شينجياڭ 2024 - جىلعى ادەتتەگى جوعارى مەكتەپتەرگە وقۋشى قابىلداۋ قىزمەتى بەلگىلەمەسىن جاريالادى

بىرنەشە كۇننىڭ الدىندا «شينجياڭ ۇيعۇر اۆتونوميالى رايونىنىڭ 2024-جىلعى ادەتتەگى جوعارى مەكتەپتەرگە وقۋشى قابىلداۋ قىزمەت بەلگىلەمەسى» اۆتونوميالى رايوندىق وقۋشى قابىلداۋ كوميتەتىنىڭ قاراپ ماقۇلداۋىنان ٴوتىپ، شينجياڭ وقۋ - اعارتۋ ەمتيحان مەكەمەسىنىڭ ۇكىمەت تورابىندا (wjzk.gov.cn) رەسمي جاريالاندى. وقۋشى قابىلداۋ بەلگىلەمەسىندە جوعارى مەكتەپ ەمتيحانىنا تىزىمدەلۋ، ەمتيحان بەرۋشىلەردىڭ ەلەكتروندىق ارحيۆى، يدەيالىق - ساياسي ٴمورالىن باعالاۋ، دەنساۋلىق اقاۋسىزدىعىن تەكسەرۋ، ەمتيحان جانە ەمتيحان قاعازىن باعالاۋ، وقۋشى قابىلداۋ ۋستابى، ولكە ( اۆتونوميالى رايون، توتە قاراستى قالا ) بويىنشا كاسىپ  بويىنشا وقۋشى قابىلداۋ جوسپارى، قابىلداۋ قارارىن ورنالاستىرۋ جانە تالاپ كەستەسىن تولتىرۋ، قابىلداۋ، ينفورماتسيانى اشىق جاريالاۋ، وقۋشى قابىلداۋدى باسقارۋ مىندەتى، وقۋشى قابىلداۋ قاراجاتى، بەلگىلەمەگە قايشى ارەكەتتەردى ٴبىرجاقتىلى ەتۋ جانە قوسىمشا ەرەجە سياقتى جاقتارىنا ايقىن بەلگىلەمە جاسالدى. شينجياڭ ۇيعۇر اۆتونوميالى رايوندىق وقۋ - اعارتۋ ەمتيحان مەكەمەسى ەشقاشان ٴارقانداي جەكەگە نەمەسە دانەكەر قۇرىلىمدارعا وقۋشى قابىلداۋ ۇگىتىن ورىستەتۋدى تاپسىرمايدى، ەمتيحان بەرۋشىلەر مەن اتا - انالارعا ساقتىقتى كۇشەيتىپ، ٴارقانداي زاڭسىز دانەكەر قۇرىلىمدار مەن جەكەلەرگە جەڭىل - جەلپى سەنبەۋدى، جەكەلىك ينفورماتسيانىڭ وڭاي شاشىلىپ كەتۋىنەن جانە جالعان ۇگىت پەن وقۋشى قابىلداۋ الدامشىلىعىنان قاتاڭ ساقتانۋدى ەسكەرتەدى.