ينفورماتسيا اشكەرەلەۋ: mzjubao@cnr.cn

ادەبيەت ارناسى

مىنەزدەمەلەردەن تۇيگەن وي تۇيىندەرى

来源:جۇڭگو قازاق راديو تورابى     |责编:阿依娜古丽|     发布日期: 2019-09-28 16:29

سىمايىل ىسقاق ۇلى

*قاڭقۋ سوزدەن اۋلاق، وعان جانى قاس، ءوزى جايلى ونداي ءسوز ەستىسە ونى مىسە تۇتپاي، جايدارلى مىنەز تانىتاتىندار-ناعىز ساباز جاندار.


*پەندەلەردە ىشىنە شىنتاق ايلانبايتىنداردى ادامنىڭ ەڭ ناشارى دەگەن وڭ.


*سەنىڭ قۋانىشىڭدى، ەل سۇيىنەر جاقسى ءىسىڭدى كورسە دە كورمەسكە سالىنىپ، ول جايىندا جاق كىرىسىن اشپايتىندار قاسىڭنان دا جامان.


* ىلعيدا وزىنىكىن ءجون سانايتىن، اسقان ءوزىمشىل، ونان قالسا ءمىنى، كەمشىلىگى، ۇياتتى ءىسى بولا تۇرا، ونى مويىندامايتىندار-ناعىز بەتپاقتىڭ ٴوزى. ول ايلانىپ كەلگەندە بىلىمسىزدەردىڭ قاتارىنان ويىپ ورىن العان جان.


*ءوزىڭ باردا مايموڭكەلەپ ىشىڭنەن كىرىپ، سىرتىڭنان شىعاتىن، ال، سەن جوقتا باسقاشا پوزيتسيا ۇستاناتىندار تۇبىندە سەنى ورعا يتەرەدى.


*تينامداي نارسەگە قولى جەتە قالسا كىسىمسىپ، ەجىرەيە قالاتىنداردىڭ ميعۇلادان ەش پارقى جوق.


*قورمال دا قايىرىمدى، قولدان كەلەر جاقسىلىعىن ايامايتىن كىسىگە توبەڭنەن جول بەرسەڭ دە ورىندى.


*ءىسى مەن ارەكەتى ەكى باسقا، سوزىنەن تياناقتى ءبىر ويدى اڭعارۋعا بولمايتىن، تۇرلاۋسىز، جالتاقوي جاندار جانىڭدا جۇرسە، ساعان كوڭىلسىزدىك پەن اۋىرەشىلىك تۋدىرعاننان باسقا تۇك تە سەپتىگى تيمەيدى. وندايلارمەن وي ورتاقتاستىرۋىڭ قيىننىڭ قيىنى.


*وزگە جاندى بويىڭا توعىتپاساڭ ول دا ساعان سولاي پيعىل تانىتادى. كەيدە بىرەۋدىڭ ساعان يىلگەنى ونىڭ السىزدىگى ەمەس، سۇڭعىلالىعى.


*باسقالاردىڭ قولىمەن شوق ۇستاۋعا اۋەس جاندار تۇبىندە سول شوققا ءوزى كۇيەدى.


*ءوزىن كوتەرمەلەۋدى، ۇنەمى ءوزى جايىندا ءناسيحاتتاۋدى ءارى باسقالاردىڭ وزىنە ءتيىمدى پىكىر-تانىمدا بولۋىن كوكسەيتىندەردىڭ پاسىقتاردان ەش ايىرماشىلىعى جوق. ناعىز پاراساتتىلار اتاققۇمارلىقتى، ماقتاۋ مەن قولپاشتاۋدى جانى سۇيمەيتىن قاسيەتىمەن كوپكە قادىرلى.


*قاي-قاشاندا وزىنىكىن عانا ءجون ساناپ، ءوزىن باسقالاردان جوعارى قويۋ-ەسەرسوقتىقتىڭ بەلگىسى.


*تۋراشىل، كوپشىل، كىشى پەيىل كىسى-ناعىز كەمەڭگەر ادام.


*عايباتقا ءۇيىر كەيبىرەۋدىڭ ماڭايىنداعىلاردى وسەككە قوسىپ، كوڭىلدەنگەنى قاي جەتىسكەندىگى دەيسىڭ . وسىندايلار الدىمەن ءوزى وسەككە ىلىگەدى.


*اق-قارانى شىنايى پارىقتاپ، ناعىز شىندىقتان اۋىتقىماۋدىڭ ءوزى ۇلكەن ەرلىك پەن كىسىلىك.


*پايدا ءۇشىن جۇرگەن دوس تۇبىندە وپا قىلمايدى. ءمۇبادا بىرگە ءجۇرىپ قيىنشىلىققا جولىقساڭ، سەنى ‹‹جارعا›› يتەرىپ كەتە بەرەدى.
*قولدىڭ قىسقالىعى ايىپ ەمەس، اقىل مەن تۇيتىكتىڭ جوقتىعى-ەڭ ۇلكەن كەدەيلىك.


*ادامنىڭ شىنايىلىعى سوزىندە ەمەس، ارەكەتىندە. شىنايىلىقتى جۇرەگىمەن جەتكىزە العاندار جۇرەكتەن ورىن الادى.


*باسقالاردىڭ وزىڭە قىزۋ مەرەيلى مامىلەدە بولۋىن ءۇمىت ەتسەڭ، الدىمەن ءوزىڭ سولاي ىستەۋدى ۇيرەن.


*ادالدىقتى اۋىزدا ايتۋ وڭاي بولعانىمەن، شىنايى سولاي ىستەۋگە اسا ەستىلىك قاجەت.


*كوڭىلدى اۋىرتقان كىسىگە كەشىرىممەن قاراۋدىڭ ءوزى دە بىلىكتىلىك.


*كىسىلىك قاتىناستا وزگەلەردىڭ كۇلىمسىرەي قاراعانىنا تالعامدى بولعاننىڭ زيانى جوق. بىرەۋ كۇلىمسىرەي ريزاشىلىعىن بىلدىرەدى، بىرەۋ مىسقىلداي كۇلىمسىرەيدى، ال بىرەۋ زورلانا كۇلىمسىرەيدى . ءبارىنىڭ ءوز ەسەبى وزىندە. ءبىراق، ىزگى كۇلكىدەن سول ادامنىڭ جارقىن بەينەسى مەنمۇندالاپ تۇرادى.


*جاقسىلىعىڭدى اياماساڭ دا، ساعان بوگدە نيەتتە بولاتىنداردىڭ كىسىلىك ساپاسىنىڭ قاي دەڭگەيدە ەكەنىن اڭعاۋ قيىن ەمەس.


*كەيبىرەۋ ءىسىنىپ، كۇپىنىپ، نىعىزدانىپ جۇرگەنىمەن، وزىنەن جوعارىلاردى كورسە قۇرشا جورعالايدى.


*جاقسى ءسوز ايتساڭ جالباڭدادى، جاعاتسىدى دەيتىندەردى جارىمەستەرگە تاۋەلدەمەسكە شارا جوق.


* ات-اتاعى بارلارعا جۇعىسا قالسا، ءوزىن ابىرويلى سانايتىندار، ءىس جۇزىندە، ەڭ بەيشارا جاندار.


*سەن ءۇشىن وتقا كۇيىپ، سۋعا تۇسكەن اعايىنعا ات مىنگىزىپ، اتان تۇيە جەتەكتەتسەڭ دە ازدىق ەتەدى. ال، وعان ءوزىڭنىڭ دە سونداي نيەتتە بولعانىڭ-ازاماتتىعىڭ، بىلىمدىلىگىڭ.


*باس-اياعىڭا سىناي قاراپ، ءسوز-قيمىلىڭدى اڭدىپ تۇراتىن پەندەنىڭ ءوزىنىڭ ءماز بولۋى ناعايبىل.


*ۇلەسىڭدى جوققا شىعارىپ، ناتيجەنى وزىنە تاۋەلدى ەتەتىندەردەن جاقسىلىق دامەتۋدىڭ قاجەتى جوق.


* كەيدە ارتىقشىلىعىڭا وزگە ەمەس، ەت جاقىنىڭ دا توسىرقاي قاراپ، پەندەشىلىك تانىتادى.


*ەڭ ۇلكەن وكىنىش-ەڭ جاقىن ادامىڭنىڭ وپاسىزدىق ىستەگەنى. ءبىراق، وپاسىزدار تۇبىندە مارقادام تاپپايدى.


*بىلە تۇرا بىلمەسكە سالىنۋ، قولىنان كەلسە دە قول ۇشىن بەرمەۋ-ەڭ ۇلكەن كەمىستىك.


*باسقالار جايىندا ۇنەمى جاقسى ءسوز ايتىپ جۇرەتىن ادام-ەڭ قادىرلەۋگە ءتيىستى ادام.


*قاساقانا ءمىن تاعىپ، ىسىڭە ىلعيدا كەسە-كولدەنەڭ بولاتىن قيتۇرقىلار ءوزى سونداي پيعىلىنان زارداپ شەگەدى.


*قاشان دا ساعان وڭ قاباق تانىتپايتىن ادام اۋەلدە ساعان دۇرىس نيەتتەگى جان ەمەس.


*باسىڭا ءىس تۇسكەندە قاسىڭنان تابىلىپ، قول ۇشىن بەرىپ مەدەۋ بولعان كىسى-ناعىز دوسىڭ.


*پىكىرىڭدى قۇپتاعان-قۇپتاماعانىن پارىقتاۋعا بولمايتىن كىسىدەن جاۋاپكەرشىلىكتىڭ نىشانىن بايقاۋ قيىن.


*ماسەلەگە دەربەس كوزقاراسى جوقتار الدىمەن وزىنە، ونان كەيىن ماڭايىنداعىلارعا قيىندىق تۋدىرادى.


*جانى جايساڭ، كەڭ پەيىلدىلەر جاماعايىندارىنا تىلەۋلەس بوپ، قۋانىشىنىڭ باياندى بولۋىن اڭساپ جۇرەدى. ال، بوسقا قارا تالاسىپ جۇرەتىندەردىڭ ىشكى كۇيزەلىسى وڭىنەن ءبىلىنىپ شارشاپ جۇرەدى.

*اعاتتىعى مەن كەمشىلىگىن تاني ءبىلۋدىڭ ءوزى دە بىلىمدىلەرگە ءتان قاسيەت.

中央广播电视总台 央广网 版权所有