گۇل مەن قاۋاشاق
0
2019-08-03 11:13:00
|
كەلۋقاينارى:جۇڭگو قازاق راديو تورابى
|
جاۋاپتى رەداكتور :


    سۋرەتتەرىن ءتۇسىرىپ، ماقالاسىن جازعان باقىتبەك ءجۇمادىل ۇلى 

    بايتاق دالانى جاپقان قىرمىزى قىزعالداقتىڭ جامىراي اشلۋى جەر ءجانناتى ىلە اڭعارىندا گۇل ماۋسىمىنىڭ سوڭىنا كەلىپ جەتكەنىن بىلدىرەدى. ويتكەنى قىزعالداق ءار جىلى 5- ايدىڭ ورتا شەنىنەن باستاپ ىلەنىڭ وي مەن قىرىندا الاۋلاپ، ارت- ارتىنان اشىلىپ، باس- اياعى ءبىر ايعا جالعاسادى. سونىمەن جاز ايلارى دا جادىراپ كەلىپ، اق ورىك پىسادى.


    قىردىڭ اسەم قىرمىزى گۇلى قىزعالداق--- ەرتە كوكتەمدە گۇل اشىپ، جاز باسىندا پىسىپ ۇرىق تاستايتىن ماۋسىمدىق وسىمدىك. زەرتتەۋلەرگە قاراعاندا جابايى قىزعالداق ءوسىپ- ونۋ شارتى جاراسپاعان جاعدايدا تۇقىمى توپىراقتا 30 جىلعا دەيىن ساقتالاتىن ءتوزىمدى ءشوپ تۇرىنە جاتادى ەكەن. سوندىقتاندا ىلە اڭعارىنىڭ كوپ وڭىرلەرىندە اتام زاماننان بەرى قىزعالداقتىڭ تۇقىمى ساقتالىپ، اۋارايى ۇيلەسكەن جىلداردا بارىنشا ءوسىپ- وربىپ، كەڭ دالا ءتوسىن گۇلگە وراپ، تۇقىم تاستاپ، جالعاستى ساقتالىپ كەلەدى.


    << بۇل الەمدە گۇلدەر كوپ الاۋ جاپقانداي، بىراق ەشبىر گۇلدەر جوق قىزعالداقتارداي...>> دەگەندەي قىزعالداق الاۋلاعان گۇلتەسىمەن، ءار تاڭدا جاڭارىپ، گۇلگە اينالىپ وتىراتىن قاۋاشاعىنىڭ ومىرشەڭدىگىمەن، تاڭ نۇرىمەن ىرعالا سان قۇبىلاتىن دارا اسەمدىگىمەن، ساحارانىڭ كىرشىكسىز تۇنىق تابيعاتىن ونان ارى نۇرلاندىراتىن، وڭى سولىمايتىن دالا گۇلى. تىڭ دالادا جامىراي اشىلعان قىزعالداق عاشىق جۇرەكتىڭ ىنكارلىق لۇپىلىندەي اسەرلى تەربەلىسىمەن جانىڭدى باۋرايتىن ناعىز اسەم گۇل.


    قىزعالداق جاپقان دالاعا تاڭعى مەزگىلدە بارساڭ عانا قىزعالداقتىڭ اسەمدىگىن ايقىن سەزىنەسىڭ، ويتكەنى قىزعالداق تاڭ نۇرىمەن گۇل جارادى. تاڭ الدىندا قىزعالداق ساباعىنداعى قاۋاشاق گۇل جارۋعا دايىندالعاندا الدىندا اشىلعان گۇلگە قۇمارتا باسىن يەتىن كورنەدى. سونىمەن ول تاڭ شۇعىلاسى كوتەرىلگەندە وزىدە گۇل بوپ اشىلادى. باعجايلاپ قاراساڭ قاۋاشاقتىڭ گۇلگە اينالۋ جولىنداعى بۇل زاڭدىلىعى بىزگە ءومىر جولىنىڭ ءبىر سىرىن سىبىرلاپ ايتىپ تۇرعانداي...


    بۇدان بۇرىن دا وي مەن قىرعا كوپ رەت قىزعالداق گۇلىن كورۋگە باردىم، فوتوعا ءتۇسىرىپ وقىرمانعا تالاي رەت ۇسىندىم، الايدا بىيىلعى كوكتەمدە تاعى سول اسەم قىزعالداق گۇلىنە قۇمارتا كەلىپ فوتو ءتۇسرىپ جۇرىپ، قىزعالداق گۇلىنىڭ اسەمدىگى قاۋاشاقتان باستالاتىنىن جاڭا بايقاعانداي بولدىم. سونىمەن << گۇل مەن قاۋاشاق>> اتتى وسى جەلىلەس سۋرەتتى تۋىندى بارلىققا كەلدى. قادىرلى وقىرمان قانە مىنا سۋرەتتەردەگى گۇل مەن قاۋاشاققا ايىرىم- ايىرىم زەر سالىپ كورەلىك، سىزگە قانداي ويلار ورالار ەكەن...؟

 

QQ浏览器截图20190802100549.jpg
IMG_8986.jpg
00.jpg
QQ浏览器截图20190802095544.jpg
00.jpg