شي جينپيڭ ايدى بارلاۋ ينجەنەرياسى چاڭ ى 6-ءنومىرلى مىندەتىن زەرتتەۋگە، سىناق ەتۋگە قاتىناسقان قىزمەتكەرلەردىڭ ۋاكىلدەرىن قابىلداعاندا ماڭىزدى ءسوز سويلەپ، تىنباي كۇش قوسىپ، ەكپىن قۋا العا ۇمتىلىپ، عارىش ىستەرىندە ەگەي ەل قۇرۋدى جەدەلدەتۋ كەرەك،-دەپ باسا دارىپتەدى ءارى اي شارى ۇلگىسى مەن اي شارىن بارلاۋ ينجەنەرياسىنىڭ جەتىستىكتەرى كورمەسىن ەكسكۋرسيالادى؛ لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي قيمىلعا قاتىناستى

ءوز حابارىمىز. ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 9-ايدىڭ 23-كۇنى تۇستەن بۇرىن حالىق سارايىندا ايدى بارلاۋ ينجەنەرياسى چاڭ ى 6-ءنومىرلى مىندەتىن ورىنداۋدا زەرتتەۋ-سىناق ەتۋگە قاتىناسقان قىزمەتكەرلەردىڭ ۋاكىلدەرىن قابىلداپ، ماڭىزدى ءسوز سويلەدى.ول بىلاي دەپ باسا دارىپتەدى: ايدى بارلاۋ ينجەنەرياسىنىڭ جەتىستىكتەرىنە ەلىمىزدەگى نەشە ۇرپاق عارىش قىزمەتكەرلەرىنىڭ اقىل-پاراساتى مەن جۇرەك قانى سىڭگەن، ول ءبىزدىڭ سوڭعى جىلدارى عىلىم-تەحنيكادا ءوز كۇشىنە سۇيەنە الۋەتتەنۋ جاعىندا قول جەتكىزگەن كورنەكتى تابىستارىمىزدى ءبىر قىرىنان ايگىلەپ، جۇڭگولىقتاردىڭ جىگەرىن، قايسارلىعىن جانە مىعىمدىعىن تولىق كورسەتتى. تۇتاس قوعامدا ارمانعا قۇلاش سەرمەۋ، باتىلدىقپەن ىزدەنىس جاساۋ، سەلبەسىپ قامال الۋ، سەلبەسە ورتاق يگىلىكتەنۋ سىندى ايدى بارلاۋ رۋحىن بارىنشا ساۋلەلەندىرىپ، بارلىق جۇڭحۋا ۇلاندارىنىڭ ۇلتتىق سەنىمى مەن ماقتانىش سەزىمىن ونان ارى كۇشەيتىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتىڭ كوركەيۋى ۇلى ءىسىن جالپى بەتتىك ىلگەرىلەتۋگە قۇدىرەتتى كۇش ۇيىستىرۋ كەرەك.

 

ج ك پ ورتالىق كوميتەتى ساياسي بيۋروسىنىڭ تۇراقتى مۇشەلەرى لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي قيمىلعا قاتىناستى.

 

تۇستەن بۇرىن ساعات 10 مولشەرىندە شي جينپيڭ قاتارلى پارتيا مەن مەملەكەت باسشىلارى حالىق سارايىنىڭ سولتۇستىك زالىنا كەلدى، تۇتاس زالدى ۇزاققا دەيىن شاتىرلاعان شاپالاق ءۇنى كەرنەدى. شي جينپيڭ قاتارلىلار كوپشىلىكپەن ىقىلاسپەن قول الىستى ءارى ەستەلىك سۋرەتكە ءتۇستى.

 

شاتىرلاعان شاپالاق ءۇنى ىشىندە شي جينپيڭ ماڭىزدى ءسوز سويلەدى. ول بىلاي دەدى: بيىل 6-ايدىڭ 25-كۇنى چاڭ ى 6 ءنومىرلى عارىش مىندەتى ورىندالىپ بولعاننان كەيىن، عارىشكەرلەر ءساتتى قايتىپ كەلدى، مەن قۇتتىقتاۋ تەلەگرامما جولدادىم. بۇگىن مەن ورتالىقتاعى باسقا دا باسشى جولداستارمەن بىرگە كوپشىلىككە امانداسا كەلىپ، پارتيا ورتالىق كوميتەتى اتىنان كوپشىلىكتى تاعى دا قۋانىشتى قۇتتىقتايمىن جانە ىقىلاستى سالەم جولدايمىن!

 

شي جينپيڭ مىنالاردى انىق ايتتى: چاڭ ى 6-ءنومىرلى عارىش اسپابى ادامزات تاريحىندا تۇڭعىش رەت ايدىڭ ارعى بەتىنەن ۇلگى الىپ قايتىپ، كوپ ءتۇرلى شەشۋشى تەحنيكادا قامال الدى، ول ەلىمىزدىڭ عارىش ىستەرىندە ەگەي ەل، عىلىم-تەحنيكادا ەگەي ەل قۇرۋىندا قول جەتكەن تاعى ءبىر بەلگى سيپاتتى جەتىستىك، ەلىمىزدىڭ ايدى بارلاۋ ينجەنەرياسىنداعى ماڭىزدى بەلەسى بولدى. 20 جىلدان بەرى ايدى بارلاۋ ينجەنەرياسىندا شەشۋشى، وزەكتى تەحنيكا سالاسىندا ۇزدىكسىز قامال الۋعا نازار اۋدارىلىپ، عىلمي بارلاۋ، تەحنيكالىق جاڭالىق جاراتۋ، ينجەنەريالىق اماليات، جەتىستىكتەردى كادەگە جاراتۋ، حالىقارالىق سەلبەستىك سياقتى جاقتاردا سۇبەلى تابىستارعا قول جەتىپ، ايدى جوعارى ساپالى، جوعارى ءونىمدى بارلاۋ جولىمەن ءجۇرىپ، ەلىمىزدىڭ عارىش ىستەرىنىڭ دامۋىنا، ادامزاتتىڭ الەم كەڭىستىگىنە ىزدەنىس جاساۋىنا زور ۇلەس بولىپ قوسىلدى.

 

شي جينپيڭ بىلاي دەپ باسا دارىپتەدى: ۇشى-قيىرسىز الەمگە ىزدەنىس جاساپ، عارىش ىستەرىندە ەگەي ەل قۇرۋ  — ءبىزدىڭ قاجىماي-تالماي تالپىناتىن عارىش ارمانىمىز. جاڭا جۇڭگو قۇرىلعان 75 جىلدان بەرى، جۇڭگو كوممۋنيستىك پارتياسىنىڭ باسشىلىعىندا، ەلىمىزدىڭ نەشە ۇرپاق عارىش قىزمەتكەرلەرى ءوز كۇشىنە سۇيەنىپ ءومىر سۇرۋگە، دەربەس جاڭالىق جاراتۋعا تاباندى بولىپ، عارىش ىستەرىنىڭ جوقتان بار بولۋىن، السىزدەن كۇشەيۋىن ىلگەرىلەتىپ، جوبا ارقىلى ارماندى كارتينالاۋدان كۇرەس جۇرگىزۋ ارمانىن ورىنداۋعا دەيىنگى تاريحي سيپاتتى، جوعارى ساپالى، سەكىرمەلى دامۋ جۇزەگە اسىپ، عارىش ىستەرىندە ەگەي ەل قۇرۋدا نىق قادام تاستالدى.

 

شي جينپيڭ بىلاي دەپ انىق ايتتى: سىرتقى كەڭىستىك — ادامزاتتىڭ ورتاق تەرريتورياسى، كەڭىستىك جونىندەگى ىزدەنىس — ادامزاتتىڭ ورتاق ءىسى. ايدى بارلاۋ ينجەنەرياسىندا باستان-اياق تەڭدىك، ءوزارا تيىمدىلىك جاساۋ، بەيبىت پايدالانۋ، سەلبەسە ورتاق يگىلىكتەنۋ پرينسيبى ۇستانىلىپ كەلەدى، چاڭ-ى ءارى جۇڭگوعا، ءارى بۇكىل ادامزاتقا ءتان بولىپ، حالىقارالىق عىلىم-تەحنيكا سەلبەستىگىنە كەڭ ساحنا ازىرلەپ، بۇكىل جەر شارىنىڭ شالعاي كەڭىستىك ىزدەنىسىنە جۇڭگو اقىل-پاراساتى مەن جۇڭگو كۇشىن ارنادى. ءبىز ۇزدىكسىز دارقان پەيىلدە بولىپ، كوپ ءتۇرلى فورماداعى عارىش جاعىنداعى حالىقارالىق اۋىس-كۇيىس سەلبەستىگىن ىشكەرىلەي ىلگەرىلەتىپ، ءار ەلمەن دامۋ جەتىستىكتەرىنەن ورتاق يگىلىكتەنىپ، سىرتقى كەڭىستىك ىزدەنىس ىستەرىن عىلمي باسقارۋدى كەمەلدەندىرىپ، عارىش عىلىم-تەحنيكا جەتىستىكتەرى ارقىلى بۇكىل ادامزاتقا باقىت جاراتۋىمىز كەرەك.

 

شي جينپيڭ بىلاي دەپ باسا دارىپتەدى: عارىشتى بارلاۋ ماڭگى تولاستامايدى. عارىش شەبىندەگى جولداستاردىڭ تىنباي كۇش قوسىپ، ەكپىن قۋالاي العا ۇمتىلىپ، اي شارى ۇلگىسى جونىندەگى عىلمي زەرتتەۋدى دەن قويا ورىستەتىپ، شالعاي كەڭىستىكتى بارلاۋ سياقتى عارىشتىق كەلەلى ينجەنەريالاردى ۇزدىكسىز ويداعىداي اتقارىپ، كەڭىستىك عىلىمىنان، كەڭىستىك تەحنيكاسىنان، كەڭىستىكتەن پايدالانۋدىڭ جالپى بەتتىك دامۋىن ىلگەرىلەتىپ، عارىش ىستەرىندە ەگەي ەل قۇرۋعا تاعى دا تىڭ ۇلەس قوسۋىن ءۇمىت ەتەمىن.

 

وسىدان كەيىن شي جينپيڭ قاتارلىلار حالىق سارايىنىڭ شىعىس زالىنا كەلىپ، اي شارى ۇلگىسى مەن ايدى بارلاۋ ينجەنەرياسىنىڭ 20 جىلدىق تابىس كورمەسىن ەكسكۋرسيالادى.

 

لي گانجيە، لي شۋلي، جاڭ يوۋشيا، جاڭ گوچيڭ، ۋ جىڭلۇڭ جوعارىداعى قيمىلدارعا قاتىناستى.

 

ايدى بارلاۋ ينجەنەرياسىن اتقارۋ — پارتيا ورتالىق كوميتەتىنىڭ ەلىمىزدىڭ ەكونوميكاسىنىڭ، عىلىم-تەحنيكاسىنىڭ دامۋ اۋقىمىن يگەرىپ جاساعان كەلەلى ستراتەگيالىق شەشىمى. ەلىمىزدىڭ عارىشكەرلىك تاريحىندا قازىرگە دەيىن تەحنيكا ورەسى ەڭ جوعارى بولعان اي شارىن بارلاۋ مىندەتى بولعان چاڭ-ى 6-ءنومىر ادامزات تاريحىندا العاشقى رەت ايدىڭ ارعى بەتىندە ۇلگى الىپ قايتۋدى ىسكە اسىرىپ، بولاشاقتا ەلىمىزدىڭ اي شارى جانە پلانەتالاردى بارلاۋ قىزمەتىن قانات جايدىرۋىنا مىعىم نەگىز قالادى.