الىسقا ۇزاتىلعاننىڭ ازابى
كەلۋقاينارى:جۇڭگو قازاق راديو تورابى |جاۋاپتى رەداكتور:داۋىل | جاڭالانعان ۋاقىت:2019-01-07 17:25:00


ماقسات قيزات ۇلى



اۆتوردان اڭداتپا:

ازدى-كوپتى بىردەڭە جازىپ جۇرگەن سوڭ الىس-جاقىننان اڭگىمەگە تولى حات-قابار كوپ كەلەدى. اسىرەسە نازىك جاندىلاردىڭ جازعان جان ايعايى جانىڭا تىنىم بەرمەيدى.

تاياۋ كۇندەردەن بەرى ۇنحاتىما كەلگەن حاتتى اقتارىپ وتىرسام، كوبىسى مۇڭعا ورالعان سوزدەر ەكەن، سونىڭ ىشىندە الىستا قالىپ، ايعايىن سىرتىنا شىعارا الماي جىلارمان كۇي كەشكەن قارىنداستارىمنىڭ قاراسى ءبىر تالاي ەكەن.

بۇل حاتتار قۇددى الىستاعى اپەكەمنىڭ كوزى جاسى، قيىرداعى قارىنداسىمنىڭ قۇمىعا شىققان ءۇنى سياقتى سەزىلدى.



الىستان قىز العان جىگىتتەر، قاسىڭداعى قوساعىڭدى قادىرلەي ءبىل، ول سەن ءۇشىن بارلىعىنان ۋاز كەشىپ سەنىڭ وتباسىڭا كەلدى.

سەن ونىڭ جارىم عۇمىرىن وتارلاپ الدىڭ، ول وعان كوندى، ول قىل-اياعى توسەك تارتىپ جاتقان اناسىنىڭ: قايتەسىڭ، قىزىم، تاپقانىڭ تىم الىستا ەكەن، جاقىننان تاپساڭ، جانىمدا بولاسىڭ،-دەگەن ءسوزىن دە ەلەمەي، سەنىمەن بىرگە بولۋعا جات ەل، جات جۇرتقا جەتتى.

ول «قىزىم مەنىڭ – قىزعالداعىم» دەپ بەتىنەن قاقپاي وسىرگەن قادىرلى اكەسىن دە التى قىردىڭ استىنا تاستاپ، ءسۇيدىم، كوندىم،-دەپ سەنىڭ ۇيىڭە كەلدى. ساعان سەنگەنىنەن كەلدى، سەنى سۇيگەنىنەن كەلدى.

ايتپەسە ونىڭ باسىن ات تەۋىپ كەتتى عوي دەيسىڭ بە؟ سەن سياقتى ءبىر ەركەكتى ول ءوز ەلىنىڭ ىشىنەن تابا المادى دەيسىڭ بە؟

ال، سەن ءشى، جىگىت باسىڭمەن نە ىستەدىڭ، قىز كۇنىندە ءسۇيدىم، كۇيدىم،-دەپ اياعىنا جىعىلىپ، جۇمساق سوزىڭمەن جىلىتىپ الىپ كەلىپ ەدىڭ، ۇيلەنگەن سوڭ وزگەرىپ شىعا بەردىڭ.

كەشەگى جاقسى ءسوزىڭنىڭ ءبارى جالعان بولدى، ونى ازاپتاپ قيناپ ءبىتتىڭ، جارالى جانىنا اشتى تۇز سەپتىڭ.

ونى اكە-شەشەسىنىڭ، تۋعان-تۋىسىنىڭ الىستان ەكەنىن، ساعان شاعىمدانىپ كەلە المايتىنىن ءبىلدىڭ دە، ونى ءوز بىلگەنىڭشە باسىندىڭ، باسبۇزارلىققا بارىپ باسقا دا ۇردىڭ، ول سەنىڭ ۇيىڭدە كۇلىپ ءومىر سۇرەمىن دەپ ويلاپ ەدى، كۇڭىرەنىپ ءومىر ءسۇردى.

ونى الىستاعى اتا-اناسى، اعا-جەڭگەسى بىلگەن جوق، توركىنىنەن تەلەفون كەلسە، كۇلە جاۋاپ بەردى: جاعدايىم جاقسى، تىرلىگىمىز وڭالىپ كەلەدى،-دەپ ءتىل قاتتى.

ەندى قايتەدى، بولارى بولدى، ماحاببات، سەزىم، تىرلىك دەگەندى كەش ءتۇسىندى، اۋىزداعى ادەمى ءسوزدىڭ قىسقا ءجىبى كۇرمەۋگە كەلمەيتىن تىرلىكتىڭ الدىندا تىزەرلەپ قالاتىنىن كوزى كوردى.

ءبىزدىڭ ەلدى بىلەسىڭ، شىققان قىز شيدەن ارى ،-دەيدى، قاشىپ كەلگەن قىز جامان،- دەيدى.

قاشىپ بارا قالاتىنداي توركىنى ىرگەدە تۇرعان جوق، مىنا جات ەلدە كىمنىڭ ەسىگىن پانالايدى، سىرتقا قونسا، سۋىق ءجۇرىسىڭ بار دەپ ساباۋدان ەرىنبەيدى.

ەندى قايتەدى، بارماقتى تىستەپ، قايىران ەلىم، قايىران جەرىم،-دەپ ەكى كوزدەن جاس اعىزىپ، بالالارىن قۇشاعىنا باسا بەرۋدەن باسقا جىلۋ بارما؟

ءاي، جىگىتىم-اي، ۋادە قايدا، سەن ونىڭ بۇكىل عۇمىرىنا وكىنىش سەپتىڭ، سەرتىڭ دە تۇرمايتىنىڭ بار، نەسىنە ۋادە ەتتىڭ، نەسىنە بىرەۋدىڭ ون ەكىدە ءبىر گۇلى اشىلماعان قىزىن وبالدى ەتتىڭ.

ول ءۇيىن عانا تاستاعان جوق، ول بويىنداعى ونەرىن دە تاستادى، ول ءوز ۇيىندە جۇرگەندە كەرەمەت تىگىنشى ەدى، شەشەسى وعان كىشكەنتاي كەزىنەن ءىس تىگۋدى ۇيرەتتى.

ول ون سەگىزىندە وركەن ءجايىپ، جيىرماسىندا جايقالىپ كەلە جاتقاندا ساعان كەزىكتى، سەن ونى اربالاپ ءجۇرىپ ۇيىڭە الىپ كەتتىڭ، ايەل شىن سۇيسە، قۇلاي سۇيەدى، قۇلاي بەرىلەدى، سەن ءۇشىن بارلىعىن تارىك ەتۋگە دايىن، ول سەنىڭ ۇيىڭە بارعاننان كەيىن ءىس تىگۋدى قويدى، ءوز الدىنا كاسىبىن وركەندەتۋدى ويلاپ ءجۇر ەدى، وعان دا جاعداي جار بەرمەدى.

بار زەيىنىن قارتايىپ قالعان اتا-ەنەسىن باعۋعا ارنادى، ءبىر جىلدان سوڭ بالا ءسۇيدى، ءبىر باسى ەكەۋ، ەكەۋدەن ۇشەۋ بولدى، ەندى قىز كۇنىندەگىدەي، ءوز ۇيىندەگىدەي ءومىر ءسۇرۋدى دوعاردى.

كەشەگى بۇلاڭداعان سارى قىز ەندى سالپى ەتەك سارى ايەلگە اينالدى، سەنىڭ وتىڭمەن كىرىپ، سۋىڭمەن شىقتى، باققانى سەنىڭ اتا-اناڭ، قاققانى سەنىڭ بالاڭ، كۇزەتكەنى سەنىڭ بوساعاڭ.

ءوز ءۇيىن جىلىندا ءبىر ەسىنە الادى،ەسىنە العاندا دا جىلاپ تۇرىپ ەسىنە الادى، الىستا ءجۇرىپ حال ۇستىندە جاتقاندا دا اناسىنىڭ اۋىزىنا سۋ تامىزا المادى، اياۋلى اكەسىنىڭ اقتىق ءسوزىن ەستي المادى، ول بارىنەن كەشىكتى، ول تۋعان ءۇيىنىڭ بارلىق كۇلكىسى مەن شاتتىعىنان كەشىكتى، سەن دەپ كەشىكتى.

ول قارا تۇياعىنان حال كەتكەنشە، سەنىڭ شاڭىراعىڭدى گۇلدەندىرۋگە كۇش قوستى، سونداي كەزدە: شارشادىڭ عوي، توركىنىڭە بارىپ كەلسەڭشى،-دەپ ءبىر اۋىز ءسوز ايتا الدىڭ با، ءاي، قايدام، ەسەسىنە: ۇيدە وتىرىپ تاپقانىڭ بەلگىلى، وسى ءۇيدى مەن عانا باعىپ جاتىرمىن،-دەپ كەۋدەڭدى كەرىپ كەردەڭدەگەنىڭ دە از ەمەس شىعار،ءيا، ول سوندا سەنىڭ وسى ءسوزىڭدى ەستۋ ءۇشىن وسىندا كەلگەن بولدى عوي.

ول قازىر توركىنىنە بارعىسى كەلمەيدى، «قىزىم-اۋ، ناعىپ توزىپ كەتكەنسىڭ»،-دەسە، نە بەتىن ايتار، تۋعان ەلىنە قالاي دەپ تۇسىندىرەر، قاي كۇنى ارتىنداعى سىڭلىسىنە تەلەفون بەرگەن، مۇڭىن شاققان، بىرگە تۋعاننىڭ سوندا ايتقان ءسوزىن قارا: كىم سەنى الىسقا ۇزاتىلسىن،-دەپتى، ءوزىڭ عوي سونىڭ سوڭىنا كەتكەن،-دەدى شورت كەسىپ. ەندى نە دەسىن، ءتىلى بايلانعان دا قالعان، ءوزى ءتىلىن ءوزى بايلادى عوي.

الىسقا ۇزاتىلعاننىڭ ازابىن ءبىر كىسىدەي تارتىپ كەلەدى.

ول ءوز ۇيىندە جۇرگەندە ءبۇتىن قىز ەدى، الىسقا ۇزاتىلعاننان كەيىن جەتىم قىزعا اينالدى، قايىن اپكەسى مەن قايىن ەنەسىنىڭ الدىنا وتىرسا وپاق، تۇرسا سوپاق بولعانى اينالايىن ەكەن، كۇيەۋى جولدان تايعانى جۇرەگىن جارالادى.

سەن ءۇشىن دەپ قانا كەلىپ ەدى، سەن ونىڭ بارلىق ءتاتتى ۇمىتىن تاس-تالقان ەتتىڭ.

ەركەك باسىڭمەن الىستان الىپ كەلگەن ارۋىڭدى باقىتتى ەتە المادىڭ.

ول بۇل جەردەن دوس تابا المادى، بالا كەزدەگى دوسى سوناۋ الىستا اۋىلىندا قالدى، ونىمەن ۇنحاتتا عانا سويلەسەدى، كەزدەسىپ كەڭەسپەگەن سوڭ ءبارى بەكەر ەمەس پە.

ەگەر جاقىندا بولعاندا جان جاراسىن اشىپ ايتار ەدى عوي، ەكى بالا تاپقان سوڭ ەڭكەيىپ قالدى. تاياۋدا سىرقاتتانىپ جاتىپ قالدى. بۇعان ەشكىم دە قاراي قويمادى، بىردە اۋىز ۇيدەگى قايىن ءسىڭلىسىنىڭ اعاسىنا: ءسۇيىپ العانىڭ وسى ما، دەنى ساۋ ادام الساڭ بولماي ما، ىڭقىل-سىڭقىلى نەدەگەن كوپ ءوزىنىڭ،-دەگەن ءسوزدى ەستىدى.

كورپەنىڭ استىندا كوز جاسى كول بولدى. ەگەر ءوز ءۇيى، ءوز ءسىڭلىسى، ءوز جەرى بولعاندا، ول بۇنداي ءجابىر كورمەستە ەدى، «قىزىمىز اۋىرىپ قالىپتى»،-دەپ قۇراق ۇشىپ جۇگىرەر ەدى.

ازاماتتار الىستان الىپ كەلگەن اق قۇستارىڭدى ايالاڭدار، ولار كەشە ءوز ايدىنىندا اسىر سالعان اققۋلار، ەندى بۇگىن سەنىڭ ايدىنىڭا كەلىپ سۇرقى جامان سۇقسىرداي كۇن كەشپەسىن. ايەل جىلاسا، الەم جىلايدى، سەن سونى بىلەسىڭ بە؟

بىلسەڭ، بۇيتپەس ەدىڭ عوي...

ءاي، ازاماتىم-اي، ءاي، اقىماعىم-اي، ءاي، جىگىتىم-اي، ءاي، ءتۇبىتىم-اي.

ول ۇيلەندىم، باقىتتىمىن دەپ ەدى، ۇيلەنگەنىنە وكىندى، بارلىق باقىتىن ۇيلەنۋ قۇرتىپ كەتكەندەي بولدى.

ءيا، الىسقا ۇزاتىلاردان بۇرىن نەگە ويلانبادىم دەدى ول...

ەگەر مەنىڭ قايىن اپام قاتتى كىسى بولسا، قاشان كورسەڭ قاباعىمەن جاسقاپ، ىستەگەنىمدى جاقتىرتپاي تۇرسا، قايتەم دەپ؟

الىسقا ۇزاتىلعاندا كۇيەۋىم سىرتتا قىزمەتتە بولسا، بالام اۋىرسا، جالعىز ءوزىم شيپاحاناعا قالاي بارام دەپ..

الدا-جالدا اكەم مەن شەشەم اۋىرىپ قالسا، حال ۇستىندە قالسا، قايدان، قالاي جەتەم دەپ....

جات جۇرتتان ءجابىر كورسەم، قاي جاقىنىمدى ىزدەپ بارام دەپ....

ءيا، ويلانبادى ول، سەن ءۇشىن ويلانبادى ول.

ول سوندا ويلادى...

اۋەلى الىسقا ۇزاتىلىپ شىقساڭ، ءوزىڭدى ەركىن باعاتىن ەكونوميكالىق قۋات بولۋ كەرەك دەپ...

قالا بەردى كۇيەۋىڭ سەنىڭ اۋىزىمەن ەمەس، جۇرەگىمەن ءسۇيۋ كەرەك دەپ..

ال قالعانىنىڭ ءبارى بەكەر دەپ...

بۇل الىستا قالعان ءبىر قارا كوزدىڭ جان ايعايى، الىسقا ۇزاتىلىپ باقىتتى عۇمىر كەشىپ جاتقان نازىكتىلەرىمىز دە از ەمەس، ولار سەنىمدى دە سۇيىكتى ازاماتىنا جولىققاندار، دەسە دە الىسقا ۇزاتىلعاننىڭ وزىندىك ازابى بار ەكەنى اقيقات، ءوز ۇيىڭنەن قىرىق ادىم شىقساڭ مۇساپىرگە اينالاسىڭ دەگەن حالىق ماقالىنىڭ جانى بار ەكەن شىن بولسا، ءوز ۇيىنەن قىرىق شاقىرىمنان قىرىق ەسە ۇزاق الىسقا ۇزاتىلعان قىزداردىڭ قانشالىقتى مۇڭايا كۇي كەشىپ جۇرگەنىن ءاربىر ازاماتىمىزعا تايعا تاڭبا باسقانداي تۇسىنىكتى. ەندەشە ءسوز سوڭىندا ءبىز ءاربىر الىستاعى، جاقىنداعى قارا كوزدەرىمىزگە شىن جۇرەكتەن باقىت تىلەيمىز.


اۆتوردىڭ ۋيچات ءنومىرى:18160621712