ينفورماتسيا اشكەرەلەۋ: mzjubao@cnr.cn

ادەبيەت ارناسى

ماحاببات قابىرى

来源:جۇڭگو قازاق راديو تورابى     |责编:阿依娜古丽|     发布日期: 2019-11-26 09:24

    ھ.بلوچۋرىن (گوللانديا)

 

حانزۋشادان اۋدارعان: ريشات سابىرباي ۇلى


    سولتۇستىك تەڭىز جاعالاۋىنداعى اندىز-اندىز قۇم توبەشىكتەردىڭ اراسىندا بالىقشىنىڭ جۇپىنى عانا شاعىن لاشىعى كوزگە تۇسەدى. داۋىل تۇرسا بولعانى تەرەزەنىڭ اينەكتەرى مەن كاسەكتەرى شارقىلداي بىرگە شۋىلداپ قويا بەرەدى دە، پەشتەگى قىزۋ جالىن تىك شاپشىپ لاپ ەتە قالاتىن.


    دەسەدە، قۇلاققا ۇرعان تاناداي جىم-جىرتتىققا شومعان بۇل كەشتە سامسىعان سانسىز جۇلدىزداردىڭ جىلتىداعان ساۋلەسى ەش تولقىنسىز مۇلگىپ جاتقان تەڭىز بەتىنە تامىپ كەتىپ جاتقانداي ەدى. تەك، جاعانى ناراۋلانا سۇيكەي قايتقان سۋدىڭ بولىمسىز دىبىسى عانا كەلەدى. قۇم توبەشىكتەردە كۇمىس ساۋلەسىن ويناتقان اي ساعىمى تەڭىز بەتىندە دوڭگەلەنە سىرعيدى.


    لاشىقتىڭ جاتاعان تەرەزەسىنەن ولەۋسىرەگەن شام جارىعى دىرىلدەپ تۇردى دا، ءسونىپ قالدى. بالىقشى ۇيقىعا كەتكەن بولۋى كەرەك. بارلىق ءۇنسىز مۇلگىگەن توبەشىكتەر دە، جاعانى اياۋسىز ۇرعىلايتىن تەڭىز تولقىنى دا قالجىراعانداي جىم-جىرتتىققا ۇلاسىپ، ەرتەڭگى كۇننىڭ دولى داۋىلى قايتا كوتەرىلگەنشە بويىنا جان شاقىرىپ، مىزعاپ العىسى كەلگەندەي. سونادايدا قاراڭعى تۇننەن ۇرەيلەنگەن شاعالالاردىڭ ءۇنى دە بىرتىندەپ بارىپ تىنىپ قالدى دا، ەندى تىپتەن، ءولى تىنىشتىق ورناعانداي ەدى.


    وسى ساتتە، ەسىك اشىلعانداي بولدى دا، شاعىن لاشىقتان بۇيرا سارى شاشتى ءبىر قىز بالا شىعا كەلدى. يىعىنا توگىلگەن شاشىن تۇنگى سامال جەلپىپ، قايراڭعا بەت العان قىزدىڭ ەپپەن باسقان ءار ادىمىنىڭ داۋىسى قۇلاققا كەلەدى.


    جاعاعا جەتكەن ول توقتاي قالدى دا، كىشكەنتاي گۇل ءتاجىسىن الىپ شىعىپ، سۋ بەتىنە قويا بەرىپ ەدى، از قالىقتاپ تۇردى دا، تەڭىز سۋىنىڭ تولقىنىمەن ارپالىسىپ كەتە باردى.


    تۇنگى الەمدى ءسۇت ساۋلەسىمەن بەزبەندەگەن اپپاق اي، تۇڭعيىققا باتىپ بارا جاتقان گۇل تاجىسىنەن كوز ايىرماي، ءۇنسىز عانا قاراپ قالعان قىزدىڭ قارداي اپپاق بىلەگىنەن قۇشىرلانا ءوبىپ تۇردى.


ء    يا، ول بالىقشىنىڭ كىشى قىزى بولاتىن. ءار كۇنى كەشتە تەڭىز جاعاسىنا بارىپ، تەرىپ العان گۇل شوقتارىن قيىرداعى عاشىعىنا سالەم رەتىندە تەڭىزگە جىبەرەتىن. تەڭىزدىڭ ارعى بەتىنە ساپار شەككەن عاشىعىنان كۇنى-بۇگىنگە دەيىن ەشقانداي حات-حابار بولمادى، ءولى-ءتىرىسى دە بەلگىسىز، ونى ەندى قايتا كورەتىن كۇن تۋارما... دەگەنمەن، قىز، ماحابباتى ءۇشىن بارلىعىنا ءتوزدى، تاڭىرگە جالبارىنىپ، كۇدەرىن دە ۇزبەدى.


    راس-اۋ، سوڭعى رەت قۇشاقتارى اجىراماعان ولار ماحابباتتارىنىڭ كۋاسى رەتىندە كەش سايىن جۇلدىزدار سامسىپ، اي كوتەرىلگەندە. ءبىر ۋاقىتتا عاشىقتىق جىرىن ايتۋدى ۋادەلەسكەن دە بولاتىن.


    مىنە ەندى، قيىردا كەمەنىڭ ماچتاسىنىڭ ۇشار باسىنا ورمەلەپ شىققان جىگىتكە كوز جەتكىسىز كوك تەڭىزدەن باسقا ەشتەمە كورىنەر ەمەس. «...سۇيىكتىم قايدا ەكەن-دەشى، تەرىستىك تەڭىز جاعالاۋىنداعى مەكەنىندە ساعىنىشپەن جۇدەپ ءجۇر-اۋ...».


    ايدىڭ بوزعىلتىم ساۋلەسىنە شومعان قىز تەڭىز جاعاسىندا سۇيىكتىسىنە دەگەن شەكسىز ساعىنىشىن باسا الماي، سامسىعان جۇلدىزدارعا قاراپ، سىڭعىرلاعان داۋىسىمەن عاشىقتىق عازالىن اۋەلەتە ءتۇستى. جىم-جىرت تۇندە شارىقتاعان، جاندى ەلىكتىرەر تۇنىق تا، اسەم ءۇن الىسقا تاراپ جاتتى.


    ءلۇپ ەتكەن جەلەمىككە ءدىر ەتە قالعان قىز تۇپ-تۇنىق تۇنگى اسپانعا تاعى ءبىر رەت كوز تاستادى دا، اقىرىن عانا باسىپ، ۇيىنە بەت الدى. كوڭىل تۇپكىرىنەن سۇيگەنىنە دەگەن كىرشىكسىز سەزىممەن: «قايداسىڭ جانىم، قازىر دە سول ءبىر قاتىگەز تەڭىز ايدىنىندا جابىرقاپ جۇرسىڭ بە؟!!...»-دەگەندى قايتالاي بەردى.


    سول كۇنى كەشتە نوسەرلى داۋىل تۇردى. كوك ءجۇزىن تورلاعان قارا بۇلت پەن جوڭكىلگەن اساۋ تولقىن جۇرەگىن العان شاعالالار شوشىنا ۇشادى. كۇندەگىدەي تەڭىز جاعاسىنا بارعان قىز ءبىر شوق گۇلىن سۇيگەنىنە جىبەردى دە، كادىمگىدەي ماحاببات ءانىن اسقاقتاتا شىرقادى.


    قۇتىرىنا سوققان داۋىل جىبەكتەي شاشىن جۇلمالاپ، سۇيكىمدى دە، سۇلۋ بەينەسىن سۇرەڭسىز كورسەتۋگە تىرىسقانداي، ورشەلەنە اپتىققان تولقىندار اپپاق بالتىرىنا كەلىپ جارماسادى.


    وسىنداي ارپالىستى كۇندەرىمەن جىلدار سىرعىپ جاتتى. قايتىپ ورالار دەگەن سۇيىكتىسىنەن حابار بولمادى. جەلكەندەرىن جايىپ، الىستان كەلىپ، سابىلىپ جاتقان كوپ كەمەلەردىڭ بىرىمەن كەلىپ قالار دەگەن ءۇمىتى دە ورىندالمادى.


    ادەمى سوزدەرىمەن جارامساقتانىپ، باتىرسىنا سويلەگەن تەڭىزشىلەردىڭ جىلتىراق لەبىزدەرىنە ەلەڭ ەتىپ تە قويمادى. قۇلاعىنا تەك، كوڭىل تۇكپىرىندەگى عاشىعىنىڭ ءۇنى جاڭعىرىپ تۇرىپ الدى.


    كۇن ارتىنان كۇن، جىل ارتىنان جىلدار اۋناپ جاتتى. قىزدىڭ اقشا قارداي اپپاق جۇزىنە سارعايعان ساعىنىش پەن قاتىگەز قايعىنىڭ قاسىرەت تابى ۇيالاپ، كۇننەن-كۇنگە جۇدەپ، مولدىرەگەن قوس جانارىنىڭ جاسى قۇرعامادى. ءيا، بۇل كۇندە ول ونىڭ ماڭگى قايتىپ ورالماسىنا كوزى ابدەن جەتكەندەي ەدى.


    سۋىنعان جۇرەك،... ەندىگارى، قارا ءتۇندى جامىلىپ، عاشىقتىق عازالىن ايتۋدى دا دوعاردى. ۇيتكەنى، بۇل كۇندە كەمە ماچتاسىندا شىرقالاتىن جىگىتتىڭ ماحاببات ءانى الدە-قاشان كەلمەسكە كەتكەن ەدى. دەسەدە، سول ءبىر شوق گۇلدەر ءار كۇنى كەش تەڭىز تولقىندارىمەن بۇرىنعىداي قاۋىشىپ جاتتى. ءيا، بۇل ەسكەرتكىش-«ماحابباتىنىڭ» ماڭگىلىك قابىرىنا اينالعان تەلەگەي تەڭىزگە ارنالماق...

中央广播电视总台 央广网 版权所有

ماحاببات قابىرى

سولتۇستىك تەڭىز جاعالاۋىنداعى اندىز-اندىز قۇم توبەشىكتەردىڭ اراسىندا بالىقشىنىڭ جۇپىنى عانا شاعىن لاشىعى كوزگە تۇسەدى. داۋىل تۇرسا بولعانى تەرەزەنىڭ اينەكتەرى مەن كاسەكتەرى شارقىلداي بىرگە شۋىلداپ قويا بەرەدى دە، پەشتەگى قىزۋ جالىن تىك شاپشىپ لاپ ەتە قالاتىن.