شي جينپيڭ اۋمىنعا باردى

ءوز حابارىمىز. ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 12-ايدىڭ 18-كۇنى تۇستەن كەيىن ارناۋلى ايروپلانمەن اۋمىنعا باردى، 12-ايدىڭ 20-كۇنى وتكىزىلەتىن اۋمىن وتان قۇشاعىنا ورالعاندىعىنىڭ 25 جىلدىعىن قۇتتىقتاۋ جينالىسىنا جانە اۋمىن ەرەكشە اكىمشىلىك رايونى 6-كەزەكتى ۇكىمەتىنىڭ مىندەتكە وتىرۋ سالتىنا قاتىناسادى ءارى اۋمىندى كوزدەن كەشىرەدى.

 

ساعات 16 مولشەرىندە، شي جينپيڭ وتىرعان ارناۋلى ايروپلان اۋمىن حالىقارالىق اۋەجايىنا باياۋ قوندى.

 

شي جينپيڭ مەن حانىمى پىڭ لييۋان ايروپلاننان شىققان كەزدە، قارسى الۋشىلارعا قول بۇلعاپ قۇرمەت ءبىلدىردى. اۋمىن ساقشى قوسىنى وركەسترى قىزۋ مەرەيلى قارسى الۋ مۋزيكاسىن ورىندادى، ارىستان ءبيى بيلەنىپ، الاڭ شات-شادىمان كۇيگە ەندى. ايروپلان باسپالداعىنىڭ جانىندا 2 ءوسپىرىم شي جينپيڭ مەن پىڭ لييۋانعا گۇل ۇسىندى. اۋمىن ەرەكشە اكىمشىلىك رايونىنىڭ اكىمى حى ي-چىڭ مەن حانىمى جىڭ سۋجىننىڭ سەرىك بولۋىندا، شي جينپيڭ مەن پىڭ لييۋان قارسى الۋعا كەلگەندەرمەن ىقىلاسپەن قول الىستى. اۋمىنداعى نەشە جۇزدەگەن جاستار مەن ورەندەر جانە ءار سالاداعى بۇقارانىڭ ۋاكىلدەرى مەملەكەت تۋىن، ەرەكشە اكىمشىلىك رايون تۋىن جانە گۇل شوقتارىن بۇلعاپ، قىزۋ قارسى الاتىندىقتارىن ءبىلدىردى.

 

شي جينپيڭنىڭ بۇل جولى اۋمىنعا بارۋى ەل ءىشى-سىرتىنىڭ نازارىن ايرىقشا اۋداردى، جۇڭگولىق، شەتەلدىك تىلشىلەر اۋەجايدا كۇتىپ تۇردى. شي جينپيڭ تىلشىلىك جاساۋ رايونىنا بارىپ، سول مايدانداعى تىلشىلەرگە امانداستى. شي جينپيڭ بىلاي دەدى: كوپشىلىك سالەمەتسىزدەرمە، ءار جولى كورىكتى اۋمىنعا كەلگەنىمدە ايىرىقشا قۋانىشتا بولامىن. بۇل رەت باۋىرلاستارمەن بىرگە اۋمىننىڭ وتان قۇشاعىنا ورالعاندىعىنىڭ 25 جىلدىعىن قۇتتىقتاۋعا، تاياۋ جىلدارداعى اۋمىننىڭ جاڭا دامۋ، جاڭا وزگەرىستەرىن كورۋگە كەلدىم. وسى ورايدا مەن ورتالىق ۇكىمەت پەن بۇكىل ەلدەگى ءار ۇلت حالقى اتىنان بارلىق اۋمىن تۇرعىندارىنا ىقىلاستى سالەم جولدايمىن جانە ىزگى تىلەك بىلدىرەمىن. 25 جىلدان بەرى اۋمىن ەرەكشەلىگىنە يە «ءبىر ەل، ەكى ءتۇزىم» امالياتى دۇنيە ءجۇزى مويىنداعان تابىسقا قول جەتكىزىپ، ومىرشەڭ كۇش پەن وزگەشە باۋراۋ قۋاتىن ايگىلەدى. مەملەكەتتىڭ دامۋى كۇن سايىن جاڭالانىپ، بوگەۋ بەرمەس اۋقىمعا اينالدى، اۋمىننىڭ دامۋى دا كۇن سايىن جاقسارىپ، بولاشاعى نۇرلى بولا تۇسۋدە. بۇل اۋمىن تۇرعىندارىنىڭ داڭقى ءارى بۇكىل ەل حالقىنىڭ ماقتانىشى. مەن «ءبىر ەل، ەكى ءتۇزىمنىڭ» تۇزىمدىك ابزالدىلىعىن تولىق ساۋلەلەندىرىپ، باتىلدىقپەن كۇرەس جۇرگىزىپ، باتىلدىقپەن جاڭالىق اشسا بولعانى، اۋمىننىڭ، ءسوز جوق، اناعۇرلىم كوركەم بولاشاق جاراتا الاتىندىعىنا سەنەمىن. اۋمىن وتانىمىزدىڭ مەرۋەرتى، بۇل ارانىڭ دامۋى جانە بارلىق تۇرعىنداردىڭ باقىتتى بولۋى مەنىڭ كوكەيىمدە. الداعى نەشە كۇندە مەن ارالاپ، كورىپ، ءار سالاداعى دوستارمەن كەڭ كولەمدە ىشكەرىلەي پىكىر اۋىستىرىپ، اۋمىننىڭ دامۋ ۇلى جوسپارىن بىرگە اقىلداسامىن. كوپشىلىككە راقىمەت.

 

ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ساي چي، ج ك پ ورتالىق كوميتەتى ساياسي بيۋروسىنىڭ مۇشەسى، مەملەكەتتىك حالىق قۇرىلتايى تۇراقتى كوميتەتى باستىعىنىڭ ورىنباسارى لي حۇڭجۇڭ، ج ك پ ورتالىق كوميتەتى ساياسي بيۋروسىنىڭ مۇشەسى، ورتالىق اسكەري ىستەر كوميتەتى ءتوراعاسىنىڭ ورىنباسارى حى ۋيدۇڭ، جۇڭگو كوممۋنيستىك پارتياسى ورتالىق كوميتەت ساياسي بيۋروسىنىڭ مۇشەسى، مەملەكەتتىك كەڭەس زۇڭليىنىڭ ورىنباسارى حى ليفىڭ، مەملەكەتتىك ساياسي كەڭەس ءتوراعاسىنىڭ ورىنباسارى، باس حاتشى ۋاڭ دۇڭفىڭ قاتارلى ساپارلاستارى وسى ايروپلانمەن بىرگە باردى. ج ك پ ورتالىق كوميتەتى شياڭگاڭ، اۋمىن قىزمەتى كەڭسەسىنىڭ، مەملەكەتتىك كەڭەس شياڭگاڭ، اۋمىن ىستەرى كەڭسەسىنىڭ مەڭگەرۋشىسى شيا باۋلۇڭ اۋمىنعا الدىن الا باردى ءارى اۋەجايعا بارىپ قارسى الدى.

 

مەملەكەتتىك ساياسي كەڭەس ءتوراعاسىنىڭ ورىنباسارى حى حوۋحۋا، اۋمىن ەرەكشە اكىمشىلىك رايونىنىڭ جاڭادان تاعايىندالعان اكىمى سىن حاۋحۇي، اۋمىن ەرەكشە اكىمشىلىك رايونىنىڭ قازىرگى اكىمشىلىك، زاڭ شىعارۋ، ءادىليا قۇرىلىمدارىنىڭ جاۋاپتىلارى قاتارلىلار اۋەجايعا بارىپ قارسى الدى.

 

ورتالىق ۇكىمەتتىڭ اۋمىندا تۇراتىن بايلانىس جاساۋ كەڭسەسىنىڭ مەڭگەرۋشىسى جىڭ شينسۇڭ، سىرتقى ىستەر مينيسترلىگىنىڭ اۋمىندا تۇراتىن ارنايى جىبەرىلگەن قىزمەتكەرلەر مەكەمەسىنىڭ ارنايى قىزمەتكەرى ليۋ شيانفا، جۇڭگو حالىق ازاتتىق ارمياسىنىڭ اۋمىنداعى اسكەري ءبولىمىنىڭ سىليڭيۋانى يۇي چاڭجياڭ، جىڭۋيى لين چيڭحۋا قاتارلىلار دا اۋەجايعا بارىپ قارسى الدى.