ادامنىڭ قۇنىن ساعىنىشىمەن ەسەپتە....
كەلۋقاينارى:جۇڭگو قازاق راديو تورابى |جاۋاپتى رەداكتور:داۋىل | جاڭالانعان ۋاقىت:2019-03-14 16:01:00


اۆتورى: جياڭ شۇن

اۋدارعان: ماقسات قيزات ۇلى

وقىعان ديكتور: شىنار عالىم قىزى


00:0015:30


ەگەر ماعان سالسا، ادامنىڭ قۇنىن ساعىنىشىمەن ەسەپتەر ەدىم، ەگەر سەن جاقىنىڭدى قانشا كوپ ساعىنا بىلسەڭ، سونشالىقتى قۇندىسىڭ.

مەن كوزىمدى جۇمىپ، كوكىرەك كەرە تىنىس السام بولدى، كوز الدىما وتكەن كۇندەردەگى اشتى بولسا دا ءتاتتى كۇندەرىم ەلەستەيدى، انادايدان ارداقتى اناشىمنىڭ سۇلباسى اعاراڭدايدى.

ءسىز بىلەسىز بە، ءبىزدىڭ شەرمەندە شەشەلەرىمىز ءوزىنىڭ التىن ۋاقىتىن كۇيبەڭ تىرلىكتىڭ قازان-وشاعىنا ايىرباستاسا دا، بىزگە ەستەن كوتەرىلمەس كەرەمەت بالالىق شاقتىڭ كارتيناسىن سيلاي ءبىلدى.

مەن ءار كۇنى ۇيىقتار الدىندا كونەتوز كورپەمدى جامىلىپ ۇيىقتايمىن.


مەن كورپەمنىڭ تىسىن وزگەنىڭ التىن جالاتقان استاۋىنا ايىرباستامايمىن. مىنە، قاراشى، كونە بولسا دا، ءدال مىناداي ادەمى كەستەلەنگەن كورپەنىڭ تىسىن كورمەگەن بولارسىڭ، بۇنى شەشەم ءوز قولىمەن كەستەلەپ شىققان، كەستەسىنىڭ كەي تۇستارى جەمىرىلىپ، بوياۋى وڭىپ كەتكەنىمەن سىنى ءالى كەتە قويماعان.

ءالى ەسىمدە ول ۇنەمى وسى كورپەنى وزەن بويىنا اپارىپ ءوز قولىمەن جۋىپ كەلەتىن.

ول كەزدە بۇگىنگىدەي كىر جۋعىش قايدا، بار بولعانى تەمىر ەلەگەن مەن اعاش كەرتپە، «سەندەر ۇيدە تىنىش وتىرىڭدار، مەن وزەن جاعاسىنا بارىپ كىر جۋىپ كەلە قويايىن»-دەيتىن دە، كىرلەگەن كيىم مەن كورپەنىڭ تىستارىن ەلەگەنگە سالىپ الىپ وزەنگە قاراي جىتىرمەلەتىپ ءجۇرىپ كەتەتىن.

مەن بالا كەزىمدە شەشەمنىڭ اپتا سايىن وزەن بويىنا بارىپ كورپەنىڭ تىسىن جۋىپ وتىراتىنىن كورەتىنمىن، كىردى جۋىپ بولعاسىن وزەن بويىنداعى تۇيە وركەشتى مالتا تاستار مەن جاپ-جاسىل ارشالاردىڭ ۇستىنە جۋعان كيىمدەردى، كىرلەردى ءجايىپ قوياتىن. جارقىراعان كۇن نۇرى سۋ كيىمدەردى ەت پىسىرىم ۋاقىتقا جەتكىزبەي كەپتىرىپ جىبەرەتىن.


كەشتە جاتاردا تاپ-تازا جۋىلعان كورپەنىڭ تىسىنان كۇننىڭ اپتابى مەن ارشانىڭ كەرمەك ءيىسى اڭقىپ تۇراتىن، ءبىز سول حوش ءيىس شىققان كورپەنى جامىلىپ ۇيقىنىڭ ءتاتتى قۇشاعىنا قۇلايتىنبىز.

ەگەر ماعان بىرەۋ دۇنيەدەگى ەڭ قىمبات كورپەنى اكەلىپ: مىنانى سەن ال دا، انداعى كونەتوز كەستەلى كورپەڭدى ماعان بەر،-دەسە.

مەن وعان: جوق، بەرە المايمىن، بۇعان انامنىڭ ماڭدايىنىڭ تەرى تامعان، تۋعان جەرىمنىڭ كۇنى ءتۇسىپ، ارشاسىنىڭ ءيىسى سىڭگەن، ماعان بۇدان ارتىق ەڭ قىمبات كورپە جوق،-دەر ەدىم.

مەن جاپونيادا تۇرعان كەزىمدە ول جەردەگى ادامداردىڭ ءالى دە قولمەن كىر جۋىپ، كەستەلى كورپە جامىلاتىنىن بايقادىم. تەحنيكاسى الەمنىڭ الدىڭعى قاتارىندا تۇراتىن وسى ەلدىڭ ءالى دە وتكەندى ۇمىتپاي، ۇلىلىقتى ءالى دە ساعىنىشپەن ولشەيتىنىن ءبىلىپ قايىران قالدىم.


شىنتۋايتىندا ورەلى تۇرمىس دەگەنىمىز وسىنشالىقتى قاراپايىم دا قاستەرلى عانا، سەن ءوزىڭنىڭ جۇرەگىڭە جاقىن تۇرمىستىڭ بەينەسىن ۇمىتپاۋعا ءتيىسسىڭ، بۇل سۇيىسپەنشىلىكتىڭ ارقاۋى، سۇلۋلىقتىڭ سيمفونياسى ەمەس پە.

ادامزاتتىڭ قوس قولى بارلىق سۇلۋلىقتى جاراتادى. ادامزاتتىڭ جۇرەگى شىنايىلىقپەن سۋارىلىپ، ساعىنىشپەن ادىپتەلگەندە عانا، ءومىر ءماندى سەزىلەدى. سۇلۋلىقتى سەزىنۋ دەگەنمىز سەنىڭ ءبىر ادامعا، ءبىر جەرگە، ءبىر زاتقا قاراتقان تەرەڭ سۇيىسپەنشىلىگىڭنەن تۋىنداپ جاتادى.

بۇل كۇندە اتا-انا مەن بالانىڭ سۇيىسپەنشىلىگى تالقىعا تۇسكەنىن كوز كوردى. كوپتەگەن ادامدار ەڭبەكشى جالداپ ەر مويىنىنداعى جاۋاپكەرشىلىكتى وتەگىسى كەلەدى. ءبىراق وزگەنىڭ قولىمەن جاسالعان جاقسىلىق جاقىنىڭنىڭ جۇرەگىن جىلىتا قويارما؟


مەنىڭ ءبىر ىرىسى تاسىپ كەلە جاتقان جاقىن دوسىم بار ەدى، كاسىپكەرلىكپەن ەل كوزىنە ءتۇسىپ، جۇرتتىڭ القاۋىنا بولەندى. اكەسى بولسا جاسى ەگدەلەپ ءجۇرىپ-تۇرۋى قيىنعا سوقتى، تاياۋدان بەرى ۇلكەن كىسىنىڭ دەنساۋلىعى سىر بەرىپ، مۇگەدەكتەر ارباسىنا وتىرۋعا ءماجبۇر بولدى.

بالاسى بولسا: قاربالاس قىزمەتتەن قارايلاسۋعا قولىم تيمەدى،- دەپ جوعارى ەڭبەك اقى بەرىپ ءۇش كۇتۋشىنى جالداپ الىپ، اكەسىن قاراتىپ قويدى.

ءبىر كۇنى ول ماعان: ە، دوسىم، قارت كىسىنى قاراپ-كۇتىمدەۋ وڭاي شارۋا ەمەس ەكەن، ءبىر ەمەس ءۇش كۇتۋشى تاۋىپ بەرسەم دە، شالەكەڭنىڭ كوڭىلىنىڭ كونشيتىن ءتۇرى جوق، مەن قاتتى قالجىرادىم،-دەدى كۇرسىنىپ.


مەن وعان: سەن العاش ءتاي-ءتاي باسىپ، تالتىرەڭدەپ جۇرە الماي جۇرگەن شاعىڭدا، سەنى كىم باعىپ ەدى،-دەپ سۇرادىم. ول: كىم باعۋشى ەدى، اكەم مەن شەشەم باقتى عوي،-دەدى.

–ەندەشە، ەندى مىنە قارتايىپ، قۋات كەتىپ اكەڭ جۇرە الماي قالدى، ونى ءوزىڭ قاراۋىڭ كەرەك،-دەدىم.

ول ءۇنسىز قالدى.

ءيا، ءبىز اكەگە دەگەن قۇرمەتتى، شەشەمىزگە دەگەن ىزەتتى ۇمىتىپ كەتتىك. مەن الگى دوسىما اكەسىنە دەگەن كوزقاراسىنىڭ دۇرىس ەمەس ەكەنىن ەسكەرتتىم. شىندىعىندا اكەلەرىمىزدىڭ كوكسەيتىنى شيپاگەردىڭ دۋالى قولى، كۇتۋشىنىڭ جۇمساق ماپەسى ەمەس، قايتا جۇرەگى مۇزداعان كەزدە وزىنە سەرىك بولاتىن وزىنەن تۋعان بالاپاندارى.


ونىڭ قاجەت ەتەتىنى سەنىڭ جىلى الاقانىڭ، ول بار بولعانى: شىركىن، بالام باسىن يىعىما سۇيەسە، ەركەلەسە،-دەپ قانا ويلايدى. وعان كەرەگى جارقىراعان ساراي، ۇلدە مەن بۇلدەگە ورانعان استا-توك تۇرمىس ەمەس، وعان كەرەگى بالاسىنىڭ مەيىرى.

مەن ءبىر سەرىكتىكتىڭ قىزمەتشىلەرىنە ساباق ءوتتىم. بۇنداعى ادامداردىڭ كوبى تانىمالى ۋنيۆەرسيتەتتى بىتىرگەن دارىندىلار ەكەن، ولار سەرىكتىككە العاش كەلگەن جىلدان باستاپ وسى سەرىكتىككە قارجى قوسىپتى، ولار ءار كۇنى قارجى اينالىمىن باقىلاۋدى ادەتىنە اينالدىرىپتى.

مەنى تاڭعالدىرعانى ەگەر كاسىپكەردىڭ بىرەۋى ون جىل ىشىندە قىزمەتتەن شەگىنسە، قوسقان قارجىلارى قۇردىمعا كەتەدى ەكەن، سوندىقتان ولاردىڭ بىردە-بىرەۋى دە بۇل سەرىكتىكتەن قول ۇزۋدى قۇپ كورمەيدى ەكەن.


ولار بۇنى ەڭ تاماشا سەرىكتىك باسقارۋ ءادىسى دەپ قارايتىن كورىنەدى. سەرىكتىكتىڭ تابىسى مول بولعان سايىن قىزمەتشىلەردىڭ قوساتىن قارجىسى دا از ەمەس ەكەن.

ولاردىڭ ءبىر جاۋاپتى باسقارۋشسى ماعان بۇل جەردىڭ ءتارتىبى قاتاڭ، جۇمىسشىلار كەشكى ساعات توعىزسىز قىزمەتتەن تۇسپەيدى، مىنا وتىرعان قىزمەتكەرىمىز سەگىز جىلدان بەرى بىردە-ءبىر رەت دەمالىس الىپ كورگەن جوق، ناعىز سەرىكتىكتىڭ سەركەسى،-دەپ مارقايدى.

مەن ولارعا ون كۇن ساباق ءوتتىم، سوڭعى كۇنى ساباعىمدى اياقتاتىپ ورنىمنان تۇرا بەرگەنىمدە، ءبىر كىسى مەنەن: سىزدەن كەڭەس الايىن،-دەگەن ەدىم، مەنىڭ قىزىم بەس جاستا، وسىنداي كەزدە مەن وعان گارمون ۇيىرەتكەنىم دۇرىس پا، جوق الدە سكريپكا ۇيىرەتكەنىم دۇرىس پا،-دەپ سۇرادى.

مەن وعان: ءسىز الگى كۇنى-ءتۇنى ۇيىڭىزگە قايتپاي قىزمەت ىستەيتىن، سەگىز جىل بويى دەمالماعان قاجىرلى قىزمەتكەر ەمەسسىز بە،-دەدىم سۇراۋلى كوزبەن. ول باسىن يزەدى.


مەن وعان: ءسىز گارمون مەن سكريپكاعا باسىڭىزدى قاتىرماس بۇرىن، ۇيىڭىزگە بارىپ قىزىڭىزدى قۇشاقتاپ، كەشتە وعان ەرتەك وقىپ بەرسەڭىز ءجون بولار،-دەدىم.

ول مەنىڭ ءسوزىمدى تۇسىنبەي قالدى-اۋ دەيمىن، جاپاقتاپ تۇرىپ قالدى..

ءوز باسىم بەس جاسقا كەلگەن بالاسى بار ءبىر اكەنىڭ ءدال وسىلاي باس الماي قىزمەت ىستەي بەرۋىن قالاماس ەدىم، ونىڭ بالاسىن باۋىرىنا باسىپ، اكەلىك مەيىر، ماحابباتىن ەرتەدەن ءسىڭىرۋىن ون قايتارا وتىنەر ەدىم.



اتتەڭ، اكە-شەشە ماحابباتىنىڭ بالا ءۇشىن ۇلكەن قۋات، ۇلكەن كۇش ەكەنىن كوپ ادامدار ۇقپاي ءجۇر-اۋ.

جان جىلۋى – جاننىڭ تىلەۋى، مىنە بۇل ادامنىڭ ەڭ ءتۇبىرلى، ەڭ نەگىزگى تىلەگى، مەن كوركەمونەردى ونەر رەتىندە دارىپتەۋشىمىن، ءبىراق ومىردە كوركەمونەردەن دە بيىك تۇراتىن ادامدىق، جان شۋاعى دەيتىن ۇلى كۇشتىڭ بار ەكەنىن ۇمىتپايىق دەگىم كەلەدى.

سوندىقتان دا مەن اكە-شەشەمنىڭ كىشكەنتاي كەزىمدە مەنىمەن بىرگە بولعانىنا قاتتى قۋانامىن. ولار مەنىڭ جۇرەگىمە شۋاق ءشاشىپ، ءوز مىندەتىن ادا ەتكەن ناعىز ارداقتى اتا-انا.