قازاقستانداعى بىرەگەي ءبىلىم ورداسى - الفارابي اتىنداعى قازاق ۇلتتىق ۋنيۆەرسيتەتى
0
2019-05-07 14:27:00
|
كەلۋقاينارى:جۇڭگو قازاق راديو تورابى
|
جاۋاپتى رەداكتور :داۋىل قادىلبەك ۇلى


مەيلى قايسى داۋىردە قايسى مەملەكەتتە بولسىن جالپى جۇرتتىڭ عىلىم–بىلىمگە، جىلت ەتكەن جاڭالىققا قۇشتارلىعى زامان ۇدىرىسىمەن جارىسا ارتپاسا سولعىنداپ كورمەگەنى شۇباسىز شىندىق، مىنە وسىنداي قۇشتارلىق پەن بىلىمگە دەگەن تالپنىس بولعاندىقتان دا بۇگىنگىدەي قارقىندى دامىعان داۋىردە جاساپ وتىرعانىمىز انىق.

 
ەگەردە ءارقانداي بىر مەملەكەتتىڭ دامۋى سول ەلدەگى ءبىلىم بەرۋ قۇرلىمىنىڭ دەڭگەيىمەن تىكە قاتىستى دەسەك وندا سول ەلدەگى جوعارى وقۋ ورنىنىڭ دەڭگەيى سول مەملەكەتتىڭ ماڭدايعا باسار ماركاسى سپەتتى. ولاي بولسا وسى ارادا ءبىز ەلىمىزدىڭ جاقىن كورشىسى، بارشا الەم ءۇن قوسقان «ءبىر بەلدەۋ، ءبىر جول» يىگىلىكتى ىسىنە ات سالىسقان ماڭىزدى ەلدەردىڭ ءبىرى بولعان قازاقستان رەسپۋبليكاسىنىڭ بەتكە ۇستار جوعارى وقۋ ورداسى-قازاقستان الفارابي اتىنداعى قازاق ۇلتتىق ۋنيۆەرسيتەتىن تىلگە تيەك ەتكەلى وتىرمىز.


قازاقستان الفارابي اتىنداعى قازاق ۇلتتىق ۋنيۆرسيتەت 1934-جىلى قۇرىلعان. قازىرگە دەيىن 85 جىلدىق تارلان تاريحتى باستان وتكەرگەن وسى ءبىلىم ورداسى قازاقستان رەسپۋبليكاسىنداعى ەڭ ۇلكەن ءارى ەڭ جوعارى دەڭگەيلى ۆەنيۋەرسال ۋنيۆەرسيتەت. ول ءوزى باسىپ وتكەن عاسىرعا جۋىق ۋاقىتتا قازاقستاننىڭ ەكونوميكا، ساياسي، مادەنيەت، ادەبيەت، عىلىم جانە وقىتۋ قاتارلى كوپتەگەن سالاسىنا زور ۇلەستەر قوستى ءارى قازاقستان جوعارى وقىتۋ جۇيەسىندەگى تىرەكتى كۇشكە اينالدى. ونداعى جوعارى ساپالى وقىتۋ جۇيەسى، حالىقارانىڭ مويىنداۋى، بەلسەندى عىلمي زەرتتەۋ قىزمەتى، عىلىم شىڭىنا تالماي تالپىنىپ نەبىر بيىك بەلەستەردى باعىندىرعان وقىتۋشى –وقۋشى قوسىنى قاتارلىلار بۇگىنگى كۇنى وقۋ ورداسىنىڭ بەدەلىن اسقاقتاتىپ، باسىمدىلىعىن ارتتىرىپ وتىر.

ءبىلىم ورداسىنان قاناتتانىپ شىققان تۇلەكتەر مەملەكەتتىك اكىمشىلىك ورىن، كاسپورىن، ءىسپورىن، وقۋ-اعارتۋ، دەنساۋلىق ساقتاۋ جانە باسقادا ماڭىزدى سالالارعا سارالاپ الىنادى، وسىدان-اق وقۋ ورداسىنىڭ قوعامداعى بەدەلىنىڭ قانشاما جوعارى ەكەندىگىنە كۇمانسىز كوز جەتكىزەسىز. قازاقستان ءالفارابي اتىنداعى قازاق ۇلتتىق ۋنيۆەرسيتەتىندە قازىر 20 مىڭنان ارتىق ستۋدەنت ءبىلىم نارىنەن سۋسىنداۋدا، ولار 37 ماماندىق بويىنشا باكالاۆر، ماگيستر جانە دوكتور قاتارلى ءۇش ساتى بويىنشا دايىندالادى.

ۋنيۆەرسيتەتتە ەكى مىڭنان ارتىق جوعارى بىلىكتى وقىتۋشى جۇمىس ىستەيدى، بۇنىڭ ىشىندە مىڭنان استام عىلىم دوكتورى مەن كانديداتى، 100 اكادەميىك پەن 50 فيلوسوفيا دوكتورى بار. ءبىلىم ورداسىنىڭ ستۋدەنىتتەردىڭ ساپالىق تاربيەلەنۋىنە جالپى بەتتىك ءمان بەرىپ، ءپان ءتۇرىن بارىنشا كوپ اشۋى- وزىندىك وقىتۋ ەرەكشەلىگى سانالادى. وسىزاماندانعان وقىتۋ عيماراتى، مۇراجاي، كىتاپحانا، سپورتتىق قۇرىلعىلار، ءتۇرلى تاقىرىپتاعى كلوب جانە جاتاق قاتارلىلار تولىعىمەن قامتىلعان.

ۋنيۆەرسيتەتتىڭ ۋەنيۋەرسال باسەكەلىك قۋاتى دۇنيەدەگى ايگىلى ۋنيۆەرسيتەتتەر قاتارىندا. قازاقستان ءالفارابي اتىنداعى قازاق ۇلتتىق ۋنيۆەرسيتەت 2013-جىلى حالىقارالىق ساپا حاۋىپسىزدىك باعالاۋىندا دۇنيەنىڭ الدىنعى لەگىندەگى 300 ايگىلى ۋنيۆەرسيتەت قاتارىنان بوي كورسەتىپ ورتا ازيا بويىنشا وسى باعالاۋدا كومبەدەن كورىنگەن بىردەن –ءبىر جوعارى وقۋ ورداسى بولعان. سونداي –اق دۇنيە بويىنشا 800 ۇزدىك ۋنيۆەرسيتەت تىزىمدىگىندە 234-ورىننان بوي كورسەتىپ تاۋەلسىز ەلدەر دوستاستىعىنان وسى تىزىمدىككە كىرگەن ءۇش جوعارى وقۋ ورنىنىڭ ءبىرى بولعان.


وقىتۋ شارت-جاعدايى:


قازاقستان ءالفارابي اتىنداعى ۇلتتىق ۋنيۆەرسيتەتتە قازاقستان بويىنشا وزىنە ءتان وسىزاماندانعان عىلىم-تەحنيكا جاڭالىق جاراتۋ نەگىزگى قۇرىلعىسى بار. قازاقستاندا ءجۇرىلىپ جاتقان عىلىمي زەرتتەۋ نىساندارىنىڭ باسىم كوبىن نەگىزىنەن وسى ۋنيۆەرسيتەتتەگى 30 نەشە زەرتتەۋ ورنى ۇستىنە الىپ وتىر. جالپى قازاقستانداعى وقىمىستى مامانداردىڭ حالقارالىق باسىلىمداردا جارىق كورگەن عىلمي ەڭبەكتەرىنىڭ بەستەن ءبىرى وسىنداعى بىلىكتى مامانداردىڭ ماڭداي تەرىنىڭ جەمىسى. وقۋ ورنى كەزىندە «ۇزدىك عىلمي زەرتتەۋ سيلىعى» كۋالىگىنە يە بولعان.


حالىقاراداعى كوپتەگەن ايگىلى سەرىكتىكتەردىڭ باسىم كوبى دەرلىك وسى ارادا وقىتۋ ورتالىعىن جانە عىلمي زەرتتەۋ ورنىن قۇردى. قازاقستان ءالفارابي اتىنداعى قازاق ۇلتتىق ۋنيۆەرسيتەتى قازىرگە دەيىن دۇنيە بويىنشا 400 دەن ارتىق ايگىلى جوعارى وقۋ ورنىمەن جانە حالقارالىق وقىتۋ عىلمي زەرتتەۋ ۇيىمىمەن جوعارى وقۋ ورىندارى ارا سەلبەستىك قاتىناس ورناتتى، ءالفارابي اتىنداعى ۇلتتىق ۋنيۆەرسيتەت حالىقارالىق ۋنيۆەرسيتەتتەر قوعامى مەن ەۋروپا ۋنيۆەرسيتەتتەر قوعامىنىڭ مۇشەسى. ءبىلىم ورداسىنان جىلىنا 2 مىڭنان ارتىق وقىتۋشى –وقۋشى شەتەلگە تىل ۇيرەنۋگە نەمەسە بىلىم تولىقتاۋعا مۇمكىندىك الىپ وتىر.


2014-جىلى جۇڭگو، يندىستان، تۇركيا، حانگو، جاپونيا، گەرمانيا، سپانيا، انگليا، فرانسيا، يران، ەگيپەت، پاكيستان، موڭعۇليا، رەسەي، ۋكراينا جانە وزگە دە كورشىلەس ەلدەردەن وقۋشىلار كوپتەپ ءبىلىم الۋعا كەلدى. قازاقستان ءالفارابي اتىنداعى قازاق ۇلتتىق ۋنيۆەرسيتەتى 1990-جىلدان قازىرگە دەيىن جۇڭگوداعى جيىرما نەشە جوعارى وقۋ ورنىمەن تۇسىنىستىك ەسكەرتپە حاتىنا جانە جوعارى وقۋ ورىندارى ارا سەلبەستىك كەلىسىمىنە قول قويدى. ۋنيۆەرسيتەتتە جۇڭگونى تانۋ-زەرتتەۋ ورتالىعى، «ءبىر بەلدەۋ ، ءبىر جول» زەرتتەۋ ورتالىعى، كۇڭزى ينىستيتوتى قاتارلى ورىندار قۇرىلىپ ، ەكى ەل اراسىنداعى كورشىلەس قاتىناسقا وزىندىك ۇلەسىن قوسىپ، ناتيجەسىن كورسەتىپ وتىر.


ءبىز وسى ارادا ەكى ەل دوستىعىنىڭ بارعان سايىن نىعايۋىن شىن جۇرەكتەن تىلەيمىز، تاياۋدا عانا ءتوراعا شي جينپيڭنىڭ قازاقستاننىڭ تۇڭعىش پرەزيدەنتى نۇرسۇلتان نازاربايەۆقا «دوستىق وردەنىن» سيلاۋى ەكى ەل دوستىعىنىڭ بيىگىن ايگىلەسە؛ جۇڭگو كلاسسيىك شىعارمالارىنىڭ قازاقستاندا جارىق كورۋى- ەكى ەل مادەنيەتىنىڭ توعىسۋىنا وزىندىك ۇلەسىن قوسىپ، كوپتەگەن سالادا سەلبەستىك ورىستەتۋدىڭ ماڭىزدىلىعىن تاعى ءبىر قىرىنان ايگىلەدى.

 

ورتالىق راديو-تەلەۆيزيا باس ستانسياسىنىڭ قىزمەتكەرى، تەتە اعا اۋدارماشى گۇلميرا قوزىقان قىزى قازىر قازاقستان رەسپۋبليكاسىنىڭ  جوعارى وقۋ ورداسى قازاقستان الفارابي اتىنداعى قازاق ۇلتتىق ۋنيۆەرسيتەتىندە ءبىلىم اسىرىپ جاتىر.

 

ماقالا اۆتورلارى:  گۇلميرا قوزىقان قىزى، كلارا قابىلعازينا

610dcf5c-44f4-4c8c-8eb8-10025293d78a9146a2ce-cbe5-4bec-b51a-b7195122272c.png
15736064435587244883.jpg
企业微信截图_20190506153559.jpg
37DC5F7D8D17ACFD29541C0BD29B3F8D.jpg
17f8-hwfpcxp0615530.jpg