ينفورماتسيا اشكەرەلەۋ: mzjubao@cnr.cn

ادەبيەت ارناسى

قونجىق پەن قويان4

来源:جۇڭگو قازاق راديو تورابى     |责编:古丽美热|     发布日期: 2020-01-02 09:04

    ايدوس امانتاي

بالاپان راباتوۆ اۋدارماسى 

قايىرلى كۇن، قادىرلى وقىرمان:

العاش اكبار ٴماجيتتىڭ «قايران ونبەستەگى حاليدا-اي» دەگەن اڭگىمەسىن شونجى دەگەن اۋىلدا، تولىقسىزداعى كەزىمدە قىزىعا وقىعان ەدىم. اڭگىمەنى قازاقشالاعان ساعات جايپاق ۇلىنىڭ ەسىمى دە وسىناۋ تارتىمدى شىعارمانىڭ ىقپالىمەن الىستاردى ارالاپ كەتكەن-دى. ال قازىر ساعات اعانىڭ نەمەرەسى ايدوس امانتاي دا اكبار ٴماجيت، ەركەش قۇرمانبەكتەن كەيىنگى حانزۋ تىلىندە شىعارما جازاتىن جاڭا ۇرپاق قالامگەرلەر قاتارىندا.
تومەندە ايدوستىڭ «قونجىق پەن قويان» دەگەن اڭگىمەسىن تاقىرىپقا ٴبولىپ ۇسىنامىز. 

                                                                                
العاشقى ماحاببات


ول سۇلۋ ەدى، ءالى دە سونداي سۇلۋ ەكەن. سىمباتىنا كوز جۇگىرتتىم. ونىڭ ءتۇر-تۇلعاسى سول باياعى13جاستاعى قالپىنان وزگەرمەگەن سەكىلدى. ولاي بولۋى مۇمكىن ەمەس قوي ارينە. بۇل تەك عانا مەندەگى ماحابباتتىڭ شىنايىلىعىن بىلدىرەدى. تىزبەكتەلگەن تىرشىلىك كارتيناسى-اي، ەشتەڭەنى ۇعىندىرمايدى، ەش نارسەگە دە سايمايدى. ءومىر دەگەن وسى.


مەنى بەلگىسىز بەيمازالىق بيلەدى.كەزىندە مەنىمەن ۇيلەنبەگەنىن ايتىپ “ءنادۇرىسسىڭ” دەپ سوكتىم.


ول قايىرا سۇراق قويدى: “مەنى سۇيگەن سوڭ دۇنيە وزگەرىپ كەتتى دەيسىڭ، نەگە؟”

 
”نەگە دەيتىن نەگەسى جوق، قىسقاسى وزگەردى، ءبىتتى. “


” سوڭىڭنان قالماي قويعانىم ءۇشىن ابدەن مەزى بولدىڭ دا دۇنيەنى قاساقانا وزگەرتىپ جىبەردىڭ“ دەدىم. ”جاقسى بالا ەمەس شىعارمىن، سوعان بولا دۇنيەنى وزەرىتكەنىڭ نە جورىق؟“ دەپ جازعىرا سۇراق قويدىم.

 
جاۋاپ بەرە المادى، ويتكەنى مەن نادۇرىسپىن. كۇلگەن بوپ قۇتىلدى.

 
”كۇلكىڭدى ۇناتامىن“ دەدىم.”نەگە؟“ دەدى.”كۇلگەنىڭ تورەشىگە ۇقسايدى، ءارى باپكەردىڭ تەرەڭ ماحابباتى دا قامتىلعان“ دەدىم.


ول ىشەك-سىلەسى قاتىپ“عاشىقتار لەبىزىنە مامانىسىڭ” دەدى، مەن وعان “ايتقانىمنىڭ ءبارى راس” دەدىم.

ول مەنىڭ فوتبولدى مىسالعا الىپ سويلەۋ داعدىسىنان ءالى كۇنگە دەيىن جاڭىلماعانىما قايران قالدى. مەن وعان فوتبولدى جاقسى كورەتىنىمدى ايتتىم


“قىزىقتى سوزدەرىمە بولا مەنىمەن ۇيلەنەرمە ەدىڭ؟” دەپ ەدىم، ءوڭىن سۋىتا قويدى.


قىزىقتىڭ كوكەسى وسى بولار دەپ ويلادىم.


سۋ قامالىنىڭ بويىنا تاياعاندا مەن وعان الىستاعى ءبىر ءۇيدى نۇسقاپ”بۇرىن ءبىر دوسىم بار ەدى، سوندا تۇراتىن، كەيىن شەتەلگە شىعىپ، ۇيلەنىپ، سودان قايتىپ كەلگەن جوق“ دەدىم.

 
” وقاسى جوق“ دەدى ول دوسىممەن قاتىسى جوقتىعىن ءارى تانىمايتىندىعىن ايتىپ.


”قاتىسىڭ بار“ دەپ ەدىم، ”قالايشا“ دەپ سۇرادى.

” بالاعا بارلىق ادام وتە ماڭىزدى، سەبەبى دوستار تانىسۋدان بۇرىن تۇگەل بەيتانىس جاندار، دەمەك، نەگە قاتىسى بولماسىن. كىشكەنتاي كەزىمىزدە كارتاداعى دوسىمىزدىڭ ءۇيىن شەڭبەرمەن قورشاپ قوياتىنبىز. ول مىنا كوشەدە تۇرادى ەمەس، ونىڭ تۇرعان جەرى مىنا كوشە دەۋشى ەدىك. ءبىز الگىندەي لوگيكامەن جەر اتتارىن جاتتاۋدان كەشكەندىكتەن باقىت بارعان سايىن الىستاپ بارادى. “

ول ەداۋىر ۋاقىت ويلانىپ بارىپ بىردەڭە ايتقىسى كەلدى، ەداۋىر وي جۇگىرتتى، ءبىراق، ەشتەڭە ايتپادى.


كوزىنە قارادىم. ونىڭ قارا ءتۇستى ىقشام كيمگە ورانعان جان-الەمى الدە قاشان ءاجاپتاۋىر وزگەرگەن ەكەن. ءجۇزىن وزىمە قاراتىپ، ەرنىنەن قايتا-قايتا سۇيە بەردىم. مەن باياعى كىشكەنە بالامىن نەمەسە ءنادۇرىسپىن، مۇبادا سەن وسىلاي اتاۋدى قالاساڭ ارينە. مەن ۇلكەندەرشە ءسۇيۋدى بىلمەيمىن. ءوزىمنىڭ سۋلانعان دىمقىل ەرنىمدى ونىڭ ەرنىنە قاتتى-قاتتى تيگىزەمىن. قورقامىن. اشۋلانىپ، شاپالاقپەن تارتىپ جىبەرەمە دەپ جۇرەكسىنەمىن.

ءبىراق ول ەشتەڭە بولماعانداي كۇلىپ قويدى.


سونىمەن اۋەلگى تاقىرىپتى اسىعىس تاستاي بەرىپ جاي عانا”دوپ جارىسىن كورەسىڭ بە“ دەپ سۇرادىم. ” فوتبول؟ كورمەيمىن.“ دەدى ول.

”فوتبول جاقسى عوي، ويتكەنى وندا ەرەجە بار، ال ءومىر ولاي ەمەس. “


” نەلىكتەن؟“


” فوتبولدا دوپ قاقپاعا كىرسە عانا بولدى. دوپتى كوپ كىرگىزگەن كوماندا ۇتادى. ال، ومىردە – جەڭىمپازدى ءوزىمىز بەلگىلەيمىز.“


” وي-قيالىمنىڭ تىم اۋساي كەتەتىنى، ونىڭ ۇستىنە دۇنيەمەن سەلبەسپەۋ كوزقاراسىن ۇستاناتىنىم ساعان ايان. سونىڭ سالدارىنان جىندى، نادۇرىسقا اينالدىم. ءبىراق سەنى سۇيەتىنىم راس، سەن دە مەنى سۇيەسىڭ،ءسويتە تۇرا الگى ەسۋاستىڭ ەتەگىنەن ۇستادىڭ دا كەتە باردىڭ.“


ول كۇلدى، الگى ەركەكتىڭ جاسى ۇلكەن ەكەندىگىن، كىسىنى الاڭداتپايتىعىن ايتتى.


”مەن دە ەسەيەمىن عوي، بارىپ تۇرعان نادۇرىس سەن ەكەنسىڭ“ دەدىم.


ول باسىمنان سيپادى. مەن ونىڭ مۇنىسىن جاقاتپادىم.


سوسىن كوپ سويلەدى، توق ەتەرى تۇگەل ءتۇسىندىرۋ، سوندىقتان دا مۇقيات قۇلاق اسپادىم.


جالعىز ءوزى اۋىز جاپپاي ۇزاق سويلەگەننەن بولار دەمدە جابىرقاي قالدى. تىم شارشاعانداي، ءبىر ءتۇرلى كورنەۋ قالجىراۋ بار. جۇرەگىم شانشىدى، سوسىن ” سەن ءالى دە كىشكەنە كەزىڭدەگىدەي سۇيكىمدىسىڭ“ دەدىم.

” سۇيكىمدىلىكتەن نە پايدا؟ باقىتتى بولماساڭ“


ىشىمنەن ادامدار سۇيكىمدى بولعاندىعى ءۇشىن باقىتتى بولۋعا حاقىلى عوي دەپ ويلادىم.


” كوڭىلسىزسىڭ بە؟“

 
باسىن شايقايدى.


”كوڭىلدىسىڭ بە؟“


باسىن شايقايدى.


بارشا دۇنيە ىلعي دا وسىلاي.


(جالعاسى بار)

中央广播电视总台 央广网 版权所有

قونجىق پەن قويان4

مەنى بەلگىسىز بەيمازالىق بيلەدى.كەزىندە مەنىمەن ۇيلەنبەگەنىن ايتىپ “ءنادۇرىسسىڭ” دەپ سوكتىم.