ينفورماتسيا اشكەرەلەۋ: mzjubao@cnr.cn

سۋرەتتەر سويلەيدى

قىزىل الما ! قىزىل الما !!

来源:ىلە وبلىستىق مادەنيەت- ساياحات مەكەمەسى     |责编:达吾力别克 |     发布日期: 2019-11-11 11:01

 

سۋرەتتەرىن ءتۇسىرىپ، حابارىن جازعان باقىتبەك ءجۇمادىل ۇلى


مامىراجاي قوڭىر كۇز مول ونىمنىڭ ماۋسىمى ەكەنى بارشاعا ايان، بيىل جاڭا جۇڭگو قۇرىلعاندىعىنىڭ 70 جىلدىعى دابىرالى تويلانعان «مەملەكەت مەرەكەسى» وتە سالىپ، كۇنەس اۋدانىنىڭ باتىس قاقپاسى دەپ اتالعان قارابۋرا قالاشىعىنىڭ ارقايسى قىستاقتارىنداعى ديقاندار جابال اتتانىسقا كەلىپ، قىزىل الما ءۇزۋدىڭ قىزۋ دۋمانىن باستاپ كەتىپتى.

 


بۇكىل ەل كولەمىندەگى تۇتىنۋشىلاردىڭ قارسى الۋىنا يە بولىپ، ارىسى شەتەلدەرگە دە شىعارلىپ جاتقان «قارابۋرانىڭ قىزىل الماسى» بيىل مول ءونىم بەرىپتى دەگەندى ەستىپ، جۋىقتا قارابۋرا قالاشىعىنىڭ كەمە اۋزى قىستاعىنا باردىم. قىستاق باسشىلارىنىڭ باستاۋىمەن ەكى جەردەگى كولەمدى الما باعىن ارالاپ، ونداعى باعبانداردان المانىڭ بىيلىعى ءونىمى جونىندە سۇراپ، باقتاعى مول ءونىم كورنىسىنەن سۋرەت ءتۇسىردىم. الما اعاشتارىنىڭ ارالىعىنداعى كوگالدارعا ءار ءتۇرلى سورتتارى بويىنشا جينالىپ، ىلعاپ قوراپتالىپ جاتقان توبە- توبە ۇيىلگەن قىزىل، القىزىل، سارى قىزىل ءتۇستى سورتتى المالاردىڭ ۇيىندىلەرى جاسىل باققا گۇل الاۋىن قاپتاتقانداي ءسان بەرىپ، اسا ءبىر ايباتتى سەزىلدى. بۇتاقتاردا سامسىپ تۇرعان پىسقان الما بولسىن، نەمەسە ءۇزىپ جەرگە جينالعان الما ۇيىندىسى بولسىن بارلىعىنىڭ تازا دا جىلتىرلىعى مەن كۇن نۇرىنا شاعىلىسقان ادەمى القىزىل رەڭى كورگەن جاننىڭ كوز مەيىرىن قاندىرىپ، ۇزگەن المانىڭ جاعىمدى ءىيسى اڭقىپ، ادامعا ەرەكشە اسەرلى سەزىم باعىشتايدى ەكەن.


قىستاق كوللەكتۆىنە ءتان 105 مۋلىق الما باعىن كوپ جىلدان بەرى كوتەرمەگە الىپ، قىستاقتاعى بوس ەڭبەككۇشتەردەن ونشاقتى ادامدى كاسىپتەندىرىپ كەلە جاتقان قارت باعبان ۋاڭ سىكاي تانىستىرىپ بىلاي دەدى: «بيىل المادان ەرەسەن مول ءونىم الدىق. بۇل الما باعى جارتىلاي سورتاڭ جەر، سوندىقتان الما اعاش تۇبىنە اۋلا تىڭايتقىشىن عانا بەرۋگە بولادى. الايدا بۇل وڭىردە كۇن نۇرىنىڭ ءتۇسۋ ۋاقتى ۇزاق، سۋارۋ قولايلى بولعاندىقتان بۇل جەرگە وسكەن المانىڭ سۋى مول، ءدامى ءتىل ۇيىرەتىن ءتاتتى بولادى، <قىزىل فۋشى> سورتىن جەرلىك جابايى الما اعاشىمەن ۇلاپ، وزگەرتىلگەن بۇل قىزىل الما، قابىعى جىلتىر ءارى قاتتى بولعاندىقتان ساقتاۋعا، الىسقا تاسۋعا جاقسى، وڭايلىقشا بۇزىلمايدى، قازىر ساتىلعانىنان قالعانىن جەر استى ۇرالارعا ساقتاپ قويىپ، كەلەر جازعا دەيىن بازارعا شىعارا بەرەمىز».


ۇعىسۋعا قاراعاندا كۇنەس اۋدانىنىڭ باتىسىنا ورنالاسقان قارابۋرا قالاشىعىنىڭ كەمە اۋزى، قۇمتوبە، قىزىلتال، اقتوعان قاتارلى 10 قىستاعىندا جالپى 15 مىڭ 600 مۋدان اساتىن الما باعى بار ەكەن. كوپ جىلدان بەرى ەلىمىز ءىشى- سىرتىنان قاتىستى مامانداردى ۇسنىس ەتىپ، تەكسەرىپ- زەرتتەپ تۇراقتاندىرعاننان كەيىن، اۋدان جانە قالاشىقتاعى اگىرونومداردىڭ قۇلشىنىسى ارقىلى، كۇنەس اۋدانىنىڭ تەرىستىڭ وڭىرلەرىنە تارالعان ەكى مىڭ جىلدان ارتىق تاريحى بار، ومىرشەڭدىگى كۇشتى جابايى الما اعاشىمەن «قىزىل فۋشى» الما سورتىن بۋدانداسترۋ ارقىلى بارلىققا كەلگەن وسى «قارابۋرانىڭ قىزىل الماسى» دەرت- دەربەزگە ءتوزىمدى، سورتاڭ جەرگە ۇيلەسەتىن، ساپالى الما سورتى ەكەن. پىسقان المانىڭ ەڭ كىشكەنەسى 180 گرام، ۇلكەنى 400 گرامعا دەيىن شىعاتىن، مول ءونىم بەرەتىن جەرگىلىكتى ەرەكشە ءونىم، ونىڭ ۇستىنە اۋلا تىڭايتقىشى عانا بەرلەتىندىكتەن اتى- زاتىنا ساي «جاسىل ازىقتىق» بولىپ باعالانىپتى. جاقىن جىلداردان بەرى جىلدىق ءونىم مولشەرى 55 مىڭ توننادان اسىپ، ديقاندار مول پايداعا كەنەلىپ وتىر ەكەن.







中央广播电视总台 央广网 版权所有

قىزىل الما ! قىزىل الما !!

مامىراجاي قوڭىر كۇز مول ونىمنىڭ ماۋسىمى ەكەنى بارشاعا ايان، بيىل جاڭا جۇڭگو قۇرىلعاندىعىنىڭ 70 جىلدىعى دابىرالى تويلانعان «مەملەكەت مەرەكەسى» وتە سالىپ، كۇنەس اۋدانىنىڭ باتىس قاقپاسى دەپ اتالعان قارابۋرا قالاشىعىنىڭ ارقايسى قىستاقتارىنداعى ديقاندار جابال اتتانىسقا كەلىپ، قىزىل الما ءۇزۋدىڭ قىزۋ دۋمانىن باستاپ كەتىپتى.