ينفورماتسيا اشكەرەلەۋ: mzjubao@cnr.cn

ادەبيەت ارناسى

قونجىق پەن قويان 8

来源:     |责编:古丽美热|     发布日期: 2020-01-10 15:08

  ايدوس امانتاي

   بالاپان راباتوۆ اۋدارماسى


                                                                           ايۋدى ءولتىرۋ

وسى كەزدە بىرەۋ اسحاناعا اسىعىس كىرىپ كەلدى. ۇستىندە توي كيىمى. قاراسام كەلىنشەگىم ەكەن. سول باياعى تويداعى جاسانعان قالپى، ءتىپتى گرەمىن دە جۋۋعا ۇلگىرمەگەن ءتۇرى بار.

ەس-اقىلىنان اداسقانداي ماكدولانتقا كىرە سالا الدە نەنى ىزدەي باستادى. كوز جاسى ءۇنسىز عانا ۇزىلەدى. مونشاقتاعان جاس تامشىلارى وعان تيەسەلى ەمەستەي، ونىمەن مۇلدە قاتىسى جوقتاي ىرا-تومەن سورعالايدى.

نەتكەن سۇلۋ ەدى. سول ساتتە كەنەتتەن ءبىر وي ساپ ەتە قالدى: ونى ىلەستىرگەن بويى توي ءوتىپ جاتقان سارايعا تەزىرەك جەتىپ ۇيلەنەيىن دەپ ويلادىم. ءبىراق، بارلىعى دا كەش ەدى.

سونىمەن ونى ەلەمەگەن كىسىمسىپ قونجىققا ”اناۋ توي كيىمىن كيگەن ايەلدى كوردىڭ بە؟ ول مەنىڭ كەلىنشەگىم.“دەدىم.

قونجىق كورمەگەندىگىن ايتتى.

كەلىنشەك توڭىرەگىن تۇگەندەپ ءجۇر. بارلىق ادام تۇقىرىپ الىپ، اسىعىس تاماق جەۋدە. قالادا تاماق جەۋدىڭ ءوزى اسىعىس قوي. تەك مەنىڭ بەيشارا كەلىنشەگىم عانا ادەمى توي كيىمىمەن بەيتانىس ادامداردىڭ ورتاسىندا سىلەيىپ تۇر. وسى ساتتە وعان بۇكىل دۇنيە جات ەدى. ونىڭ كوزى كەنەتتەن قىز دوسىما تۇسە قالدى. ول مەنىڭ وسى قىزبەن بىرگە شىعىپ كەتكەنىمدى كورگەن بولاتىن. مازام كەتە باستادى. جاڭا تۇسكەن كەلىنشەك قاسىمداعى قىزدى ساباپ جۇرمەسىن دەپ الاڭدادىم.

الايدا، ويلاماعان جاعداي ٴجۇز بەردى. كەلىنشەگىم قىزدىڭ قۇشاعىنا ەنە بەرىپ، بوتاداي بوزدادى. تاستاندى ايەل قۇشاعىنا كەلىپ قۇلاعان ساتتە-اق قىز دوسىم دا ەڭىرەپ قويا بەردى. بەينە سۋ تۇرۋباسىن اعىتىپ جىبەرگەندەي قاراپايىم ءارى تابيعي ەدى.

ەشكىم دە بايىبىنا بارا المادى.

قونجىق تاڭدانا داۋىستادى: « سەنىڭ قاسىڭداعى قىز اياق استىنان نەگە جوعالىپ كەتتى؟» مەن اڭىرىپ ەداۋىر ۋاقىت تۇردىم دا ءوزىمنىڭ نادۇرىس ەكەنىمدى العاش رەت سەزىندىم.

ۇيلەنۋ تويىندا ايتقانىم ەستەرىڭىزدە بولار؟ رەال ومىردە بارلىق ادامدا قوجايىن بار. ءار ادام قوجايىننىڭ رۋحىىنا ساي ءومىر سۇرۋدە. قازىر مەنىڭ كەلىنشەگىم مەن قىز دوسىم ونداي رۋحقا ىلەسكەن جوق. ولار ماكدالونتتا وتىرىپ اسىعىس تاماق جەسە عانا ەرەجەگە نەمەسە بەلگىلى ءبىر جۇيەگە ۇيلەسەتىن ەدى.

بىراق ەڭىرەپ وتىر. سوندىقتان كورىنبەي كەتتى. ەگەر نانباساڭدار كەلەسى جولى سىناپ كورىڭدەر، ماكدولانتتا ەڭىرەگەننىڭ قانداي ناتيجەمەن اياقتارىن...توڭىرەكتەگى ادامداردىڭ اڭىسىن اڭداپ كور، ءسوز جوق سەنى كورمەگەن سياقتانادى.

مەن ەجەلدەن جايباراقات ءارى الىمسىنباي جۇرەتىن ەركەكپىن. بۇرىن-سوڭدى ءوزىم رەنجىتكەن ايەلدىڭ بارلىق ادام كورمەي قالعانشا ەڭىرەي بەرەدى دەپ ويلاعان ەمەسپىن.

ول مەن ءۇشىن ەڭىرەدى. ال مەن ءنادۇرىسپىن.

مەن كەلىنشەگىمنىڭ جاۋدىرەگەن جانارىنان ۇرەيلەنەم، ويتكەنى ەڭ سوڭىندا ءوز قۇشاعىمدا جاتىپ كوز جاسىن كولدەتەمە دەپ قورقام.

مەن ونىڭ كوز جاسىن كورىپ وتىرمىن. ەڭىرەگەندە جانىڭ تۇرشىگەدى. دەسەدە ءوزىنىڭ قورلانىپ قالعاندىعىنا ەمەس، مەنىڭ قاشىپ كەتكەنىمە جىلايتىنىن سوڭىنان ءبىلدىم.

مەن تاعىدا ءوزىمە ءوزىم: ”نە شارا، جىندىمىن، نادۇرىسپىن“دەپ كۇبىرلەدىم. بىراق، وسى ساتتە مەنى ەشكىمدە كورىپ وتىرماعانىن اڭعاردىم. قاشۋ-سونشالىق كۇلكىلى سەزىلدى.

سوسىن قونجىقتان ”نەلىكتەن وزگەلەردە، سەن دە كورە المايسىڭدار؟“دەپ سۇرادىم. ”مۇمكىن ولار سەنىڭ ايەلىڭ بولعاسىن سولاي شىعار“ دەدى قونجىق.

ولارعا قاراۋعا شىنىندا ءداتىم شىدامادى.

”تاعى دا بيلەشى.“ دەدىم ، ”مەن قۋىرشاقپىن، سەن قونجىقسىڭ، كەل، قۋىرشاق پەن قونجىق ءبيىن بيلەيىك، ءبىر ەكى ءبىر. “

ءبىراق، كوزى جاساۋراعان قونجىق” انالار سەنىڭ ايەلىڭ بە؟“دەدى.

“بيلەيىك! ” دەدىم مەن وعان.

كوزى جاساۋراعان قونجىق “قاراساڭشى، انالار سەنىڭ ايەلىڭ بە؟” دەدى

مەن ودان “نەگە جىلايسىڭ” دەپ سۇرادىم.

قونجىق كىر-قوجالاق قولىمەن كوزىنىڭ جاسىن ءسۇرتتى.

“نەگە جىلايسىڭ، ولار ساعان كورىنبەيدى ەمەس پە؟”

”ەكى ايەلدىك جىلاپ وتىرعان بەينەسى ەلەستەپ...ولاردىڭ جىلاعانىن جالعىز سەن عانا كورە الاسىڭ، سويتە تۇرا بيلەيىك دەيسىڭ.“

قونجىق جۇندەس تۇياعىمەن جۇزىمدى تۇمشالادى.

”تومەن قاراماي، كوزىمە قارا،“


”بيلەگىم كەلەدى، ايۋ بولعىم كەلەدى. “


”ءىستىڭ جاي-جاپسارىن تۇگەل ايتىپ بەر. “

”مەن بىلمەيمىن، نادۇرىسپىن“، دەدىم قونجىققا. “سەنى كورىپ تۇرمىن عوي، قونجىعىم، مەن ءۇشىن سەنىڭ دە ورنىڭ بولەك.“

قونجىق تەرەڭ تىنىستاپ، تاۋسىلا كۇرسىندى. سوسىن”ايۋ تۇبىندە ولەدى“ دەدى.

مەن ”ولمەيدى“دەدىم. ول “ولەدى” دەدى. مەن “سەنبەيمىن” دەدىم.

قونجىق كۇلىمسىرەدى. بەينە تەنتەك بالانىڭ قاپىسىز قاتەلىگىنە جىميعانداي ءجۇزىن جىلىتتى.

بۇل قونجىقتىڭ اقتىق كۇلكىسى ەدى.


(جالعاسى بار)

中央广播电视总台 央广网 版权所有

قونجىق پەن قويان 8