بارعىم كەلىپ تۇرادى الاقاققا
0
2018-11-05 15:16:00
|
كەلۋقاينارى:جۇڭگو قازاق راديو تورابى
|
جاۋاپتى رەداكتور :داۋىل قادىلبەك ۇلى


اۆتور تۋرالى: ءومىرۇزاق ءتالىپ ۇلى 1963-جىلى 8-ايدىڭ 20-كۇنى التاي قالاسى الاقاق قالاشىعىنىڭ اقشي قىستاعىندا قاراپايىم ديقان وتباسىندا دۇنيەگە كەلگەن. 1986-جىلى شينجياڭ «1-اۆگۇست» اۋىل شارۋاشىلىق ينستيتۋتىنىڭ (قازىرگى شينجياڭ اۋىل شارۋاشىلىق ۋنيۆەرسيتەتى) جايلىم پاكۋلتەتىنەن وقۋ بىتىرگەن.

1989-جىلى «التاي گازەتىندە» «جاڭبىردان كەيىن كوركىن-اي، تۇنگى دالانىڭ» اتتى ولەڭىمەن ادەبيەت شەبىنە ارالاسقاننان بەرى، ەلىمىز ىشىندە شىعاتىن قازاق تىلىندەگى گازەت-جۋرنالداردا تىنباي ولەڭ جاريالاپ كەلەدى. ول ىلە قازاق اۆتونوميالى وبلىسى جاعىنان وتكىزىلگەن از ۇلتتاردىڭ ءداستۇرلى دەنەتاربيە جينالىسىنىڭ دويبى جارىسىندا ەكى دۇركىن اعا جۇلدەگەر بولعان.

قازىر التاي قالالىق مەملەكەت جەر بايلىعى مەكەمەسىندە قىزمەت ىستەيدى، التاي ايماقتىق جازۋشىلار قوعامىنىڭ مۇشەسى.

اقىننىڭ الداعى شىعارماشىلىق ساپارىنا ساتتىلىك تىلەي وتىرىپ، بۇگىن ءومىرۇزاق ءتالىپ ۇلىنىڭ «بارعىم كەلىپ تۇرادى الاقاققا» قاتارلى 5 ولەڭىن وزدەرىڭىزگە تارتۋ ەتتىم، قابىل العايسىزدار.


بارعىم كەلىپ تۇرادى الاقاققا



جولدا تۇر ەم جۇرگەلى جولاۋشىلاپ،

تانىس شوفەر توقتادى جولىم سۇراپ.

– بارىس قايدا ؟

– بارامىن الاقاققا،

ورىن بولسا الا كەت جانىم شىراق.



– نەڭ بار ەدى، ول جەردىڭ بورانى كوپ،

تۇرعان شىعار بۇگىن دە بورانى ۇدەپ.

– سول جەردە، سول بوراندا تۋىلىپپىن،

ءسوز باستادىم سوندىقتان بارامىن دەپ.



قالاڭ اسەم كورىنەد قاراماققا،

بازارىڭدى زەرىكتىم ارالاپ تا.

مەنى اپارىپ تاستاشى، شوفەر جىگىت،

از كۇن تۇرىپ قايتامىن الاقاقتا.



جەر بولعانىمەن ەلەۋسىز قاراماققا،

بارعىم كەلىپ تۇرادى سول الاپقا.

الاقاقتا نەڭ بار دەپ سۇراما سەن،

باسى جاتىر اكەمنىڭ الاقاقتا.



تۋعان جەردىڭ بورانى سامال ماعان،

سول بورانىن ساعىندىم، سوعان بارام.

ىزعارىنا بەتىمدى توسەپ تۇرىپ،

جىگەرىمدى شىڭدايمىن سول ارادان.



تىرلىك كوشىن سول جەردەن باستاعامىن،

تۋعان جەردەن سەن مەنى جاسقاماعىن.

سورتاڭ دالا دەدىڭ بە جاڭا ماعان،

تۋعان جەرىم ول مەنىڭ اسقاق ءانىم.



اتقان تاڭىڭ اعارىپ، باتقان كۇنىڭ،

ءبارى-بارى تاريح باسقان ءىزىڭ.

بالاشاقتى اپ-ايقىن ايگىلەپ تۇر،

سور دالاعا سويداقتاپ باتقان ءىزىم.



تۋىسقاندار، تۋعاندار ماعان كەرەك،

جۇرگەن شىعار ساعىنىپ كەلەمە دەپ.

ۇلكەندەر دە بارماسام جازعىرماي ما،

كەلمەدى دەپ، كەپ سالەم بەرمەدى دەپ.



سالەم بەرىپ اق ساماي انالارعا،

ناسيحاتىن تىڭدايمىن سول ارادا.

اعامدى ەرتىپ بارام دا اقتوبەگە،

تاعزىم ەتىپ قايتامىن بابالارعا.



ارتىق ايتقان ءسوزىڭدى سوكپەيمىن تەك،

كەتىپ باراد دەمەگىن ەت جەيمىن دەپ.

بارعىم كەلىپ تۇرادى الاقاققا،

تۋعان ەلدى ۇمىتىپ كەتپەيىن دەپ.

تۋعان جەردى ۇمىتىپ كەتپەيىن دەپ.


ساعىندىم انا



بۇل تىرلىكتى ارپالىس مايدان دەسەڭ،

كەتەدى ەكەن ءبىر كۇنى مايداندا ەسەڭ.

كوپ ۇرپاقتى جەتكىزىپ، سەكسەن جاساپ،

ءبىر مينۋتتا كوز جۇمدىڭ، قايران شەشەم.



ماڭدايىمنان ۇلىم دەپ ايمالاعان،

ايدىن كولىم، ساعىندىم قايران انام.

سەن سياقتى بىرەۋى رەنجيمە،

ىزدەگەنمەن ايتشى ءوزىڭ قايدا بارام.



ءبىر اۋىلعا باس القا بولعان ادام،

سەن دە مەنى ساعىندىڭ قورمال انام.

مەنىڭ ءيىسىم سەندە بار، سەنىڭ ءيىسىڭ،

ماڭدايىڭنىڭ تەرى بار سورعالاعان.



شەك جەتەمە ساعىنۋ، زارىعۋعا،

باق باعىشتاپ جاتا بەر قارا ۇلىڭا.

مەنىڭ ءيىسىم ءبىر ۋىس توپىراقتا،

كوز جاسىممەن توگىلگەن قابىرىڭا.



الاڭسىز بول ۇلىڭ دا، قىزىڭ دا امان،

تالاپ كيدىك كيىمىڭدى ىرىمداعان.

ساعىنعاندا ءار كۇنى يىسكەپ ءجۇرمىن،

اق جاۋلىعىڭ قالىپتى جۋىلماعان.



جۋعىزبايىن ەشكىمگە، جۋىلماسىن،

تۋ عىپ تىگەم، اق تۋىم جىعىلماسىن.

وندا سەنىڭ ءيىسىڭ بار، التىن انا،

قارا جەرگە كىرگەنمەن جۇمىر باسىڭ.



ۇل-قىزىڭ بار ايۋداي، مارالدايىن،

نەمەرەڭ بار قايراتتاي، داناڭدايىن.

مەن ولگەنشە ساعىنام، سەن كەلمەيسىڭ،

ساعىنعانمەن ازىرگە بارا المايىم.

تەك وزىڭدەي باس القا كەلمەي مە دەپ،

قايران شەشە، قاراداي الاڭدايمىن.


سىركىرە جاۋىن




سىركىرە جاۋىن، اياماي جاۋعىن سىركىرە،

شاڭىرقاپ جاتقان، شولىركەپ جاتقان كۇرتىگە.

ماما بۇلتتار-اۋ، تاس بايلانعان با ۇرپىڭە،

اياماي توكشى تاندىرعا مىنا سىلكىنە.



اسپاندا بۇلتتار تىنىمسىز قايدا كوشەسىڭ،

جەل قۋىپ بارىپ قىراتتان اسىپ كەتەسىڭ.

بۇل جەردەن ىلعي ايالداماي وتەسىڭ،

ءبىر ءجونىڭ جوق پا نوسەرلەپ قۇيىپ كەتەتىن.



وزىڭمەن عانا بۇل دالا ەدى شۇرايلى،

جاۋساڭ دا ءبىر اي ءشول دالا بيىل شىدايدى.

جىرتىق بۇلتتار-اۋ، جامالماي قالعان شالبارداي،

سيقىڭدى كورىپ جاۋمايد دەپ ديقان جىلايدى.



سىركىرە جاۋىن، اياماي جاۋىن سىركىرە،

جىلاساڭداعى كوزىڭنىڭ جاسىن ىركىمە.

حالىققا اتاپ اق سارباس سويىپ بەرەيىن،

اسپاندا بۇلتتار نوسەرىڭ توكشى كۇرتىگە.




جۇرەگىمدە بىرەۋ جاتىر ۇندەمەي




ءامىر بەرىپ جىلاما دا كۇل دەمەي،

جۇرەگىمدە بىرەۋ جاتىر ۇندەمەي.

جاتا بەرسىن، جاتا بەرسە جاقسى عوي،

قوزداپ جاتقان قولامتاسىن ۇرلەمەي.



ول قوزعالسا مەن دە بىرگە قوزعالام،

ەڭىرەسە سومەن بىرگە بوزداعام.

شاتتانعانىن ەندى ونىڭ كورمەيىن،

ەسكە ءتۇسىپ كەتەدى عوي توزعان ءان.



قارلىققان-دى جىلاي-جىلاي داۋىسىم،

كۇلكىمنىڭ دە سيقى بولەك سول ءۇشىن.

كۇلمەيداعى، جىلاماي دا وتەيىن،

پانيدەگى قارا باستىڭ قامى ءۇشىن.



جۇرەگىمدە بىرەۋ جاتىر ۇندەمەي،

ونى ءبىراق تىكەن دەرسىڭ، گۇل دەمەي.

وتىنەرىم كۇندىز دەمەي، ءتۇن دەمەي،

جۇرەگىمدى تۇيرەمەسە ينەدەي.

بولدى دەيمىن، جاتا بەرسىن كەۋدەمدە،

ەسكەرۋسىز ەل جوعالتقان تۇيمەدەي.


مەنىڭ تەگىم


اكەم مارقۇم مومىنداۋ ادام ەدى،

ايىبى وقىماعان نادان ەدى.

بۇل ومىردەن وتسە دە حات تانىماي،

قوي باعۋدىڭ مايتالمان مامانى ەدى.



دەمەيسىڭ بە، دەيسىڭ بە كورىم جىگىت،

ءوز باعاڭدى بەرەرسىڭ ءوزىڭ ءبىلىپ.

ماماندىعىم تارتپاپتى سول اكەمە،

ادلدىعىم تارتىپتى ەرىپ ءجۇرىپ.



قالاي دەسەڭ ولاي دە، جاناشىرىم،

جالعانىم جوق ايتايىن ساعان ءىنىم.

مەنىڭ تەگىم باي دا ەمەس، باتىر دا ەمەس،

قويداي مومىن قويشىنىڭ بالاسىمىن.

 

توراپقا دايىنداعان: ساعىنبەك رابات ۇلى (تورابىمىز ۇسىنىس ەتكەن ءتىلشى)

ۋيچات نۇسقاسىن مىنا √ بەلگىنى باسىپ كورىڭىز 

未标题-2.jpg
未标题-1.jpg
未标题-1.jpg
未标题-1.jpg
00.jpg