شي جينپيڭ وڭتۇستىك افريكانىڭ زۇڭتۇڭىمەن كەڭەس وتكىزدى

ءوز حابارىمىز. 9-ايدىڭ 2-كۇنى تۇستەن كەيىن، مەملەكەت ءتوراعاسى شي جينپيڭ بەيجيڭدە حالىق سارايىندا جۇڭگو-افريكا سەلبەستىك تالقىسىنىڭ بەيجيڭ باسشىلار ماجىلىسىنە قاتىناسۋ ءارى مەملەكەتتىك ساپاردا بولۋ ءۇشىن ەلىمىزگە كەلگەن وڭتۇستىك افريكانىڭ زۇڭتۇڭى راماپوسامەن كەڭەس وتكىزدى. ەكى ەل باسشىلارى جۇڭگو مەن وڭتۇستىك افريكانىڭ قاتىناسىن جاڭا داۋىردەگى جالپى بەتتىك ستراتەگيالىق سەلبەستىك سەرىكتەستىك قاتىناس دەڭگەيىنە كوتەرەتىندىگىن جاريالادى.

شي جينپيڭ مىنالاردى اتاپ كورسەتتى: جۇڭگو مەن وڭتۇستىك افريكانىڭ دوستىعى ۇلت ازاتتىعىنا قول جەتكىزۋدە ءبىر-بىرىنە ادال بولۋدان، مەملەكەتتىڭ دامۋ قۇرىلىسىن ىلگەرىلەتۋدە ءبىر-بىرىنە سۇيەنىش بولۋدان، حالىقارالىق تەڭدىك پەن ادىلدىككە تالپىنۋداعى ىنتىماق پەن سەلبەستىكتەن باستاۋ الادى. بيىل جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعى، سونداي-اق جاڭا وڭتۇستىك افريكا قۇرىلعاندىعىنىڭ 30 جىلدىعى. حالىقارالىق جاعداي اۋمالى-توكپەلى بولعانىمەن، جۇڭگو مەن وڭتۇستىك افريكانىڭ وسىزاماندانۋعا تالپىنۋ بورىشى وزگەرگەن جوق، جۇڭگو-افريكا سەلبەستىگىن ىلگەرىلەتۋ مۇراتى وزگەرگەن جوق، الەمدىك جونگە سالۋدى كەمەلدەندىرۋ تىلەگى وزگەرگەن جوق. جۇڭگو مەن وڭتۇستىك افريكانىڭ ىنتىماقتى، سەلبەستىكتى كۇشەيتۋى ەكى ەل حالقىنىڭ ورتاق ۇمىتىنە ۇيلەسەدى، دۇنيە ءجۇزى وڭتۇستىگىنىڭ دامىپ زورايۋىنىڭ تاريحي اياق الىسىنا ۇيلەسەدى، ول ماڭىزدى داۋىرلىك مانگە جانە دۇنيە جۇزىلىك ىقپالعا يە.

شي جينپيڭ مىنالاردى باسا دارىپتەدى: جۇڭگو مەن وڭتۇستىك افريكا قاتىناسىنىڭ جاڭا ورنىن كوزدە ۇستاي وتىرىپ، ەكى جاق مىناداي «3 بەتالىستى» ويداعىداي يگەرۋى كەرەك. ءبىرىنشى، بىرگە العا باساتىن ساياسي بەتالىس، جوعارى دەڭگەيدەگى ستراتەگيالىق ءوزارا سەنىمدىلىك ارقىلى ەكى ەل قاتىناسىنىڭ ارشىندى قاداممەن العا باسۋىنا جەتەكشىلىك ەتۋ. ەكىنشى، ءوزارا پايدا جەتكىزىپ، ورتاق يگىلىككە كەنەلەتىن سەلبەستىك بەتالىسى، ەكى ەل سەلبەستىگىنىڭ جوعارى دەڭگەيلى جوباسىن كەمەلدەندىرىپ، «ءبىر بەلدەۋ، ءبىر جولدى» جوعارى ساپامەن بىرگە قۇرىپ، سيفرلى ەكونوميكا، جاساندى زەردە، جاڭا ەنەرگيا سياقتى سالالارداعى سەلبەستىكتى ىلگەرىلەتۋ. ءۇشىنشى، ۇرپاقتان-ۇرپاققا جالعاسقان دوستىقتىڭ حالىق تىلەگى بەتالىسى، ادام كۇشى بايلىعىن اشۋ، اۋىس-كۇيىس جاساۋ سەلبەستىگىن كۇشەيتىپ، كاسىپتىك وقۋ-اعارتۋدان ۇلگى كورسەتەتىن مەكتەپتەر، كاسىپتىك تاربيەلەۋ ورتالىعى نىساندارىن جەدەل ىلگەرىلەتىپ، وڭتۇستىك افريكا جاستارىنا ءتىپتى دە كوپ وقۋ سيلىق اقشاسى مەن ءبىلىم اسىرۋ، تاربيەلەۋ ورايىن ازىرلەۋ.

شي جينپيڭ مىنالاردى اتاپ كورسەتتى: جۇڭگو-افريكا سەلبەستىك تالقىسى وڭتۇستىكتەگىلەر سەلبەستىگىنىڭ ۇلگىسى جانە حالىقارانىڭ افريكامەن سەلبەسۋىنە جەتەكشىلىك ەتەتىن تۋ. جۇڭگو مەن افريكا وسى رەتكى باسشىلار ماجىلىسىندە جاڭا داۋىردەگى جۇڭگو-افريكا قاتىناسىنىڭ جاڭا ورنىن تۇراقتاندىرىپ، وسىزامانداندىرۋدى قول ۇستاسا ىلگەرىلەتۋدىڭ ناقتى جولىن بىرگە اقىلداسادى. جۇڭگو كوممۋنيستىك پارتياسى 20-كەزەكتى ورتالىق كوميتەتىنىڭ ءۇشىنشى جالپى ماجىلىسىندە جوعارى دەڭگەيدەگى سىرتقا ەسىك اشۋ ءتۇزىلىس-مەحانيزمىن كەمەلدەندىرۋ جونىندە ورنالاستىرۋ جاسالدى، جۇڭگو افريكا ەلدەرىنە ەسىكتى بارعان سايىن ايقارا اشادى. جۇڭگو وڭتۇستىك افريكا سياقتى افريكا ەلدەرىمەن سەلبەستىكتىڭ جاڭا قوزعاۋشى كۇشىن ۇزدىكسىز قالىپتاستىرۋدى، جۇڭگو-افريكا سەلبەستىگىنىڭ جوعارى ساپالى دامۋىن جەبەۋدى، جۇڭگو-افريكا سەلبەستىگىنىڭ جۇردەك پويەزىن، ءسوز جوق، بارعان سايىن تەزدەتىپ، بارعان سايىن جاقسارتۋدى قالايدى.

شي جينپيڭ مىنالاردى باسا دارىپتەدى: قازىر دۇنيە جۇزىندە 100 جىلدىق وزگەرىس جەدەل دامىپ، ادامزات قوعامى بۇرىن-سوڭدى بولماعان سىن-سايىستارعا ءدوپ كەلۋدە. حالىقارالىق جاعداي نەعۇرلىم كۇردەلى بولعان سايىن، دۇنيە ءجۇزىنىڭ وڭتۇستىگىندەگى ەلدەر دەربەس، ءوز-وزىنە قوجايىن بولۋعا، ىنتىماقتاسا سەلبەسۋگە سولعۇرلىم تاباندى بولىپ، حالىقارالىق تەڭدىك پەن ادىلدىكتى بىرگە قورعاۋى كەرەك. جۇڭگو وڭتۇستىك افريكامەن حالىقارالىق كوپ جاقتى سەلبەستىكتى كۇشەيتۋدى قالايدى، وڭتۇستىك افريكانىڭ كەلەر جىلى 20 ەل توبىنىڭ كەزەكتى ءتوراعا ەلى بولۋ قىزمەتىن بار كۇشپەن قولدايدى.

راماپوسا بىلاي دەدى: بىلتىر ءتوراعا شي جينپيڭ وڭتۇستىك افريكادا 4-رەت تابىستى مەملەكەت ىستەرى ساپارىندا بولدى، ءبىز وڭتۇستىك افريكا مەن جۇڭگونىڭ ديپلوماتيالىق قاتىناس ورناتقاندىعىنىڭ 25 جىلدىعىن بىرگە قۇتتىقتاپ، وڭتۇستىك افريكا-جۇڭگو قاتىناسىنىڭ «التىن داۋىرگە» ءوتۋىن ىلگەرىلەتتىك. وڭتۇستىك افريكا مەن جۇڭگو وسكەلەڭ ساياسي سەنىمدىلىككە جانە تەرەڭ ءداستۇرلى دوستىققا يە، كوپتەگەن ماسەلەلەردە تۇرعىسى ۇقساستاۋ، نىساناسى بىردەي. ەكونوميكا-ساۋدا سەلبەستىگى تەڭ تۇرعىدا قۇرمەت ەتۋدى، ءوزارا پايدا جەتكىزىپ، ورتاق يگىلىككە كەنەلۋدى نەگىز ەتىپ، بايلانىس كۇن سايىن قويۋلاي ءتۇستى. جۇڭگونىڭ ۇزاق ۋاقىتتان بەرى وڭتۇستىك افريكانىڭ ەكونوميكالىق، قوعامدىق دامۋىنا قىمباتتى قولداۋ كورسەتكەندىگىنە العىس ايتامىن، جۇڭگو كوممۋنيستىك پارتياسى 20-كەزەكتى ورتالىق كوميتەتى ءۇشىنشى جالپى ءماجىلىسىنىڭ ءساتتى اشىلعاندىعىن قۇتتىقتايمىن، جۇڭگونىڭ رەفورمانى ونان ارى جالپى بەتتىك تەرەڭدەتۋىنىڭ، جۇڭگو ۇلگىسىندەگى وسىزامانداندىرۋدى ىلگەرىلەتۋىنىڭ وڭتۇستىك افريكا مەن دۇنيە ءجۇزىنىڭ وڭتۇستىگىندەگى باسقادا ەلدەرگە اناعۇرلىم كوپ وراي ازىرلەيتىندىگىنە سەنەمىن. وڭتۇستىك افريكا ۇزدىكسىز جۇڭگونىڭ سەنىمدى دوسى بولىپ، جۇڭگومەن جاڭا داۋىردەگى جالپى بەتتىك ستراتەگيالىق سەلبەستىك سەرىكتەستىك قاتىناس ورناتۋدى وراي ەتىپ، ەكونوميكا-ساۋدا، قارجى قوسۋ، نەگىزدىك قۇرىلعى، جاڭا ەنەرگيا، كەدەيلىكتەن ارىلتۋ سياقتى سالالارداعى ناقتى سەلبەستىكتى كەڭەيتىپ، تەرەڭدەتىپ، گۋمانيتارلىق بارىس-كەلىس پەن وقۋ-اعارتۋ، مادەنيەت سەلبەستىگىن جيىلەتىپ، ەكى ەل قاتىناسىنىڭ اناعۇرلىم كوپ تابىستارعا قول جەتكىزۋىن ىلگەرىلەتىپ، وڭتۇستىك افريكانىڭ وسىزاماندانۋىن جۇزەگە اسىرۋىنا دەم بەرۋدى قالايدى. وڭتۇستىك افريكا ءبىر جۇڭگو ساياساتىن ۇزدىكسىز تاباندىلىقپەن اتقارادى. جۇڭگو-افريكا سەلبەستىك تالقىسى جۇلگەسىندەگى سەلبەستىك وڭتۇستىك افريكانى قامتىعان افريكا ەلدەرىن كوپ يگىلىككە كەنەلتتى. وڭتۇستىك افريكا جۇڭگونىڭ وسى رەتكى جۇڭگو-افريكا سەلبەستىك تالقىسىنىڭ بەيجيڭ باسشىلار ءماجىلىسىن ءساتتى وتكىزۋىن قولدايدى، افريكا مەن جۇڭگونىڭ ىنتىماعىن كۇشەيتىپ، ءوزارا باتىل قولداۋ كورسەتىپ، افريكا قۇرلىعى مەن دۇنيە ءجۇزىنىڭ وڭتۇستىگىندەگى ەلدەردىڭ بىرگە دامۋىن جەبەيدى. وڭتۇستىك افريكا جۇڭگو مەن برازيليانىڭ ۋكراينا ماسەلەسىن ساياسي جولمەن شەشۋ جونىندە العا قويعان «6 ءتۇرلى ورتاق تانىمىن» قولدايدى، جۇڭگونىڭ بىلتىر وڭتۇستىك افريكانىڭ بريكس ەلدەرى باسشىلارىنىڭ كەزدەسۋىن وتكىزۋىن قولداعاندىعىنا العىس ايتادى، وڭتۇستىك افريكا جۇڭگومەن بريكس ەلدەرى جانە 20 ەل توبى سياقتى كوپ جاقتى جۇلگەدە ءجيى پىكىرلەسۋدى، سەلبەسۋدى قالايدى.

كەڭەستەن كەيىن، ەكى ەل باسشىلارى بەيدوۋ جاساندى سەرىك باعدار سىلتەۋ جۇيەسىن قولدانۋ، تۇرعىن ءۇي قۇرىلىسى، ەكى جاقتى ساۋدا، اۋىل شارۋاشىلىق ونىمدەرىنىڭ بازارعا كىرۋىنە رۇقسات ەتۋ، مادەنيەت مۇرالارى سياقتى كوپتەگەن ەكى جاقتى سەلبەستىك قۇجاتتارعا قول قويۋعا بىرگە كۋا بولدى.

ەكى جاق «جۇڭحۋا حالىق رەسپۋبليكاسى مەن وڭتۇستىك افريكا رەسپۋبليكاسىنىڭ جاڭا داۋىردە جالپى بەتتىك ستراتەگيالىق سەلبەستىك سەرىكتەستىك قاتىناس ورناتۋ جونىندەگى بىرلەسكەن مالىمدەمەسىن» جاريالادى.

كەڭەستەن بۇرىن، شي جينپيڭ حالىق سارايىنىڭ سولتۇستىك زالىندا راماپوسانى قارسى الىپ سالت وتكىزدى.

ۋاڭ ي جوعارىداعى قيمىلدارعا قاتىناستى.