(فەلياتون)

تىنشىڭ كەتكىر تىشقان جىلى كىرە سالسىمەن-اق، جاڭا ءتيپتى ايدارشا ۆيرۋس وكپە قابىنۋ ىندەتى بۇكىل ەلىمىزگە تارالىپ، ىندەت جاعدايى بارعان سايىن تولاسسىز ۇلعايىپ، ەلدىڭ ەكى كوزى ءتورت بولىپ «كەلگەن پالە اققان سۋمەن، سوققان جەلمەن كەت» دەپ تىلەندى. حالىقتىڭ اماندىعىن ويلاعان پاراساتتى پارتيا ىندەتتەن ساقتانۋدىڭ بىردەن- ءبىر امالى وڭاشالانۋ ەكەندىگىن جاريالاپ، جۇرت تەگىس ءوز ۇيلەرىنە مىسقتان قورىققان تىشقانداي ىعىپ، «بايتال تۇگىل باس قايعى» بولىپ جاتقاندا، قىستاقتاعى ءاليا مەن جاقىشتىڭ قاعاناعى قارىق، ساعاناعى سارىق بولىپ جاتتى. ولاي بولاتىنى، ءاليادان ات كەكىلىن كەسسىپ، ورتاداعى ەكى بالانىڭ كوز جاسىنا دا قاراماي، قايتا كەلەر ەسىگىن قاتتى سەرپىپ، اياعى سوتتا اجىراسىپ، ءتورت جىل توبەسىن كورسەتپەگەن جاقشتىڭ اينالىپ كەلىپ ءاليانىڭ بوساعاسىندا پايدا بولا قالعانىن قىستاقتاعىلار بىلگەن جوق. بىلمەيتىن دە ءجونى بار، سىرتقى ءجۇرىس- تۇرىسقا قاتاڭ تيىم سالىپ، قىستاق تۇرعىندار كوميتەتى مۇشەلەرى مەن ەرىكتىلەردىڭ بىلەكتەرىنە قىزىل جەڭدىك تاعىپ، دارەتكە شىققانداردى دا جارتى مينۋد دامىلداتپاي ۇيىنە قۋىپ كىرگىزىپ تۇرعاندا، كىمنىڭ وتباسىندا نە جاعداي بولىپ جاتقانىن بىلايعى جۇرتتىڭ بىلە قويۋى دا ناعايبىل ەدى.

 

 تەك شۋاقتى ناۋرىز ايى كەلىپ، قىرىق كۇنگە جالعاسقان ۇيدە وڭاشالانۋدان قۇتىلىپ، قىستاق تۇرعىندار كوميتەتىنىڭ مەڭگەرۋشسى ايعاي شەلەكتەن (لابادان): - ءار وتباسىنان ءبىر ادام تۇستەن كەيىن، ماسكالارىن تاعىپ تازالىققا شىقسىن،-دەگەن بۇيىرىعىن ەستىگەندە، قىستاق تۇرعىندارى جاپا-تارماعاي قىستاق جولدارىن تازالاۋعا شىققان. بۇرىن مۇنداي جۇمىسقا سۇيرەپ شىعارا المايتىن ساكەڭ دە، ماندىپ باسپايتىن ماكەڭ دە، ەسەپپەن جۇرەتىن ەسەكەڭ دە، ۇيىنەن ون قادام ۇزاپ شىقپايتىن ۇيكۇشىك ۇسەكەڭ دە، قويشى، تايلى-تاياعىمەن تۇگەل تازالىق ناۋقانىنا قاتىناسقان سول كۇنى عانا، ولار جاقشتىڭ كەلگەنىنەن تولىق حابارلى بولدى. «ءولىپ تە قالاتىن ءبىر قاتىن ەمەس پە، اجىراسىپ كەتتىم» دەپ كويتىپ جۇرەتىن جاقىش جايلى قىستاق ايەلدەرىنىڭ كوڭىلدەرىمەن قۇراستىرىلىپ، اۋىزدارىمەن ويستىرىلىپ، ەرىندەرىمەن جيەكتەلىپ، سوزدەرىمەن بويالعان وسەكتىڭ ۇشپا كىلەمى سول كۇنى اسا تەزدىكپەن قىستاقتىڭ «جەلكورىك» ايەلدەر سەلبەستىك كووپەراتيۆىندە ءساتتى توقىلىپ قىستاق اسپانىندا قالىقتاي جونەلدى.

-ءاليا بايقۇس قايتەدى ەندى، قانشا دەگەنىمەن بالالاردىڭ اكەسى ەمەس پە؟ «ەڭكەيگەن باستى قىلىش كەسۋشى مە ەدى»، الدىنا جىلاپ-ەڭىرەپ جاڭىلدىم، جازدىم دەپ تىلەنىپ كەلگەن سوڭ كەشىرىپتى. 

- بۇكىل ەلدە ۆيروس تاراپ، كارەنتين بولىپ جاتقاندا، بارار جەر، باسار تاۋى قالماعان دەلقۇلى ءوز اياعىمەن كەلىپ، اقىرى ءاليانى پانالاپتى.

- كوردە تۇر، جاقىش ەكەنى راس بولسا، بەلىندەگىسى تۇگەپ، پىسپەگى مايلانعان سوڭ تايىپ تۇرادى. «ءيت بوق جەگەنىن قاشان قويۋشى ەدى.». قىستاق اسپانىن كەرنەگەن وسىنداي گۋ- گۋ وسەك. ايتىپ-ايتپاي قاي «دۋالى» اۋىزدان شىققان ءسوز ەكەنىن كىم ءبىلسىن، ءساۋىر ايى كىرە جاقىش ۇشتى كۇيدە جوق بولدى. بۇل جولى ايەلدەر باس قوسىپ اقىلداسىپ، شەكەلەرىن تيستىرە شۇڭكىلدەسىپ، كەڭەسپەن ءپىشىپ، قيننان قيۋلاستىرعان وسەكتىڭ ۇشپا كىلەمى ەكىنشى رەت ءساتتى ۇشىرىلىپ قىستاق اسپانىندا سامعادى.

- كارەنتين تاعى باستالا قالسا، جاقىشتىڭ قايتا قايتىپ كەلۋى عاجاپ ەمەس.

 

- ءاليا دا قىزىق ەكەن، جىندى سۋدىڭ قۇمىراسىنا ءتۇسىپ، سۋ ىشكەن قۇدىعىنا تۇكىرگەن ساراماستى قيمايتىنداي نەسى بار؟ 

- ويباي، ءبىز سياقتى بولارى بولىپ، بوياۋى سىڭگەن كەكسە قاتىن ەمەس، ەندى عانا وتىزعا شىعىپ قۇلىن مۇشەسى تولىقسىپ تۇرعان ءاليانىڭ جاقشتاي بۇقانىڭ بۇيداسىن ءبىر ەمەس، مىڭ بىرت ەتكىزەرى مۇندا تۇرعان شارۋا عوي.

- حى، حى، حى ماۋىقتارى باسىلعان سوڭ جايىنا كەتكەن بولدى ما سوندا؟….

قىستاقتا گۋ-گۋ وسەك جەلدەي ەستى. قايسى كورىپكەلدىڭ ايتقانى ەكەنىن كىم ءبىلسىن، تامىز ايىندا ەكىنشى رەتكى كارەنتين باستالعاندا، جاقىش تاعى پايدا بولا كەتتى. ەستۋگە قاراعاندا، ات قويىپ، ايدار تاعۋعا امىراق قىستاق ايەلدەرى جاقشتىڭ ازان شاقىرىپ قويعان اتىن وزگەرتۋدى ەرەكشە قاۋلىعا الىپ، تاعى دا ءۇنحات، تەلەفون سىندى وسىزامانعى وزىق تىلدەسۋ جابدىقتارىن ىسكە قوسىپ،  «قىزىل اۋىزدار» توبىندا ورتاق اقىلداسىپ، سوڭعى قورتىندىسى «كارەنتين كۇيەۋگە» تۇراقتاندىرىلىپ، وسەكتىڭ ۇشپا كىلەمى ءۇشىنشى رەت قىستاق اسپانىندا شارلاپتى. 

 

 

اۆتوردىڭ مەكەن- جايى: بۋرىلتوعاي اۋداندىق توعسپالى مەديا ورتالىعى

福海县融媒体中心