سىناق دوسىڭ مايدا ەكەن، شىراق دوسىڭ قايدا ەكەن؟
كەلۋقاينارى: |جاۋاپتى رەداكتور: | جاڭالانعان ۋاقىت:2018-05-10 15:32:00

ماقسات قيزات ۇلى

دوس ەكەۋ بولادى.

ءبىرى سىناق دوس، ءبىرى شىراق دوس.

سىناق دوسىڭىز ءسىزدى سىناپ جۇرەدى، جاقسى كۇنىڭىزدە جانىڭىزدان شىقپايدى، سەنى ماقتاپ، شاشپاۋىڭدى كوتەرىپ، اس تولى تاماعىڭىزدان ءدام تاتىپ، ەنتەلەپ ماڭايىڭدا ۇيىرىلىپ جۇرەدى.

بىراق ول شىركىننىڭ كولەڭكەسى ساعان بۇلت ۇيىرىلگەندە جوعالىپ كەتەدى، سوندا بارىپ ونىڭ ساعان دەگەن سەنىمى كوپىر ەمەس، كوبىك ەكەنىن بىلەسىڭ.

قاپەلىمدە ول شىركىننىڭ قايدا كەتكەنىن بىلمەي قالاسىڭ-اۋ، ارى ىزدەدىڭ، بەرى ىزدەدىڭ، ءبىر قاراساڭ قارسىڭدا وتىرعان، قول سوزىم جەردە، بارعان جەرىن قارا، سەنى تابالاپ جۇرگەندەردىڭ قوسىنا بارىپ باس سۇعىپتى، سونىڭ قوسىنىنا كىرىپ ءان سالىپ ءجۇر، بيلەپ ءجۇر.

 

ال قايتەسىڭ، ال ەندى جاتا كەپ جىلا، بارماعىڭدى تىستەپ، جاعاڭدى جۇل.

ءبىراق كوز جاسىڭ كومەكتەسە مە؟ مىنا ومىردە الدانعان سەن عاناسىڭ با، ءوزىڭ سياقتىلاردىڭ تالاي ءجۇر وكىنىپ، دوسى مەن دۇشپانىن ايىر الماي، ونى كىمنەن كورەسىڭ؟

ەشكىمنەن دە كورمە ونى، تەك وزىڭنەن گور، بارىنە جايداق سۋداي كورىنگەن مىنەزىڭ كىنالى، ءبىر كورگەندى حوش كورىپ، «دوسىم»،-دەپ ارقاسىنان قاعىپ، باۋىرىڭا تارتتىڭ ەمەس پە، ول دا جىلپىلداپ جانىڭنىڭ بوس جەرىنەن ۇيا ىزدەپ ۇڭعىدى ەمەس پە؟

سەن ونى سەزبەدىڭ، قاشان كورسەڭ، كەزدەسە قالعانمەن كەڭەسە قالىپ، جاقسى ءسوزىن ايتىپ، جانىڭدى ەلجىرەتە قالسا بولدى، ونى دوسقا سانادىڭ.

باسىڭا تيمەسە سىناق دوستىڭ سۇمپايى ەكەنىن بىلەسىڭ بە، شىراعىم، شوق، بالەم، بىلگەنىڭ جاقسى بولىپتى.

بىلسەڭ بيىككە شىعاسىڭ.

ال ەندى ءبىر دوس بولادى، شىراق دوس، بۇل مىنە ناعىز پىراق دوس.

ول ساعان وزگەدەي جالپىلداپ كەتپەيتىن دە بولۋى مۇمكىن. ساعان سابىرمەن، اقىل كوزىمەن وي تاستايدى، كەيدە سەنىڭ شالىس كەتەدى-اۋ دەگەن تۇسىڭا توسەنىش توسەپ قوياتىنى بار.

سول توسەنىش بولماسا، قايدا جايىراپ جاتارىڭدى كىم بىلەدى؟

شىراق دوستى ايالا دا سايالا، ول ساعان جاقسىلىقتى بەتىڭە كۇلىپ ىستەمەيدى كەيدە، سەنىڭ ساۋلىعىڭدى شىن جۇرەگىمەن تىلەپ، قاشان بولماسىن سەنىڭ جولىڭا شىراق جاعىپ جۇرەدى.

اداسقان تۇمانداردا سەن ونىڭ قولىنا شىراق ۇستاپ وزىڭە قاراي كەلە جاتقانىن كورەسىڭ، كوزىڭە بۇرشاقتاپ سول كەزدە جاس كەلەر، جىلاپ ال سول كەزدە...

ناعىز دوستى اقىرى تاپقانىڭ ءۇشىن، ءومىردىڭ قيىندىعىن شىراق دوسىڭمەن بىرگە باسقانىڭ ءۇشىن، توبەڭدە جارقىراپ جۇلدىزىڭ تۋىپ، الىستا شايداي اشىلعان اسپانىڭ ءۇشىن.

ال شىراق دوستىڭ ءبىر كەمشىلىگى بار، كەمشىلىك ەمەس، ونى كەڭشىلىك دەسەڭ دە بولادى، ول كەيدە سەن سۇرىنبەسىن دە بەتىڭ-ءجۇزىڭ دەمەي سىن بەرۋى دە مۇمكىن، سەنىڭ قيىس كەتكەن تۇسىڭا جول نۇسقاۋى مۇمكىن، سەنىڭ سىناق دوسىڭداي بارلىعىن قۇپتاماي، ارقاڭنان قاقپاي، كوزىڭە تىكە قاراپ، كوكىرەگىڭدى سىلكىلەر كەيدە.

سودان سەن وعان قوڭىرايىپ، قىڭىرايىپ قالاسىڭ، ءتىپتى قولىڭدى سىلتەپ، ءبىر مەزەت قابارلاسپاي قويارسىڭ ءدا، ءبىراق ول جانەدە الىستان بولسا دا سەنىڭ ابىرويىڭ مەن ار-ۇياتىڭدى ويلاپ جۇرەدى. قاشان بولماسىن قولىندا شىراق، سەنى قورعاپ جۇرەدى، قولداپ جۇرەدى.

ەندەشە، سىناق دوستى سىناپ ءجۇر مايدا ەكەن دەپ، شىراق دوستى سۇراپ ءجۇر قايدا ەكەن دەپ؟