شاقىرۋلى قوناعى نەمەسە كۇتۋشىسى سالاۋاتىمەن كوپتەگەن تويلاردىڭ باسى-قاسىندا بولىپ، كەيبىر پايىمسىز باسەكەمەن اسپا-توك سىراپشىلدىقتارعا كۋا بولىپ-تا جۇرگەن ءجايىمىز بار. توي يەلەرى مەن دوس-جاراندارىنىڭ گىرىمى،ءۇستى-باسىن ايىتپاي-اق قويايىن، دەسەدە، ۇستەل تولى تىزىلگەن تاعامداردىڭ كەيبىرەۋىنىڭ ۇرتى دا ويىلماي جۋىندى كاتەلگە توگىلگەنىن كورگەندە كەپيەت-اي دەيسىڭ ىشتەي. ول از بولعانداي جۋىق جىلدان بەرگى سۇندەت توي مەن سىرعا تويلارداعى ساقاناعا شاقىرىلعان سابيلەردىڭ قولىنان ارناۋلى ءانشى جەتەكتەپءان ايتىپ كىرەتىندى شىعاردى، ارينە بەكەرءان ايتقان ءانشىنى قايدان كورىپ ەدىڭىز. 


    بارلىعىمىزدىڭ كوزىمىزگە ۇيرەنشىكتى، كوڭىلىمىزگە ءسىڭىستى بولعان توي-تومالاقتاعى باسەكەنى قويا تۇرالىق، ەندىگى قيتۇرقىلىق بيىك عيبارات، قىمبات كولىك، ماركالى تەلەفون، اشەكەي مەن كيىمگە اۋعان ءتارىزدى.

    ۇستەگى جىلدىڭ جاز ماۋسىمى، جۇمىس بابىمەن ءجۇرىپ ءبىر اۋىلداسىمىزدىڭ ۇيىنە ات باسىن بۇرعان ءجايىم بار، الپىستى ارالاعان اشاڭ ءجۇزدى انا دەمىن زورعا الىپ بۇكشەڭدەپ اۋلا ىشىندە كىر جۋىپ ءجۇر، مەنى كورىپ سۋىق سۋ سورىپ اق جەمىك بولىپ بوزارعان ارىق قولدارىن الا ۇشتى، امان-سالەمنەن سوڭ:

    -جەڭگە، جاقىندا عانا ەمحانادان شىقتى دەپ ەستىگەن ەدىم،دەنساۋلىعىڭىز ءالى قالپىنا كەلمەدى، قولىڭىزدا كەلىنىڭىز بار، سىزدىكى قاي قينالىس-دەگەن ەدىم:

    -قىزىم-اۋ، ايتاسىڭ عوي، شال مالعا كەتتى، ۇيدەگى كەلىن پالەنبايدىڭ كەلىنى شوفەرلىك ۇيرەنەدى ەكەن، مەندە ۇيرەنەم دەپ قۇلاق ەتتى جەپ بولماعان سوڭ ۇل كەلىندى ەرتىپ مالدىڭ قىسقى جەم-شوبىنە ىركىپ وتىرعان قاجاق-قۇجاقتى قالتالارىنا باسىپ الىپ شوفەرلىك ۇيرەنۋگە تىزىمدەلگەلى كەتتى-دەپ كەيۋانا كەڭك-كەڭك ەتتى.

    كەڭكىلدەمەگەندە قايتسىن، قارتايعاندا شايىمىزدى قايناتىپ، اسىمىزدى ازىرلەپ بەرەدى دەپ سەنىپ وتىرعان اياۋلى كەلىندەرى اياق استىنان اتا-ەنەسىن كۇتۋدەن ۇلى بورىشتى ءبىر جاققا سىرىپ قويىپ، كولىك ءمىنىپ سەلكىلدەپ سەرىلىككە باسسا.

    جانە ءبىر قارت اجە:

    -كىشى كەلىنىم شوفەرلىك ۇيرەنىپ كىناشكاسىن العاسىن ماشينا-ماشينا دەپ قىڭقىلداي بەرگەن سوڭ الگى ۇل قولداعى ىرىسقۇتتى ايىرىپ وتىرعان از ەشكىنى ساتىپ ماشينا الىپ بەرگەن ەدى، جۇرگىزە الماي جۋىقتا زيانىنا ساتىپ تىنىش تاپتى، ال ۇل بولسا باعارعا تىشقاق لاعى جوق، ول جەر بۇل جەردە كۇندىك ىستەپ قاڭعىرىپ ءجۇر-دەپ مۇڭىن شاقتى.

    ونەر-بىلىمگە ىنتىعۋ جاقسى-اق، دەسەدە «جالعىز نەمەرەسى اتقا شاپسا، اتاسى اۋىلدا وتىرىپ تاقىمىن قسىپتى» دەگەندەي، قالاداعى جەلەكتىلەر كولىك ءمىندى دەپ قىرداعى جەلەكتىلەردىڭ تاقىمى قىزسا ورىنسىز باسەكە ەمەي نە؟ قالاداعى جەلەكتىلەر قاي ءبىر جىرعاعانىنان كولىك ءمىنىپ ءجۇر دەيسىز، كۇندەلىكتى قىزمەتتى ايىتپاعاندا، قىزمەت اترەتىنە ءتۇسىۋ،ءار ايداعى تۋىسقا بارۋ، بۇقارانىڭ حال-جايىنان حابار الۋ،الەۋمەتتىك اۋماقتاردىڭ قىزمەتىنە سايكەسۋ، بالا بابى،ءۇي قامى سىندى شاش ەتەكتەن جۇمىستاردىڭ مۇددەسىنەن شىعۋ ءۇشىن بولعان جوق پا.

    جانە ءبىر اڭگىمەدەن اسحانادا داياشى بولىپ جۇمىس جۇرگىزىپ، ەكى بالاسىنىڭ تۇرمسىن ازەر قامداپ كەلە جاتقان ءبىر اپەكەمىزدىڭ قاتاردان قالماۋ ءۇشىن ايفون تەلەفونىن ايىنا ءبولىپ تولەۋگە قارىزعا الىپ، ەكى اي بولماي قولفونى قولدى بولىپ، قان جىلىك بولىپ تاپقان تابىسىن ءوز قالاۋىمەن تەكتەن-تەك ەكىنشى بىرەۋدىڭ قولىنا ۇسىنىپ وتىرعان ايانىشتى حالىن ەستىپ اياپ كەتتىم. ارينە ءار قانداي ادامنىڭ قالاۋى مەن تالعامى ءار باسقا، دەمەك وعان شەك كەلتىرىپ، بايدىڭ اسىن بايقۇس قىزعانىپتى دەگەننىڭ كەبىنىن كيگىم جوق، دەسەدە اۋىلداستار بىرەر ءىستى باستاۋدان بۇرىن سول ءىستىڭ جاتتعى مەن كۇدىرى، وڭ مەن سولى تۋرالى مىڭ ويلانىپ، سان تولعانىپ، اربادا سىنبايتىن، وگىزدە ولمەيتىندەي ۇتىمدى وي قورىتىپ، شەشىم قابىلداپ بارىپ ىسكە كىرىسسە، بولارى بولىپ، بوياۋى سىڭگەننەن كەيىن بارماعىن شايناعاننان كوش ارتىق پا دەيمىن.

    دەمەك جوعارىدا ايتىلعان بيىك عيبارات، ماركالى كولىك، قىمبات قولفون، اشەكەي مەن كيىم تەك ءبىزدىڭ سىرتقى قابىعىمىز عانا، ال ناعىز سالاۋاتتى ءومىر جوعارىدا اتاپ وتكەن سىرتقى فاكتوردا تۇرعان جوق، قايتا ادامنىڭ رۋحاني جان دۇنيەسىندە جاتىر، سول سەبەپتى رۋحاني جان-دۇنيەڭىزدى بايىتۋعا تىرىسىڭىز، ول ءۇشىن كىتاپ وقىڭىز، ءبىلىم ۇيىرەنىڭىز، ارزان جىلتىراققا،ءمانسىز بالدىر-باتپاق دۇنيەگەن نازار سالماڭىز، سوندا عانا جان دۇنيەڭىز جارقىرايتىن بولادى، جان دۇنيەڭىز جارقىراعان سايىن قاراپايىمدىلىقتى سۇيەتىن بولاسىز. قاراپايىمدىلىق ءبىزدىڭ اتامىزدان بوتامىزعا دارىعان تاماشا اسىل قاسيەتىمىز، وسى اسىل قاسيەتىمىزدى قايداعى ءبىر بايلاۋى جوق قۇر اتاق پەن دالباسا ابىرويدىڭ قۇربانىنا اينالدىرمايىق.

    «قازاقتى جامانداما قازاق بالا، قازاق دەگەن حالىقپىز از-اق عانا» دەگەندەيىن، كوپكە توپىراق شاشۋدان اۋلاقپىن، دەسەدە سىن تۇزەلمەي ءمىن تۇزەلمەيدى دەگەندەي حالقىمىز اراسىنداعى كەۋلەگەن كەيبىر كەرەعارىلىقتارعا تەك-تەك بولسا، قولىمىزداعى شەكتى قارجىنى ورنىندا پايدالانساق، تۋىسقان ۇلتتار سياقتى جاماپ-جاسقاۋدى ۇيرەنىپ، تيىننان تەڭگە قۇراساق، ەسسىز باسەكەنى قويساق دەگەن رياسىز كوڭىلدىڭ تۋلقۋىنان تۋعان ءتاتتى تىلەگىمدى قارا ورمانداي حالقىم تۋرا قابىلدار دەگەن ويدامىن. ارزان، كوڭىلگە بايلاۋى جوق تۇرلاۋسىز دۇنيەنىڭ سوڭىنان قۋا بەرىپ،ءوزىمىزدى جوعالتىپ المايىق اعايىن!!!!!!