الاڭداعى التىن وردا
0
2019-08-20 15:02:00
|
كەلۋقاينارى:جۇڭگو قازاق راديو تورابى
|
جاۋاپتى رەداكتور :اينا


    ساحارا تورىندە كوك كۇمبەزىندەي بولىپ كوزگە تۇسەتىن قازاقتىڭ كيىز ءۇيى بۇگىنگى كۇنى قالادان دا ويىپ ورىن الىپ، وزىنىڭ ءسان-سالتاناتىن ايگىلەپ، ساياحاتشىلاردى ەرەسەن باۋراپ وتىر. ايتباقشى، بۇل كيىز ءۇي قىزىلدى جاسىلدى، الەم-جالەم، جۇقالتاڭ جەلبىر جاساۋىمەن عانا كورگەندەردىڭ كوزىن ارباۋ ەمەس، قايتا كونەنىڭ كوزىندەي ەسكىرمەس اسىل ويۋ-ورنەگى، وزىنە عانا ءتان تابيعاتقا قابىسقان دالالىق مادەنيەت دەتالدارىمەن، ناعىز قول ونەر تۋىندىسى بولعان بولەكشە بوگەنايىمەن قازاق كيىز ءۇي مادەنيەتىنىڭ ۇلىلىعىن ۇلاعاتتاپ تۇر دەي الامىز.


    قازاق ادەتتە ات ۇستىنەن شاڭىراق كوتەرىپ تۇرىپ ۋىق ءشانشىپ تىگەتىن، 30 قاناتتى الىپ كيىز ءۇيدى <<التىن وردا>> دەپ اتايدى. ال، ٴبىزدىڭ <<الاڭداعى التىن وردا>> دەپ وتىرعانىمىز قۇلجا قالاسى پويەز بەكەتى ماڭىنداعى <<ورتا ازيا قاقپاسى>> دەپ اتالعان سالت-سانا باقشا رايونى، ورتالىق الاڭىنا جۋىقتا عانا سالىنىپ، جابدالىپ بولعان، بىيىكتىگى 10.2 مەتر، ىشكى شەڭبەر راديوسى 20 مەتر شىعاتىن، كولەمى 350 شارشى مەترلىك، ءبىر جولدا تورىنە 200 دەن ارتىق ادام داستارقان ءجايىپ جايعاسا الاتىن ەرەسەن ۇلكەن كيىز ۇي. ەرەسەن دەگەنىمىز ات ۇستىنەن ەمەس، اتان ۇستىنە ات شىعارىپ ءمىنىپ تۇرىپ شاڭىراعىن كوتەرسەڭىزدە قول جەتە بورمەيتىن ٴزاۋلىم وردا دەگەن ءسوز.


    <<ىلە جىبەك جولى شۇعىلاسى ساياحاتقا قارجى قوسۋ (شەكتى) سەرىكتىگىنىڭ>> قارجىلاندرۋىمەن، <<ىلە تاسبۇلاق ۇلتتىق كيىم-كەشەك سەرىكتىگى>> بۇل ۇلكەن كيىز ءۇيدىڭ كەرەگە، تۋىرلىعىن، ىشكى ابزەلدەرىن تۇگەلدەي قازاقى قول ونەرمەن جابداپ جاساپ شىقتى.


    <<ىلە تاسبۇلاق ۇلتتىق كيىم-كەشەك شەكتى سەرىكتىگىنىڭ>> ديرەكتورى، <<مەملەكەت دارەجەلى قازاق ۇلتتىك كيىم-كەشەك بەي زاتتىق مادەنيەتىنىڭ ۋاكىلدىك مۇراگەرى>> جەڭىسگۇل نۇرداناقىن قىزىنىڭ باس جوباسى مەن جەتەكشىلىگىندە كيىز ۇيدىڭ 3D جوباسىن مارعۇلان جارقىن ۇلى جاساعان، وسى 3D جوبا بويىنشا ىلە وبلىستىق قۇرلىس جوبالاۋ ورنىنداعى دۋمان قاتارلى ارحيكتەكتورلار ناقتىلى قۇرلىس جوباسىن ورىنداپ، بولات شىبىقتان ءۇي قاڭقاسى تۇرعىزىلعاننان كەيىن، ۇيدىڭ سىرتقى كەرەگە، تۋىرلىق، ۇزىك، تۇڭىلىگىنە دەيىن قولمەن باسىلعان قازاقى كيىزبەن جابىلىپ، ىشكى باۋ-شۋى، باس قۇرى، وراۋلى ءشيى دەگەن سياقتى بارلىق جاساۋ-جابدىقتارى تۇگەل قول ونەر بۇيىمدارىمەن جابدالىپ، اتى زاتىنا ساي قازاق كيىز ءۇي مادەنيەتىنىڭ مۋزەيى قالىپتاستىرىلعان.


    ۇعىسۋعا قاراعاندا بۇل ۇلكەن كيىز ءۇي، 2011-جىلى موري اۋداندىق حالىق ۇكىمەتى جاساتىپ، دۇنيە گەنىيس رەكوردىن العان كيىز ۇيمەن، 2015-جىلى تەكەس اۋدانى قارادالا قالاشىعى جاساتىپ، قاراجون جايلاۋىنا تىككەن، دۇنيە گەنىيس رەكوردىن العان كيىز ۇيدەن دە ۇلكەن ەكەن. ونىڭ ۇستىنە ىشكى جاساۋ جابدىقتارىنىڭ ءتۇرى تولىق، ءسان-سالتاناتى دا ەرەكشە كوز جاۋىن الادى. بۇل اق وردانىڭ جوعارداعى كيىز ۇيلەردەن تاعى ءبىر ارتىقشىلىعى، وسى كيىز ۇيدىڭ ىشكى وڭ جاق بوساعاسىنا تىگىلگەن ءساندى جابدالعان اق وتاۋ، كيىز ءۇي مادەنيەتىمىزدەگى تىڭ جاسامپازدىق رەتىندە كوزگە تۇسەدى.


    يا، بۇل اق وردانىڭ سان-سالتاناتىن ءوز كوزىڭىزبەن كورسەڭىز، قالاداعى قايناعان حان الاڭدا كۇمبەزدەنىپ تۇرعان وسى الىپ كيگىز ءۇيدى، قازاق سىندى جومارت مىنەزدى ادامدار مەكەن ەتكەن اناۋ دارقان دالا تابيعاتىنىڭ وزىنە تارتىپ، كىشىرەيىپ تۇرا قالعان ايناسى دەسەك ارتىق ايتتىڭ دەي المايسىز، اعايىن!


    وسى ۇلكەن كيىز ءۇي ساياحاتشىلارعا اشىلعان ءبىر ايعا جەتپەيتىن ۋاقىتتان بەرى ەلىمىزدىڭ جەر-جەرىنەن، ءتىپتى جۇمىر جەردىڭ تۇكپىر-تۇكپىرىنەن ىلە اڭعارىنا اياق باسقان ساياحاتشى قاۋىم، ۋاگزالدان شىعا سالا، ۇشاقتان تۇسە سالا، الىس ساحاراعا سابىلماي-اق، وسى الاڭدا بوي كوتەرىپ، قانە مارحابات دەپ كۇندىز-ءتۇنى ەسىگى ايقارا اشىق تۇرعان قازاقتىڭ التىن ورداسى--وسى كيىز ۇيگە كىرىپ، قازاق دەيتىن اق كوڭىل مىرزا جۇرتتىڭ عاسىرلار بويى دالا توسىندە كەمەلدەنگەن دانالىعىن، تالعار بىيىك تالعامىن، بولمىس ءبىتىمىن وسى وردانىڭ شاڭىراعىمەن كەرەگەسىندەگى كەرەمەت ءداستۇر تالىمىنەن كورىپ، ءبىلىپ، رازى بولىپ، تاڭداي قاعا تاڭدانىپ قايتىپ جاتىر.

حابارىن جازىپ، سۋرەتتەرىن تۇسىرگەن باقىتبەك ءجۇمادىل ۇلى 
    ىلە وبلىستىق مادەنيەت جانە ساياحات مەكەمەسى

00.jpg
00.jpg
00.jpg
00.jpg
3.jpg