جۇتقىش، ساراماس، القاكول، قايتپاس ءتورت اعايىندى قىستاقتاعى كەزەكشىلىككە كەلگەندى قويدى، تەلەفونمەن تىلدەسسە المايمىن. ال تىلدەسكەن  كۇنىندە دە ساۋ بولسا «سىم كيىپ جاتقاندا سيراعىم سىنىپ قالدى» دەگەندەي سىلتاۋ ايتادى، ماس بولسا مايىن تامىزىپ، ماقتامەن ءوزىڭدى باۋىزداي سالادى، كەيدە «قىستاقتى بىرەۋلەر تۇيە قومداپ كەلىپ ۇرلاپ اكەتكەلى جاتقان جوق، ءتورت تامدى كۇزەتىپ نە قىلاسىڭدار، التىننان جيناعان قازىنالارىڭ بولسا ءبىز نەگە بىلمەيمىز» دەپ بىلجىرايدى. ءتىپتى «ولارعا ەندى جالىنعاندى قويدىم» دەپ كەيىدى قىستاقتىڭ ايەلدەرگە جاۋاپتى كادرى جاميعا ماعان قاراپ، ءسىز بىردەمە قىلىڭىز دەگەندەي. العاش وسى قىستاققا كەلگەندە، قىستاق تۇرعىندار كوميتەتىنىڭ مەڭگەرۋشىسىنىڭ تانستىرۋىمەن ءبىر تالاي ادامداردىڭ اتىنا قانىق بولا باستاعان ەدىم، اسىرەسە، جىندى سۋدى كورسە سىلەكەيى شۇبىرىپ، سىدىگىنە ءسۇرىنىپ جۇگىرەتىن ءبىر تالاي اراقكەشتەردىڭ اتىن قاداپ-قاداپ ايتقان- دى. ەسىمە كەلە كەتتى. ارحيۆ تۇرعىزىلىپ كارتچكالاندىرىلعان كەدەي وتباسى پازيلا شەشەيدىڭ ءتورت ۇلى بىرىنەن - ءبىرى وتكەن «كولتاۋسار». ءۇش ۇلى اراقتىڭ سالدارىنان اجىراسىپ، وتاۋلارىن ويرانداعان، ال قالعان بىرەۋى قالىڭمالسىز-اق «شاراپگۇل بيكەشپەن» توي جاساپ ماحابباتى كۇنىنەن كۇنگە تەرەڭدەي تۇسكەن، ولاردىڭ سۇيسپەنشىلىگىنە تاڭداي قاعىپ تامسانباعان ەل جوق. ەكەۋى قاباقحانا، اسحانا، ۇيدە نە تۇزدە ءبىر-بىرىنەن ەكى ەلى ايىرىلىپ كورگەن ەمەس. وسى قىستاقتىڭ جاڭادان تاعايىندالعان قىستاق پارتيا ياچەيكاسىنىڭ شۋجيى بولعاندىعىم ءۇشىن ولاردىڭ ۇيلەرىنە ادەيى بارىپ، ۇشەۋىنە اقىل ايتىپ، بولماسا جەتپىستى جەلكەلەگەن اناسىنا كەزىگىپ، سول كىسى ارقىلى ولاردى ءبىر قايىرىمعا كەلتىرەيىن دەگەن ساسىق قيالدىڭ جەتەگىندە سالىپ ۇرىپ پازيلا شەشەيدىڭ ۇيىنە ات باسىن تىرەدىم.

 

ۇيگە كىرگەنىمدە پازيلا شەشەي ۇن يلەپ، القاكول ءتور الدىندا جىن يلەك بولىپ، «شاراپگۇلى» جانىندا «باقىت قۇشاعىندا بالبىراپ» ۇيىقتاپ جاتىر ەكەن. ال جۇتقىش، قايتپاس، ساراماس ۇشەۋى كورىنبەيدى. امان- سالەمدى قىسقا قايىرعاننان كەيىن، مەن كەلگەن بۇيىمتايىمدى ايتا باستادىم.  

 

-ۇلدارىڭىز قىستاققا كەزەكشىلىككە شىقپاعالى ۇزاق بولىپتى، بۇل باسقالاردىڭ دا كەزەكشىلىككە شىعۋىنا ءتاسىرىن تيگىزىپ وتىر، كەيبىرەۋلەر «وسى پازيلانىڭ ءتورت ۇلىنا سوزدەرىڭ وتپەي مە، كەزەكشى بولعانىن ءبىر كورمەدىك عوي، جوق ولاردىڭ اياعى اسپاننان سالبىراپ ءتۇسىپ پە ەدى» دەپ ءسىزدىڭ ۇلدارىڭىزدى كولدەنەڭ تارتادى، ەڭ جاقسىسى ەكى ايدا ءبىر كەلەتىن كەزەكشىلىك مىندەتىن ۋاعىندا وتەپ تۇرعانى دۇرىس،- دەدىم بارىنشا مايمونكەلەپ.

 

 بەتىمە بەجىرەيە ءبىر قاراپ الدى دا، ۇن يلەگەن تەگەنەنىڭ قاسىنداعى قىرىق شوقپىت بولعان ورامالعا قولىن شالا ءسورتىپ، پازيلا شەشەي سويلەپ كەتتى.

 

-سەندەر قىزىق ەكەنسىڭدەر،- دەپ پازيلا شەشەي ماعان اجىرايا ءبىر قاراپ الدى دا،- وسى قىستاقتا تەك مەنىڭ ۇلدارىم عانا جاساپ جاتقانداي، بەيباقتارعا ءبىر تىنىم بەرمەيسىڭدەر عوي، ولار دا جىرعاپ ءجۇر مە؟ اعايىن-دوستارىنىڭ تۇگەمەس توي-تومالاعى، ساباقتاستارىنىڭ باس قوسۋى، ءتۇرلى تويلاردىڭ اقىلداسۋ شايى سياقتى قالىڭ جۇمىستان كوز اشا الماي ءجۇر، وسى قىستاقتاعى بەس جۇزگە جۋىق ادام كوككە شىعىپ بولماسا جەرگە كىرىپ كەتىپ پە ەكەن، ولاردى نەگە ىزدەمەيسىڭدەر، قىستاقتىڭ قيت ەتكەن جۇمىسىنا جەگىلەتىن مەنىڭ ءتورت ۇلىم بورىشتار ما ەدى،- دەپ ەتەگىن قاعىپ ورنىنان تۇردى. مەنىڭ تاعى ساۋال تاستاۋىما مۇرسات بەرمەي الدىمدى وراپ، اۋىزى كوپىرشىپ تاعى سويلەپ كەتتى:- ماڭايمىز تولعان توبىرلارمەن توپاستار، ولاردىڭ ايتاتىنى مەنىڭ ۇلدارىمنىڭ اڭگىمەسى. ىلعي جارىماعان جاندايشاپ، «بالىق ۇندەس، باقا تىلدەس» لاعىناتتار  بالالارىمنىڭ ازامات بولىپ، ەل قاتارى اراق ءىشىپ قوعامدا جۇرگەنىن دە كورە المايدى تۇگە. ءسويتىپ وتىرىپ «كۇندىگىنە 200 يۋان بەرەيىك ەگىن شوپتەسىپ جىبەرسىنشى»، «اقىسىن بەرەيىك ەگىنىمىزدى سۋارىپ بەرسىنشى»، «ايلىعىنا بەت ەكى كەلسەيىك مالىمىزدى باعىپ بەرسە» دەپ قىسى-جازى ەسىككە ءامىر بەرمەيدى. پۇۇۇت،  مەنىڭ ۇلدارىم سول جارىماعىرلاردىڭ جارتى جارماعىنا قاراپ وتىر ما؟ ىستەمەي- اق ءىشىپ، تىربىنباي- اق تىستەپ ءجۇر ءوز نەسىبەلەرىن. تاپ وسىنى ايتىپ جۇرگەندەر الگى جاتىرىڭ تۇسكىر جازيما، قىلتاماق بولعىر قىدىرقان، سارى اۋىرۋ سەكەن شىعار…،- دەپ وزەلەنە سويلەگەندە كوزدەرىنىڭ اعى ۇلكەيىپ، قارا سۇرى ءوڭى تىپتەن ادام تانىعىسىز بولىپ وزگەرىپ كەتتى. مەن ءلام دەمەي كەلگەن ىزىممەن ەسىككە قاراي جىلستادىم.

 

 

اۆتوردىڭ مەكەن- جايى: بۋرىلتوعاي اۋداندىق توعسپالى مەديا ورتالىعى

福海县融媒体中心