التىن القالى جەلاياق
0
2019-07-08 15:29:00
|
كەلۋقاينارى:جۇڭگو قازاق راديو تورابى
|
جاۋاپتى رەداكتور :داۋىل


مۇقامەتقالي سۇلتاش ۇلى


جۇگىرۋ− نەگىزگى سپورت تۇرىنىڭ ءبىرى بولسادا، ونى ارناۋلى كاسىپ ەتىپ، تالماي جاتتىعۋ جاسايتىندار كوپ ەمەس. جۇگىرەتىن سپورتشىلار مارافون جارىسىنا تۇسۋگە دايىندالۋدا اسقان توزىمدىلىكتى قاجەت ەتەدى. ءبىر سىدىرعى ارەكەتتى كۇندە قايتالاپ، وكپەنى كۇيدىرىپ، قارا ساندى ۇزىپ جۇگىرە بەرۋگە ەكىنىڭ ءبىرى شىداي بەرمەسى انىق. وسى تۇرعىدان العاندا، جەلاياقتاردىڭ توزىمدىلىكپەن قاتارىنان قارا وزىپ جۇلدەلى ناتيجەلەرگە قول جەتكىزۋى وڭاي- وسپاق ءىس ەمەس.


تىلىمىزگە تيەك بولىپ وتىرعان گەرويىمىز− اقسۋ ايماقتىق كاسىپتىك– تەحنيكا شۋيۋانى دەنە-تاربيە كاسىبىندە وقىپ جاتقان ستۋدەنت سپورتشىمىز، جۇگىرۋ، باسكەتبول، ۋالەيبول سياقتى سپورت تۇرىمەن اينالىسقان 5 جىلدان بەرى مەملەكەتتىك، حالىقارالىق جانە رايونىمىز كولەمىندەگى سپورت جارىستارىندا 4 التىن مەدال، 6 كۇمىس مەدال، 5 مىس مەدال جانە ءبىرقانشا داڭق گراموتاسىن− العان مۇحيت بەكبولات ۇلى.


تۇلپارلارىنىڭ تۇياعى جەر اپشىسىن قۋىرعان دۇلدۇل مەكەنى− موڭعۇلكۇرە اۋدانىنىڭ اقسۋ اۋىلىندا، قاراپايىم شارۋا وتباسىندا 1998- جىلى 11- ايدا دۇنيە ەسىگىن اشقان مۇحيت اتا- اناسىنىڭ اياۋلى الاقانىندا ەسەيىپ، اقسۋ اۋىلى 5- ورتا مەكتەپ ورتالاۋ جىلدىعىنا تۇسكەن سوڭ، سپورتتاعى دارالىعى كۇن ساناپ ايشىقتالا باستايدى. ءاۋ باستا ول ءوزىنىڭ اۋەسى دەنە-تاربيە قيمىلىنا بەلسەنە قاتىناسىپ، مەكتەپتە كوپ رەت سيلانادى. ول جالعاستى تىنباي جاتتىعۋ ارقىلى كۇش- قايراتى كۇن ساناپ تولىسىپ، ورتا، قىسقا ارالىققا جۇگىرۋ تەزدىگى مەن توزىمدىلىگى ارتا تۇسەدى. وسى ەرەكشەلىگىمەن مۇحيت 2014- جىلى كۇزدە موڭعۇلكۇرە اۋداندىق شۇعىلا ورتا مەكتەبىنە وقۋعا قابىلدانادى.


مۇحيت تولىق ورتانىڭ تابالدىرىعىن اتتاعاننان باستاپ، وزىنە قاتاڭ تالاپ قويىپ، ۇيرەنۋدە ۇزدىك بولۋمەن بىرگە، ءتۇرلى دەنە-تاربيە ارەكەتتەرىندە ەرەكشە كوزگە تۇسەدى. دەنە-تاربيە مۇعالىمى جۇماباي ساتان ۇلىنىڭ باۋلىپ، تاربيەلەۋىنىڭ ارقاسىندا 2014- جىلدان 2017- جىلعا دەيىنگى تولىقسىز، تولىق ورتا جىلدىقتارىنىڭ قىسقى دالادا ۇزاققا جۇگىرۋ جارىسىندا ەكى رەت 1- دارەجەلى جۇلدەلى بولۋمەن بىرگە، موڭعۇلكۇرە اۋدانى بويىنشا وتكىزىلگەن 2015- جىلعى، 2016- جىلعى ورتا، باستاۋىش مەكتەپ وقۋشىلارىنىڭ باسكەتبول جارىسىندا ول قاتىسقان كوماندا جەڭىمپاز بولىپ، كوللەكتيۆ ءبىر رەت التىن مەدال، ءبىر رەت كۇمىس مەدال الادى. 2016- جىلى 5- ايدىڭ 31- كۇنى ىلە قازاق اۆتونوميالى وبلىسىنىڭ 2- كەزەكتى شارۋالار دەنە-تاربيە جينالىسىندا، مۇحيت جەتەكشىلىك ەتكەن موڭعۇلكۇرە ۋالەيبول كومانداسى كوللەكتيۆ 1- دارەجەلى بولىپ، اۋداننىڭ جانە مەكتەپتىڭ ماداقتاپ، ماراپاتتاۋىنا يە بولادى.


2016- جىلى 12- ايدىڭ 31- كۇنى جۇڭگو قازاقىستان قورعاس حالىقارالىق شەكارا سەلبەستىك ورتالىعى ۇيىمداستىرعان « قىستىق مارافون دوستىق ساۋىتىنا تالاسۋ جارىسىنا» قاتىناسقان 3 مىڭ ادامنان قارا وزىپ شىققان مۇحيت 3- بولىپ مارافون سىزىعىن كەسىپ، مىس مەدال الادى. ءسويتىپ وسى رەتكى حالقارالىق جارىستا مۇحيت تۋعان اۋلىنا، انا مەكتەبىنە ۇلكەن داڭق اپەرەدى.


مۇحيت 2017- جىلى 6- ايدا ءوز قالاۋى بويىنشا دەنە-تاربيە كاسىبىنىڭ مەملەكەتتىك ءبىرتۇتاس ەمتيحانىنا قاتىناسىپ، اقسۋ ايماقتىق كاسىپتىك تەحنيكالىق شۋيۋانىنىڭ دەنە-تاربيە كىلاسىنا قابىلدانادى. دەنە تاربيە كاسىبىنەن ارناۋلى ءبىلىم الۋعا بارعان ول، ءوز اۋەسىنەن ناتيجە جاراتۋ ءۇشىن ماشاقاتتى جاتتىعۋلار جاسادى. وسى مەكتەپتەگى تاجىريبەلى جاتتىقتىرۋشىلاردىڭ تاربيەلەۋىنە سايكەسىپ كۇندى- تۇنگە جالعاپ جاتتىعۋ جاساۋعا كىرىسەدى. ول مەكتەپتە وزىنە قاتاڭ تالاپ قويىپ، جەڭىل اتلەتيكا تۇرلەرىنىڭ ءادىس- امالدارى مەن بىلىمدەرىن بەرىلە ۇيرەنىپ، جاتتىعۋ جاسايدى. سونىمەن 2018 - جىلى 11- ايدىڭ 3- كۇنى اقسۋ ايماعىندا وتكىزىلگەن 10 كيلومەترلىك ارالىققا جۇگىرۋ جارىسىندا التىن مەدال ەنشىلەيدى. ورتا، ۇزاق ارالىققا جۇگىرۋدىڭ تابالدىرىعىن جەڭىستى قاداممەن اتتاعان جەلاياق، وسى جىلى 12- ايدىڭ 15- كۇنى بەيجيڭ قالاسىندا وتكىزىلگەن << حالىقارالىق جارتىلاي مارافون جارىسىنىڭ>> ادىرلى تاۋ جولىنداعى 21 كيلومەترلىك ارالىققا جۇگىرۋ جارىسىندا 2 ساعات 24 مينۋتتىق ناتيجەمەن 3 مىڭ ادامنان 1- بولىپ، التىن مەدال الىپ، حالقارالىق جارىستىڭ داڭق مىنبەسىنە شىعادى.


« ەردىڭ داڭقى− ەلدىڭ داڭقى» دەگەن اتالى سوزدىڭ كۋاسىنداي بولعان ايتۋلى جەلاياق ازاماتىمىز مۇحيت، جوعارىدا ايتىلعان ناتيجەلەرىنەن تىس، قازىر وقىپ جاتقان مەكتەبى اتىنان دا 2017- جىلدان 2018- جىلدىڭ سوڭىنا دەيىن مەملەكەت، اۆتونوميالى رايون، وبلىس، ايماق دارەجەلى ءبىرقانشا رەتكى ورتا، ۇزاق ارالىققا جۇگىرۋ جارىستارىنا قاتىناسىپ، 6 مارتە التىن، كۇمىس، مىس مەدالدىڭ يەگەرى بولىپ، انا مەكتەبىنە داڭق الىپ بەرىپ، ۇستازدارى مەن ساباقتاستارىنىڭ ماقتانىشىنا اينالدى.


مۇحيتتىڭ وسى قوماقتى ناتيجەلەرىنە بولا- شينجياڭ پەداگوگيكا داشۋەسى، اۆتونوميالى رايوندىق دەنە-تاربيە مەكەمەسى 2018- جىلى 12- ايدا «مەملەكەتتىك 2- دارەجەلى جەڭىل اتلەتيكا شەبەرى» دەگەن داڭىقتى ات بەرەدى. سول اتاقپەن مۇحيت اۆتونوميالى رايوندىق دەنە-تاربيە مەكەمەسى مەن وقۋ- اعارتۋ مەڭگەرمەسىنىڭ بەكتۋىمەن «داشۋە وقۋشىلارى سپورت قوعامىنىڭ مۇشەسى»  بولدى.


وسى ماراپاتتاردان شابىت العان جەلاياق جاس 2019- جىلى جاڭا جىل مەرەكەسى كۇنى ەلىمىزدىڭ شاڭحاي قالاسىندا وتكىزىلگەن بۇكىل مەملەكەتتىك جارتىلاي مارافون جارىسىنىڭ 21 كيلومەترلىك جارىسىندا، شالعايداعى تۋعان جەرى ورتەكەس ساحاراسىنداعى ورشەلەنە ورگە شاۋىپ، توپتان وزعان تۇلپارداي ارىنمەن 3 مىڭ ادامدى باسىپ وزىپ 2 - بولىپ، كۇمىس مەدال ەنشىلەيدى. ىلە- شالا وسى ايدىڭ 13- كۇنى رايونىمىزدىڭ ءۇرىمجى قالاسى نانسان رايونىندا وتكىزىلگەن بۇكىل مەملەكەتتىك « جىبەك جولى قار مۇز ساياحات مەرەكەسىنىڭ» تاعى 3 مىڭ سپورتشى قاتىناسقان تاۋلى وڭىردەگى 42 كيلومەترلىك مارافون جارىسىندا 3- بولىپ، مىس مەدالمەن سيلانادى.


الەم تانىعان زاڭعار جازۋشى م . اۋەزوۆ « قاي ءىستىڭ بولسىن وتۋىنە ءۇش شارت بار: ەڭ اۋەلى نيەت كەرەك، ودان سوڭ كۇش كەرەك، ودان سوڭ ءتارتىپ كەرەك» -دەيدى. ال، مۇحيت جاتتىعۋ مەن جارىس بارسىندا وسى شارتتاردى تولىعىمەن ورىنداپ كەلەلى ناتيجەلەرگە جەتتى دەسەكتە بولادى. ول وزىنىڭ سۇبەلى ناتيجەسىمەن اۆتونوميالى رايونىمىزداعى، وبلىسىمىزداعى، تۇلپار مەكەنىندەگى قالىڭ حالىقتىڭ ماقتانىشىنا اينالىپ، تۋعان اۋىلىنا ۇلكەن اتاق ابىرويمەن ورالدى.


دەنە-تاربيە كاسىبىنە وقۋعا تۇسكەن قىسقا عانا ەكى جىلدا، ارىسى حالقارالىق، بەرىسى ولكەلىك جارىستاردا جەلدەي ەسكەن جەلاياق بولىپ، كەۋدەسىن التىن مەدالعا تولتىرىپ، وتانعا، تۋعان ەلىنە داڭق اپەرگەن، ساحارادان تۇلەپ ۇشقان تاستۇلەك قىران ۇلدارى بىيل قىسىقى كانيكولعا تاراپ قايتىپ كەلگەن ساتتە اۋىلداستارى 2- ايدىڭ 2- كۇنى موڭعۇلكۇرە اۋدانى اقسۋ اۋىلىندا مۇحيتقا ات ءمىنگىزىپ، وقالى تون جاۋىپ « ءشاشۋ ءشاشىپ قارسى الۋ سالتىن» وتكىزدى.  (1- دەن 4- گە دەيىنگى سۋرەتتى باقىتبەك ءجۇمادىل ۇلى تۇسىرگەن، 5-، 6- سۋرەتتى مۇحيت جولداعان)


اۆتوردىڭ قىزمەت ورنى: موڭعۇلكۇرە اۋدانى 67 - تۋان الاڭى ۇگىت كەڭسەسى

00.jpg
00.jpg
00.jpg
00.jpg
00.jpg