وزگەنى اقىماق ساناما
كەلۋقاينارى:جۇڭگو قازاق راديو تورابى |جاۋاپتى رەداكتور:ايناگۇل | جاڭالانعان ۋاقىت:2017-08-25 17:04:00

 

    ماقسات قيزات ۇلى 

    كەيدە الدى-ارتىڭدى وراعىتىپ، قارسى الدىندا وتىرعان سەنى ادام قۇرلى كورمەي كوسەمسي جونەلەتىن، ءمورتى كەلسە، ماڭگۇرتتەندىرىپ ساتىپ جىبەرگىسى كەلەتىن كىسىنى دە كەزىكتىرىپ قالاتىنىڭدى قايتەرسىڭ.


    وندايدا اۋىلداعى اتام ايتقان مىنا ءبىر اڭگىمە ەسىمە تۇسەدى دە، مىرىس ەتە تۇسەمىن، وراتى كەلسە، وسى اڭگىمەنى ايتىپ بەرۋگە تىرىسامىن، ەگەر سىزگە دە سونداي ءبىر ءوزىن اقىلدى، وزگەنى اقىماق كورەتىن جان كەزىكسە، وسى اڭگىمەنى ايتىپ بەرىڭىز، ويلانا جاتار، اقىماق كىسىنىڭ قاتارىن ازايتا جاتار.


    ەرتە تۇرعان جۇكشى بازار جاققا بارىپ قايتايىنشى، جەڭىل-جەلپى جۇمىس تابىلىپ قالماس پا ەكەن دەپ بازارعا كەلەدى.


    بازارعا كىرىسىمەن: ءاي، جۇكشى، بەرى قاراي،-دەگەن داۋىستى ەستىپ، جاقىنداپ كەلسە، قارىنى قاباقتاي ءبىر باي ۇلكەن اق ورامالمەن جەلپىنىپ، شەرتيىپ تۇر ەكەن.


    -ءاي، جۇكشىم، مىنا ءبىر قوراپ اسا قىمبات، تاماشا شىنى-اياق ساتىپ الىپ ەم، سونى ۇيگە جەتكىزىپ بەر،-دەيدى.


    -اقىسىنا قانشا تولەيسىڭ؟


    -ەي، اقشانى نە قىلاسىڭ! مەن ساعان ءۇش اۋىز اقىل ايتايىن.


    -جارايدى، اقىلدى تاڭدايىن،-دەپ جۇكشى شىنى-اياق تولى قوراپتى يىعىنا كوتەرىپ ءجۇرىپ كەتەدى.


    بازاردان شىققاننان كەيىن جۇكشى:


    -بايەكە، اقىلىڭىزدىڭ ءبىرىن ايتىڭىز،-دەيدى.


    -اقىلىمنىڭ ءبىرى،-دەپتى باي،-وسى بازاردا سەنەن اڭقاۋ، سەنەن ەسسىز ءبىر ادام بار دەسە، سەن وعان سەنبە،-دەپتى.


    جولدىڭ جارتىسىنان وتكەننەن كەيىن:


    -ەندى اقىلىڭىزدىڭ ەكىنشىسىن ايتىڭىز،-دەپتى جۇكشى.


    -اقىلىمنىڭ ەكىنشىسى،-دەپتى باي،-وسى قالادا سەنەن كەدەي، سەنەن ناشار ادام بار دەسە، سەن وعان سەنبە،-دەپتى.


    جۇكشى بايدىڭ ۇيىنە كەلىپ، ەسىك الدىنداعى قازانداي قارا تاسقا ءبىر اياعىن سالىپ تۇرىپ:


    -بايەكە، اقىلىڭىزدىڭ ءۇشىنشىسىن ايتىڭىزشى،-دەپتى.


    -اقىلىمنىڭ ءۇشىنشىسى، دۇنيەدە سەنەن اقىلسىز، سەنەن نادان ادام بار دەسە، سەن وعان سەنبە،-دەپتى باي ناساتتانىپ.


    سول ساتتە، جۇكشى يىعىنداعى شىنى-اياق تولى قوراپتى اسپانعا قاراتىپ، بار كۇشىمەن قازانداي قارا تاسقا ءبىر سوعادى دا:


    -بايەكە، ەگەر،-دەپتى،-وسى قوراپتىڭ ىشىندە سىنباي قالعان ءبىر شىنى-اياق بار دەسە، سەن وعان سەنبە،-دەپ جۇكشى ءجۇرىپ كەتىپتى.


اۆتوردىڭ ۇنحات ءنومىرى: 297316847