گيتلەردى قۇتقارىپ، بەتحوۆەندى ولتىرە جازداۋ
كەلۋقاينارى: |جاۋاپتى رەداكتور: | جاڭالانعان ۋاقىت:2018-10-08 16:28:00


1- اڭگىمە

ءبىر اۋىر اياق ايەلدىڭ 8 بالاسى بولسا، بالالارىنىڭ ۇشەۋى ساڭىراۋ، ەكەۋى سوقىر، بىرەۋىنىڭ اقىل-ەسى كەم، ءوزى جىنىس جولى جۇقپالى ناۋقاسىنا شالدىقسا، وسى ايەلگە جاساندى تۇسىك تاستاۋعا ۇسىنىس بەرەر مە ەدىڭ؟

جاۋاپ قايتارۋعا وڭتايلانعانىمدا، دوسىم ەكىنشى ماسەلەنى ورتاعا قويدى.

 

2- اڭگىمە

 

قازىر كوسەم سايلاۋىنا داۋىس بەرۋ كەرەك، سەنىڭ قۇپتاۋشى داۋىسىڭ شەشۋشى رولعا يە. ءۇش كانديداتتىڭ شارت- جاعدايى تومەندەگىدەي:

كانديدات A : ءىشىنارا تۇرلاۋسىز ساياساتشىلارمەن ارالاسادى، بالشىلارعا توتەنشە سەنەدى. نەكەدەن سىرت كوڭىلدەسى بار، پيانشىك، كۇندە 8-10 ىستاكان مارتين اراعىن ىشەدى.

كانديدات B : ەكى رەت جۇمىستان قۋالاندى بولعان، تۇسكە دەيىن ۇيىقتايتىن ماۋباس، ۋەنيۆەرسيتەتتە اپين شەككەن، ونىمەن قوسا ءار كۇنى كەشتە كوپ مولشەردە ۆيسكي ىشەدى.

كانديدات C : سوعىستا وردەنمەن ماراپاتتالعان قاھارمان، قاتىقسىز تاماقتانۋدى دارىپتەۋشى، تەمەكى شەكپەيدى، ازداپ ءسىرا ىشەدى. ەجەلدەن نەكەلى ايەلىنەن وزگە كوڭىلدەسى بولماعان.

وسى كانديداتتاردىڭ ىشىنەن قايسىسىن تاڭدار ەدىڭ؟

ايتار جاۋابىمدى قاعازعا جازعانىمدا، دوسىم ماعان: كانديدات A نىڭ فرانكلين روزۆەلت، كانديدات B نىڭ ۋەنستون چەرچيل، كانديدات C نىڭ ادولف گيتلەر ەكەنىن ايتتى.

مۇنى ەستىگەندە اڭىردىم دا قالدىم. دوسىم ماعان: كوسەمدىك ورىنعا گيتلەردى تاڭداعان شىعارسىڭ؟ وندا الگى ايەلگە تۇسىك تاستاۋعا كەڭەس بەرەسىڭ بە؟- دەپ سۇرادى.

- بۇل ماسەلەگە باس قاتىرۋدىڭ قاجەتى جوق، ساپالى ۇرپاق كورىپ، ۇرپاقتى ۇلاعاتتى تاربيەلەۋدى دارىپتەگەنىمىزگە قانشاما جىلدار ءوتتى، ءبىرتالاي مۇگەدەك-زاعيپ بالالار تۋعان ەكەن، ەندى ونداي بالانى كوبەيىتپەگەنى ءجون. سوندىقتان تۇسىك تاستاۋعا كەڭەس بەرەمىن،- دەدىم.

- ويىتسەڭ بەتحوۆەننىڭ تۇبىنە جەتكەنىڭ، ول ايەل بەتحوۆەننىڭ اناسى،- دەدى.

ودان بەتەر سىلەيدىم دە قالدىم. دوسىم ماعان:

- بۇلاي بولارىن ويلاماعان شىعارسىڭ؟ وزىڭشە دۇرىس تالعامىڭنىڭ زاردابى بەتحوۆەننىڭ تۇبىنە جەتىپ، گيتلەردى الەمنىڭ تورىنە شىعارادى،- دەدى.

 

3- اڭگىمە

 

تەڭىزدە اپاتقا ۇشىراعان ساياحات كەمەسىندەگى ءبىر جۇپ ەرلى- زايىپتى ەس كەتىپ جان شىعارعا تاايعاندا قۇتقارۋ قايىعىنا جاقىندايدى، ال قايىقتا ءبىر ادامدىق ورىن قالعان ەدى. وسى كەزدە ەركەك ايەلدى كەيىنگە سىرىپ قايىققا شىعادى. ايەل تەلەگەي تەڭىزگە باتىپ بارا جاتىپ كۇيەۋىنە داۋىستاپ ءتىل قاتىپتى...

وسى ارادا اڭگىمەسىن ۇزگەن دوسىم:

- ايەلدىڭ نە دەپ ايعايلاعانىن تاپشى،- دەدى.

- «سەنى ءيتتىڭ ەتىنەن دە جەك كورەمىن! شىنايى كەسپىرىڭدى تانىماعان كور سوقىر ەكەنمىن!» دەگەن شىعار،- دەدىم.

- ايەلى «بالامىزدى كوز قاراشىعىڭداي قورعا!» دەپ ايعالاپتى، ەندى مەن بۇل اڭگىمەنى اقىرىنا دەيىن ايتايىن- دەدى دوسىم،- كەمە تەڭىزگە باتتى. ەركەك مەكەنىنە قايتىپ كەلىپ، قىزىن جالعىز باعىپ بويجەتكىزەدى. كوپ جىلدان كەيىن، ەركەك ناۋقاستانىپ دۇنيە سالادى، ارتىندا قالعان زاتتارىن رەتتەگەن قىزى اكەسىنىڭ كۇندەلىگىن تاۋىپ الادى. ءاسىلى اكە-شەشەسى ساياحات كەمەسىنە شىعاردان بۇرىن شەشەسى ايىقپاس دەرتكە شالدىعىپتى. شەشۋشى ساتتە، قىزدىڭ اكەسى امان قالۋدىڭ بىردەن- ءبىر ورايىن قارماعان ەكەن. ول كۇندەلىگىنە «تەڭىز تۇبىنە سەنىمەن بىرگە كەتۋگە رازى بولسام دا، ويتۋىمە مۇلدە بولمايتىن ەدى. قىزىمىز ءۇشىن سەنى تۇڭعيىق تەڭىزگە جالعىز اتتاندىردىم...،- دەپ جازىپتى.

دۇنيەدەگى ىزگىلىك پەن سۇرقيالىقتىڭ، دۇرىس پەن بۇرىستىڭ كەيدە ورنى الماسىپ، ءوڭى وزگەرىپ، پارىقتاۋ قيىنعا سوعاتىن شاقتارى بولادى. سوندىقتان بارلىق ىسكە قالىپقا تۇسكەن داعدىلى قۇن كوزقاراسى بويىنشا وي جۇگىرتىپ، جەڭىل- جەلپى، اسىعىس قورتىندى جاساماۋ كەرەك. الدە بىرەۋدىڭ بۇگىنگى بەينەسى ( اۋەلى ءوزىڭنىڭ دە ) نەگىزىندە ەرتەڭگى كەلەشەگى تۋرالى بولجامدى كەسىپ پىشپە!

 

دەرەككوز: جازۋشىلار بىرلەستىگى ءۇنحات تەكشەسىنەن

اۋدارعان: قۋات جۇماش ۇلى (تورابىمىزدىڭ ۇسىنىس ەتىلگەن ءتىلشىسى)