الەمدەگى ەڭ جاعىمدى ەكى اتاۋ
كەلۋقاينارى: |جاۋاپتى رەداكتور: | جاڭالانعان ۋاقىت:2018-06-29 12:55:00

الەمدەگى ەڭ قۇدىرەتتى نارسە — ءتىل. ون سەگىز مىڭ عالامداعى جان-جانۋار مەن قۇبىلىستاردىڭ ءوز-وزىنىڭ ءتىلى بار.....

«اكە»، «شەشە» دەگەن ەكى اۋىز ءسوز ادام بالاسىنىڭ اۋزىنا الدىمەن تۇسەتىن ەڭ ارداقتى ەكى اتاۋ. وسى ەكى اتاۋدى شاقىرا الۋىمىزدىڭ ءوزى ءتاڭىردىڭ بىزگە سيلاعان شاپاعاتى. ايتسە دە، كۇندەردىڭ بىرىندە وسى ەكى اتاۋدى قاتار شاقىرا الماي قالۋىمىز دا عاجاپ ەمەس.

2018-جىلعى جوعارى مەكتەپ ەمتيحانى قارساڭىندا جازىلعان بۇل ماقالا (وقىتۋشىنىڭ ۇلگى ماقالاسى) سانسىز جاننىڭ كوز شاناعىنا جاس مونشاعىن ۇيىرۋىنە سەبەپ بولدى.

 

الەمدەگى ەڭ جاعىمدى ەكى اتاۋ

01

اۋىلعا قاراي تاعى دا جول الدىم، وسى رەت اكە-شەشەمە قۇلاق قاعىس ەتپەدىم. ماقساتىم اكە-شەشەم بەيحابار وتىرعاندا جەتىپ بارىپ، ولاردىڭ اۋىلداعى ناقتى تۇرمىسىن كوزىممەن كورۋ ەدى.

تۇستەن بۇرىنعى ساعات 10، قىستاق جىم-جىرت قاڭىراپ بوس تۇرعان سەكىلدى، سامال جەل باياۋ ەسۋدە. اتىزداعى ءبيداي پىسىپ، الدى ورىپ جيناپ السا، ارتى ءالى وراق قويماپتى. بايتاق دالا ءۇن-تۇنسىز مۇلگىپ تۇر.

اق كۇشىك مەنى تانىماي قالدى بىلەم، الىستان ماعان قاراپ ءۇري جونەلدى. اياداي قىستاققا سىرتتان قانشا بەيتانىس ادام كەلەر دەيسىز، ارتىنان تاني قويدى ما، اياعىما ورالىپ ەركەلەي باستادى.

 

ءۇيدىڭ ەسىگى جارتىلاي اشىق تۇر، ءبىراق ەشكىم شىقپادى، ەسىك الدىنداعى الاڭقىعا قىزىلدانعان ءبيداي جايىلىپتى. الاڭقىنىڭ جانىنا ەككەن گۇلدەرىم 2 دە 3 جىلدا قۇلاشىن كەڭ جايىپتى. اسەمگۇل، پارسى كۇرەڭكەيى، كىشى جاپىراقتى كۇرەڭكەي سياقتى گۇلدەر كوزدىڭ جاۋىن الىپ، قۇشاق جايا قارسى الىپ تۇرعانداي. گۇلدىك ىشىنەن قىلتيعان ارام ءشوپ كوزگە شالىنبايدى، شەشەم مەنىڭ تاپسىرىعىم بويىنشا گۇلدىكتى ءوز الىنشە باعىپ-باپتاعانى بەسەنەدەن بەلگىلى بولىپ تۇر.

 

02

اكەمە تەلەفون شالىپ ەدىم، ول كىسى قىستاقتىڭ ەمدەۋ ۇيىندە اسپا ۋكول قۇيدىرىپ وتىر ەكەن، اكەمدە بۇرىن قابىنۋ بار ەدى، ونىڭ ۇستىنە دەنە مۇشەسىنە وسپە شىققان بولاتىن. قىستاق تۇرعىندار كوميتەتى جاڭا ورىنعا كوشىپ كەتىپتى، بىرەۋدەن سۇراپ ەدىم ول مەنى سولاي قاراي جولعا سالىپ جىبەردى.

قىستاق تۇرعىندار كوميتەتى اۋلاسىندا ادام كورىنبەيدى، ەمدەۋ ءۇيى ادامعا لىق تولىپتى، دەنى اسپا ۋكول قۇيدىرىپ وتىرعان قارتتار ەكەن، اكەم دە سونىڭ ىشىندە.

مەنى كورگەندە اكەم بالاشا قۋاندى، باسقا قارتتاردىڭ پەرزەنتتەرىنەن ەشكىمى كەلمەگەن كورىنەدى، سوعان بولا اكەم ەداۋىر مارقايىپ قالدى. ءسوزىنىڭ اراسىندا «قۇلىنىم» دەگەندى نەشە قايتالاپ جىبەردى. ولار ءۇشىن بالا دەگەن اۋىرعاندى باسىپ، ازاپتى ۇمىتتىراتىن شيپالى ءدارى.

شەشەم ءاسىلى ۇيدە جىبەك قۇرتىن باعىپ-باپتاۋمەن ابىگەر ەكەن. شەشەم كۇيكى تۇرمىستىڭ كۇيبەڭىمەن كوپ سىرتقا شىقپايتىن دا، ادامداردىڭ نازارىنان ۇنەمى قاعىس قالاتىن-دى. مەن شەشەمە: ەندىگارى جىبەك قۇرتىن باقپاڭىز دەگەنىم قايدا؟-دەدىم جازعىرا سويلەپ.

 

 

شەشەم جاسىپ قالدى، ول: تۇت اعاشىمىز جاقسى ءوستى، ەندى جىبەك قۇرتىن باقپاساق جاپىراقتان ۇيات قوي،-دەگەندى كولدەنەڭ تارتتى.

شەشەم: ءۇيدىڭ جۇمىسىن مەنەن باسقا كىم ىستەيدى؟ اكەڭنىڭ دەنساۋلىق جاعدايىن ءوزىڭ دە بىلەسىڭ، قىرسىق شالعان ناۋقاستىڭ كەسىرىنەن كىشى دارەتىن ۇنەمى شالبارىنا قويا بەرەدى، كۇنىنە 10 نەشە رەت شالبار جۋۋمەن ابىگەر بولامىن،-دەپ شاعىمداندى.

شەشەمنىڭ سوزىنەن ىڭعايسىزدانعان اكەم: كەيدە بۇل ومىردەن ءتۇڭىلىپ كەتەمىن،-دەدى ماعان قاراپ.

 

03

— اكە، ءبىر كۇن بولسا دا ءتىرى جۇرگەنىڭىزگە نە جەتسىن. ناۋقاس بولعانىڭىزبەن ميىنا قان قۇيىلىپ، توسەك تارتىپ جاتقانداردان الدە قايدا جاقسىسىز عوي،-دەدىم كوڭىلىن جۇباتىپ.

— ءيا، بۇعان دا شۇكىر، ءشوپ شاينارىم، ۇيقىم جاقسى، اياعىم ساۋ، وزدىگىمنەن ارەكەت جاساي الامىن،-دەدى اكەم مەنىڭ ءسوزىمدى قۇپتاي.

— اۋىرساڭىز ەمدەلىڭىز، ەمدەۋگە بەلسەنە سايكەسىڭىز، باستارىڭىزعا قانداي ءىس تۇسسە دە ماعان ايتىڭىزدار، شامامنىڭ كەلىسىنشە كومەكتەسەمىن،-دەدىم اكەمنىڭ كوڭىلىن اۋلاي ءارى قولىنا ءبىراز اقشا ۇستاتىپ تۇرىپ.

 

 

وسى كەزدە شەشەم جەتىپ كەلىپ ماعان ءداتىن ايتتى، وتكەندە اكەم شەشەمدى بازارعا ەرتىپ بارىپ، ءبىر كۇن ارالاتىپ ەشتەمە دە الىپ بەرمەي، قالبىرداعى دايىن تاماقتان ساتىپ الىپ، كولەڭكە جەر تاۋىپ ەكەۋى بىرگە وتىرىپ جەپتى. شەشەم سول رەتكى بازار ارالاعاندى ايتقاندا باستابىندا كۇلىپ ەدى، اياعىنا كەلگەندە جىلاپ قويا بەردى. ءيا، جۋىقتاعى جىلداردان بەرى شەشەمنىڭ جىلاۋى كوبەيىپ كەتتى.

امالسىزدان وتىرىك كۇلگەن اكەم: سەن وسى قانداي ادامسىڭ، قالبىرداعى تاماقتان ساتىپ الۋعا قوسىلعان ەدىڭ عوي، اۋزى-مۇرنىمىزدان شىعا تويىپ قايتپادىق پا؟-دەدى ءوزىن اقتاپ.

ولارعا نە دەرىمدى بىلمەي داعدارىپ مەن تۇرمىن. كولەڭكەدە جۇرەلەپ وتىرىپ قالبىرداعى دايىن تاماقتى جەگەن ەكەۋىنىڭ بەينەسىن كوز الدىما ەلەستەتكەندە، كەڭسىرىگىمە اشتى وكسىك تىعىلدى.

 

04

اكەم اقشادان كەندە ەمەس. اپەكەمنىڭ ايتۋىنشا، بانكەگە قويعان نەشە 10 مىڭ يۋانى بار ەكەن. الايدا اكەم كەدەيلىكتەن ابدەن زاتتە بولعان ادام، اۋەلى كەيدە اكەمدى شىق بەرمەس شىعايبايدىڭ ءوزى مە دەپ قالامىن. اكەمنىڭ دە ءوز ويى بار، زاۋدەعالام، شۇعىل اقشا قاجەت بولىپ قالسا، جيعان-تەرگەنى بولماسا پەرزەنتتەرىن قينايدى عوي؟

اكەمنىڭ اقشانى ءوزى مەن شەشەمنىڭ ارتقى ىستەرى ءۇشىن جينايتىنى ايتپاسا دا تۇسىنىكتى، ونى بىلسەم دە بىلمەگەنسىپ قويامىن. «تۇستىك ءومىرىڭ بولسا، كەشتىك مال جي» دەگەن اتالى ءسوز بار ەمەس پە!؟

مەن گۇلدىكتىڭ الدىندا بىرگە تۇرىپ سۋرەتكە تۇسەيىك دەپ ەدىم، شەشەم دەرەۋ ءبىر كيەرىن كيىپ، بالاشا ءماز بولدى. اكەم دە جاعا-جەڭىن تۇزەپ، جاڭا باس كيىمىن كيىپ شىعا كەلدى. ەكەۋىن ەكى قولىممەن قۇشاقتاپ، الدىمەن «اكە»، ونان سوڭ «شەشە» دەپ شاقىردىم.

«اكە»، «شەشە» — الەمدەگى ەڭ جاعىمدى، ەڭ ارداقتى اتاۋ، كۇندەردىڭ بىرىندە وسى ەكى اتاۋدىڭ ءبىرىن ايتا الماي قالۋدان قورقامىن. ايتسە دە، ءدال قازىر ەكەۋىن قاتار شاقىرىپ تۇرعانىما ءوزىمدى اسا باقىتتى جان ەسەپتەيمىن.

 

دەرەككوزى: حالىق گازەتى ۋيچات تەكشەسى

اۋدارعان: ساعىنبەك رابات ۇلى (تورابىمىز ۇسىنىس ەتكەن ءتىلشى)