ەشكىم دە جىرعاپ جۇرگەن جوق
كەلۋقاينارى:جۇڭگو قازاق راديو تورابى |جاۋاپتى رەداكتور:ايناگۇل | جاڭالانعان ۋاقىت:2017-06-13 18:46:00


    ماقسات قيزات ۇلى


    بالا ايتادى: مەنى نەگە اكە-شەشەم ءوزى باقپايدى، مەن نەگە كۇندىز ءوز ۇيىمدە وينامايمىن، ولار مەنى نەگە بالا باقشاعا اكەپ تاستايدى، مەن بۇل جەردەن ابدەن مەزى بولدىم.


    ستۋدەنت ايتادى: ءوستىپ جۇرگەنىم نەنىڭ ازابى، ەرتەڭ قىزمەت تابا الماسام ۇيدەگىلەرگە قاي بەتىممەن قارايمىن، ءبۇيتىپ تىربىڭداعانشا، وقۋدان قول ۇزىپ، ەرتەرەك اقشا تابۋدىڭ جولىنا تۇسسەم ءجون ەدى.


    داياشى ايتادى: ەرتەدە وقۋدى دۇرىس وقىعان بولسام، ءبۇيتىپ ەلدىڭ قولىندا ىستەپ، تىرتىڭداپ جۇرمەس ەدىم. كىم-كورىنگەننىڭ مايلىق-سۋلىعى بولعانشا، كەتپەن شاۋىپ، كۇرەك ۇستاپ كەتسەم قايتەر ەدى.


    مۇعالىم ايتادى: مەنىكى نە ءبىر وسپەيتىن، نە ءبىر وشپەيتىن ماندىماعان كاسىپ. ءوز بالامنىڭ نە بولىپ جاتقانىمەن ءىسىم جوق، ەلدىڭ جىندىسىمەن الىسامىن، اعارىپ بىتكەن شاش مىناۋ، جيىلماعان ءۇي اناۋ، سوندا مەنىكى نە ءجۇرىس، نە تىرلىك؟!


    جازۋشى ايتادى: جازا-جازا جالىقتىم، ءبىر سارىندى ءومىر، جازىپ جاتقانىڭنان ءونىپ جاتقان ەشتەڭە جوق، جەلگە ۇشقان ءسوز، سونشا جازعاندا شىعارعان ءبىر كىتابىم جوق، باسپاعا كەرەگى جازعانىڭ ەمەس، جارماعىڭ. ماعان قاراعاندا تاۋداعى مالشى باقىتتى-اۋ، جانى دا، ءتانى دە تىنىش.


    مالشى ايتادى: ءاي، قاسقىر جەگىر قۋ كەمەلەك، قۋ قاراسان باسىمدى ءتۇبى سەندەر مۇجيسىڭدار. مالمەن بىرگە مال بولعان تىرلىك-اي دەسەڭشى، قىردان قۇتىلىپ، وتىن-سۋى دايىن قالادا جايلانىپ جاتار كۇن تۋسا عوي.


    ەگىنشى ايتادى: جاز بويى ماڭدايىڭنان شۇمەكتەپ تەر اعىزعاندا، ەڭبەگىڭ وتەلە قالسا جاقسى، تاندىر بوپ جاتقان القاپ مىناۋ، بيىل دا جىرعاماسپىن، اسپانعا تەلمىرىپ، جاڭبىرعا جاۋسا دەپ تىلەنگەن كۇنىڭ قۇرىسىن، بۇيتكەنشە، كۇندىك ىستەگەنىم قايىرلى-اۋ.


    كۇندىكشى ايتادى: باسىمدا نە باسپانا، نە مىنگەن كولىگىم جوق، بۇيتكەنشە، اۋىلعا قايتىپ، ايىرانىمدى ۇرتتاپ، قويىمدى قۇرتتاپ جاتسام ءجون بە ەكەن، كۇندە تاپسام، كۇندە جوق، ءوستىپ ءجۇرىپ اۋىرىپ قالسام قايتەر ەكەنمىن. قارا جۇمىس قاجىتتى-اۋ.


    شيپاگەر ايتادى: كورگەنىم ۋكىل-ءدارى، مي شارشاتاتىن قاربالاس قىزمەت، بوسايتىن كۇنىم جوق، ۇيدەگى ۋاقىتىمنان شيپاحاناداعى ۋاقىتىم ۇزىن، بۇيتكەنشە ءوز ەركىم-وزىمدە ساۋداگەر بولعانىم مىڭ جاقسى عوي.


    ساۋداگەر ايتادى: شىركىن تۇراقتى ءبىر قىزمەتتىڭ قۇلاعىن ۇستاعاندا عوي، ەل قولىنداعى تيىنعا تەلمىرىپ وتىرماس ەدىم. ساۋدامنىڭ كۇسەت بولۋى ءۇشىن وزگە تىرىك كۇلىپ، وزگەنى وزۋرەي ماقتاماس ەدىم. تيىن ءۇشىن تۋىسىمدى دا الداپ ءجۇرمىن. ىستەمەسەڭ ءناسىپ جوق، تۇراقتى ءبىر كاسىپ جوق، قولدى-اياققا تۇرعىزباعان قۋ دۇنيە-اي دەسەڭشى.


    ناۋقاس ايتادى: اۋىرۋ توسەگىندە جامباسىڭ ويىلىپ، ءولىم كۇتىپ جاتقانىڭ قيامەتتىڭ سورى ەكەن. شىركىن، دەنىم ساۋ بولىپ، جۇمىستىڭ قانداي دا ءبىر اۋرى بولسا دا، سودان شارشاپ كەلىپ، قارا سۋدى قىلعىتا، قارا ناندى قاربىتا سوققاننىڭ ءوزى قۋانىش ەكەن عوي.


    جۇرەك ءسوز: راس، كەيدە قۋ تىرلىك قاجىتىپ جىبەرەدى، اياق-استىنان نان تاۋىپ بەرىپ وتىرعان جۇمىسىنان جەريسىڭ، ىستەگەنىڭە كوڭىلىڭ تولماي، وزگەگە تامسانا قارايسىڭ.


ء    بىراق ەسىڭدە بولسىن، ەشكىم دە، جىرعاپ جۇرگەن جوق، ولاردا وزىنەن جەرىپ، ساعان قىزىعىپ ءجۇر.


    تۇڭىلە بەرمەي، جۇگىرە ءبىل، بۇل ومىرگە كەلىپ قالعان ەكەنسىڭ، ءجاي جۇرمە، جانتالاسىپ كور.


    باسىڭ امان، دەنىڭ ساۋدا ومىرگە وكپە ارتىپ جۇرگەنىڭنىڭ ءوزى ءبىر باقىت ەكەنىن ءتۇبى ءبىر تۇسىنەسىڭ عوي!


    سول كەزدە ە، راس-ۋا، دەيسىڭ.


    اۆتوردىڭ ٴۇنحات ءنومىرى: 297316847