قولىڭ جەتكەن باقىت عانا شىن باقىت
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2017-08-29 12:54:00


    ٴار بىر جۇمىر باستى پەندەنىڭ باسىندا قولى جەتپەگەن نارسەنى ەڭ جاقسى نارسە ، سول نارسە مەن ٴۇشىن وتە قاجەتتى دەپ ويلايتىن قاتە تۇسىنك بار . وسىنداي قاتە تۇسىنكتەر وي سانامىزعا كىرىپ العاننان كەيىن، ۇنەمى سونى ارمانداپ ، تىنىم تاپپاي ىزدەۋمەن بولامىز . سول ارمانداعان نارسەلەرىمىز قولىمىزدى انتەك سوزساق بولدى جەتەردەي بوپ تۇرعانىمەن ، شىنتۋايتىندا وڭاي - وسپان قولعا تۇسە بەرۋى ناعايبىل ، ارمانداعان الايدا قول جەتكىزە بەرمەيتىن نارسەلەرىمىزدى ىزدەگەنىمىز بەينە اينادان گۇل ، سۋدان اي ىزدەگەندەي قىينىنىڭ قىينى .


    قول جەتپەيتىن نارسەلەردى ارمانداۋ - شىنتۋايتىندا تەك ٴبىر تۇرلى جانىڭدى جەگىدەي جەيتىن ازاپتان باسقا دانەڭە ەمەس . ەگەر ٴسىز ارمانداعان نارسە اعاشتىڭ ۇشار باسىنداعى جەمىس بولسا ، بالىكىم اعاشقا شىعىپ ، نەمەسە ساتى اكەلىپ جەمىستى الۋدى ويلايتىن شىعارسىز ، قانداي امال قولدانساڭىزدا اعاش باسىنداعى جەمىستى الا الماساڭىز وندا قايتەر ەدىڭىز ؟ جەمىستى الماي اق قوياسىزبا الدە جالعاستى باسقالاي شارا قاراستىراسىزبا ؟


    ومىردە تىرشىلىك ەتىپ جاتقان جان يەسىنىڭ بارلىعى بيىك اعاش باسىنداعى جەمىستى كورەتىنى شىندىق، اقىلدىلارى اعاشتى نەشە اينالىپ كورەدى دە قولى جەتسە ۇزىپ الادى ، قولى جەتپەسە باسقالاي امال قاراستىرادى . ەگەر شىنىندا الا المايتىن بولسا وندا اۋىرە بولماي جولىنا تۇسەدى . اشكوز ، اقىماق جاندار اعاشتى نەشە اينالىپ الا المايتىنىن بىلسەدە تاستاپ كەتۋگە كوزى قىيماي ، ازاپتانىپ ، اۋىرە - سارساڭعا تۇسىپ قۋ جانى قالىپ ، ەڭ سوڭىندا اعاش تۇبىندە وتىرىپ ، بارىنەن كۇدەر ۇزىپ ، ازاپتانادى.


    ٴومىر بەينە الىس ساپار ىسپەتتى ، وسى ساپاردا ٴبىز كوپتەگەن ادامدار مەن ىستەرگە ، كوركەم تابىيعاتقا ، وزىمىزگە قاجەتتى نەمەسە قاجەتسىز نارسەلەرگە ، تامساندىراتىن تاتتى شاراپ پەن قوشامەتتىڭ الاقايى مەن باسىڭا اقىر زامان ورناتاتىن اۋىر قايعى - قاسىرەتكە جولىعىپ جاتامىز ، اشكوز ، اقىماق جاندار بارلىق نارسەگە قول جەتكىزىپ ، يەمدەنىپ العىسى كەلەدى دە ، نارسە وتە كوپ بولىپ كەتسە ، الىپ جۇرە الماي قالامىن با دەگەندى ويلامايدى . اقىلدى ادامدار تەك وزىنە قاجەتتىسىن عانا الادى دا ، قاراپايىمدا قام - قايعىسز تىرلىك كەشىرۋدى قالايدى.


    قول جەتپەيتىن باقىتقا جارماسا بەرۋ اۋىر رۋحاني ازاپ ارقالاۋدان باسقا ەشتەڭەدە ەمەس ، ونىڭ ەسەسىنە قولدا بار باقىتتى قادىرلەپ ، ومىردەن لاززات الىپ ، تۋىس - تۋعان ، دوس - جاراندار مەن شۇيىركەلەسىپ ، دەنساۋلىقتى ايالاپ كوڭىلدى  تۇرمىس كەشىرۋدەن ارتىق باقىت بارما ؟


    تىرشىلىك ٴۇشىن تىربانعان مىناۋ قامشىنىڭ سابىنداي كەلتە عۇمىردا ، قول جەتپەسكە قول سوزىپ ، باعداردان اداسىپ ، قوڭىز دۇنيەنىڭ قۇلى بولماي ، كوڭىلدى كەڭگە سالىپ ، بارعا قاناعات ەتىپ ، باياندى باقىتتى تۇرمىس كەشىرگەن ەڭ ابزال .


اۋدارعان : ەركىنبەك تۇرداقىن ۇلى