شي جينپيڭ باسشىلار كەڭەسىنە قاتىناستى ءارى ماڭىزدى ءسوز سويلەدى

ءوز حابارىمىز. مەملەكەت ءتوراعاسى شي جينپيڭ جەرگىلىكتى ۋاقىت 10-ايدىڭ 24-كۇنى تۇستەن بۇرىن قازان قالاسىنداعى ءماجىلىس-كورمە ورتالىعىندا «بريكس+» باسشىلار كەڭەسىنە قاتىناستى ءارى «<دۇنيە ءجۇزى وڭتۇستىگىنىڭ> جويقىن كۇشىن توپتاپ، ادامزاتتىڭ تاعدىرلاس ورتاق تۇلعاسىن قۇرۋدى بىرگە ىلگەرىلەتەيىك» دەگەن تاقىرىپتا ماڭىزدى ءسوز سويلەدى.

 

شي جينپيڭ مىنالاردى اتاپ كورسەتتى: دۇنيە ءجۇزى وڭتۇستىگىنىڭ توپتىق ەڭسە كوتەرۋى—دۇنيەدەگى زور وزگەرىستىڭ ايقىن بەلگىسى. دۇنيە ءجۇزىنىڭ وڭتۇستىگىندەگى ەلدەردىڭ وسىزاماندانۋعا بىرگە قادام تاستاۋى دۇنيە تاريحىنداعى ءىرى ءىس، سونداي-اق ادامزات وركەنيەتى بارىسىندا بۇرىن-سوڭدى بولماعان ۇلكەن ەرلىك. سونىمەن بىرگە، دۇنيە ءجۇزىنىڭ بەيبىتشىلىگى مەن دامۋى ءالى دە اۋىر سايىسقا ءدوپ كەلىپ وتىر، دۇنيە ءجۇزىنىڭ وڭتۇستىگىن گۇلدەندىرۋ جولى، استە، تەگىس بولمايدى. دۇنيە ءجۇزىنىڭ وڭتۇستىگىندەگى ءبىرىنشى شەپ رەتىندە، ءبىز كوللەكتيۆتىڭ اقىل-پاراساتى مەن كۇش-قۋاتىن ايگىلەپ، ادامزاتتىڭ تاعدىرلاس ورتاق تۇلعاسىن قۇرۋ جولىندا اۋىر مىندەتتى باتىلدىقپەن ارقالاۋىمىز كەرەك.

 

شي جينپيڭ مىنالاردى اتاپ كورسەتتى: بەيبىتشىلىككە تاباندى بولىپ، ورتاق حاۋىپسىزدىكتى جۇزەگە اسىرۋ. ءبىز بەيبىتشىلىكتى قورعايتىن ورنىقتى كۇش بولىپ، الەمدىك حاۋىپسىزدىكتى جونگە سالۋدى كۇشەيتىپ، تۇبىرىنەن دە، تۇلعاسىنان دا وڭاۋ ۇشتاستىرىلعان قولامتالى ماسەلەلەردى شەشۋدىڭ جولىن قاراستىرۋىمىز كەرەك. مەن الەمدىك حاۋىپسىزدىك دارىپتەمەسىن العا قويدىم، بۇعان ءار جاق بەلسەنە ءۇن قوسىپ، ءوڭىردىڭ ورنىقتىلىعىن قورعاۋ سياقتى كوپتەگەن سالالاردا ماڭىزدى تابىستارعا قول جەتكىزدى. ءبىز ۋكراينا داعدارىسى جاعدايىن تەز ارادا باسەڭدەتىپ، ساياسي جولمەن شەشۋدى جۇزەگە اسىرۋعا جول اشۋىمىز كەرەك. گازا وڭىرىندە سوعىستى جاپپاي توقتاتۋدى ۇزدىكسىز ىلگەرىلەتىپ، «ەكى ەل جوباسىن» قايتا باستاۋ ءارى سوعىس ءورتىنىڭ ليۆاندا كەڭەيۋىن تەجەۋىمىز كەرەك.

 

شي جينپيڭ مىنالاردى اتاپ كورسەتتى: دامۋدى قايتا سەرپىلتىپ، جاپپاي گۇلدەنۋدى جۇزەگە اسىرۋ. ءبىز بىرگە دامۋدىڭ تىرەكتى كۇشى بولىپ، الەمدىك ەكونوميكانى جونگە سالۋ جۇيەسى رەفورماسىنا بەلسەنە ات سالىسىپ جانە وعان جەتەكشىلىك ەتىپ، دامۋدى حالىقارالىق ەكونوميكا-ساۋدا كۇن ءتارتىبىنىڭ وزەكتى ورنىنا قويۋدى ىلگەرىلەتۋىمىز كەرەك. الەمدىك دامۋ دارىپتەمەسى العا قويىلعان 3 جىلدان بەرى، 20 ميلليارد امەريكا دوللارىنا تاياۋ دامۋ قارجىسى توپتالىپ، 1100 دەن استام نىسان ورىستەتىلدى. الەمدىك ونەركاسىپ جاساندى زەيىن وداعىنىڭ جو-يۋە ورتالىعى تاياۋدا شاڭحايعا ىرگە تەپتى، جۇڭگو تاعى الەمدىك «زەيىندى كەدەندەردىڭ» جەلىدەگى سەلبەستىك تۇعىرىن جانە بريكس ەلدەرىنىڭ كەدەنىنەن ۇلگى كورسەتۋ ورتالىعىن قۇردى، بۇعان ءار ەلدىڭ بەلسەنە قاتىناسۋىن قارسى الادى.

 

وركەنيەتتى بىرگە گۇلدەندىرىپ، كوپ نەگىزدى جاراسىمدىلىقتى جۇزەگە اسىرۋ. ءبىز وركەنيەتتەردىڭ ءوزارا ۇلگى الۋىن جەبەيتىن كۇش بولىپ، پىكىرلەسۋدى، سۇحباتتاسۋدى كۇشەيتىپ، ءارقايسى ەلدىڭ ءوز مەملەكەت جاعدايىنا ۇيلەسەتىن وسىزامانداندىرۋ جولىمەن ءجۇرۋىن قولداۋىمىز كەرەك. جۇڭگو دۇنيە ءجۇزى وڭتۇستىگىنىڭ اقىل-پاراسات قويماسى سەلبەستىك وداعىن باستاماشىلدىقپەن قۇرىپ، ءار ەلدىڭ گۋمانيتارلىق اۋىس-كۇيىسى مەن ەل باسقارۋ، ۇكىمەت ىستەرىن جونگە سالۋدا ءوزارا ۇيرەنۋىن، ءوزارا ۇلگى الۋىن جەبەيدى.

 

شي جينپيڭ مىنالاردى باسا دارىپتەدى: جۇڭگو كوممۋنيستىك پارتياسى 20-كەزەكتى ورتالىق كوميتەتىنىڭ ءۇشىنشى جالپى ءماجىلىسى رەفورمانى اناعۇرلىم جاپپاي تەرەڭدەتۋ، جۇڭگو ۇلگىسىندەگى وسىزامانداندىرۋدى ىلگەرىلەتۋ جونىندە جۇيەلى ورنالاستىرۋ جاسادى، بۇل، ءسوزسىز، دۇنيە جۇزىنە اناعۇرلىم كوپ وراي ازىرلەيدى. حالىقارالىق جاعداي قالاي وزگەرسە دە، جۇڭگو باستان-اياق دۇنيە ءجۇزىنىڭ وڭتۇستىگىن كوكەيدە ساقتاپ، دۇنيە ءجۇزىنىڭ وڭتۇستىگىنە تامىر تارتىپ، دۇنيە ءجۇزىنىڭ وڭتۇستىگىندەگى ءتىپتى دە كوپ ەلدىڭ بريكس ەلدەرى ىستەرىنە قاتىناسۋىن قولداپ، دۇنيە ءجۇزىنىڭ وڭتۇستىگىندەگى جويقىن كۇشتەردى توپتاپ، ادامزاتتىڭ تاعدىرلاس ورتاق تۇلعاسىن قۇرۋدى بىرگە ىلگەرىلەتەتىن بولادى.

 

رەسەيدىڭ زۇڭتۇڭى پۋتين ءماجىلىستى باسقاردى، ەگيپەتتىڭ زۇڭتۇڭى سەيسي، يراننىڭ زۇڭتۇڭى پەيزەشكيان، وڭتۇستىك افريكانىڭ زۇڭتۇڭى راماپوسا جانە برازيليا، ينديا، اراب بىرىككەن امىرلىگى، ساۋد ارابياسى، ەفيوپيا ەلدەرىنىڭ ۋاكىلدەرى، ۇسىنىس ەتىلگەن سيلى قوناق ەلدەردەن 25  باسشى نەمەسە ۋاكىل، سونداي-اق ب م ۇ-نىڭ باس حاتشىسى گۋتتەرەس، جاڭا كوركەيتۋ بانكەسىنىڭ باستىعى روسسەف سياقتى حالىقارالىق ۇيىمنىڭ جاۋاپتىلارىنان 6 ادام ماجىلىسكە قاتىناستى.

 

10-ايدىڭ 23-كۇنى كەشتە، شي جينپيڭ پۋتيننىڭ بريكس ەلدەر مەن سيلى قوناق ەلدەردىڭ باسشىلارىنا ارناپ وتكىزگەن قارسى الۋ قوناعاسىنا قاتىناستى. 

 

ساي چي، ۋاڭ ي قاتارلىلار جوعارىداعى قيمىلدارعا قاتىناستى.