ءبىز ماڭگى تىرشىلىك قۇشاعىندامىز
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2018-06-06 15:36:00

 

(شالقىما)


    (ساباقتاستاردىڭ باس قوسۋ كۇنىنە ارنالعان)


    قاپاس اسەيىن ۇلى


    سوناۋ كوز ۇشىندا قالسادا كومەسكى تارتپاعان كورىكتى كۇندەردى ەسكە الۋ ءبىر عانيبات. ول سەنىڭ ومىرىڭە تىڭ تەبىن، جاڭا مازمۇن باعىشتايدى. ەسكە الۋ ءار بىر سانالى ازاماتتىڭ ءماندى قيمىلى، ول سودان تىرشىلىك ءلاززاتىن، سۇيسپەنشىلىك ءمانىن الادى. وسىدان 30 جىلدىڭ الدى تۇڭعىش سانجى وبلىسى موري پەداگوگيكا ورتا تەحنيكومىندا وقىعان بالدىرعان ساباقتاستار التىن ۇياعا، اياۋلى ۇستازدارعا، ەكى جىل جىل سىرلاس وتكەن، مۇڭداس وتكەن قيماس شاق، قيىسپاس دوستارعا، جانى جايساڭ ساباقتاستارعا جانارىمىزعا ۇيرىلگەن ءمولدىر شىقتاردى كۋا ەتىپ، قوش ايتىسىپ، تۇس- تۇسقا اتتانىپ كەتكەن ەدىك. سودان بەرى 30 جىل وتە شىعىپتى. ول شاقتا ءبىز بويجەتكەن قىز، بوز جىگىت ەدىك. مىنە بۇگىن ونداعى ارۋ قىزدار تولىسىپ اياۋلى اناعا، بوز جىگىتتەر اكەگە اينالىپ ۇلگىردى. وسىناۋ جىلدار بىزگە ءومىر ۇيرەتتى، قوعام تانىتتى. ءبىزدى شىڭداپ، شىمىرلاپ اتپال ازامات قاتارىنا قوستى.


    بۇگىنگى تاڭدا قالادا دا، دالادا دا، ءار سالا، ءار كاسىپتىڭ تيەسەلى سالماعىن قارا نارداي قايىسپاي كوتەرىپ، ۇلتىمىزدىڭ ۇلاعاتتى ىستەرى ءۇشىن تەبىن تانىتىپ، تەر توگىپ كەلەمىز. ءيا، وتكەن وقۋشىلىق ءومىر، قيماس كۇندەر قىسقا ءارى نۇسقا جازىلعان تاريح ىسپەتتى، ادام جۇرەگىنە ءار قانداي كەزدە الدە قانداي ءوز كارتيناسىن تۇسىرە بەرەدى ەكەن. وسى ءبىر سىرعا تولى، جىرعا تولى جارقىن ساتتەردى ءبىر اراعا جينالىپ، بىرلىكتە ەسكە الۋ قانداي باقىت دەسەڭىزشى!


    جۇزدەسىپ ەسەندەسۋ، سىر شەرتىپ ءتۇسىنىسۋ، ەلەستەتىپ ەسكە الۋ، مەرەيلى كۇننەن مەدەت تىلەۋ، ساعىنىشتىڭ سارىعىن باسۋ، كوڭىلدىڭ كوكجيەگىن كەڭەيتۋ، ءوزارا قولداپ، ءوزارا دەم بەرۋ، الداعى كۇندەرگە اقجول، باياندى باقىت تىلەۋ ماقساتىمەن بارلىق ساباقتاستاردىڭ ءبىر اراعا باس قوسىپ، ەركىن ءدايدارلاسۋى كوبىمىزگە اۋاداي قاجەت بوپ جۇرگەن. اقىرى سول كۇندەر دە كەلىپ جەتتى. وسى ورايدا قان- تەرىن توگىپ، بارىن باعىشتاعان قادىرمەندى ۇستازدارىمىزعا شىن جۇرەكتەن سالەم جولدايمىز!


    وسىنداي بارلىعىمىز قۋانىشپەن باس قوسقان مەرەيلى شاقتا ءبىر قازاننىڭ شايىن ىشىپ، ءبىر پارتادا وتىرعان، ءبىرگە ءان شىرقاپ، بىرگە بيلەگەن، بولاشاق كۇندەردى بىرگە ارمانداعان، ايتسەدە قاتال تاعدىر ارامىزدان ەرتە اكەتكەن اياۋلى ساباقتاستارىمىزدى ساعىنا ەسكە الامىز! تۋىس- تۋعاندارىنا شىنايى كوڭىل ايتامىز، توپىراقتارى تورقا بولسىن، بۇگىنگى ولاردى ساعىنا شىرقاعان اندەرىمىز قۇلاقتارىنا جەتەتىن بولسىن!


    ءيا، ەسكە الۋ ءار بىر سانالى ازاماتتىڭ ءماندى قيمىلى، ول سودان تىرشىلىك ءلاززاتىن، سۇيسپەنشىلىك ءمانىن الادى. جىلدار وتكەن سايىن التىنداي جارقىراپ، الاۋلاپ جانىپ، بۇلدىراپ، بۇلىڭعىرلاپ بارا جاتقان سوناۋ جىلداردى ەسىڭە الساڭ، كوزىڭە ەرىكسىز جاس كەلەدى، سول داۋىردى قايرىلىپ قارماپ قالعىڭ كەلەدى!!! امال قانشا، زىمىران جىلدار، قاتىكەز تاريح اساۋ اتتاي ماڭىنا جولاتقىسى كەلمەيدى. قارماۋدان باسقا قولىمىزدان كەلەرى جوق، تەك، بۇگىنگە قاناعات ەتىپ، قول جەتكەن تابىستارىمىزدى مىقتاپ بوكتەرىپ، اتىمىزدىڭ باسىن ىركپەي العا تارتا بەرەيىك! حالقىمىز ءۇشىن، ۇرپاقتار ۇشىن بارلىعىمىزدىڭ دەنىمىز ساۋ، وتباستارىمىز امان بولسىن!


ء    بىز ماڭگى تىرشىلىك قۇشاعىندامىز!