جۇيىرىك ادام
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2018-06-05 09:32:00

 

(قارا ءسوز-شالقىما)


    قاپاس اسەيىن ۇلى 

    كەشكى كەپتەلىس كەزى. وسى قالانىڭ نەگىزگى قان جولىنىڭ ءتورت كوشەسىنىڭ اۋزىنا ىلىنە بەرگەندە توقتاپ قالدىق. قان جول دەيتىنىم وسى ءتورت كوشەدەن ولكە جولى دا كەسىپ وتەتىن. ەلەكتر جولىنان شاتاق شىعىپ، ءتورت كوشەدەگى بەلگى شىراعى جانباي قالىپتى، سونان بولعان كەپتەلىس ەكەن. ءبىرىن-ٴبىرى سۇيكەپ كەتكەن، تۇمسىعىن بايقاماي الدىنگى ماشينانىڭ ارتىنا سوعىپ العان داۋ ءوز الدىنا ءبىر توبە، اينالا ازان-قازان بولىپ جاتىر.


    كولىكتى توقتاتىپ، ءتۇسىپ ەدىك، نەمەرەمىز بىرگە ءتۇستى دە جول اۋزىنا قاراي جۇگىرە جونەلدى. ەكى تىزەسىنەن شويناڭداپ اجەسى كەتتى ارتىنان ايعاي سالىپ. جەتكىزبەي بارادى. ٴۇيىمىز ٴتورت كوشەدەن وتكەن سوڭ ءبىر شاقىرىمداي جەردە بولاتىن. نەمەرەمىزدىڭ كۇندە ءجۇرىپ جۇرگەن تانىس جەرى. قايتا اينالىپ كولىكتىڭ ەسىگىن جاۋىپ مەن دە جۇگىردىم. اجەسى ەكى وكپەسىنەن دەم الىپ ءبىر كولىككە سۇيەنىپ تۇر، سوزگە اۋزى كەلمەيدى، انشەيىن، ەنتىگەدى، الدىنعى جاقتى نۇسقايدى تەز، تەز دەگەندەي. مەن قۋىپ جەتكەنشە قاقپادان كىرىپ ەسىك الدىنا جەتىپ بارىپتى. كوزىم قاراۋىتىپ كەتتى، نەمەرەمدى قايتا كورگەندە بارىپ قۇشاقتاي الدىم ەنتىگىپ.


    سودان ءتورت كوشەنىڭ كەپتەلىسى ەرتەڭىندە تۇستە بارىپ اشىلدى. تۇندە كولىكتىڭ ىشىندە ۇيىقتادىم. ۇيىقتادىم دەگەنىم وتىرىك، بىردەم-بىردەم ويانىپ نە بولىپ جاتىر ەكەن دەپ، ماشينادان ءتۇسىپ جان-جاعىمدى بارلايمىن. تاڭ اتقان سوڭ ۇيگە بارىپ شايىمدى ءىشىپ قايتىپ كەلىپ جانە توستىم. جۇمىس قالدى. مەكەمەگە تەلەفون سوعىپ قويدىم، مەن عانا ەمەس ەكەنمىن، بىرنەشەۋىمىز كەپتەلىپ قالعاندارىڭ ىشىندە ەكەنبىز. بۇل كۇنى ءتورت كوشەدەگى كەپتەلىستىڭ اۋماعى قانشا شارشى كيلومەترگە جەتكەنىن ايتىپ بەرە المايمىن. دەسەدە وسى قالادا جانە ءبىر كەپتەلىستىڭ بولعانىنا كوزىم جەتەدى. ورگاندار، مەكتەپتەر، بالالار باقشاسى، بانكەلەر، كاسپورىندار، كۇن-ءتۇن تۇگەمەيتىن جيىندار، ساۋدا-ساتتىق توقتامدارى، شۇعىل قۇتقارۋ، اۋەجاي، قاتىناس-تاسىمال، تاكسي، قوناق داستارقاندارى، ءتۇرلى باس قوسۋلار، تاعامجايلار، ەرەنبازارلار، تەز جەتكىزۋشىلەر، عاشىق-ماشىقتار، قۇمارپازدار، ۇرىلار... دا كەپتەلىستىڭ اكەسىن كورگەن بولار دەيمىن. بۇل كەپتەلىستىڭ قالعان وڭىرلەردە قانداي كەپتەلىستەر تۋدىراتىنىنا ءجىپ تاعۋ قيىن، ايتەۋىر، كوز جەتپەيتىن ۇزىنان-ۇزاق سوزىلعان كولىك سۇلباسىن عانا كورەسىز، ەرتە بىلگەن بولساق دۇنيە گەنيس رەكوردىنا جولدايتىن-اق كورىنىس.


    ايتپاقشى بولعانىم جۇيرىك ادام تۋرالى عوي، ەندى سەزگەن بولارسىزدار، باراتىن جەرىنە كەپتەلىس كورمەي ەلدەن بۇرىن جەتىپ العان ءسابي بالانى. بۇل كەپتەلىس ۇشقان قۇستاي دامىعان عىلىم-تەحنيكانىڭ كەپتەلىسى ادامداردىڭ وسىزامان عىلم-تەحنيكاسىنىڭ قۇلىنا اينالا باستاعان داۋىردىڭ كەپتەلىسى. سول كەپتەلىستىڭ ىشىنەن جولىنان قالماي، اداسپاي، جول تاۋىپ ۇيىنە جەتكەن بالا جۇيرىك پە ەكەن؟! ۇيىنە ەلدەن بۇرىن جەتىپ، تاماعىن ءىشىپ، تۇندە پىر-پىر ۇيىقتاپ، تاڭەرتەڭ كۇن جايىلعاندا بارىپ ورنىنان تۇردى كوزىن ۇيقالاپ!