پارتيانىڭ تۋعان كۇنىن «تەسكەن توعاندا» تويلادى
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2018-07-04 15:47:00

 

    قادىل نۇراحىمان ۇلى، بولات ءمۇشان ۇلى حابارلايدى. «سۋ ىشكەندە قۇدىق قازۋشىنى ۇمىتپاۋ»-جۇڭحۋا ۇلتتارىنىڭ تاڭداۋلى قاسيەتى. اعا بۋىن توڭكەرىسشىلەردىڭ تابان ەت ماڭداي تەرى مەن ىستىق قاندارىنىڭ بوداۋىنان كەلگەن قاسيەتتى ەڭبەك جەمىستەرىن قاستەرلەپ، بۇگىنگى ۇرپاقتاردىڭ ساناسىنا ءسىڭىرىپ، كوڭىل تۇكپىرلەرىنە ۇيالاتۋ، قاحارمانداردىڭ توڭكەرىستىك رۋحىنا مۇراگەرلىك ەتۋ-كەزەكتەگى پارتيا مەن ۇكىمەتىمىزدىڭ دارىپتەپ وتىرعان ماڭىزدى ساياساتتارىنىڭ ءبىرى.


    مىنە، ءدال وسىنداي پارتيانىڭ مەيىر شاپاعاتى شارتاراپقا شۇعىلا شاشىپ، باس شۋجي شي جينپيڭنىڭ «قوعام ورنىقتىلىعى مەن باياندى تىنىشتىق» باس نىساناسىن تىعىز توڭىرەكتەپ، جۇڭگو ارمانى الاۋلاعان ءساليحالى ساتتەردە، جۇڭگو كوممۋنيستىك پارتياسى دۇنيەگە كەلگەندىگىنىڭ 97 جىلدىق مەرەي تويى دا كەلىپ جەتتى.


    ماۋسىمنىڭ 30-كۇنى ساۋان اۋدانى بورتىنكو مال فەرماسى كوكالاشوقى قىستاق پارتيا ياچايكاسى، پارتيانىڭ تۋىلعان كۇنىن قۇتتىىقتاۋ بايلانىسىمەن، اۋەلگى ماقساتتى ۇمىتپاي، بورىشتى ەستە بەرىك ساقتاپ، ۋادەدە تۇرۋدى ماقسات ەتىپ «تەسكەن توعان رۋحى» تاقىرىبىندا ماڭىزدى قيمىل الىپ باردى. قىستاق پارتيا ياچايكاسى، قىستاقتا تۇراتىن قىزمەت اترەتى قىستاقتاعى پارتيا مۇشەلەرى مەن بەلسەندىلەردى ۇيىمداستىرىپ، 50 جىلدىڭ الدىندا بورتىنكو حالقىنىڭ قان تەرىمەن قالانىپ جاسالعان تەسكەن توعان قۇرىلىسىن كوزدەن كەشىرىپ، قايتپاس، قايسار بورتىنكولىكتەردىڭ ەگەي ەڭبەگىن ەسكە الىپ، تاريحتىڭ تاسقا جازىلعان تاڭباسىن تاماشالادى.


    سوناۋ 1968-جىلى ساۋان اۋداندىق پارتكوم مەن حالىق ۇكىمەتىنىڭ جەتەكشىلىگى مەن قامقورلىعىندا، بورتىنكو باۋرايىنداعى ەگىنشى-مالشى قاۋىم، ينجەنەر قاميتجاننىڭ ۇيىمداستىرۋىندا، ەڭبەكشىل قوس قولدارىنا سۇيەنىپ، 1500 مەتر ۇزىندىقتاعى تاۋ-تاستى تەسىپ، توعان الىپ، انجىحاي وزەنىنىڭ سۋىن وباتى جەرىنە جەتكىزىپ، تاريحتان بەرى تاندىر جەر اتانعان قۇلا ءتۇزدى سۋلاندىرىپ، بورتىنكو مال فەرماسىنىڭ ەگىن ەگۋ جانە مال سۋاتى قيىنشىلىعى مەن حالىقتىڭ اۋىز سۋ ماسەلەسىن تىپتەن شەشكەن بولاتىن.


    جارتى عاسىر بويى ىركىلىسسىز اعىپ، ساپاسىنا سىناداي سىزات تۇسىرمەگەن بۇل يگىلىكتى قۇرىلىستى جەرگىلىكتى حالىق «تەسكەن توعان» دەپ اتاپ كەلەدى. الايدا، وسى ءبىر حيكىمەتتى قۇرىلىستىڭ قاتپارىندا سول تۇستاعى ەڭبەكشى قاۋىمنىڭ وسكەلەڭ اقىل پاراساتى مەن اشتى تەرىنىڭ، ەڭبەكشىل قوس قولىنىڭ تابى جاتقاندىعىن مولشەرلەۋ قيىن.


    تەسكەن توعان قۇرىلىسىنا باستان اياق قاتناسقان، بۇل كۇندەرى جاسى 70 تى جەلكەلەگەن قارت پارتيا مۇشەسى اقان ءيىسباي ۇلى جاس پارتيا مۇشەلەرىنە: «تەسكەن توعاننىڭ قۇرىلىسى كۇردەلى، جۇمىستارى وتە ماشاحاتتى بولدى، حاۋىپ-قاتەر قاس-قاعىمدا تۋىلىپ وتىراتىن، ەسىمدە قالۋىنشا، سول كەزدەگى جاستار قول اياعىن تاس جانشىپ جاتسا دا، جىگەرلەرى جالىنداپ، رۋحتارى تاسقىنداپ، العان بەتتەرىنەن قايتپاۋشى ەدى. سەندەر بۇگىنگى باقىتتى تۇرمىستارىڭنىڭ سولاردىڭ جاپالى ەڭبەگىنىڭ بوداۋىنان كەلگەندىگىن ۇمىتپاڭدار، قاراقتارىم»،-دەدى.


    سوڭىندا پارتيا مۇشەلەرى تەسكەن توعان كومەيىنىڭ باسىنا جينالىپ، قيمىل بارىسىن قورتىندىلاپ، پارتيا تۋى الدىندا ۋادە بەرىپ، پارتياعا كىرگەن كەزدەگى سەرتتەرىن قايتالاي ەسكە الدى.


ساۋان اۋدانى 2-ورتا مەكتەپ