شەجىرە ايتقان تۋعان جەر، تۋعان ەلدەن،
اۋىلىمنىڭ قارتتارىن تىڭداعان با ەڭ.
الىپ تاۋدىڭ قادالىپ شوقىسىنا،
تاريحتى اقتارعان مۇڭلى اۋەنمەن.

ول وتكەندە سويلەگەن شاقتارىندا،
تاڭىرقايسىڭ سۇڭعىلا قارت جانىنا.
كەيدە وقىپ وتىر ما دەپ قالاسىڭ.
جازىپ الىپ تاۋلاردىڭ قاتپارىنا.

ەرلىك جىرمەن جۇرەگىن تەربەپ ەلدىڭ،
شىڭعا سۇيەپ جاسانعان كەۋدەلەرىن.
قارت جۇزىنە سىزىپ اپ وتىرادى،
ءوز جۇرگەن ولكەنىڭ جەر بەدەرىن.

اجەلەردىڭ ءاجىمى

سەكىلدەنگەن كەشەلەر كەرىم ءۇمىت،
قولىن سوزىپ، ءسوز سالعان نە ءبىر جىگىت.
ءجۇر انالار اجە بوپ ەندى بۇگىن،
كەتكەن ءومىر اياماي بەلىن بۇگىپ.

كۇنگە كۇيىپ جامىلعان جەلەكتەرى،
كۇندەلىكتى كۇيبەڭ بوپ ەرمەكتەرى،
گۇل جايناعان جاستىعىن جارىنا ارناپ،
تىرەك بولدى اۋىلعا بەرەكەلى.

قۇنداعىندا ءتۇن كەشىپ تاس قۇشاقتىڭ،
قىزىقپەنەن وتكىزدى جاستىق شاعىن.
كەلەدى ەندى اجە بوپ ۇرپاعىىنا،
كۇندەي كۇلىپ شاشۋمەن جان شۋاعىن.

جاقسى كۇندى وتكىزدى، جامان كۇندى،
تەك ىشىندە ساقتالدى نالا- مۇڭى.
جىلجىعان جىل ايعىزداپ اپپاق ءجۇزىن،
تايدى اقىرى جاستىقتىڭ الاۋ- نۇرى.

ەسكە الادى وڭاشا قىز كۇندەرىن،
تورلاپ الىپ ءاجىمدى جۇزىنە مۇڭ.
قاراعايداي قايسارلىق تانىتادى،
قايسار تۋعان قىزدارى ءبىزدىڭ ەلدىڭ.

شاڭىراقتىڭ اياۋلى قورمالى ەدى،
بەرەكەگە شاقىرعان وردالى ەلدى.
قۇرمەتىنە بولەنىپ كەلەدى ەلدىڭ،
اجە بولىپ قادىرلى سودان بەرى.

نەگە باستى جۇزدەرىن ءاجىم قۇرعىر،
تابيعاتتىڭ تاڭباسى ء تارىزدى ءبىر.
قاراي بەرەم جۇزىنە اجەلەردىڭ،
ءبىر تاريح سول جۇزدە جازۋلى ءجۇر.

ۇرپاعىڭدى ماڭگىگە ماپەلەي بەر،
تالىمىڭە ءتاتنى عىپ جان تەربەلەر.
ءجۇز جاساڭدار، اجەلەر مىڭ جاساڭدار،
اسقاقتاتسىن وسىناۋ مارتەبەڭدى ەل.

بۋىرشىن اۋداندىق توعىسپالى اقپارات ورتالىعى