مەنىڭ التى جىلدىق ستۋدەنتتىك جىلدارىم
كەلۋقاينارى:جۇڭگو قازاق راديو تورابى |جاۋاپتى رەداكتور:ايناگۇل | جاڭالانعان ۋاقىت:2017-09-11 17:31:00


    قاۋسىلقان دولداش ۇلى


    ءبىرىنشى ءبولىم، العاشقى قادام 

    2011-جىلى 23-تامىز. تۇستەن كەيىنگى ساعات بەيجيڭ ۋاقىتى بەستەن اسقان كەز مەن ءۇشىن ۇلى بولاشاقتىڭ ۇمتىلماس ساتىنە جازىلىپ قالدى.


    ءيا،ءدال وسى مەزەت رايونىمىزدىڭ ءۇرىمجى قالاسى پويەز بەكەتىنە جول العان ساتتەرىم ەدى.


    وسىدان تۇپ-تۋرا ءبىر ساعاتتىڭ الدىندا اتاممەن اپامنىڭ قاسىندا بولعان ساتتەرىم؛ تۇپ-تۋرا ەكى كۇننىڭ الدىندا ورتا مەكتەپتەگى ساباقتاستارىممەن باس قوسقان ساتتەرىم؛ تۇپ-تۋرا بەس كۇننىڭ الدىندا سوناۋ الىستا قالىپ قويعان جان ۇيامنان اق جول تىلەپ شىعىپ باراجاتقان شاقتارىم بۇكىل ومىرىمدەگى جاڭا باستامانىڭ قازىرگى كورنىسىمەن تۇتاس تاۋىپ جاتتى.


    ءتىپتى مىناۋ ۇزاق جولدىڭ ادامىنا اينالىپ باراجاتقان قازەز باسىم ءوز قۇزىرىنا سەرگەكتىك، باتىلدىق، ۇمىتشەڭدىك، جىلاۋىقتىق، ۋايىم مەن كۇيىنىش-سۇيىنىشتەردى تۇگەل جيناپ الىپ، قيان-كەسكى قاربالاسقا سالىپ جىبەرگەندەي ەدى.


    بۇرىن-سوڭدى تالعام مەن تاڭدانىسقا تولى ۇزاق ساپارعا شەگىلىپ كورمەگەن ءوز مارقا جانىم قوراعا تارتقان قويداي جامىراي ۇمتىلعان ادامدار توبىرىنان جۇرەر جولىمدى ارەڭ تاۋىپ، بەينە ‹مىڭ ءبىر ءتۇن حيكاياسىندا› ايتىلاتىن جاھانگەرلەردەي جالعىز تارتىپ بارامىن.


    قادامىم قاراجەردى قارىس-قارىس باسقانىمەن، جۇرەك ءدۇپىلىم ونان بەتەر لۇپىلدەپ سوعادى. دۇنيەدە ەڭ تەزدىك پەن ەڭ زور جۇيىرىكتىكتى ايتار بولسام، مەنىڭ تۇڭعىش رەت پويەز ۆاگزالىنان قوزعالعان ساتتەرىمدەگى دامىلسىز سوققان جۇرەك ءدۇپىلىن بىردەن-ءبىر تەزدىككە جازساق بولاتىنداي.


    باسى مەن اياعىنا كوز جەتكىزىپ بولمايتىن، كوزجەتسەدە،كوپتەگەن ءلۇپىلدى جۇكتەگەن كوڭىلدى ۇيىرەتىپ قويمايتىن پويەزدىڭ سىرتقى تۇلعاسى بار ادامدى ءوز-ءوز ورنىنا انتەك جەتەلەيدى. مىناداي اپىل-عۇپىل ساتتەردە ءوز دىلىڭمەن جانىڭدى جاي تاپتىرار ورتا ىزدەيدى ەكەنسىڭ. ايتپەگەندە، جانتالاستان جارىلىپ كەتە جازدايسىڭ با قالاي؟


    الاڭعاسارلىقتىڭ دا ۇشىنا جەتكەن بەيمازالىعى نەمەسە الاڭداۋدان تۋعان پىسىقتىعى دا بولادى ەكەن،ءار مۇندا قالىڭ توبىر ادامدار اراسىنان ‹جالعىز اتتانامىن›دى بۋىنعا بەكىتىپ، جۇرەككە قۇيىپ العان الاڭعاسار باسىم العاش پويەزعا كوتەرىلگەندە مەنى اتتاندىرعالى بايەك بولىپ كەلگەن ارداقتى دا اق جارقىن اتامدى دا ارتقا تاستاي ۇمىتىپ، ۆاگوننىڭ ورتا تۇسىنا بادىرايتىپ جازىلعان ‹13›دەگەن دەگەن نومەرگە ەنتەلەي ەنىپپىن-اۋ....


    قولىمدا ساندىق، يىقتا سومكا،ءوز ورنىما وتىرا بەرىپ، تەرەزە سىرتىندا قولىن الەسەل-الەسال بۇلعاعان اتامنىڭ قاراسىنان ارەڭ ەسىمدى جيناعانداي بولدىم. ەندى وزىمە-ءوزىم: ‹ە، تۋعان ءوڭىر، تۋعان شينجياڭ وزىڭنەن اتتانعالى تۇرىپپىن-اۋ، ەلجىرەي اماندىعىمدى تىلەگەن تۋىس-تۋعاندارىم، تۋعان جەرىم ءور توسىڭدە وزىڭمەن بىرگە ماڭگىلىك ءزاۋلىم بيىگىم بولىپ تۇرا بەرگەي....حوش، امان بول، الىپ شينجياڭ›-دەپ ىستىق جۇرەكپەن كۇبىر جاسادىم.
پويەز ءوز ورنىنان باياۋ جىلجي جونەلدى. مەندە پويەزبەنەن اۋىر قوزعالىپ، الدىمداعى بەلگىسىز ساپاردان اق جول تىلەپ، اينالامداعى ادامداردان جاقىندىق شىراي، شاپاعات سەزىم كۇتكەندەي ەلەگىزىپ جان-جاعىما ءبىر قاراپ الدىمدا، ارت جاقتا قالىپ باراجاتقان اياۋلىلارىما، جاقىن-جاناشىرلارىما بورىشتىلىق بەينەمەن ءوز كوڭىل-كۇيىمدى بوياماسىز جەتكىزگىم كەلدى.


    بۇگىنگى پويەز بەكەتىنە اتا-اپاممەن قوسا ەكى اپەكەم جانە جەزدەمدە كەلگەن ەدى. ولاردىڭ ورتاق تىلەگى: مەنىڭ امان-ەسىن ماقساتتى جەرگە جەتىپ الۋىم. بارلىعىنىڭ ورتاق الاڭدايتىنىدا: مەنىڭ تۇڭعىش رەت جالعىز اتتانىپ، ۇزاققا كەتىپ باراجاتۋىم.


    بەلەتىمدى تەكسەرتىپ ىشكە كىرەردە ياعني مىناۋ قاسىمداعى جاقىندارىمنان ايىرىلىسار كەزدە، مەندە ەشقانداي قوبالجۋ نەمەسە الاڭداۋ بولمادى. ونان دا ماعان ىشتەي الاڭداپ كوزدەرىنەن جاس العان اپاممەن اپەكەمە ءالسىن-ءالى توقتاۋ سوزدەر ايتىپ قويامىن:


-مەنەن الاڭداماڭىزدار، بارلىعى دا جاقسى بولادى. مەن ەرجەتتىم، ءوز جولىما بەرىك بولامىن، بولدى، كوڭىلدەرىڭىزدى بوساتپاڭىزدار،-دەپ توقتاعان سوڭعى ءسوزىم ءارى سالماقتى ءارى بايلام رەتىندە شىقتى. ەندى ەشكىمنىڭ جىلاۋىنا، كوڭىل سوزدەرىن ايتۋىنا رۇحسات جوق، ونى تىڭدارلىق مەندە دە مۇرسات جوق. ويتكەنى، مەن ەندى ىشكە ەنۋىم كەرەك.


    -كوزدەرىمەن قيماي-قيماي ۇزاتىپ سالعان اپام مەن ەكى اپەكەمنىڭ كوڭىل-كۇيلەرى قانداي بولدى ەكەن دەشى، مەنىڭ قاسىمدا ەرىپ كەلە جاتقان اتامدا مەنىڭ ءاربىر قيمىلىمدى باعىپ،‹ەندى قالاي بولار ەكەن›دەگەندىك تانىتىپ كەلەدى،–اۋ....


    مەن باسپالداقتان ەكىنشى قاباتقا كوتەرىلىپ كەلە جاتىپ وسىنى ويلاپ ءوتتىم.


    *** *** ****


    پويەز جۇيتكىتىپ كەلەدى. كەش الدەقاشان باتقان، دالا مۇلگىپ تۇر.


    ورىندىقتا وتىرعان مەنىڭ ويىم ون ساققا جۇگىرەدى، وتكەندى كوپ بويلاتادى. بىردە ماڭايداعى بەيتانىس ادامدارعا كوزىم تۇسە قالىپ، ساتتىك جالعىزدىق تانىتادى.


    -ەنشاللا، وسى جولعى ساپارىم ساتىنە باسسا-دەپ بارىپ، الداعى جاڭا ورتا، ۇيرەنۋ ىسىنە ويىمنان جوسپار جاساي باستادىم. ال، بىردە سوناۋ الىس مەكەندە قالىپ قويعان جان ۇيامدى جانە اكەم مەن انامدى ويلاپ قويام.


    ءتۇن بولسادا جانعا تىنىشتىق اپەرمەدى-اۋ، ۇيقى كەلەتىن ەمەس. الدە بىرەۋلەر ورىندىقتا قورىلعا باستى، مەنەن بۇل جاعىنان حابار جوق، ونىڭ ۇستىنە قاسىمدا تۇرەگەلىپ تۇرعان بىرەۋگە قاسىمنان سىرىلىپ ورىن بەرگەن ەدىم،ءوزى تار ورىن تىپتەن قوزعالىتپاي تاستادى.


    وتكەننەن بەرگى انامنىڭ وسى ساپارىمنان الاڭداي بەرەتىن داعدىسى بۋىنىمدى الدەقاشان بەكىتىپ قويعان سياقتى. مەن مىناۋ بىلمەس ساپاردىڭ يەسى قاتتى ورىندىقتا شىرەنە وتىرىپ، قۋىس كەۋدەمنەن ەشتەڭە سەزدىرەر ەمەسپىن. اۋەلى، ءوز ورلىگىم ەشكىمنەن جول سۇراپ، ەشكىمگە تەلمەڭدەمەيتىندەي راي بايقاتادى. سونان سوڭ، سومكامنان الدىن–الا دايارلاپ العان كىتاپتارىمنىڭ بىرەۋىن الىپ شىعىپ پاراقتاي باستادىم.


    مىنە، وسىلايشا پويەزعادا ۇيىرلەسىپ كەتتىم. ءبىر قاراعاندا مەنىڭ وسىناۋ ۇزاق جولدىڭ كولىگىنە وتىرىپ، بەلگىلى ءبىرباعىتپەن كەتىپ بارجاتۋىم ەشكىمگەدە تاڭسىق ەمەس شىعار. اۋەلى، بۇل ارادا ەشكىمدە ماعان جول نۇسقاۋشى نەمەسە جول توسۋشى بولا المايدى دا، مەنىڭ دە قايداعىعا قايىرارلىق ۋاقىتىم بولماۋ كەرەك. بۇل اراداعىلاردىڭ اربىرىندە ءوز جول ءجۇرۋ مەن جۇمىس جۇرگىزۋ ەركىندىگى بولادى. بۇلار بۇرىنعى ساپار يەسى بولسىن نەمەسە كەيىنگى ساپار يەسى بولسىن تۇگەلدەي تەڭ قارالادى. ارينە، ەشكىمنىڭ كۇردەلى ىستەرگە، ماسەلەلەرگە باس قاتىرۋى ەشكىممەن تاۋەلدەنىپ جاتپايدى.


    پويەزعا ەڭ ارى دەگەندە جولاۋشىلار وتىرادى. ال، وسى جولاۋشىلاردىڭ دا جىك-جىكتەگى ءبولىنۋ بارىسى دا بار. ايتالىق، شينجياڭنىڭ وزگە ولكەگە بارىپ وقيتىن وقۋشىلارى؛ شينجياڭنىڭ وزگە ولكەگە باراجاتقان جۇمىسشىلارى؛ شينجياڭنان ءوزجەرىنە قايتىپ باراجاتقاندار نەمەسە مەملەكەت ىشىندە الۋان-الۋان شارۋالارمەن جۇرگەن ادامدار توبى،ت.ب.


    مەن بولسام وسىلاردىڭ ەڭ قاراپايىم، ەڭ ايقىن تۇرىندەمىن. دەمەك، مەن الىس جەرگە، الىس ولكەگە وقۋ ىزدەپ بارامىن. ەرتەڭگى بولاشاعىم ءۇشىن، جان باعىسىم ءۇشىن، ارىسىن ايتقاندا، جۇڭحۋا ازاماتى حاقىسىنان، قازاق پەرەزەنتى تۇرعىسىنان ءبىلىم ىزدەپ الىسقا اتتانىپ كەلەمىن.


    مەن استە زەرىگىپ وتىرعامىن جوق. ءتىپتى، زەرىگۋگە، ەرىگۋگە مويىنسال بولۋىما مۇلدەم بولمايدى. مەنىڭ قازىرگى سىپ-سيدام بويىم مەن الاعاق كەۋدەم كوتەرە الماس اسا ۇلكەن مىندەتىم، قىر ارقامدا قىل شىلبىرمەن تاڭۋلى تۇر.


    ءيا، مەن ۇزاققا ءوز سەزىم، ءوز نامىسىم ەمەس، بۇكىل ءبىر ۇلت، بۇكىل ءبىر ولكەنىڭ نامىسىن جوقتاپ بارامىن. ول بولسا-عىلىم، ءبىلىم، ونەر، جەتىستىك، تەحنيكامەن تىڭ تالعام.


    وسىلاردى قابىلداۋ ءۇشىن اتامەكەننەن نەشە مىڭ شاقىرىمدىق الىس قادام باسىپ وتىرمىن. ەگەردە مەن ىزدەيتىن دۇنيەنىڭ بارلىعى اياۋلى اتامەكەننەن تابىلا بەرسە، كوكەيگە وزدىگىنەن قۇيىلا بەرسە، باراتىن جەرىمنەن وزدىگىمنەن ۋاز كەشۋگە پەيىل ەدىم. الايدا، تاعدىردىڭ تاسى ولكەمىزدەن ەڭ شالعاي اراعا دومالاتىپ جىبەرىپ وتىرماي ما؟


    مەن پويەزعا تامىزدىڭ 23-كۇنى 7 دە وتىرعان ەدىم. ەرتەسى جالعاستى ءبىر تاۋلىك وتىرىپ، 25-تامىز تاڭ سارىدە حىنان ولكەسىنە قاراستى جىڭجوۋ ستانسياسىنا كەلىپ توقتادىق.


    وسى بارىستا ماعان اسەر ەتكەن ءبىر ءتۇرلى جاعداي بولدى. بۇل ءبىر توسىن جاعداي بولىپ قالماستان، كوڭىلگە الاقاي قۋانىشىن تولتىرارلىق تانىستىق پەن بىلىستىك ەدى.


    بۇل جولدا مەن ساپارلاس تىلەك دەگەن اعامەن تانىسىپ قالعان ەدىم. تالعامى مەن تالعارىنا بىردەي قول ۇسىنعان قالاۋلى دا سالاۋاتتى، بەلگىلى ۆنيۋەرسيتەتتىڭ سوڭعى جىلدىق ستۋدەنتى، جۇرەگى اقيقات دەپ،ادامدىق دەپ دۇرسىلدەگەن، كوڭىلى اق جايقىن، كىشپەيىل اعانىڭ الدىندا ءوزىمدى سالماقتى ۇستادىمدا، الداعى جولدارىمنىڭ بەلەڭ-بەلگىسىن وسى اعادان ۇققانداي بولدىم.


    اعا، قورعانعا بىتكەن اسىل شىنارداي، ەل نامىسىن ويلانا، مۇڭايا، ىجداعاتپەن سويلەگەندە، ۇزىن تۇرا بويىم وزدىگىنەن الاسارىپ شوگىپ كەتكەندەي بولدى.


    اعا، جاستارىمىزبەن قوعامنىڭ بايلانىسىن، اسىرەسە،ءىشىنارا ستۋدەنىتەردىڭ كەلەڭسىز ارەكەتتەرىن اشىنا بايانداعانىندا، ەرىكسىز باس يزدەپ،ءوز بىلدىرىمدى بىلدىرەمىن.


    مەندە ازامات باسىممەن ءوز بوزبالا ءۇنىمدى شىعاردىم. اعا بۇلاردى قۋانا قابىلدادى، اعا ەكەۋىمىزدىڭ ءبىر ۇقساستىعىمىز ادەبيەتكە دەگەن قۇشتارلىعىمىزبەن ۇشتاسىپ، بەلگىسىز ءبىر ماگنيت كۇشى ءبىر-بىرىنە اناعۇرلىم تارتا ءتۇستى.
ەشبىر تاڭدانىسسىز رەال الدىندا ايعاق بولارلىق سونى اڭگىمەلەر قۇرىپ، اقىل پەن كەڭەسكە وزىمشە بوگىپ، قابىلداۋمەن قاناعات تۇتۋ، قۇرمەت پەن ءۇمىت ءجىبىن جالعاۋ بارىستارىنا ءوتىپ، سوڭىندا اعا-باۋىر قيماستىق سەزىمىنە بارىپ ءبىراق توقتالدى.


    اراداعى از ۇزىلىستە مەن ول كىسىگە دەگەن قۇرمەت سەزىمىمدى شامالى ولەڭ جولدارىمەن بەينەلەپ، ول كىسىنىڭ ماقساتتى جەرى شي-ان بەكەتىنە كەلگەندە ءوز قولىنا تابىس ەتتىم. سونداعى ولەڭ جولدارى بىلاي بولىپ كەلەدى:
ۆاگزالدا جولىعىپ اعامەن،
شوق بولىپ سەزىمىم جاراپ ەم.
كوپ بولىپ تەبىرەنىپ قۋاندىم،
جوق بولعان جالعىزدىق جارالى ەم.

جولىمدى العانداي جاڭساققا،
ويىمدى جۇگىرتەم ءارساققا.
اعا،ءبىز ماڭگىلىك بىرگەمىز،
جانىمىز الىستا بولساقتا!
‹جول جۇرە تۇزەلەدى› دەگەندەي، مەن جىڭجوۋ بەكەتىنەن تۇسە سالىپ ءدال مەن باراتىن مەكتەپكە جول الىپ باراجاتقان ەكى ۇيعۇر بالامەن ۇشىراسا كەتتىم دە،ءبىز بىرگە جۇرەتىن بولىپ كەلىستىك.


    ەندى جيليننىڭ چاڭچۇن قالاسىنا بارماقپىز. وكىنىشكە وراي چاڭچۇنگە توتە باراتىن پويەز بەلەتى جول بولىپ شىقتى دا، ءبىز ءوزارا اقىلداسا كەلىپ بەيجيڭمەن اينالىپ بارۋعا كەسىم جاسادىق.


    انە-مىنە دەگەنشە بەلەتىمىزدى دە الىپ، بەيجيڭگە باراتىن پويەزعادا شىعىپ ۇلگىردىك.


    - ە، ادام عۇمىرى–اي دەسەڭشى!


    پويەز ءتۇزۋ رەلىستە ەرەكشە تەزدىكپەن جۇيتكىتىپ كەلەدى. مەن تەرەزەدەن سىرتقا تەلمىرىپ كەلەمىن. ءبىز جۇرگەن جول الاپتارى بارعان سايىن كوركەمدەنىپ،ءبىز بەينە ءبىر جاسىل باققا ەنىپ باراجاتقانداي كۇي كەشەمىن. قاسىمداعى ەكى بالانىڭ بىرەۋى قىز بالاەدى، بىزدەنءبىر جىل ىلگەرى بارىپتى. قازىرشە جولدى سول باستاپ كەلەدى، ەندى بىرەۋى مەنىمەن ساباقتاس ەكەن.


    مەنىڭ كوشىم جۇرە-جۇرە تۇزەلگەندەي بولدى. ەندى جالعىز ەمەسپىن، كوڭىلىم دە كوتەرىلىپ قالعان. الدىڭعى الاڭداۋدىڭ ورنى جولدىڭ ەكى جاعالاۋىنداعى ادەمى كورىنىستەردى تاماشالاۋمەن كوز جەتەتىن الىس-جاقىنعا تەلمىرۋگە ۇلاسقان.


    پويەزبەن ون ەكى ساعاتتا بەيجيڭ قالاسىنا كەلىپ تۇستىك. بۇل كەزدە بەيجيڭدە اقشام ۇيىرىلگەن ەكەن.


    بەيجيڭنىڭ باتىس بەكەتىندە ءسال ايال جاسادىم. ماڭايىما تاڭدانا قاراپ قويامىن: وتانىمىزدىڭ الىپ استاناسى مەملەكەتتىڭ ورتالىق قالاسى ءوز ساۋلەتىمەن،ءوز اسقاق بەينەسىمەن تۇنگى كورنىسىن كوزگە تارتا باستاعان.


    ءبىز بۇل اراعا ءسال ايال جاساپ، بۇگىن ءتۇن وسى اراداعى مەيمانحاناعا دەمالاتىن بولىپ كەلىستىك.


    ەرتەسى تاڭ سارىدە ويانساق، سىرتتا جاڭبىر قۇيىپ تۇرىپتى. كادىمگى اۋىلدىڭ اق جاڭبىرى، اينالا تولعان قولشاتىر ۇستاپ ارى-بەرى اعىلعان ادامدار شوعىرى.ءبىز تاعى دا اقىلداسا كەلىپ، كەلەرگى ماقساتتى جەرىمىز بويىنشا بەيجيڭ پويەز ستانسياسىنا قاراي جول الدىق.


    كوشە اۆتوبوزىندا وتىرىپ، دۇنيەگە ايگىلى ەلىمىزدىڭ ەڭ ۇلكەن الاڭى تان-انمىن الاڭىنىڭ قاسىنان وتتىك. وسى كەزدە مەنىڭ كوڭىل-كۇييم قالاي بولدى دەيسىز-عوي، قاراداي الاقىزىپ، الاڭ سىرتىنا جاپسىرىلعان ۇلى كوسەمىمىز ماۋزىدۇڭنىڭ سۋرەتىنە الەسال-الەسال قاراي بەرىپپىن.


    تۇل عۇمىرىمداعى تىڭ ءبىر قۋانىش ءدال مەنىڭ بەيجيڭ قالاسىنىڭ كورىكتى كوشەسىنەن ءوتىپ باراجاتۋىم ەدى.


    ءوتىپ باراجاتىرمىن، ءوتىپ عانا ەمەس، بۇدان دا الىس قيىرعا كەتىپ باراجاتىرمىن. تەك عانا ءبىر ءوتۋ جەتەرلىك قىلمايدى. مەن كورمەگەن، تىپتەن تاڭىرقايتىن ايگىلى قىزمەت ورىندارى، مادەنيەت سارايلارى، وركەنيەت ۇيالارى، نە ءبىر ۇلكەن ونەر وشاقتارى، عىلىم مەن ءبىلىمنىڭ ۇيالارى وسىندا قالىپ بارادى. قايتا قايىرىلارمىن با،قايىرىلىپ كەلىپ بارلىعىمەن تانىس بولارمىن با؟ ءوزىمدى قاتتى تاڭىرقاتارلىق، زاتتىق جانە رۋحاني دۇنيەمدى بايىتارلىق الىپ استاناعا تۇعىرىمنان تۇلەپ ۇشپاسامدا، كەرەگىممەن تەبىرەنە ۇشىپ قوناقتارما ەدىم؟ قوناقتاپ عانا قالماي، قۇزىرلى عىلىم وردالارىنان، قۇنىتتى، قابلەتتى، ۇلىستى ازاماتتاردان ءتالىم-تاربيە،وركەنيەت ءومىرىن قابىلدارما ەدىم؟!


    ەنشاللا، ويلاعاندارىمنان ءۇمىت كۇتۋگە ابدەن بولادى. رەالدىق جاناسىمدىلىعى تانىتارلىق امالياتپەن تاني الاتىن ۇشقىر كوكىرەك كوزىندە تۇر-عوي! تالابىم مەن جالىنىن اسپانعا اتارجاستىق كوكتەمىمنىڭ بارىندا ءبىرمۇنشا تاڭدانىستارمەن وتتى دا ويلى، تالەيلى دە تابىستى ورلەرگە ورمەلەي الاتىن بولارمىز.


    ۇلى دا اسەم تابيعاتتىڭ ءتورت مەزگىلدىك اينالىسى ‹كۇز› دەگەن جەمىستى دە سالاۋاتتى ماۋسىمعا بەتالعان تۇسىندا، ادام دەگەن وسى ءبىر ۇلكەن اتاۋمەن اتالىپ، قازاق دەگەن ۇلتقا جىكتەلىپ، وسى ۇلتتىڭ ازاماتتىق سالاۋاتىنا تىركەلگەن ارمانشىل ءبىر جاستىڭ ‹ارمانىم-ۋنيۆەرسيتەت› قادامى، مىنە، وسىلايشا جۇڭگونىڭ شىعىس تەرىستىگىنە قاراي بەتالىپ باراجاتتى.


    سىمعا تارتقان شىنارداي ءتۇپ-ءتۇزۋ رەلىستە الىپ پويەز جۇيتكىتىپ كەلەدى. تەك اۆتوبوزدان باسقاعا وتىرىپ كورمەگەن مەن وسى جولى تۇڭعىش رەت پويەزعا وتىردىم. پويەز تەرەزەسىنەن مىناۋ جات ولكە جاڭالىقتارىن تاماشالاپ، مەنىڭ قاراپايىم اۋىلىمدا بولىپ كورمەگەن بيىك-بيىك اسەم عيماراتتارىنا تامسانىپ، تاڭىرقاپ كەلەمىن.ءبىرىنشى رەت مىناۋ دۇنيە ماعان سونداي كەڭ، كەرەمەت سەزىلدى. مەنىڭ بالا جۇرەگىم ارنەگە تاڭىرقاپ، مىناۋ بەيتانىس دالا تابيعاتىنا، بوتەن قالا جاڭالىعىنا تويىمسىزدانىپ، تەبىرەنىپ تولقىپ كەلەدى.