تاسادا تۇرىپ تاس اتپا
كەلۋقاينارى: |جاۋاپتى رەداكتور: | جاڭالانعان ۋاقىت:2018-02-12 16:29:00

ماقسات قيزات ۇلى

 

 


    دۇنيەدە بايلىق تا، وراي دا، ءبىلىم دە شەكسىز. وسىنى تارىلتىپ جىبەرەتىن ءبىزدىڭ پەندەشىلىك ءناپسىمىز، ءىشىمىزدىڭ ينە اينالماس تارلىعى، بىرەۋ ورگە شىعىپ بارا جاتسا، ەتەگىن تارتىپ قالۋعا حارەكەت قىلاتىن قىزىل كوزدىگىمىز.

 

كوپ دۇنيە ىسكە اسار ەدى، كوپ ادام جەڭىسكە جەتەر ەدى. ءبىراق تاسا دا تۇرىپ تاساتقانداردىڭ كەسىرىنەن تالاي جۇيىرىك ءسۇرىندى، تالاي ارعىماق اجال قۇشتى، ومىردە تالابى تاۋداي بولعانىمەن، باعى اشىلماعان قانشاما ادامدار بار!

 

اۋىلعا قايتقان سايىن ءبىر مىسكىندى كوزىم شالىپ قالادى، قىستىڭ اق قىراۋ ايازىندا جالاڭاش، لىپاسىز جۇرەدى، قوقىسىق ساندىعىن قوپارىستىرىپ، كۇلتەبەدەن ءدان تەرىپ جەيدى. «ە، بۇل بەيشارا، بىرەۋدىڭ مومىن ۇلى ەدى، وقۋ مەن ونەر وعان ۇيىعان ەدى، قاسكۇنەم قاستىق قىلدى، قىز ءۇشىن قۇرباندىققا شالدى، اكە-شەشەسى بىزبەن كورشى تۇرعان، كورشى اقىسى ءتاڭىر اقىسى دەگەن، كەلگەن سايىن تاماق بەرەمىن، كيىم بەرەمىن »،-دەدى اۆتوبۋزدىڭ الدىڭعى جاعىندا وتىرعان موسقال تارتقان ساركىدىر ايەل كىسى.
قاي كەزدە دە، قاي وڭىردە دە قارا جۇرەكتىڭ قاسكويلىگىنەن قاقپانعا تۇسكەندەر از ەمەس، جۇرەك نۇرسىز بولسا، ءومىر قالاي نۇرلى بولسىن، كوكىرەك كەشىرىمگە، مەيىرگە تولعاندا عانا، ادام ءوزىن باقىتتى سەزىنەدى.

 

بىراق تاسادا تۇرىپ تاساتىندار ءبىزدىڭ ءبۇي دەگەنىمىزگە ءبۇيىرى بۇلىك ەتىپ قويىپ جۇرمەسىن. ابايدىڭ ءوزىن اعاش اتقا وتىرعىزىپ كەتەتىندەرگە كەڭەس بەرگەننەن گورى ولاردان ىرگەنى اۋلاق سالعان ءجون، ادامنىڭ بارلىعىنان مەيىرىمدىلىك كۇتپە، ساقسىنا بىلگەنگە نە جەتسىن، اسقارعا قول سەرمەگەننىڭ ءجونى وسى دەپ الدىعا قاراپ ۇمسىنا بەرمە. ءبىر ۋاق ارتىڭا دا قاراپ قوي، ىزىڭە ءتۇسىپ، جولىڭدى كەسەتىندەردىڭ جار استىندا تىعىلىپ جاتقان بولار، سەنىڭ اڭعال كەزىڭدى تورۋىلداپ جۇرگەندەرگە دە ءوزىڭنىڭ سەرگەك ەكەنىڭدى ءتۇسىندىر.

 

 

كەي دۇنيەگە قولىڭ جەتە بەرمەۋى مۇمكىن، ورايىڭنىڭ ۇستاتپاي كەتۋى، تالەيىڭنىڭ جانباي قالۋى، ابىرويىڭنىڭ اقساپ قالۋى، ەڭبەگىڭنىڭ ەش كەتۋى دەگەن قالىپتى جاعداي. ءتىپتى باسەكەلەسىڭنىڭ توپتان وزىپ، شاڭعا كومىپ كەتۋى دە عاجاپ ەمەس، ەندەشە، ول كەزدە سۇلكىنىڭ ءتۇسىپ، ومىردەن تۇڭىلسەڭ، ناعىز ناشار ادام بولعانىڭ.
قايتا ءبىر رەتكى جارىستا جەڭىلىپ قالعانىڭا قۋان، ول كەيىنگى مىڭ جەڭىسىڭنىڭ جولىنا شىراق جاعىپ قويعان بولۋى مۇمكىن. وراي دەگەندە كەيدە ورىنسىز جەرگە قوناقتاي بەرەدى، باسى اينالىپ قالعان ورايعا بولا ءوزىڭدى ورعا يتەرمە، وراي ءتۇبى ءبىر كەلەدى، بىرەۋگە ەرتە، بىرەۋگە ءجاي كەلەدى، ءبىراق وراي قوناقتايتىن ۋاقىتى ۇزاق بولعانى جاقسى، تىرلىكتە ارعىماعىنان كوپ جىعىلىپ، جەردى كوپ تانىعان ادام باسىنا وراي ءبىر قوناقتاسا، سول بەتى كەتپەي قويادى، ال قوناقتاعان باققا قوتىر ەشكىشە قاسىنا بەرگەن جاننىڭ ومىردەن الار ۇلەسى شامالى.

 

 

 

اشتى تەرىڭنىڭ ءتاتتى ءدامىن تاتا ءبىلۋدى عانا كوزدەمە، كوزدەگەنىڭ تەك زاتتىق بايلىق بولسا، وندا عۇمىرىڭنان ءمان كەتەدى. قىزىعۋشىلىق، قاراپايىمدىلىق، جومارتتىق بۇل سەن سەزبەگەن ەڭ باعالى ساۋعالار، تولىستوي قۇساپ جازۋىڭدى جازىپ بولىپ، ەتىگىڭدى جاماپ، ەلمەن ەمەن-جارقىن اڭگىمىلەسىپ وتىرساڭ، سول كۇنگى ءومىرىڭ نۇرلى بولماق، قالتاڭنىڭ تايازدىعىن ويلاپ قايعىرعانشا، قاباعىڭدى اشىپ، ماڭايىڭا كۇلە قارا، ءجۇزىڭنىڭ جىلى كۇلكىسى ماڭايىڭدى شۋاققا بولەسىن.

 

كەشە قىستاقتاعى مال شيپاگەرىمەن اڭگىمىلەسىپ قالدىم، «وسى ءبىزدىڭ اۋىل باستىعىنىڭ قاباعىنان قار جاۋىپ تۇرادى، سالەم بەرسەڭ جونىن كۇجىرەيتەدى،ءىسىمدى ءبىتىرىپ بەرمەي-اق قويسىن دەلىك، اشىق قاباقپەن اڭگىمە ايتسا دا، قۋانىپ قالاسىڭ عوي»،-دەيدى.

 

جانىم اشىدى، ارينە، مال شيپاگەرىنە ەمەس، انا اۋىل باستىعىنا، ءومىرى بوس ءوتىپ جاتىر-اۋ، ءبىر مالشىعا كۇلە قاراي الماسا، ونىڭ نەسى ءومىر، نەسى اتقا مىنگەندىك.