ينفورماتسيا اشكەرەلەۋ: mzjubao@cnr.cn

ادەبيەت ارناسى

كۇزگى جاپىراق (شالقىما)

来源:Kazakcnr     |责编:达吾力别克 |     发布日期: 2020-08-11 09:45

گۇلنار ابەن قىزى

شەت -شەگى جوق الىپ اسپان تەڭگەدەي بۇلتسىز. قوڭىر تاۋدان كوتەرىلگەن كەڭ شارالى التىن كۇننەن توگىلگەن جىلۋلىق كۇللى تابيعاتقا، جان- جانۋارلار دۇنيەسىنە نۇر قۇيىپ تۇرعانداي…


شىركىن، تابيعات سىبىرىنىڭ قۇلاقتان كىرىپ، بويدى الىپ، ويعا ۇيالايتىن ءتۇرلى دىبىس- ىرعاعى ماڭايىمنان ەستىلىپ كەلەدى.


اعاش جاپىراقتارىن باياۋ تەربەگەن كۇزدىڭ قوڭىر سامالى تەرەزەدەن ءجۇزىمدى ايمالاپ، ءبىر عاجايىپ تولقىندا شىم- شىم ۇيىرىلگەندەي وزگەشە بولەك سەزىم باعىشتاپ، كۇز قۇشاعىنا مەنى اكەتىپ بارا جاتتى، سوسىن بايىبىنا بارا المايتىن كۇي كەشتىم دە ماڭايىمدى اينالا شولىپ ءوتتىم.


اسپانداعى كۇن دە كەشەگىدەن بۇگىن وزگەرەك سەزىلدى. بار الەم دىمقىل تارتىپ، سالقىندىق كەڭەستىككە كوتەرىلىپ كەشەگى شىلىڭگىر ىستىق شىرايىن وزگەرتكەن. ايناداي اسفاليت جولدىڭ ەكى جاعالاۋى تالمەن قورشالعان. جۇلدىزداي زىمىراعان اۆتوكولىكپەن اۋىلعا كەلىپ تە بولىپپىن. قايدا بارسام دا كوز الدىمدا سارى جاپىراقتار. " مەزگىل جەتتى دەگەن وسى-اۋ" دەيمىن ىشتەي كۇبىرلەپ.


انە، كەڭ اۋلانىڭ ىشىندەگى قالىڭ اعاش ساباعىنان ۇزىلگەن سارعىش جاپىراقتار ويدىم جەردەن پانا تاپقانداي جەر انا قۇشاعىنا باۋىرىن توسەپ جاتىر. ونىڭ ءۇپ ەتكەن جەلگە ىلەسىپ تاعى قانشا جەر باسارىن كىم سەزگەن؟


ارتىمنان ءبىر ەلەس ەرە كىرگەندەي بولدى. اندىز-اندىز تال بۇتاقتارى اراسىنان سىعالاعان كەشكى كۇننىڭ شۇعىلاسى كۇلگىن - جاسىل تۇسكە ەنىپ، تەرەزەدەن ءۇيدىڭ وڭ بۇرىشىنا قاراي سوزىلىپ جاتىر. ءۇيدىڭ سول بۇرىشىندا جاتقان شەشەمنىڭ قاسىندا وتىرمىن.


شەشەم توسەك تارتىپ جاتقالى ءبىر جىل بولعان-دى . ەتى قاشقان سۇيرىك ساۋساقتارىمەن قولىمدى قىسقانداي بولادى، سويلەيتىندەي ءالى دە جوق.


بىرنەشە كۇننەن بەرى كۇيكى تىرلىكتىڭ كۇيبىڭىمەن شەشەمە دە كەلە الماعان ەدىم، ءاجىم باسقان جۇزدەردەرىنەن انالىق مەيىرىن بايقاپ وتىرمىن ، كوز شاناعىنان دومالاپ تۇسكەن تامشىلاردى كورىپ جۇرەگىم قاتتى ەزىلىپ كەتتى…


ادام تىرلىگى كۇزگى جاپىراققا ۇقسايدى- اۋ، مەزگىلى جەتكەندە اجالدىڭ جەتەگىنە ەرىپ كەتە بەرەتىنى سياقتى. "ۋاقىت ادام ءومىرىن توناۋشى"- دەگەن راس ەكەن!


قاسىمدا وتىرعان كىشكەنتاي قىزىمنىڭ:" شەشە نەگە جىلادىڭ؟" دەگەنىنەن اعىل-تەگىل جىلاپ وتىرعانىمدى سەزدىم.


ءسابي جۇرەگى نە ءبىلسىن؟ دەگەنمەن ول دا ەت جۇرەكتى پەندە ەمەس پە، ءسابي تىلىمەن جاناشىرلىعىن ءبىلدىرىپ:


"شەشە، كەيىن ۇلكەيگەندە دوحتىر بولامىن، ناعاشى اپاما، تاعى باسقا اۋىرعان كىسىلەرگە اراشاشى بولامىن، ناعاشى اپامدى ءسوزسىز ەمدەپ جازامىن! الاڭداما، جىلاماشى شەشە"- دەيدى ماعان، ونىڭ بۇل رياسىز بەينەسى كەشەگى جاس جاپىراقتاي ەلەستەپ كەتتى.


كۇز كەلگەندە سارعايعان جاپىراقتى كورسەم مەنىڭ دە وسىلاي جابىعاتىن كەزدەرىم بولادى، كۇزگى جاپىراق ءومىر قاعيدالارىن كوز الدىڭا اكەلەتىندەي…


الدىمدا جاتقان سارى جاپىراقتىڭ ءبىر تالىن قولىما الىپ كوڭىلىمدى تولقىتىپ العان جەرىم دە بار ەدى.


ءيا، بيىلعى كوكتەم كەلەر دەپ اڭساعالى قاشان؟


اقىرى اڭساعان كوكتەمىمىز دە كەلىپ جەتتى. بىلتىر كۇزدە شانشىعان ءبىر ءتۇپ اعاش اقىرى قۋراۋدان امان قالىپ، كوگىلدىر تارتىپ بۇرشىك جايدى. سونداعى قۋانىشىمدى ايتسايشى؟! قۋرايلارمەن تولىپ تۇراتىن باقشالىعىمداعى ءبىر ءتۇپ جەمىس اعاشى اقىرى جاپىراق جايدى. سول كۇننەن تارتىپ ءبىر توپ تورعاي تاڭعى ۇيقىسىنان ويانا سالىپ وسىندا دۇرمەك قۇراتىن بولعان. كەيىن كەلە ءبىر جۇپ بۇلبۇل دا وسى اعاش بۇتاعىنا قوناتىن بولعان. ماڭايىمداعى قارعا ۇيالارى كورىنەتىن اربيعان قارا اعاش بۇتاقتارى جاپىراق جايىپ، كەشەگى سۇركەي بەينەسىن ارى اكەتىپ تىرشىلىك تىنىسىن قايتا باستاعانداي ەدى. ولار اششى كۇندى كولەگەيلەپ، سايا بولارلىق بەينەمەن كوگەرىپ، اينالاسىنا كولەڭكە ءتۇسىرىپ تۇر . ساناپ تاۋىسقىسىز جاپىراقتار ىشىنەن تاعى دا قولىمداعى ۇستاپ وتىرعان وسى جالعىز جاپىراققا كوزىم ءتۇستى.


قاراشى، ءوزىنىڭ كورىكتىسىن! بىرنەشە رەت ساۋساعىمنىڭ ۇشىمەن سيپاپ تا الدىم. ودان ارى سوقتىعۋعا ءداتىم جەتپەدى. ول ءوز قالپىندا تۇرۋ كەرەك. ول كوكتەمنىڭ جاڭبىرىنا تۇنشىعىپ، سامالى مەن تەربەلە سىلدىراي كۇلدى. ول وسى بىرنەشە ايلىق عۇمىرىندا بيىككە تالاسپادى. تومەنگە سالبىراي وسەتىن بۇتاق جاراتۋعا وزەكتەن قۋات الىپ، اعاش قابىعىنان قايسارلانا قىلتيىپ باس كورسەتىپ، اعاشتىڭ ومىرشەڭدىگىن ارتتىرىپ تۇرعانداي ەدى، سونشا جەردەن اكەلىپ ەككەن ەڭبەگىم زايا كەتپەگەنى ءۇشىن مەن دە قۋانىشتامىن، ءبىر جاس شىبىقتى ومىرگە اكەلگەنىمدى ماقتانىش سەزىندىم، وسى ءبىر جاپىراق كەزىندە قوڭىر سامال ەسكەندە تەربەلگەنى بولماسا، تەنتەك مىنەز تانىتپاي، ءوز ورنىنان مەزگىلى جەتكەنشە جىلجىماي، بار نازارىن ءوزىن قۇشاعىنا باسقان انا وزەگىنە ارنادى. وزگە جاپىراقتار ونىمەن جارىسىپ وسكەنىمەن، ءدال وسى جاپىراقتاي ومىرشەڭدىگىن ارتتىرا الماعانداي…


جاڭا عانا تۇسكەن جەرىنە ەرتەڭ جاسىل شىبىق بولىپ سامالمەن تەربەلىپ وسەتىنىن ءوز كوزىممەن كورىپ، ونىڭ ەرلىگىنە ءسۇيىنىپ وتىرمىن.


"ادام بالاسىنىڭ تىرلىگى بەينە، جاپىراق سياقتى"- دەيتىن ءسوزدى ەمىس- ەمىس ەستۋشى ەدىم.


يا، ءار تالدىڭ باسىندا سان بۇتاقتار بولعانىمەن، ءدان بەرەتىن بۇتاقتارى ساناۋلى عانا.


قولىمدا ءالى ءبىر تال كۇز جاپىراعى سارعايعان وڭىنەن جازباي جاڭا عانا سۋعا مالعان قولىمنان اجىرار ەمەس. مۇمكىن بولسا ءالى دە ءومىر سۇرگىش ويى بار ءتارىزدى.


مەن:" نە شارا، قولىمنان كەلسە سەنى ماڭگى كورگەرتەر ەدىم"- دەگەن سەزىمنىڭ جەتەگىندە ونى قيماستىقپەن ءوزى كوكتەپ شىققان جەمىس اعاشىنىڭ استىنا كومدىم. ءبالكىم، ول جەمىس اعاشىنىڭ كەلەر جىلى كوكتەۋىنە قولعابىسىن تيگىزەر؟


-وزىڭدەي جەمىستىڭ جەلكەنى بولارلىق جاپىراقتار جايقالا ءوسسىن! - دەيمىن وعان جانى بار ادامداي ءتىل قاتىپ…

中央广播电视总台 央广网 版权所有

كۇزگى جاپىراق (شالقىما)

شەت -شەگى جوق الىپ اسپان تەڭگەدەي بۇلتسىز. قوڭىر تاۋدان كوتەرىلگەن كەڭ شارالى التىن كۇننەن توگىلگەن جىلۋلىق كۇللى تابيعاتقا، جان- جانۋارلار دۇنيەسىنە نۇر قۇيىپ تۇرعانداي…