كوڭىل قورجىنى قوقىسىق ساندىعى ەمەس
كەلۋقاينارى: |جاۋاپتى رەداكتور: | جاڭالانعان ۋاقىت:2018-01-11 15:55:00


ماقسات قيزات ۇلى

 

اپاڭ ساعان ءبىر ارقا وتىن اكەل دەسە، ءبىر ارقا وتىن اكەل. ماقتاۋ ەستيمىن دەپ ەكى ارقا وتىن اكەلسەڭ، ارتىڭ تىرتيىپ، ەرتەسى قوي شەتىنە شىعا الماي قالاتىن جاعداي تۋادى. كورپەڭە قاراي كوسىل، يىعىڭا بار جۇكتى سالىپ الما، ءىستى ازدان كوپكە قاراي ىستەگەن قايىرلى، مويىنداعى جۇك جەڭىل بولعان سايىن، تۇرمىس ءماندى بولادى.

 

كوڭىل قورجىنىڭا تۇرمىستاعى باكىن-شۇكىن كيكىلجىڭ، كىرازىمايتىن كوڭىلسىزدىكتەردى نىعارلاي بەرمە، جامان ويلار جانىڭا جيىلا بەرسە، ءتانىڭدى جيدىتەدى. كوڭىل قورجىنى قوقىسىق ساندىعى ەمەس، كىم كورىنگەننىڭ لاقتىرعانىن سيعىزا بەرەتىن، كوڭىل قورجىنىن باتتاستىرماي جەڭىل ۇستا، كوڭىل تەرەزەسىن ۇنەمى ءسۇرتىپ، تازارتىپ تۇرۋدى ۇمىتپا، ءومىر دەگەن قىزىق قوي، قىزىق جەرىن سىزىپ قوي دەگەننىڭ ءبىر ءمانىسى بار. بىرەۋ قيتىعىڭا تيسە، سونى كۇنى بويى ويلاپ، تۇنجىراپ ءجۇرىپ الما، كولدەنەڭدەگەن كوك اتتىنىڭ كەرەكسىز ءسوزىن كوڭىلدەن شىعارىپ تاستا، جامپىلدەگەن جۇيەسىز سوزدەر ايتىلىپ جاتادى. كۇلىپ قوي، ءجىميىپ قوي. وعان بولا اۋىزىڭدى اۋىرتىپ ناعىلاسىڭ.

 

شتانكىنى ءبىر كۇن كوتەرىپ، بۇلشىق ەتىن بۇلتيتقان سپورتشىنى كوردىڭدەر مە؟ ونداي جاعداي مۇلدەم بولمايدى، تابيعاتتىڭ زاڭى سونداي، «استا، استا، اسىقپا»،-دەگەندى ايعايلاپ ايتىپ تۇرعانداي، تەزدەن بايي قالمادىم، تەز تابىسقا جەتە قالمادىم دەپ وزەلەنبە، تابىسقا جەتكەن قىزىق ەمەس، قىزىعى سول تابىسقا جەتۋدىڭ بارىسى. ميللياردتەرلەر ءوزىنىڭ اقشاسىنىڭ كوپتىگىمەن ماقتانبايدى، قايتا سول بايۋ جولىنا كەدەرگى بولعان دوڭبەكتەردى قالاي اۋدارىپ تاستاعانىن ماقتان قىلادى. ناتيجەدەن دە ماڭىزدى نارسە ول - بارىس، جول، شىنىعۋ.