قىزعاندىرىپ قايتەسىڭ، قىلمىس قوي ول
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2017-07-13 15:08:00


    ﴿ ماقسات قيزات ۇلى 

    پەندە جۇرەگىن قارا قۇرتشا كەمىرىپ، كەۋلەپ-كەۋلەپ قۇرتاتىن ءبىر دۇنيە بار، ول – قىزعانشاقتىق، كوبىمىزدى وسى دەرت مەڭدەتىپ العان.


    بۇگىنگىنىڭ ەركەگى دە، ايەلى دە قىزعانىشتىڭ قىزىل دەرتىنە كوگەندەلىپ قالعان، ەركەگى مىنگەن موتاسىمەن ماقتانسا، ايەلى كيگەن ماتاسىمەن ماقتانادى.


    سوندا ءبىز بىرەۋ ءۇشىن كيىنىپ، بىرەۋ ءۇشىن ءىشىپ-جەپ جۇرگەن كىسى سياقتىمىز عوي.


    مەن بىرەۋلەردى كوردىم، الدەقالاي الا الماي جۇرگەن ءوشى بار سياقتى، كۇندىز-ءتۇنى ەل كوڭىلىن قىجىرتاتىن سوزدەردى شىعارادى. قولىن بىردەڭەگە جەتە قالسا، سونىسىن ماقتان قىپ دوستىق شەڭبەرىنە شىعارعانشا اسىعادى. «بۇل ءسىزدىڭ جەكە تىرلىگىڭىز عوي، نەسىنە ماقتان قىلعانداي شۋلاتاسىز، بىرەۋ بولماسا، بىرەۋدىڭ كوڭىلىنە كەلەدى عوي»،-دەدىم مەن بىردە سونىڭ بىرەۋىنە.


    -دۇرىس ايتاسىز، سولاردىڭ كوڭىلىنە كەلسىن،-دەپ شىعاردىم،-دەدى ول توتەسىنەن سەلت ەتكىزىپ: كۇنى كەشە ۋنيۆەرسيتەتتە وقىپ جۇرگەندە، ولار مەنى بوزەك ەتەتىن، مەنىڭ كەدەيشىلىگىمدى بەتىمە باسقان، ال بۇل كۇنى مەنىڭ كۇنىم وڭىنان تۋدى، كورسىن ەندى، قىجىرتقاننىڭ كوكەسىن، مەندەگى باردى كورىپ قىزعانىپ كۇيسىن-دەمەسى بارما؟!


    ءبىز مىنە وسىلاي ءومىر ءسۇرىپ جاتىرمىز.


    قولىمىز دۇنيە شىركىنگە ءبىر جەتسە، ماقتانىپ قالۋعا بارمىز، كۇندەردىڭ كۇنىندە باستاعى بايلىقتىڭ پىر ەتىپ ۇشىپ بىرەۋدىڭ باسىنا قوناتىنىن بىلمەيمىز. اسىرەسە، كەۋدەسى نان پىسكەن ادامنىڭ باسىنداعى باق تەز تايادى. بايلىق، دۇنيە قاناعاتتىڭ ارقاسىندا قادىرلى عوي.


    ادامزاتتىڭ ەڭ اسىل اۋليەسىنەن ساحابالارى: اگار-اكىم ءسىزدىڭ مەنشىگىڭىزدە نۇق تاۋىنداي التىن بولسا، ونى قالاي پايدالانار ەدىڭىز،- دەپتى، سوندا عۇلاما: باسىمداعى بەرەشەكتەرىمنەن ارىلعان سوڭ، مەن ونى كەدەي-كەپشىككە تاراتار ەدىم، ونى قاسىمدا ءۇش كۇننەن ارتىق ۇستاپ تۇرماس ەدىم،-دەپتى.


    بۇل ءجاي عانا مىسال بولعانىمەن ءبىر ءمانىسى بار.


    ەلدى قىزعاندىرىپ، سودان ءلاززات تابۋعا بولارما، ءاي، قايدام، ەسەسىنە سودان ازاپ شەگىپ، ماڭدايى تاسقا تيگەندەر مول ەمەس پە.


    قىزعانىش – ءورت، ول ءوزىڭدى دە، وزگەنى دە ورتەيدى.


    شۇكىرشىلىك، جومارتتىق – سالقىن سۋ.


    ءورتتى سۋ سوندىرەدى.