جازدا موڭعۇلكۇرە اۋدانىنىڭ 10 مىڭ مۋلىق قىشى گۇل اشىپ، ۇلان-بايتاق ساحارا تۇلپار تۇياعىمەن دۇبىرلەپ، ايبىندى دا اسەم كورىنىس قالىپتاستىردى
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2019-08-01 15:31:00


    جازدا موڭعۇلكۇرە اۋدانىنىڭ كۇدىر ساحاراسى جاسىل ماناتقا ورانىپ، قارلى تاۋدىڭ باۋرايىنداعى 10 مىڭ مۋلىق قىشى گۇل اشىپ، قۇزارى اپپاق قارمەن ورانعان اسقار تاۋلار مەن التىن سارى گۇلدى القاپ ءبىر-بىرىمەن توعىسىپ، وسىناۋ ۇلان- بايتاق سايىن ساحارا تۇلپار تۇياعىمەن دۇبىرلەپ، ايبىندى دا اسەم كورىنىس قالىپتاستىرادى.


    سوناۋ قارلى تاۋدىڭ باۋرايىنداعى ساحارادا، شاباندوزدار سايكۇلىكپەن وقشا زىمىراسا، ءۇيىر-ءۇيىر جىلقىلار ويقاستاي شاۋىپ، قالىڭ جىلقىنىڭ تۇياعىنان ءبىر ءسات شاڭ كوتەرىلىپ، دالا ءتوسى ات تۇياعىمەن دۇبىرلەپ، اسا ايبىندى كورىنىس كوز الدىڭدا كەستەلەنىپ، جۇرەك قىلىڭدى شەرتەدى. لياۋنيڭنان كەلگەن فوتو سۋرەت اۋەسكەرى لۇي يۇڭگاڭ وسى تاماشا ءساتتى فوتو اپاراتىنا ءتۇسىرىپ ۇلگىردى. ول:«ەرەكشە تەبىرەندىم، جانىڭدى ەلەگىزەدى! مۇنداي سالتاناتتى كورىنىستى كورگەنىم وسى ەكەن»،-دەدى.


    يۇنناندىق ساياحاتشى ليۋ شاۋحۋا بىلاي دەدى: «ءٴبىز يۇنناننان كەلگەنبىز، مۇنداي قالىڭ جىلقىنىڭ ساحارا توسىندە قۇيعىتا شاپقان كورنىسىن تۇڭعىش كورىپ تۇرمىز، قاتتى تەبىرەندىم. گۇلدەنىپ-كوركەيگەن، بەرەكە-بىرلىكتىڭ رۋحاني بەينەسى مەنمۇندالايدى، ۇدىرە العا ۇمتىلۋ بىزگە شابىت سيلادى، جىگەرىمىزدى تاسقىنداتتى، مۇنداي وراي ەكىنىڭ بىرىندە كەزدەسپەيدى، ايىرىقشا قاستەرلەۋگە تاتيدى.»


    ۇعىسۋعا قاراعاندا، موڭعۇلكۇرە اۋدانىندا قازىر، 110 مىڭنىڭ ۇستىندە جىلقى بار ەكەن. موڭعۇلكۇرە جىلقى شارۋاشىلىعىنىڭ ۇزدىكسىز دامۋىنا وراي، ءار جىلى ساياحاتتىڭ قاۋىرت مەزگىلىندە، موڭعۇلكۇرە اۋدانى «ات ويىنى» قيمىلدارىن وتكىزۋدى داعدىعا اينالدىرعان، وسى مەزگىلدە، ادامدى ەلىتەتىن كوكپار تارتۋ، ات بايگەسى، ات ءۇستى ويىندارى سياقتى قيمىلدار وتكىزىلىپ، موڭعۇلكۇرە اۋدانىنىڭ ٴءداستۇرلى جىلقى مادەنيەتىن ساۋلەلەندىرۋمەن بىرگە، جازعى ساياحاتتىڭ تانىمالدىعىن ارتتىرىپ، جەرگىلىكتى ورىنداعى ەگىنشى ـ مالشىلاردىڭ كىرىسىن جوعارلاتىپ، اۋقاتتانۋىنا تىڭ جول اشقان. ءار جىلى ات جالداۋدىڭ وزىنەن ٴار مالشى وتباسى 10 مىڭ يۋاننىڭ ۇستىندە كىرىس كىرگىزەدى ەكەن. مالشى ولجامەنكى: «ءبىز 10 مىڭنان استام جىلقىنى شۇبىرتىپ ايداپ وتتىك، موڭعۇلكۇرەنىڭ كۇدىر ساحاراسىنان ساياحاتشىلار 10 مىڭ سايكۇلىكتىڭ شاۋىپ وتكەن كورنىسىن تاماشالاپ، سۋرەتكە الىپ، ساحارا كوركىنەن ءٴلاززاتتاندى»-دەدى.


بايسۇلتان نۇپتەبەك ۇلى (شينجياڭ حالىق راديو ستانسياسىنىڭ ءتىلشىسى)