ۇلىستىڭ ۇلى كۇنىندە كوپپەنەن بىرگە كۇلىمدە
كەلۋقاينارى:جۇڭگو قازاق راديو تورابى |جاۋاپتى رەداكتور:ايناگۇل | جاڭالانعان ۋاقىت:2017-03-20 09:05:00


    بۇلبۇل احىمەت قىزى


    قالامىزدى انگە، دالامىزدى سانگە بولەپ، كوكتەمنىڭ جارقىن مەيرامى، جىلدىڭ باسى، جىردىڭ باسى، ۇلىستىڭ ۇلى كۇنى، ءاز ناۋرىز كەلىپ جەتتى، عاسىرلار بويى سالتاناتىن جوعالتپاي اتادان بالاعا مۇرا بولىپ كەلە جاتقان، وسى ءبىر ءداستۇرلى ۇلت مەرەكەمىزدى، ورتايماس بەرەكەمەن قارسى الىپ، ءمارە-سارە ماعىنالى تويلاپ كەلەمىز.


    ۇلىستىڭ ۇلى كۇنى ناۋرىز، تابيعاتتىڭ ءتىلسىمىمەن، عالامنىڭ عاجايىپتارىن بويىنا جيعان ەرەكشە مەرەكە، سونىڭ ەڭ ۇلكەن ايعاعى، ۇلىستىڭ ۇلى كۇنى ناۋرىز ايىنىڭ 22-كۇنى، كۇنمەن ءتۇن تەڭەلىپ، قىستىڭ ىزعارى قايتىپ، جەر انا بۋسانىپ، اينالا كوگەرۋگە قامدانىپ، دۇنيە قۇلپىرا قۇبىلادى، وسىنى تەرەڭ ۇعىنا بىلگەن دانا حالقىمىز، بۇل كۇندى، جاڭارۋ مەن جاسارۋدىڭ نىشانى دەپ باعالاپ، شىرايلى جىل باسى دەپ ەسەپتەگەن.


    ناۋرىز كۇنى، بايمەن كەدەي تەڭ دەپ قاريالارىمىزءجىيى ايتىپ وتىراتىنىنداي، بۇل كۇنى جۇرتتىڭ ءبارى ورىندارىنان ەرتە تۇرىپ، بۇلاق كوزىن اشىپ، ورمان وتىرعىزىپ، قيىنشىلعى مول قارتتارمەن، دەنساۋلىعى ناشار ادامداردىڭ ءتۇرلى شارۋالارىن ستەپ بەرىپ، سوسىن ۇيلەرىنە قايتىپ، جۇزدەرىنەن شاتتىق لەبى ەسىپ، ءۇي باس سايىن قىدىرىپ، سالەمدەسىپ، اماندىق سۇراسىپ:
امانسىزبا؟
ۇلىس باقىتتى بولسىن،
ءتورت تۇلىك اقتى بولسىن،
ۇلىس وڭ بولسىن،
اق مول بولسىن،
قايدا بارساق جول بولسىن،
بەرەكەمىز بەكەم بولسىن،
باسىمىز امان، دەنىمىز ساۋ بولسىن، دەپ ءبىر- بىرىنە ىزگى تىلەكتەرىن ايتىسىپ، ۇزىن سارىعا دەپ ساقتاعان، جىلى جۇمساقتارىنان اۋىز ءتيىپ، جەتى ءدامنەن جاسالعان ناۋرىز كوجە ءىشىسكەن، سونداي- اق بىيلەرمەن اق ساقالدار، توبە باسىنا جينالىپ كەڭەس قۇرىپ، جەتىم- جەسىر، كەدەي كىسىلەرگە كومەك بەرۋ جايلى، ۇيلەنە الماي جۇرگەن جانداردىڭ باسىنا وتاۋ كوتەرىپ بەرۋ جايلى شەشىم قابىلداپ، سامارقاننىڭ كوك تاسى ەرىگەن كۇن دەپ، اراز اعايىندى تاتۋلاستىرىپ، بەرەكەنىڭ بەسىگىندە تەربەلگەن. سونىمەن بىرگە كەش باتا ءبىر اراعا باس قوسىپ، اق ساقالدى اتالاردىڭ، اق شىلاۋىشتى اجەلەردىڭ اق باتاسىمەن ناۋرىز ناما شىمىلدىعىن اشىپ، جاستار جاعى اۋەلەتىپ ءان سالىپ، مىڭ قۇبىلتىپ كۇي شەرتىپ، جۇمباق شەشىسىپ، ناۋرىز جىرلارىن ايتسىپ، ناۋرىز ايتىسىن جاساپ، مەرەكە دۋمانىن ءتىپتى دە اسىرا تۇسكەن.


    دەمەك، ناۋرىز، ىزگىلىكتىڭ، بەرەكە- بىرلىكتىڭ، جيىپ ايتقاندا، ادامگەرشىلىك اسىل قاسيەتتەردىڭ بارلىعى ادامدار بويىنان كورىنىس تاباتىن ءارى ادامداردى سول قاسيەتتەردى ءوز بويلارىنان ءوشىرىپ الماۋعا جەبەيتىن ۇلاعاتتى مەرەكە!


    بۇگنگى تاڭدا، پارتيامىزبەن، ۇكىمەتىمىز بەي زاتتىق مادەني مۇرالاردى قورعاۋدى، دامىتۋدى ەرەكشە جولعا قويۋىنىڭ ارقاسىندا، ۇلتتىق مەرەكەلەرىمىزبەن ىسپورت ويىندارىمىز، سالت - ءداستۇرىمىز، وركەن جايىپ قۇلپىرا تۇسۋدە.


ۇلىستىڭ ۇلى كۇنىندە،
كوپپەنەن بىرگە كۇلىمدەپ،
كوبەيىپ جاڭا دوسىمىز،
جاراسىپ كوڭىل حوشىمىز، دەپ جىرىمىزدى جىرلاپ، ءانىمىزدى اۋەلەتىپ، مەرەكەمىزدىڭ مەرەيىن اسىرىپ جاتىرمىز.


    يا، ۇلىس وڭ بولسىن، ىرىس مول بولسىن، ورتامىز گۇلدەنىپ كوركەيە بەرسىن!


قابا اۋداندىق قوعام حاۋىپسىزدىك مەكەمەسى