سۋرەتشى بالا
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2018-06-05 15:38:00

 

(شالقىما-قارا ءسوز)


    (1-ماۋسىم بالالار مەرەكەسىنە تارتۋىم)


    قاپاس اسەيىن ۇلى


    -پا، پا،-مىنا ۇيلەرىڭنىڭ ءىشى نەمەنە بىلىعىپ كەتكەن، ءۇيدىڭ قابىرعالارى قاپ-قارالا شيماي، ءۇيدى توزدىرىپ بۇلارىڭ نە؟،-دەدى ۇيگە كەلگەن دوسىم ويران-وسىر ءۇيدىڭ ءىشىن، شاشىلعان ويىنشىقتاردى، ءۇيدىڭ قابىرعالارىنداعى قارىنداش، بوياۋلى قالاممەن سىزعان شيمايلاردى كورىپ،-اتتاپ باسار جەر جوق، ويىنشىقتى قالاي شاشسا شاشسىن، جيناپ الاسىڭدار، مىنا قابىرعالارىڭدى قايتا سىرلاتپاساڭدار بولمايدى عوي!


    -مەن بۇل ۇيدەن شاشىلعان ويىنشىق، شيمايلانعان قابىرعا كورگەمىن جوق قوي، مەن نەمەرەمنىڭ جاسامپازدىعىن، شارىقتاعان قيالىن عانا كورىپ وتىرمىن. قانداي تاماشا، شاشىلعان ءتۇرلى-ءتۇستى ويىنشىقتار شابىسىپ كوركەم سۋرەت قالىپتاستىرعاندىعىن كوزىڭ كورمەي تۇرما؟ قازىر دۇنيەدە وسىنداي ءبىر جاسامپازدىق ستيلى قالىپتاسىپ كەلە جاتىرەكەن، مۇمكىن، ولار بۇنى بالالاردىڭ ويىنشىقتى شاشقانىنا ەلىكتەسە كەرەك. قاراشى، وسىمدىك، وزەندەردىڭ كورىنىسى تۇسىرىلگەن جاسىل كىلەمنىڭ ۇستىنە شاشىلعان جابايى سيىر، قوي، بۇعى، جولبارىس، ءيىت، ءپىل، جيراف جانە ءتۇرلى قۇستار سوناۋ افريكانىڭ ءتابيعي حايۋاناتتار باقشاسىن ەسىڭە ءتۇسىرەدى؛ قاراشى، انەۋ ءيت، ات، كەپتەر، بۇركىتتى ءوزىمىزدىڭ بوعدانىڭ ءتوسى عوي، اققولدىڭ بويى جاساڭ عوي! قاراشى، اناۋ تىك ۇشاق، قاتار-قاتار تۇرعان اۆتوكولىك، ادامداردى، ءتىپتى، ءبارى قوزعالادى عوي؛ قاراشى، اناۋ اعاشتىڭ بۇتاعىنداعى قۇسقا قونىپ وتىرعان قاناتىن قومداپ؛ انە، شىبار جىلقى وزەننەن ءوتىپ بارادى؛ قاراشى، جولبارىستى جالانىپ جاتقان. ءما، مىنە، مىنە، سيىر بۇزاۋىن ەمىزىپ تۇرعانىن كورمەي تۇرسىڭ با؟ انە، انە، قاراشى...


    دوسىم ماعان بۇگىن بىردەمە بولعانداي اڭ-تاڭ، باسىما ءبىر، اياعىما ءبىر قارايدى. ەكى كوزى كىلەمنىڭ بەتىن ءتىنتىپ، ويىنشىقتارعا قارايدى. ەكى قولىن جايىپ الىپتى.


    -قاراشى كىلەمنىڭ بەتىندە اڭ-قۇس، ۇشار قاناتتىلار مەن باۋىرىمەن جورعالايتىندار، وسىزامان عىلىم-تەحنيكانىڭ جەتىستىكتەرى ءبار-بارى بار. ءتىپتى، سەن دە وسىلاردىڭ قاتارىنا كىرىپ كەتتىڭ، حا... حا...حا... ! بالانىڭ وسى جاسامپازدىقتارىن كورىپ وتىرىپ ءبىر جاساپ قالاسىڭ كوڭىلىڭ كولىك تاۋىپ. كۇلىڭ شاشىلىپ، جۇگىڭ قۇلاپ جاتسا، سونىمەن بىرگە شاشىلىپ، سونىمەن بىرگە قۇلاپ جاتاسىڭ جانىڭ ءجاي تاۋىپ. دۇنيەدە سەنەن باقىتتى، سەنەن كوڭىلدى ادام بولمايدى. بوپەشىم، بوپاتايىم، قوزىم، ﻻﻋﯩﻢ، بوتام، جانىم، كۇنىم، قۇلىنىم، قۇلىنشاعىم، كۇشىگىم، قويانىم دەيسىڭ ەگىلىپ جۇرەگىڭدى قولىڭا الىپ. «بالالى ءۇي بازار»،-دەيدى. سەن ءۇيدىڭ ءىشىن وسىنداي ويران-وسىر قىپ، ويىنشىقتاردى ءوستىپ شاشىپ كور، سەنى اشۋشاڭ، دولى بىردەمە ەكەن دەيدى كورگەندەر؛ قابىرعانى ءوستىپ شيمايلاپ-سىزىپ كور، سەنى جىندانىپ كەتكەن ەكەن دەپ جارمەستەر شيپاحاناسىنا اپاراتىنىنا داۋ جوق.


    دوسىمىنىڭ باسى اينالىپ كەتكەندەي بولدى. ەكى كوزى بارعانسايىن باقىرايىپ، ويىنشىقتارعا ءبىر، قابىرعاعا ءبىر قارايدى تەسىلىپ.


    -وسى سەن شىن ايتىپ تۇرسىڭ با؟ ءوز كوزىمە ءوزىم سەنبەي تۇرمىن، ءيا، مىنانىڭ بارلىعى قوزعالادى عوي؛ افريكانىڭ ساحاراسىندا تۇرعاندايمىن، ءوزىمىزدىڭ جايلاۋدا تۇرعاندايمىن؛ وي، نەمەرەڭ راس كەرەمەت ەكەن، مىنانداي سۋرەتتەردى مەن-مەن دەگەندەردە سالا المايدى.


    -قابىرعاداعى سۋرەتتەر نەدەگەن كەرەمەت، قاراشى، اناۋ جەردە قۇيىن ۇيتقىپ بارا جاتقانداي؛ توعىز جولدىڭ تورابى عوي مىناۋ سىزبا، قولفوننان تۇرعان جەرىمىزدى انىقتاعاندا وسىنداي كورىنەتىن؛ پاي، پاي، اناعان قاراشى، ەرەنتاۋدىڭ سىلەمى عوي، اناۋ بوعدانىڭ شوقىسى ەمەس پە؟! جايىلعان ءتورت تۇلىك مال، شەتسىز-شەكسىز كەتكەن دالا؛ عاجاپ، ءا، نەمەرەڭنىڭ قيالداۋ قۋاتى نەدەگەن كەرەمەت، وسىنىڭ ءبارىن ويلاپ جەتكەن. دوسىم قابىرعانى سيپالاپ ءوز الدىنا سويلەپ ءجۇر.


    -دۇرىس ايتاسىڭ، بۇل ءبىزدىڭ قولىمىزدان كەلمەيدى، ءبىزدى قويىپ مەن-مەن دەگەن سۋرەتشىلەردىڭ دە قولىنان كەلمەيدى، قولىنان كەلمەيدى دە. مەنىڭ ۇيىمدە دە ءبىر كەرەمەت سۋرەتشى بار ەكەن عوي، مەن سونى نەگە سەزبەگەمىن؛ قايتىپ بارعاننان سوڭ قولىنا قارىنداش، بوياۋلى قالام بەرىپ، ءۇيدىڭ قابىرعاسىنا كوركەم سۋرەتتەر سالدىرامىن!


    ءيا، ولار دۇنيەدەگى ەڭ كەرەمەت سۋرەتشىلەر، ايگىلى سۋرەتشىلەردىڭ ۇيىندە دە وسىنداي سۋرەتشىلەر بار؛ ولار كوركەم دۇنيەنى پاك، ءسابي قيالىمەن قيالدايدى، شاشادى سىزادى، ولاردىڭ الدىنا ەشبىر جان وتە المايدى؛ سولار قيالداعانداي بولسا دۇنيە قانداي كوركەم، قانداي سيلاسىمدى بولار ەدى، شىركىن!


    سۋرەتشى بالالارىمىز كوركەم سۋرەتتەرىن سالا بەرسىن!