ءماندى مادەني قيمىل
كەلۋقاينارى:جۇڭگو قازاق راديو تورابى |جاۋاپتى رەداكتور:داۋىلبەك | جاڭالانعان ۋاقىت:2016-07-25 16:34:00
 


    تورابىمىز ۇسىنىس ەتكەن ءتىلشى قاليما بوقان قىزى حابارلايدى. بايىرعى جىبەك جولىنىڭ بويىندا جاقۇتتاي جارقىراعان، باتىس وڭىر مادەنيەتى مەن ورتا- شىعىس مادەنيەتى توعىسقان، سالت- ءداستۇرى تولىق ساقتالعان، جەلمايامەن «جەرۇيقتى» ىزدەپ جەر شالعان جاھانگەز اسان اتانىڭ ءىزى قالعان، كۇيشى مەن جىرشىنىڭ مەكەنى اتالعان، قالاسىن انگە، دالاسىن كۇيگە بولەگەن كورىكىنە كوز تويمايتىن كورىكتى مەكەن باركول قازاق اۆتونوميالى اۋدانىنىڭ 2016- جىلعى از ۇلتتاردىڭ ءداستۇرلى مادەني دەنە- تاربيە جينالسى مەن 8- كەزەكتى شارۋالار قىزىقتى دەنە- تاربيە قيمىلى جانە 26- كەزەكتى اقىندار ايتىسى سياقتى كوپ مازمۇندى قامتىعان مادەنيەت- ساياحات، سالتانات مەرەكەسى باركول اۋدانىنىڭ بايگە الاڭىندا شۋاقتى شىلدەنىڭ 23-،24 - كۇندەرى دابىرالى وتكىزىلدى.

    پارتيا قۇرىلعاندىعىنىڭ 95 جىلدىعىن قۇتتىقتاۋدى نەگىزگى جەلى ەتكەن بۇل جينالىس ۇلتتاردىڭ مايەكتى مادەنيەتىن، بەيزاتتىق مادەنيەت مۇراعاتتارىن، ءتۇرلى ساياحات كورىنىس رايوندارىن ەلىمىزدىڭ ءىشى- سىرتىنان كەلگەن قالىڭ ساياحاتشىلارعا تانىستىرۋدى كوزدە ۇستاپ، رۋحاني وركەنيەت قۇرىلىسىن ىلگەرلەتىپ، شارۋالاردىڭ مادەني تۇرمىسىن بايىتۋدى ماقسات ەتىپ، « جۇرەكتەرى توعىسقان، بەرەكە بىرلىگى جاراسقان ەلدىڭ كەدەيلىكتەن قۇتىلدىرۋدان قامال الىپ، حالىقتى باقىتقا كەنەلتەيىك » تاقىرىبىنداعى ءتۇرلى جەلىلەس قيمىلدارى توڭىرەكتىڭ 4 بۇرىشىنان اعىن سۋداي قۇيىلعان قالىڭ قاۋىمدى مارە- سارە ەتىپ، كوڭىلىن جادىراتتى.

    اشىلۋ سالتىندا اق سارباس مالعا، كوك قاسقا تايعا باتا جاسالىپ، اق سامايلى انالار اق تىلەۋلى شاشۋىن جاڭبىرشا جاۋدىردى. ءار ۇلت حالقى توپتىق قارا جورعا بيىنە باستى. ىركەس- تىركەس قىزقۋار، تەڭگە ءىلۋ، بايگە، ايتىس، بالۋان سياقتى ءتۇرلى مادەني دەنە- تاربيە ويىندارى دا رەت- رەتىمەن جالعاسىن تاپتى.

    بۇل جينالىس جۋىقتا عانا اۆتونوميالى رايون جاعىنان وڭىرلىك ساياحاتتى دامىتۋدا «ەگەي اۋدان» اتاعىن العان باركولدىڭ داڭقىن ءدۇيىم جۇرتقا ءتىپتى دە ايگىلەۋدە، باركولدەگى ءار ۇلت حالقىنىڭ رۋحاني- مادەني تۇرمىسىنا ءنار بەرۋدە، مادەنيەت، ساياحات ىستەرىن اناعۇرلىم جانداندىرۋدا، ونەرلى جاستاردىڭ ونەرىن ۇشتاپ، جوعارى دارەجەلى ساحىنا تورىنە كوتەرۋدە، ۇلتتىق سالت- ءداستۇرىن قاز- قالپىندا ۇرپاقتان- ۇرپاققا جالعاستىرۋدا، مادەنيەتتى، ىنتىماقتى، جاراسىمدى، جاسىل مەكەن قۇرۋدا ءمانى زور بولدى.