نەتكەن اسەم قىلمىس بۇل نەتكەن اسەم
كەلۋقاينارى:جۇڭگو قازاق راديو تورابى |جاۋاپتى رەداكتور:داۋىلبەك | جاڭالانعان ۋاقىت:2017-08-28 16:03:00


    نۇربولات اسىلبەك ۇلى


ارمانداۋمەن كوز ىلمەي تاڭدار اتتى .
قارسى الىپ قايعىسى مول پاڭ قوناقتى .
تالاي-تالاي جازىلدى سوڭعى جىرلار ،
تالاي-تالاي سىلتەدىم سوڭعى اراقتى .

سۇركەيلى وي ، ۇرەيلى ءتۇس …
ءتييي وسىلار …
مازالايدى.
كىم ءبىلسىن كيە شىعار ؟
قۇلاتپاق بوپ جاتار بىرەۋ بايتەرەكتى ،
باسىندا سامۇرىقتىڭ ۇياسى بار .

ناز ايتقانشا كەلەر قىس ، وتكەن كۇزگە .
بابالار كوكسەپ وتكەن كوكتەمدى ىزدە .
اماناتىن ارقالاپ عاسىرلاردىڭ ،
الميساقتان اڭىز بوپ جەتكەن بىزگە .

رۋحىممەن جىردان باسقا قالادى وزگەم .
اڭساۋدى ۇناتامىن بالا كەزدەن .
ارمانبا ؟
اقساقالما ؟
جەلمايامەن ،
جيدە بايسىن جەر ىزدەپ دالا كەزگەن …

وتىنەم ، جىر جازۋعا بولما قۇشتار .
بولماسا ەگەر ارمانىڭ الدان ۇستار…
نەجازىپ ؟
نە جاراتىپ ؟
تىندىرسىن ؟
سارى قىز ، سارى كۇز دەپ سارناعىشتار .

جۇرەگىڭدە مۇڭ نالا كوپپە دەسەڭ ،
تالاي -تالاي مايداندا كەتكەن ەسەم .
جىر جازۋ كۇنا دەيدى …
كۇنا بولسا ،
نەتكەن اسەم قىلمىس بۇل نەتكەن اسەم .


2017 - جىل، تامىز