ەينشتەيىننىڭ وكىنىشى
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2018-07-07 16:36:00

 

ەينشيتەيىن 16 جاسقا كەلگەن جىلى كۇنى بويى ءبىر توپ سوتقار، وينپوز بالالارعا ەرىپ، ەمتيحاندا الدە نەشە ساباقتان كوشپەي قالادى. ءبىر كۇنى تاڭەرتەڭ، ەينشتەيىن قارماعىن الىپ، تاعى دا سول بالالارمەن بالىق اۋلاۋعا شىققالى جاتقاندا، اكەسى الدىن توسىپ، وعان بايىپپەن:


    -ەينشتەين، سەن كۇنى بويى ويىننىڭ سوڭىندا كەتىپ، ەمتيحاننان كوشپەي جاتىرسىڭ، شەشەڭ ەكەۋىمىز سەنىڭ بولاشاعىڭنان الاڭداپ ءجۇرمىز،-دەيدى.


    -الاڭدايتىن نەسى بار؟ جەك پەن روبورت تا ەمتيحاننان كوشپەي قالدى، ولار دا بالىق اۋلاپ ءجۇر-عوي،-دەيدى ەينشتەين.


    -بالام، سەن استە ولاي ويلاما،-دەيدى اكەسى ەينشتەيىنگە مەيىرگە تولى جانارىن قاداي،-ءبىزدىڭ اتا مەكەنىمىزدە كەڭىنەن تاراعان مىناداي ءبىر ءتامسىل بار، زەيىن سالىپ تىڭداشى:


    "ءۇي توبەسىندە اسىر سالىپ جۇرگەن ەكى مىسىق ابايسىزدا ءبىر–ءبىرىن قۇشاقتاعان كۇيى مورجانىڭ ىشىنە قۇلاپ كەتەدى. ەكەۋى مورجانىڭ ىشىنەن شىققاندا، ءبىر مىسىقتىڭ بەت-اۋىزى كۇلدى-كومەش، ەندى بىرەۋىنىڭ بەتى تاپ-تازا شىعىپتى. تازا مىسىق كۇلدى-كومەش بولعان مىسىقتى كورىپ، ءوز بەتىم دە سولاي بىلعانىپ سۇرقىم قاشىپ تۇرعان بولار دەپ بىردەن وزەن جاعاسىنا جۇگىرە جەتىپ، بەت-اۋىزىن جۋىپتى. ال اناۋ بەت-اۋىزى قاپ–قارا بولىپ كىرلەگەن مىسىق اناۋ مىسىق سەكىلدى تازا شىعارمىن دەپ ويلاپ، قان كوشەدە الشاڭ باسىپ كەتە بارىپتى".


    -ەينشتەين، ەشكىم دە ساعان اينا بولا المايدى، ءوز-وزىڭە عانا اينا بولاسىڭ. وزگەلەردى ۇلگى تۇتسا قانداي دارىندى تالانت يەسى دە دەلقۇلى اقىماققا اينالادى.


    ەينشتەين مۇنى ەستىگەننەن كەيىن ۇيعالعانىنان قولىنداعى قارماعىن قويىپ، ءوز بولمەسىنە كىرىپ كەتەدى.


    سودان باستاپ، ەينشتەين ءوز-ءوزىن اينا ەتىپ باقىلاپ، وزىنە: "مەن وزگەشەمىن، وزگەلەر سەكىلدى قاتارداعى جان بولۋىمنىڭ قاجەتى جوق"،-دەپ ۇزدىكسىز ەسكەرتەدى. مىنە بۇل ەينشتەيننىڭ عالىم بولىپ جەتىلۋىنىڭ سەبەبى ەدى.


    مىڭ ادامنىڭ مىڭ ءتۇرلى تۇرمىس ءتاسىلى، مىڭ ءتۇرلى ارمانى بولادى. ۇقساماعان ءتاسىل مەن ارمان ۇقساماعان تۇرمىس جونىندەگى پوزيتسيانى قالىپتاستىرادى. وزگەلەردىڭ پوزيتسياسىنان پايدالانىپ ءوز پوزيتسياڭدى بەلگىلەۋىڭە بولادى، ءبىراق وزگەلەرگە كوزسىز ەلىكتەۋىڭە بولمايدى. مىندەتتى تۇردە ءوزىڭدى انىق كورە ءبىلۋىڭ ءارى دىتتەگەنىڭنىڭ نە ەكەنىن ايقىنداي ءبىلۋىڭ كەرەك. كەلەشەگىڭنىڭ قالاي بولۋى وزگەلەرگە كوزسىز ەلىكتەۋدە ەمەس، قايتا ءوزىڭنىڭ قالاي ىستەۋدى دەربەس بەلگىلەۋىڭدە.


دەرەككوز: «حارۆاردتىڭ وتباسى تاعىلىمى» اتتى كىتاپتان
اۋدارعان: قۋات جۇماش ۇلى (تورابىمىز ۇسىنىس ەتكەن ءتىلشى)