سەنىمەن بىرگە جاڭبىرعا مالشىنعان ادام – سەنى ەڭ جاقسى كورەتىن ادام
كەلۋقاينارى: |جاۋاپتى رەداكتور: | جاڭالانعان ۋاقىت:2019-01-02 17:10:00

ماقسات قيزات ۇلى

 

سەنى ناعىز جاقسى كورەتىن ادام جاۋىندى كۇنى ساعان شاتىر ۇستاپ بەرگەن ادام ەمەس، قايتا سەنىمەن بىرگە جاڭبىرعا مالشىنعان ادام.

توپەپ تۇرعان نوسەردە جاڭبىرلىق ۇستاپ بەرگەن ادامدى ۇمىتۋعا بولمايدى، ءبىراق كەشە ءبىر شاتىردىڭ استىندا كۇلىپ كەتىپ بارا جاتقان عاشىقتاردىڭ مىنە بۇگىن جاڭبىرلىقسىز اق جاۋىننىڭ استىندا قالعاندا ەكى ايىرىلىپ كەتكەنىن كوز كوردى.

شاتىرىڭ باردا شارىقتاپ جۇرگەندەردىڭ، شاتىرىڭ جوقتا قالىقتاپ كەتكەنىن بايقايسىڭ.

سەنى جاقسى كورەتىن ادام سەن اۋىرعاندا ساعان ءدارى اكەپ بەرگەن ادام ەمەس، قايتا ساعان: ءدارىڭدى ءىشىپ الشى، تىماۋىڭ تەزدەن جازىلىپ كەتسىن،-دەپ ساعان ءبىر قولىنا ءدارى، ءبىر قولىنا قايناق سۋ قۇيىلعان شىنى ۇسىنعان ادام.

ەسىڭدە مە، كىشكەنە كەزىڭدە كىم ساعان ساعان ءدارىڭدى ءىشىپ الشى، تىماۋىڭ تەزدەن جازىلىپ كەتسىن،-دەپ زارلاۋشى ەدى.
ول سەنىڭ اناڭ ەمەس پە ەدى،
ال ەسەيگەندە، كىم ساعان قىزۋىڭ ورلەپ تۇر ەكەنسىڭ، قارعام، ءدارىڭدى ءىشىپ الا قويشى،-دەپ ايتتى.

ونى ءوز ءىشىڭ بىلەدى ءالىباي، انە، سول ادام سەنى ناعىز جاقسى كورەتىن ادام.

وتكەن جىلدا ءبىز شارشادىق، شالدىقتىق، تىرلىكتىڭ سانسىزداعان سىناعى قاجىتتى دا قالجىراتتى. ءبىراق ءبىز سۇرىنبەدىك، سىنبادىق.
ءبىز ساعان راحىمەت ايتامىز ءبىزدى سۇيگەن ادام.

راحىمەت ساعان، جىعىلعاندا سۇيەپ قالعان ادام.

راحىمەت ساعان، اۋىرعاندا اۋىزىما سۋ تامىزعان ادام. راحىمەت ساعان، قاراڭعىدا پانارىن جاعىپ، قارا قوسىنا پانالاتقان ادام.

راحىمەت ساعان، باسىم اۋىرىپ، قايتەرىمدى بىلمەي قالعان شاقتا، ماعان قاتتى ءسوزىن ايتىپ قايىرات بەرگەن ادام.

تاعدىر - ادام مەن ۋاقىتتىڭ تۋىندىسى.

اۋىزى قاتتى ادامنىڭ جۇرەگى جۇمساق بولادى. اۋىلدا ما، جوق، الدە ۇيدە مە، سەنىڭ ءاربىر جازا باسقان قادامىڭا جارىلارداي بولىپ كۇيەتىن ءبىر ادامدار بولادى. ءتىپتى ول كەيدە باستابىندا سەنى باسىڭنان نۇقىپ، بىلشىلداپ ۇرسىپ ەسى-اقىلىڭدى شىعارار، سەنىمەن ات كەكىلىن كەسىسەردەي كەرىسىپ، تەبىسىپ قالادى.

ءبىراق كوپ وتپەي الگى ادامنىڭ سەنىڭ بار كىناڭدى مويىنىنا الىپ، سەن ءۇشىن شىرىلداپ جۇرگەنىن كورەسىڭ، قارىزىڭدى دا قايتارىپ جۇرگەن سول، ارىزىڭدى دا كوتەرىپ جۇرگەن سول، سول ءبىر جان سەنى ناعىز جاقسى كورەتىن ادام، ول سەنى ومىردە كىرشىكسىز كەرەمەت ادام بولسا ەكەن دەپ تىلەيتىن ادام، ول سەنىڭ قىلداي قاتەلىگىڭدى جۇرەگىنە ساقتاپ، وسىدان سەن زاپى كورىپ قالاما ەكەن دەپ شىرىلدايدى. سەن ونى شارقىش، سەن ونى قيتۇرقى سانايسىڭ، سەنى تۇسىنەمىن، سەنى جاقسى كورەمىن دەگەن ادامنان گورى سەنى ءبىر ءىستى ىستەۋگە زورلاپ قىساعان ادام قايىرلى. «جاقسى بولسا ءجۇر ءوستىپ سۇيىرەتىلىپ، ەلدىڭ ارتىندا قالعان جاقسى ما، جوق، وزعان جاقسى ما، بوس بەلبەۋ بولماي باسىڭدى كوتەر»،-دەپ سەنى قايىراپ، الدىعا جەتەكتەگەن ادامدى ۇمىتپا، ونىڭ اۋىزى ۋىتتى بولعانىمەن، جۇرەگى قۇلىقتى.

سەن ءبىر دۇنيەگە شەشىم جاساي الماي، ءارى-ءسارى كۇيگە تۇسكەنىڭدە: قورىقپا، الدىعا قاراي ءجۇر، ىستە، جاسقانبا،-دەگەن دوس ءسوزى ەڭ قايىرلى.

وسى ادام عانا سەنىڭ ناعىز دوسىڭ بولادى. «ۇيىتپەشى اينالايىن، نەدەگەن قىزىق ادامسىڭ، نەگە بۇيتەسىڭ، بۇيتسەڭ ادام بولاسىڭ با؟»،-دەپ ۇرىسقان ادام بولدى ما ساعان، بولعان شىعار، ءبىراق ونىڭ ءسوزىن سەن جەك كورگەن بولارسىڭ. جاسىعان كەزىڭدە جاقسى ءسوزىن ايتقان، تاسىعان كەزىڭدە تاياعىمەن جاسقاعان جاندى ۇمىتپا.