ينفورماتسيا اشكەرەلەۋ: mzjubao@cnr.cn

ادەبيەت ارناسى

قونجىق پەن قويان 12

来源:جۇڭگو قازاق راديو تورابى     |责编:古丽美热|     发布日期: 2020-01-14 15:17


ايدوس امانتاي

بالاپان راباتوۆ اۋدارماسى
 


                                                            سىرگەجيار

كەلىنشەگىممەن العاشقى جار توسەگىندە جاتىرمىن. ويانىپ كەتتىم، تاڭ اعارىپ، كۇن شىعۋعا تاياپ قالدى. مەن ونى قاۋسىرا قۇشاقتادىم. ول دا وياندى. قۇلاعىنا اۋزىمدى اپارىپ: «مەنىڭشە سەن جۇڭگوداعى ەڭ وزگەشە ايەلسىڭ» دەدىم.


«ادەمى سوزبەن الدارقاتۋدى عانا بىلەسىڭ، ميليورتتان مەن سياقتىلار عانا كەرەمەت سانالسا جۇڭگونىڭ بىتكەنى ەمەي نەمەنە».


«شىرپىداي ءالجۋاز ايەل بولا تۇرا ءبىر ايۋدى ءولتىردىڭ عوي».


«بىلەسىڭ بە، ءىستىڭ ءبارى ونشالىق وڭىنا باسا قويماس ەدى، مۇمكىن مەن تويدان قاشىپ، سەن شاراسىزدان ماكدونالتقا ىزدەپ بارىپ، سوسىن مەنىڭ العاشقى ماحابباتىممەن قۇشاقتاسىپ جىلاعان بولار ەدىڭ. وسىنى ويلادىڭ با؟»


«نەدەپ ساندىراقتاپ تۇرسىڭ؟ جانعا جايلى بىردەمە ايتايىقشى.»

«جارايدى،قانداي كوڭىلدى اڭگىمە ايتساق ەكەن؟»

«سەن مەنى ماڭگى سۇيەمىسىڭ؟»

مەن باسىمدى شايقاپ، كەڭكىلدەپ كۇلدىم. راسىندا بابى قيىن ايەل-اۋ.

«سەنى ماڭگى سۇيەم بە، سۇيمەيىم بە كوزىم جەتپەيدى.»


«وندا نەگە ۇيلەندىڭ ؟ ويتكەنشە ۇيلەنبەگەنىڭ وڭ ەمەس پە.»

شىنىن قۋعاندا ءوزىم دە بىلمەيمىن.

ايەل بۇل دۇنيەدە سيرەك بايلىققا جاتا قويماسىن بىلەمىن. باسقا بىرەۋدى ىزدەسەڭ دە تابىلادى. ءبىراق... مەنىڭ ايۋىمدى ولتىرگەن سەن عاناسىڭ. مەن ساعان ايۋىمدى ٴولتىرتتىم، سوندىقتان دا وسىندا باقىتقا بولەنىپ بال جالاسىپ جاتىرمىز. توي مۇراسىمىنداعى سابىلعان ءتۇستى قاعازداردى جيناي ءجۇرىپ ەڭىرەپ جىلاعانىڭ ءۇشىن ەمەس ارينە. دۇنيەدەگى سۇلۋلار شاش-ەتەكتەن، سەنەن ادەمىلەر دە جەتىپ ارتىلادى. ەكەۋمىز تويداعى قالىڭ ادامنىڭ كوزىنشە ءوز ايۋىمىزدى ءولتىرىپ، سەنىڭ قىلىعىڭا، كوركىڭە بولا ەمەس، اناۋ ەكى ايۋدىڭ قانى ءۇشىن قاۋىشىپ،ايمالاسىپ، بالقىپ وتىرمىز. مىناۋ جار توسەگىندە...

ول«كەلەشەك جايلى نەندەي ويىڭ بار؟»دەدى.

«ەڭ اۋەلى بالا سۇيسەك دەگەن ويىم بار.»

ايىزى قانا تىنستادى.

« سەن مەنى سۇيەسىڭ بە؟»

«ارينە.»

«ماعان دەگەن ماحابباتىڭ ءالى دە ءماز ەمەس.»

«نەمەنە؟»

«مەنى قوياندى ايالاعانداي سۇيە الاسىڭ با؟»

«قويانى نەسى؟»

«ماسەلەن قارنىم اشقاندا ءسابىز بەن كاپوستا بەرىپ، سوسىن ۇنەمى ۇلپىلدەگەن ءاپپاق جۇنىمنەن سيپاپ، ءجيى-ءجيى شومىلدىراسىڭ، تورعا قاماپ قويماي، ارى-بەرى ويناق سالىپ جۇرۋگە جول قوياسىڭ.»

ول مەنىڭ كىسى نانعىسىز مۇشكىل الپەتىمە قاراپ تۇرىپ شاراسىزدان قارقىلداپ كۇلىپ جىبەردى. مەن ونىڭ ماڭدايىنان يسكەدىم.

ول جالاڭاياق سەكەڭدەگەن قالپى تەرەزە تەكشەسىنە باردى دا ايعاي سالدى:«تەز بەرى كەپ قاراشى! كۇن شىقتى! تاڭ اتتى! نەتكەن تاماشا، بەرىس كەلشى تەز.»

مەن بارا قويمادىم، توسەكتىڭ جيەگىندە، جەلپىنگەن كەلىنشەگىمدى قىزىقتاپ، اڭىرىپ وتىرا بەردىم.

تەرەزەنىڭ تىسىنا قاراپ، مىناداي تاڭ شاپاعىن ونىمەن بىرگە ءالى سان مارتە كورەرىمە كوزىم جەتىپ وتىر. كەنەت وسى ءبىر سەزىم مەن نەكە جايلى ارمان-تىلەكتىڭ ءوز ويلاعانىمنان الدە قايدا مول ەكەنىن اڭعاردىم.

وسى ساتتە ايەلىم باعىپ جۇرگەن قويان: مىناۋ دۇنيە باقىتقا تولى دەگەندەي بولدى. تەك ءبىز ونى ەستي المايمىز. سول باياعى تىرشىلىك.

ءالى دە بالاشا تەبىرەنىپ تۇرعان ايەلىمدى قۇشاعىما قىستىم. ءوزىم دە بالا سەكىلدىمىن.

مەن ەكى الاقانىمدى ونىڭ بەتىنە باسىپ، دىرىلدەگەن ۇنمەن: «ءومىر وتە سالقىن، ءبىراق تاماشا» دەدىم.

ول مەنىڭ قولىمدى ءوز بەتىنەن ىسىرىپ، سوسىن جىڭىشكە قوس قولىمەن بەتىمنەن ۇستاپ، باسەڭ داۋىسپەن: «ءومىر تاماشا، ويتكەنى وتە سالقىن» دەدى.
سوسىن ءبىز قۇشىرلانا سۇيىستىك.

ءۇي ءىشى كەنەتتەن تىم-تىرىس تىنىشتىق ورناي قالدى. تەك قوياننىڭ عانا سويلەگەن ءۇنى قۇلاققا كەلەدى.

حانزۋ تىلىنەن اۋدارعان: بالاپان راباتوۆ « ۇلتتار ادەبيەتى »
(2011-06)
.......
(سوڭى )

中央广播电视总台 央广网 版权所有

قونجىق پەن قويان 12

ءالى دە بالاشا تەبىرەنىپ تۇرعان ايەلىمدى قۇشاعىما قىستىم. ءوزىم دە بالا سەكىلدىمىن.