ىلە وبلىسى 8 قار شاڭعى لەنياسى مەن 22 ءتۇرلى قىس-كوكتەمدىك ساياحات قيمىلىن تانىستىردى
كەلۋقاينارى: |جاۋاپتى رەداكتور: | جاڭالانعان ۋاقىت:2018-12-04 17:26:00


تاياۋدا، ىلە قازاق اۆتونوميالى وبلىستىق ۇكىمەتتىڭ اقپارات كەڭسەسى «شەكاراداعى ىرىستى مەكەن. كوركەم ىلە» اتىنداعى قىس-كوكتەمگى ساياحات قىزمەتى جونىندەگى اقپارات جاريالاۋ ءماجىلىسىن اشىپ، 8 قار شاڭعى لەنياسىن، 22 ءتۇرلى قىس-كوكتەمدىك ساياحات قيمىلىن تانىستىردى.


قىسقى ساياحات ونىمىمەن قامداۋ مولشەرىن مولايتۋ جاعىندا، ىلە وبلىستىق ساياحات مەكەمەسى شينجياڭنىڭ ءىشى-سىرتىنداعى ايگىلى ساياحات مەكەمەلەرىمەن بىرلەسىپ، توعىزتاراۋ اۋداندىق قار- مۇز سپورت ورتالىعى، قۇلجا قالاسىنداعى كوركەم باتىس ءوڭىر قار شاڭعى الاڭى، قاراجون قار شاڭعى الاڭى، موڭعۇلكۇرەدەگى حانتاڭىر قارشاڭعى الاڭى، قورعاس اۋدانىنداعى ساربۇلاق قارشاڭعى الاڭى، قۇلجا اۋدانىنداعى كوڭىلدى قارشاڭعى الاڭى، شاپشال سىبە اۆتونوميالى اۋدانىنداعى نۇراحۇن قارشاڭعى الاڭى سياقتى 8 قار شاڭعى لەنياسىن اشتى. سونىمەن بىرگە قۇلجا-اققۋ بۇلاعى- كۇنەستىڭ ناراتى ارالىعىنداعى 3 كۇندىك ساياحات، قۇلجا- تەكەستىڭ قاراجونى- موڭعۇلكۇرە ارالىعىنداعى 3 كۇندىك ساياحات، قۇلجا- قورعاس اۋدانى- قورعاس شەكارا وتكەلىندە زات ساتىپ الۋ 2 كۇندىك ساياحاتى سىندى قىس كەلبەتىن تاماشالاۋ، فوتو سۋرەتكە تارتۋ، زات ساتىپ الۋ ساياحات لەنياسىن اشتى. قار- مۇز ساياحات مەرەكەسى، جاڭا جىل بايلانىسىمەن زات ساتىپ الۋ مەرەكەسى، مىقتى شەبەرلەردىڭ قارداعى دالالىق جارىسى، قىسقى سوعىم مەرەكەسى، بۇتحانا بازارى شىراق جارمەنكەسى سىندى 22 ءتۇرلى قىس-كوكتەمگى ساياحات قيمىلدارىن جوسپارلاپ، 2019-جىلى 3-ايعا دەيىن جالعاستىرماقشى.


سونىمەن بىرگە، ىلە وبلىستىق ساياحات مەكەمەسى قىسقى ساياحاتتى ۇگىتتەۋ، ساتۋ تەبىنىن ارتتىرىپ، «شەكاراداعى ىرىستى مەكەن. كوركەم ىلە» اتىنداعى قۇلجادان شاڭحايعا قاتىنايتىن ساياحات ارناۋلى پويەزىن جۇرگىزۋمەن بىرگە، قاتىستى اۋدان-قالالاردىڭ ساياحات كاسىپورىندارىن ۇيىمداستىرىپ، 2018-جىلعى جۇڭگو ساياحات كاسىبى كورمەسى، 2018-جىلعى جۇڭگو حالقارالىق ساياحات ساۋدا كورمەسى جانە 2018-جىلعى دۇنيە جۇزىلىك دەمالىس ساياحات كورمەسىنە قاتىناستىردى .


قىسقى ساياحاتتاعى بازاردىڭ قىزمەت وتەۋ ساپاسىن جوعارىلاتۋ جاعىندا، ىلە وبلىستىق ساياحات مەكەمەسى شينجياڭعا باعىتتامالى كومەكتەسۋ قارجىسىنا سۇيەنىپ، ساياحاتتىڭ اكىمشىلىك باسقارۋشىلارى كۋرسىن جانە ساياحاتپەن شۇعىلدانۋشىلار كۋرىسىن اشىپ، تۇتاس وڭىرلىك ساياحات ارناۋلى تاقىرىپتىق كۋرىسىنە قاتىناسۋعا ۇيىمداستىرىپ، قىسقى ساياحات مازمۇنىندا ارناۋلى تاقىرىپ بەلگىلەپ، قىسقى ساياحاتتىڭ ساياحاتشى قابىلداۋ، قىزمەت وتەۋ ساپاسىن ۇزبەي جوعارىلاتتى.


بۇدان سىرت، «13-بەسجىلدىق » پىلان كەزىندە، ىلە وبلىسىنا توتە قاراستى ورىندار ساياحات نىسانىنان 46 سىن تۇيىندى سالماقشى، مەجەمەن بۇلارعا قوسىلاتىن جالپى قارجى 27 ميلليارد 165 ميلليون يۋان بولماق. بيىل 1-ايدان 10-ايعا دەيىن، ءتۇيىندى ساياحات نىساندارىنا قوسىلعان قارجى 2 ميلليارد 743 ميلليون يۋانعا جەتتى. جۋىق جىلداردان بەرى، ىلە وبلىسىنا توتە قاراستى ورىنداردا ءتۇيىندى ساياحات نىساندارىنا قوسىلعان قارجى 6 ميلليارد 801 ميلليون يۋان بولدى.


حاباردى جازعان: بايسۇلتان نۇپتەبەك ۇلى (شينجياڭ حالىق راديو ستانسياسىنىڭ ءتىلشىسى)