شي جينپيڭ زيمبابۆەنىڭ زۇڭتۇڭىمەن كەڭەس وتكىزدى

ءوز حابارىمىز. مەملەكەت ءتوراعاسى شي جينپيڭ 9-ايدىڭ 3-كۇنى تۇستەن كەيىن بەيجيڭدە حالىق سارايىندا جۇڭگو-افريكا سەلبەستىك تالقىسىنىڭ بەيجيڭ باسشىلار ماجىلىسىنە قاتىناسۋ ءارى مەملەكەت ىستەرى ساپارىندا بولۋ ءۇشىن جۇڭگوعا كەلگەن زيمبابۆەنىڭ زۇڭتۇڭى مۋنانگاگۋامەن كەڭەس وتكىزدى.

 

شي جينپيڭ مىنالاردى انىق ايتتى: جۇڭگو مەن زيمبابۆەنىڭ ءداستۇرلى دوستىعى تەرەڭ. تاياۋ جىلداردان بەرى ءبىزدىڭ بىرلىكتە جەتەكشىلىك ەتۋىمىزدە ەكى ەلدىڭ ساياسي سەنىمدىلىگى ۇزدىكسىز تەرەڭدەپ، سەلبەستىك ناتيجەسى كورنەكتى بولىپ، دامۋ جولىنداعى ەلدەردىڭ ىنتىماقتاسا سەلبەسۋ ۇلگىسىنە اينالدى. كەلەر جىلى ەكى ەل ديپلوماتيالىق قاتىناس ورناتقاندىعىنىڭ 45 جىلدىعىن قارسى الادى. جۇڭگو مەن زيمبابۆەنىڭ اينىماس دوستىقتى ونان ارى بەكەمدەۋى جانە تەرەڭدەتۋى ەكى ەل حالقىنىڭ ورتاق تىلەگىنە ۇيلەسەدى.

 

شي جينپيڭ بىلاي دەپ انىق ايتتى: ەكى جاق دوستىق اۋەلگى ماقساتىنان كوز جازباي، ساياسي، ەكونوميكا-ساۋدا، حاۋىپسىزدىك، گۋمانيتارلىق، حالىقارالىق سەلبەستىكتى تىرەك ەتكەن «بەس جۇلدىزدى» سەلبەستىك جۇلگەسىن ورناتىپ، جوعارى دەڭگەيدەگى جۇڭگو-زيمبابۆە تاعدىرلاس ورتاق تۇلعاسىن قول ۇستاسا قۇرۋ كەرەك.

 

شي جينپيڭ بىلاي دەپ باسا دارىپتەدى: جۇڭگو-زيمبابۆە پارتيالارىنىڭ تانىمى ۇقسايدى، ءوزارا سەنىمى بەرىك، بۇل جۇڭگو-زيمبابۆە قاتىناسىنىڭ ەڭ ۇلكەن باسىمدىعى. جۇڭگو زيمبابۆەنىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋىن قولدايدى، سىرتتىڭ كيلىگۋىنە جانە زاڭسىز جازالاۋعا قارسى تۇرادى، زيمبابۆە جاقپەن ەل باسقارۋ تاجىريبەلەرىن اۋىستىرۋدى كۇشەيتىپ، ءوزارا ۇزدىكسىز تاباندىلىقپەن قولداۋدى قالايدى. جۇڭگو زيمبابۆەمەن دامۋ ستراتەگياسىن ىشكەرىلەي ۇشتاستىرىپ، قارجى قوسۋ، ساۋدا، نەگىزدىك قۇرىلعى، ەنەرگيا، كەن ونىمدەرى، تازا ەنەرگيا، سيفرلى ەكونوميكا سياقتى سالالارداعى ءوزارا ءتيىمدى سەلبەستىكتى كەڭەيتۋدى؛ جۇڭگو مەن افريكانىڭ ءوزارا بايلانىس تورىن قالىپتاستىرىپ، زيمبابۆە مەن افريكانىڭ دەربەس دامۋ قابىلەتىن جوعارىلاتۋىنا دەم بەرۋدى قالايدى. جۇڭگو زيمبابۆەنىڭ ۇزدىك وقۋشىلارىنىڭ جۇڭگوعا كەلىپ وقۋىنا ۇزدىكسىز وقۋ سيلىق اقشاسىن بەرىپ، حالىق تىلەگىنىڭ توعىسۋىن جەبەۋدى قالايدى. جۇڭگو زيمبابۆەنىڭ جۇڭگو جاق العا قويعان ءتۇرلى الەمدىك دارىپتەمەلەر مەن قۋاتتامالاردى قولداعاندىعىن ايرىقشا القايدى، زيمبابۆەنىڭ وڭتۇستىك افريكا دامۋ ورتاق تۇلعاسىنا كەزەكتى ءتوراعا ەل بولعاندىعىن قۇتتىقتايدى، زيمبابۆە جاقپەن حالىقارالىق سەلبەستىكتى كۇشەيتىپ، بەيبىت قاتار تۇرۋ بەس پرينسيبىن ساۋلەلەندىرىپ، حالىقارالىق تەڭدىكتى، ادىلدىكتى قول ۇستاسا قورعاۋدى قالايدى.

 

شي جينپيڭ بىلاي دەپ انىق ايتتى: جۇڭگو افريكا ەلدەرىمەن قاتىناستى دامىتۋدى باستان-اياق سىرتقى ساياساتتىڭ ىرگە تاسى ەتەدى، افريكا ەلدەرىنىڭ دەربەس، ءوز-وزىنە قوجايىن بولۋ سىندى دامۋ جولىمەن ءجۇرۋىن باتىل قولدايدى، افريكانىڭ دۇنيە ءجۇزىنىڭ ساياسي، ەكونوميكا، وركەنيەت دامۋىنىڭ ماڭىزدى ۇيەگىنە اينالۋىن قولدايدى. جۇڭگو-افريكا سەلبەستىك تالقىسى جۇڭگو مەن افريكانىڭ ىنتىماعىن، سەلبەستىگىن كۇشەيتۋدەگى ەڭ ماڭىزدى تەكشە جانە مەحانيزم، ول حالىقارانىڭ افريكامەن سەلبەستىگىنە جەتەكشىلىك ەتەتىن تۋعا اينالدى. جۇڭگو افريكامەن بىرگە وسى رەتكى تالقىنىڭ باسشىلار ءماجىلىسىن جۇڭگو-افريكا قاتىناسى تاريحىنداعى جاڭا بەلەستىك سالتاناتتى جينالىس ەتىپ وتكىزىپ، جۇڭگو مەن افريكانىڭ وسىزامانداندىرۋدى قول ۇستاسا ىلگەرىلەتۋدەگى قۇلشىنۋ بەتالىسى مەن جۇزەگە اسىرۋ جولىن ايقىنداۋدى قالايدى.

 

مۋنانگاگۋا بىلاي دەدى: وسى رەتكى جۇڭگودا ساپاردا بولعان كەزىمدە، مەن حۋنان، شىنجىن جانە نانجيڭدە ساپاردا بولىپ، تەرەڭ اسەر جانە شابىت الدىم.ءتوراعا شي جينپيڭنىڭ باسشىلىعىندا، جۇڭگو ۇلى دامۋ جەتىستىكتەرىنە قول جەتكىزدى، كوپتەگەن جۇڭگو تەحنيكاسى مەن كاسىپورىندارى دۇنيە جۇزىندە الدىڭعى دەڭگەيدە تۇرادى. جۇڭگو كوممۋنيستىك پارتياسى 20-كەزەكتى ورتالىق كوميتەتىنىڭ ءۇشىنشى جالپى ماجىلىسىندە العا قويىلعان جەلىلەس ماڭىزدى رەفورما شارالارى جۇڭگو حالقىنىڭ باقىتىن ونان ارى ارتتىرىپ قانا قويماي، جەر شارىنىڭ وڭتۇستىگىنە ءتىپتى ادامزاتتىڭ بولاشاعىنا كەلەلى ىقپال جاسايدى. جۇڭگو جاقتىڭ زيمبابۆەنىڭ ەكونوميكالىق-قوعامدىق دامۋىنا، جۇيەدەن جاڭا تيپتى ايدارشا ۆيرۋس وكپە قابىنۋ ىندەتىنە قارسى تۇرۋىنا قىمباتتى قولداۋ كورسەتكەندىگىنە العىس ايتامىن، جۇڭگو جاقتىڭ كومەگى مەن سەلبەستىگى زيمبابۆە حالقىنا باقىت جاراتىپ، جاڭا داۋىردەگى زيمبابۆە-جۇڭگو دوستىعىنىڭ جاڭا تانىسقىسىن قالىپتاستىردى. زيمبابۆە جاق جۇڭگو جاقپەن ەل باسقارۋ، پارتيا ىستەرىن باسقارۋ تاجىريبەلەرىن اۋىستىرۋدى كۇشەيتىپ، نەگىزدىك قۇرىلعى، اۋىل شارۋاشىلىعى، كەن ونىمدەرى، جاڭا ەنەرگيا سياقتى سالالارداعى سەلبەستىكتى تەرەڭدەتىپ، وسى ارقىلى زيمبابۆەنىڭ وسىزاماندانۋ اياق الىسىنا دەم بەرۋدى قالايدى. زيمبابۆە جاق جۇڭگو جاقتىڭ حالىقارالىق ورىنداردا زيمبابۆە جاق ءۇشىن ادىلدىكتى جاقتاعاندىعىن، جۇڭگونىڭ ۋكراينا داعدارىسى جانە پالەستين-يزرايل قاقتىعىسى سياقتى حالىقارالىق-وڭىرلىك ىستەردە سىندارلى رول اتقارعاندىعىن القايدى، ءتوراعا شي جينپيڭ العا قويعان جەلىلەس الەمدىك دارىپتەمەلەردى قولدايدى، جۇڭگو جاقپەن كوپ جاقتى سەلبەستىكتى كۇشەيتۋدى قالايدى. زيمبابۆە ءبىر جۇڭگو پرينسيبىنە تاباندى بولادى، جۇڭگونىڭ وڭتۇستىك افريكاداعى مىزعىماس جاقىن دوسى بولۋدى، جۇڭگو جاقپەن بىرگە زيمبابۆە مەن جۇڭگونىڭ جالپى بەتتىك ستراتەگيالىق سەلبەستىك سەرىكتەستىك قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى قالايدى. وسى رەتكى جۇڭگو-افريكا سەلبەستىك تالقىسىنىڭ بەيجيڭ باسشىلار ءماجىلىسىنىڭ تابىستى بولۋىن، افريكا-جۇڭگو سەلبەستىگىن جەبەۋدىڭ ستراتەگيالىق جەتىستىگىنە اينالۋىن تىلەيمىن.

 

كەڭەستەن كەيىن، ەكى ەل باسشىلارى «ءبىر بەلدەۋ، ءبىر جولدى» ورتاق قۇرۋ، الەمدىك دامۋ دارىپتەمەسى، ەكونوميكا-ساۋدا اۋىس-كۇيىسى، سەلبەستىگى، المۇرت ونىمدەرىن جۇڭگوعا ەكسپورت ەتۋ، اقپارات سياقتى سالالارداعى كوپتەگەن ەكى جاقتى سەلبەستىك قۇجاتتارعا قول قويۋعا بىرگە كۋا بولدى.

 

ەكى جاق «جۇڭحۋا حالىق رەسپۋبليكاسى مەن زيمبابۆە رەسپۋبليكاسىنىڭ جالپى بەتتىك ستراتەگيالىق سەلبەستىك سەرىكتەستىك قاتىناسىن تەرەڭدەتۋ جانە دارەجەسىن جوعارىلاتۋ، جوعارى دەڭگەيدەگى جۇڭگو-زيمبابۆە تاعدىرلاس ورتاق تۇلعاسىن قۇرۋ جونىندەگى بىرلەسكەن مالىمدەمەسىن» جاريالادى.

 

كەڭەستەن بۇرىن، شي جينپيڭ حالىق سارايىنىڭ سولتۇستىك زالىندا مۋنانگاگۋانى قارسى الۋ سالتىن وتكىزدى.

 

ۋاڭ ي جوعارىداعى قيمىلدارعا قاتىناستى.