سەن مەنىڭ جانارىمسىڭ
كەلۋقاينارى: |جاۋاپتى رەداكتور: | جاڭالانعان ۋاقىت:2019-05-05 01:17:00


گۇلجان زارقىنبەك قىزى


سەن مىنا-جانارىمنىڭ ىشىندەسىڭ،

جاناردىڭ بىلەسىڭ عوي كىشىرمەسىن.

ىشىنە جانارىڭنىڭ ساقتا مەنى،

بىرەۋلەر كولەڭكەسىن تۇسىرمەسىن!

سەن مەنىڭ- مىنا ءتىلسىم كەۋدەمدەسىڭ،

بىلەسىڭ، كەۋدەمە ەشكىم تەڭ كەلمەسىن.

زىندانىڭا سالىپ ساقتا،

بىرەۋلەر كوكپار قىلىپ وڭگەرمەسىن!

سەن مىنا-تىلىمدەسىڭ، ۇنىمدەسىڭ،

بىلەسىڭ عوي، ءتىلمنىڭ بۇلىنبەسىن.

سەن مەنى ۇنىڭە قوس، تىلىڭە تۇت،

ءۇنىم ءوشىپ، ۇشكىر ءتىل تىلنبەسىن!-اقيىق اقىن مۇقاعاليدىڭ وسى ولەڭىن ەلەكتر شام تۇبىندە وتىرعان نەمەرە قىزىم مونشاقتىڭ ليريكالى داۋىسپەن وقىعانىن ەستىگەن سايىن ىشكى جان دۇنيەمدى الاسۇرعان تەڭىزدىڭ ادۋىندى تولقىندارى تەڭسەلتىپ جىبەرەتىنى بار. مونشاق جىردى جانى سۇيەدى، اعىلشىن ءتىلى ماماندىعىنان وقىپ جاتسادا ادەبيەتكە اۋەس. ديكتور بولۋدى قانشاما ارماندايدى دەشى. ينتىرنەتتە قۇرىپ العان راديو تەكشەسى بار سياقتى، كۇنى -ءتۇنى سونىڭ الەگىندە. قوس بۇرىمى يىعىنان توگىلىپ، جۇزى بال-بۇل جانىپ، سۇيكىمدى كەۋدەسى بىردە كوتەرىلىپ، بىردە باسىلىپ، جۇزىندەگى شۇڭقىرى ءتاتتى تولقىپ، اينالاسىن تارىس ۇمىتىپ ادەمى جىر وقۋعا كىرىسىپ كەتەدى. ولەڭ وقىعان ونىڭ تۋ سىرتىنان قاراپ سۇمبىل شاشىنان سەزىم نۇرى الاۋلاي توگىلىپ ، ءۇن-بويىنان ۇشقىنداعان ءتىلسىم دۇنيەمەن قابىسىپ جەر بەتىن جاۋىپ بارا جاتقانداي بولادى ماعان. سۇيسىنە قاراعان ماعان كەنەت بۇرىلادى دا :اپا، ءسىز پويەزيانى باسىڭىزعا جاستاپ وقيتىن ادامسىز عوي. تىڭداڭىزشى، مىنا ولەڭدى قانداي وقىپتىم. داۋىسىم ادەمى مە، سەزىم بوياۋى جەتكەندەيمە ؟قاي جەرى كەلىسپەي تۇر ؟ايتىڭىزشى، -دەپ موينىما ەركەلەي اسىلا كەتەتىن. اكەسى مەن شەشەسى جۇمىسپەن قاربالاس. ۆەنيۆەرسيتەتتى اتتاپ كەتكەن مونشاقتىڭ اندا-ساندا ۇيرنۋ ناتيجەسىن سۇراستىرعانى بولماسا ، ولەڭىن ەستىپ وتىرۋعا ۋاقىتى قايدان شىقسىن. ال مەن ونىڭ ەڭ العاشقى ءارى ەڭ مۇقيات تىڭدارمانىمىن. الپىستى القىمداپ، جەتپىستى ەڭسەرىپ قالعان مەنىڭ بالدىرى قاتايىپ، قامىسى قارتايعان كوڭىل ايدىنىمدا سەزىم سەلى تۇرادى-اۋ دەپ ويلايما ەكەن قارعام. قىلاۋعان قارتتىقتا قيقىم قاعاز قۇدىرەت بارما، سامايمدى اق قىراۋ شالىپ، اق تورعىن جاۋلىقتىڭ استىنا باياعى سۇمبىل شاشتار سيرەپ ، كوز جيەگىمدى اجىمدار شيرلاعان مەنىڭ سول پويەزيا بيكتىگىن سەزىنىپ، وتتى جىرلاردىڭ تەرەڭىنە بويلايتىنىما جۇرەگى سەزەمە؟بالكىم ول جاس ۇلعايسادا ، قاۋساعان كەۋدەدە لۇپىلدەپ سوققان جۇدىرىقتاي ەتتىڭ ريتىمى ماڭگى جۇرىسىنەن جاڭىلماستان نەمەن جيىلەپ نەمەن سالقىندايتىندىعىن بىلەتىن دە شىعار. ون سەگىزدەن ون توعىزعا اتتاعان مونشاقتىڭ بويىنداعى بال قاراعايداي تولسا تۇسكەن كوز تارتاتىن كوركەم وزگەرىس اناۋ اكە-شەشەسىنىڭ كوزى مەن سوزىندە بولسادا، ويىنداعى وسقىرىنسا وقىس قىلاتىن وتتى وزگەرىس بالكىم بەيمالىم شىعار.


مونشاق بىردە فاريزا وڭعارسىنۆانىڭ: 《مەن سوندا جىلاپ قالعام》اتتى ولەڭىن سىدىرتىپ وقيدى.

مەن سوندا جىلاپ قالعام،

سەن سەزبەدىڭ.

كەتتى ۇشىپ جىراققا ارمان،

بۇنىڭ ءبارى نەلىكتەن؟ بىلەسىڭ سەن - ءوزىڭدى ۇناتقاننان.

سوسىن-سوسىن جۇرگەننەن ۇمىتا الماي،

الىپ ۇشىپ جەتكەندە جىراقتاردان.

كەزدەرىڭدى الدىمدا قۇلاپ-تالعان،

ءولىپ-وشىپ ورتەنگەن كەزەڭدەرىڭ،

سوسىن. . . تۇك بولماعانداي بەزەرگەنىڭ.

وسىلارعا تۇسىنبەي مىڭ اقتارعام،

باسىم قاتىپ شەشىلمەس سۇراقتاردان.

سەزىمىڭنىڭ سونشالىق جالعاندىعى

سەن ءۇشىن ءبىر ءسات ەكەن ارمان قۇنى!

. . . مەن سوندا جىلاپ قالعام،

ءوزىڭدى جەك كورگەننەن جانە دە . . . ۇناتقاننان . . . .

-اپا، سوندا مىنا اۆتور سەزىمگە الدانعان بولدى-عوي ءا،

مونشاقتىڭ تۇيەدەن تۇسكەندەي ايتقان كەي سوزدەرىنە كۇلكىم كەلەدى.

-ءيا، بالام ومىردە ءبارى بولادى عوي، سۇيسپەنشىلىك بار جەردە وشپەندىلىك ، سەنىم بار جەردە ساتقىندىق، دوستىق بار جەردە قاستىق تەڭ جۇرەدى ەمەسپە؟

-اپا، سوندا وسىنداي سەزىم جۇگىن كوتەرگەن ادامدار دا باقىتتى جاساي بەرەمە؟

-باقىت ۇعىمى قالاي تۇسىنۋدەن عوي بالام. بالكىم ول الدانسادا سول ۇمتىلماس سەزىمىمەن باقىتتى شىعار نەمەسە ءوز كەشىرمەسى ارقىلى بولاتتاي قورتىلىپ شىققان ماحاببات زاڭدىلىعىن ، سەزىم سىرىن باقىتىنا بالار.

ءدال وزىڭدەي قايدان ۇقسىن قايعىمدى ەل،

عاشىق كوڭىل ماڭگى جاسىل ايدىن كول.

عاشىقتىقپەن عانا وتكەن كۇندەر عانا ءومىر،

ال قالعانى جاي كۇندەر، -دەپ مۇحتار شاحانوۆدا جىرلاعان ەمەسپە.

نەمەرەممەن وسىلاي ەركىن سويلەسۋ قالاي قالىپتاسىپ قالعانىن ءوزىم دە بىلمەيمىن. اڭگىمەنىڭ قولامتاسى ەكەۋىمىزدىڭ دە ادەبيەت-ونەرگە دەگەن ورتاق سۇيىسپەنشىلىگىمىزدەن باستالىپ، ونىڭ سەزىمگە دەگەن تاڭدانىسى مەن ومىرگە دەگەن ىزدەنىسىنە ۇلاسىپ، مەنىڭ كوكەيىمدە سارتاپ بوپ قالعان وتكەن كۇندەگى ۇمتىلماس ەلەسكە بولعان ساعىنىش پا الدە وكىنىش پە بەيمالىم ءبىر سەزىمنىڭ سونشاما جىلدار وتسەدە ءالى دە قولامتاسىن سوندىرمەي جۇرەك بۇرىشىمدا مازداپ جاتقاندىعىنان بولار.


******


ايشانىڭ اي وڭىنە اينالاسىنداعىلار قىزىعا قارايتىن. كۇمىس شولپىسى سىڭعىرلاپ، سىڭىعىرىنان تاڭ ويانىپ، كۇن كۇلەتىن بايدىڭ ەركە توتاي قىزى، ءۇش اعانىڭ جالعىزى قارىنداسى. بۇلعاڭداپ وسكەن بۇلا قىز ويىندا ەشتەمە جوق كۇن نۇرىمەن، دالا گۇلىمەن وينايتىن-دى. سۇيتىپ جۇرگەن الاڭسىز كۇندەردىڭ بىرىندە ايشا توسىن دەرتكە شالدىقتى. جانارى بىلشىقتانىپ، كوزاينالاسى قىزارىپ، قشىپ اۋىراتىن ادەت تاپتى. ءومىرى قىڭىق ەتىپ اۋىرماعان جاس بۋىنعا بۇل وڭاي بولعان جوق. اسەم دالانىڭ اريالى الەمىنە كوز مەيىرىن قاندىرىپ وسكەن جان بالاسى ءۇشىن بارلىق الاپ بۇلدىراپ ساعىمدانا باستاۋ قانداي ازاپ دەڭىزشى. اناسىندا ۇيقى، اكەسىندە تاقات جوق. ايشاعا تەك توسەككە تاڭىلىپ جاتۋ تۋرا كەلدى. دالاعا شىقسا بولدى، جەلگە تيگەن سايىن دەرتى ءورشىپ كوزى سولقىلداپ اۋىراتىندى تاپتى. اۋىلدا جاسالعان ەم -دومنىڭ ەش پايداسى بولمادى. اۋىل-ايماققا ادام سالىپ ەمشى ىزدەپ اعالارى اۋرە. اقىرى زايسان بويىندا اتاقتى ەمشى بار دەگەن ەل اراسىنان سىبىس تا جەتتى. ەمشىنىڭ اتا-باباسى كەزىندە اتىراۋ بويىنان اۋعان ، دارىگەرلىكتى ورىس جەرىنەن ۇيرەنىپ، وعان قازاقتىڭ قارا ەمىن قوسىپ ناۋقاس ەمدەۋدە وزىندىك قۇپيا رەتسەپكە يە مامان بوپ شىقتى. ونىڭ شارتى ناۋقاس ءوزى كەلۋى كەرەك. سونىمەن ءتاڭىر تاۋىنىڭ باتىسىنان ات سابىلتىپ اۋىرۋىنا اراشا ىزدەپ ايشا زايسانعا ات باسىپ تىرەدى. جانارىنان ايىرىلىپ قالاما، قۇداي-اۋ، توتىقۇستاي تۇرلەپ، ۇكىدەي ۇلپىلدەتىپ وسىرگەن بالاپانىم مىناۋ جارىق دۇنيەنى كورمەي قالسا نە ىستەرمىن؟ ، -دەگەن وي ايشانىڭ اناسىن جەگىدەي جەپ بارادى. كوز الدىنداعى مىناۋ سۇلۋ تابيعات كۇن ساناپ ساعىمدانعان سايىن ايشانىڭ جان -دۇنيەسى سارپالداڭ ساپار شەكتى. شىر ەتىپ دۇنيەگە كەلگەلى ەش نارسە ءۇشىن باس قاتىرىپ بالتىر سىزداتىپ كورمەگەن، اكەسىنىڭ ارقاسىندا، اناسىنىڭ الاقانىندا، اعالارىنىڭ ساياسىندا وسكەن ايشانىڭ كوكىرەگىندە العاش رەت قورقىنىش پەن ۇرەي ۇيا سالدى. دالاعا شىعا الماي ۇيگە قامالىپ، اناسىنىڭ كۇزەتىمەن تار توسەككە قامالىپ ، شيرشىق اتقان بالعىن قىز وسى ساپارعا اق جۇرەگىن قۇشاقتاپ زور ۇمىتپەن شىقتى. جاقىننان بەرى سان تاراپتان ساراپتاۋ جاساپ ساۋەگەلەريدىڭ ەش ءونىم بەرمەگەن ەم-دومى جاس قىزدىڭ ءۇمىتىن ۇگىپ، جانىن جاسىتىپ جىبەرگەن ەدى.

دارىگەر ايشانى كورگەن جەردەن كۇرسىنىپ جىبەردى.

-قانشا ەمشى ەمدەدى سوندا؟

-وي ، قايدام ، ايعا جۋىق بولدى بۇل دەرتكە. باستابىندا جاي بىلشىقتانىپ جۇرگەن، سودان كۇندەر وتە كەلە اۋىرلاسىپ، ءتۇن بولسىمەن سولقىلداپ بالامنىڭ جانىنا مازا بەرمەگەن سوڭ، جان-جاقتان ەمشى بىتكەننىڭ ءبارىن كەزەك-كەزەك شاقىردىق قوي ءبىر ەم بوپ قالار دەپ، -ايشانىڭ اناسى دەگبىرسىزدەنىپ بارادى.

دارىگەر ەلۋدى ەڭسەرىپ قالعان ، اشاڭ ءجۇزدى ، ات جاقتى ، ەكى قاسىنىڭ اراسى قوسىلىپ، تىگىنەن ەكى سىزىق تارتىلىپ، قويۋ جانارىنا قاسيەت ۇيىعانداي سابىرلى جان ەكەن.

-ەندەشە، بالاڭىزعا ۇزاق ۋاقىت ەم كەرەك. وسىندا بالكىم ايلاپ جاتارسىز، مەن قولىمنان كەلگەنشە شەتەل مەن قازاق ەمىن بىرلەستىرىپ ەمدەپ كورەيىن. كوز ءمويىزى شۇعىل قابىنىپ ارتىنشا سوزىلىپ، تۇرلىشە ەممەن شيلەنىسىپ، اسقىنىپ كەتكەن. ەگەر ءونىم بەرىپ جاتسا ، ادا-كۇدە جازىلۋى دا عاجاپ ەمەس.

- ىقىلاسىڭىزدان اينالدىم، اعاسى، قانشا ۋاقىت بولسادا وسىندا جاتىپ ەمدەلۋگە دايارمىز، ايتەۋ ايشام جازىلسا بولعانى.

سونىمەن دارىگەر ءۇيىنىڭ ىرگەسىنەن كەلىستىرىپ اق ءۇي تىگىپ بەرگەن اكەسى اناسى مەن ايشانى اللاعا اماناتتاپ، اۋىلعا قايتا بەردى.

ايشا تاۋلىك بويى كوزىن جۇمىپ جاتادى. كيگىز ءۇيدىڭ توڭلىگىنەن سىعىرايعان نۇر كەيدە ولەۋسىرەپ، كەيدە كۇشەيىپ ، جاس ارۋدى ءۇمىت پەن ۇرەي اراسىندا سابىلتىپ تىنىش تاپتىرمايدى. العاشىندا بولماعاندا تازا اۋدا سەرگىپ قايتۋعا ىنتىعىپ اناسىنىڭ جەتەگىمەن دالاعا شىعۋعا اسىقسادا بەيشارا قىز ەندى بوتەن جەردە جان-جاعىن سيپالاقتاپ سىرتقا شىعۋدى نامىس سانايتىن بولعان. تاڭ اتىسىمەن اناسى ازىرلەگەن شايدى شالا ءىشىپ دارىگەردىڭ كەلۋىن تاقاتسىزدانا كۇتەدى. دارىگەردىڭ ءجۇزىن انىق كورمەسەدە ونىڭ اسا ءبىر ىجداعاتتىلىقپەن ەمدەپ جاتقاندىعىن جانى سەزەتىن.

-ايان، بالام، بۇل بالانىڭ اۋىرۋ حارەكتىرىن ۇيدە ساعان ايتقامىن. باسقا كوز اۋىرۋلارىنا ۇقسامايدى. ءبىر شاما كۇردەلى . الدىمەن مىنا ءشۇپ ءدارىنىڭ بۋىمەن بۋلايمىز. بۇل دارىلەردىڭ ىشىندە مىناۋ ميكىروپ ءولتىرەدى، ال مىناۋ جاناردى قۋاتتاندىرادى. . . .

-ءيا، اكە، ءبىلدىم. سوندا مىنا اق ۇنتاق ءدارى شى ؟

- ول بۇل جەردە جوق، ۇلى اكەلەرىمىز كەزىندە استىراحاندا وقىپ جۇرگەندە ۇيرەنىپ جاساعان ءدارى ەكەن. ونى اقىرىن ۇيرەنەتىن بولاسىڭ، بالام.

ايشا قازىرشە جارىق دۇنيەنى كورۋدەن ماحرۇم قالعاندىكى مە، دىبىس اتاۋلىعا وتە قىراعى. 》ءيا، اكە، ءبىلدىم《دەگەن جاعىمدى بالاڭ داۋىس كوكەيىندە قالىپ قويدى.

سوڭىنان ايشانىڭ كوزىن ەمدەۋگە ۇنەمى دارىگەر مەن بالاسى كەلەتىن بولدى. دارىگەر بەينە لەكسيا سويلەگەندەي ەمدەۋدىڭ ءار ءبىر باسقىشىن بالاسىنا وتە زەر سالا تۇسىندىرەتىن. اكەسىنىڭ قاسىندا تۇرعان جاس جىگىتتىڭ جانارى مەن ويى وعان ۇنەمى قادالاتىندىعىن سەزگەندە ايشانىڭ بويىندا توسىن بۇلقىنىس پايدا بولاتىن ەدى. ءوزى كورمەسە دە داۋىسىن ەستىپ الدە ءبىر جىلى سەزىم كەۋدەسىن كەرنەپ بارادى. كوزى قازىر بۇرىنعىداي قىشىپ ءىسىپ اۋىرعاندى قويدى. ادامنىڭ سۇلباسىن كورەتىندەي دارەجەگە دە جەتتى. ۇنەمى كوزىن جۇمىپ ولاردىڭ سوزىنە اسىرەسە بوز جىگىتتىڭ اسا ءبىر سالماقتى دا بايسالدى داۋىسپەن اكەسىنىڭ ءار ءسوزىن ءمۇلت جىبەرمەي تىڭدايتىن ساليقالى بەينەسىنە بارىنشا نازار سالىپ، قىز جۇرەگىندە ءجۇزىن انىق كورمەگەن وسى ءبىر بەيتانىس جانعا دەگەن بەلگىسىز قۇشتارلىق پايدا بولعان سياقتى. بۇرىن اۋىلداعى بوي تۇزەگەن بوز بالالار قالاي جاقىنداسادا ەش ەلەڭ ەتپەيتىن ايشانىڭ كوڭىلىنە ايات اتتى وسى جىگىت الدە ءبىر شوق تاستاپ جىبەرگەندەي ەدى.

ايشانىڭ جانارى كۇنىنەن كۇنگە ساۋىعىپ كەلەدى. كوزىن اشىپ ۇزاق وتىرۋعا شىدامايتىنى بولماسا ءۇيدىڭ ىشىندە جان-جاعىنا قاراپ اياۋلى اناسىنىڭ قۋانىشتان نۇرعا تولى ءجۇزىن كورىپ ايشا ۇزاقتان بەرى كەۋدەسىنە تۇسكەن سالماقتان ارىلعانداي بولسادا ، بەلگىسىز ءبىر بەيمازا وي جۇرەگىنە ۇيا سالىپ ۇلگىرگەندەي ەدى. كۇندە دارگەردىڭ كەلۋىن كۇتەدى. ۋاقىتىندا كەلمەسە سۇرايتىن بولدى. نەگە تاقاتسىزدانىپ توساتىندىعىن ءوزى دە بىلمەيدى. ول بۇگىن تۇڭعىش رەت اياتتى انىق كوردى. قويۋ قارا شاشتارى ماڭدايىنا توگىلگەن، قاپ-قارا قاستارىنىڭ اراسىنداعى ۇياڭ جانارى ونىڭ جۇمساق دا يبالى جان ەكەندىگىن اڭعارتىپ تۇرعانداي. ءتۇرتباق ەرنى قىر مۇرىنىنا حۇپ جاراسىپ تۇر. ايشا كورگەن ەركەك اتاۋلىداي قاتاڭ مىنەزدى، قاتقىل ءوڭدى دە ەمەس سياقتى. جالپى تۇلعاسىنان قىزعا بەرگىسىز ءبيازىلىق اڭعارادى. ايشا جانارىنىڭ شىراداي جانىپ، ادا-كۇدە ساۋىعىپ كەتۋىن قانشاما ارماندادى دەسەڭىزشى! سوندا ول اياتتى كۇندە انىق كورەر ەدى -عوي.

-ەركەم-اي دانەكەرسىڭ ا-ا-ا-اي ايناداعى،

شاشاقسىڭ جالاۋلاتقان نايزداعى ا-ا-اي.

جاراتقان اقبوز اتتاي ا-ا-اي سىلاڭ قاعىپ،

بەيۋاقىت سەيىلگە شىق جايناداعى-اي. . .

ا-ا-اي، ا-ا-، اي القوڭىرداي،

ءان سالساڭ ەي بوزبالا سال وسىلا-ا-ا-اي.

سەگىز سەرىنىڭ القوڭىر ءانى ارايلاپ اتقان اق تاڭمەن بىرگە ايشانىڭ ءتاتتى ۇيقىسىن دا بۇزىپ جىبەردى. قوڭىراۋلاعان قوڭىر ءۇن ءاننىڭ جوعارى نوتالارىنا كەلگەندە تاۋ بۇلاعىنداي تاپ-تازا سارىنمەن كوك اسپانعا كوتەرىلگەن قىراننىڭ قاناتىنداي اسقاقتىق سيلايدى جانىڭا.

ءيا، ايشا اياتتىڭ داۋىسىن بىردەن تانىدى. جايشىلىقتا موپ-موماقان قالپى اكەسىنىڭ ءار ءبىر ءسوزىن قالت جىبەرمەي تىڭداپ عانا وتىراتىن ، اندا-مۇندا كوزىنىڭ استىمەن ايشاعا ۇرلانا قاراعانى بولماسا جانارىن ەشقاشان تىكە قاداپ كورمەگەن ۇياڭ جىگىتتەن مىناداي وت سەزىمدى ءان شىعاتىندىعىن ايشا ويلاپ كورمەگەن ەدى.

ايشانىڭ جانارى دەرلىك ساۋىقتى. اناسىنا ايشانىڭ دەرتتەن ايىققاندىعى قانشاما زور قۋانىش بولدى دەسەڭىزشى! جاڭا اۋىلدا جاڭادان تانىسقان كورشى -قولاڭداردى قۋانىشتى دامگە شاقىردى. از-كەمنەن سوڭ، ايشا ۇيدەگى اپا-اجەلەردىڭ قىزۋ اڭگىمەسىنەن سىتىلىپ شىقتى. كوپتەپ ۇزاققا شىقپاعان ايشا دالا تابيعاتىن ساعىنىپ قالعان ەدى. دارىگەردىڭ ۇيىنەن الدە كىم شىعىپ قالارداي جالتاڭداپ قاراپ قويادى. كۇن ۇياسىنا تاياعان الاكەۋىم شاقتا اۋىلدىڭ باس جاعىنداعى قامىس اراسىندا شىمىر-شىمىر اققان اق وزەننىڭ جانىنا كەلىپ جايعاستى. وزەن ىشىنەن اندا-ساندا كورىنىپ قالاتىن كوگىلدىر تاستاردى ەركەلەي قۇشىپ جاتقان كوكجال تولقىندارعا ، تولقىننان شاشىراعانءمار-ءمار مونشاقتارعا قاراعان سايىن ايشانىڭ سارايى اشىلىپ قالدى.

سۋعا قاراپ جاۋدىراپ وتىرعان ايشا كەنەت سىبدىردان باسىن جۇلىپ الدى.

-كوزىڭ قانداي؟ ءالى اۋىراما؟

-كوپ تاۋىرلەنىپ قالدى.

ايات اقىرىن عانا ايشانىڭ قاسىنداعى اقتاسقا وتىردى.

بىرنەشە ايدان بەرگى ناۋقاس پەن ەمشى اراسىندا سان رەت قايتالانعان جايشىلىقتى سوزدەر بۇل جولى ايشاعا باسقاشا اسەر بەردى. اياتتىڭ ءۇن-بويىنان تاراعان بەلگىسىز ءبىر كۇش ونى قاراداي قىسىپ بارا جاتقانداي ەدى. ايشا قوس ءجۇزى الاۋراپ اق كويلەگىنىڭ ەتەگىن ماقساتسىز قايتا-قايتا جۇمارلاي بەردى. اياتقا ۇرلانا قاراپ تا قويادى. ۇياسىنا باتىپ بارا جاتقان كۇننىڭ القىزىل شاپاعى اياتتىڭ قارا شاشتارىنا باسقاشا رەڭ بەرىپ، بۇكىل بەت الپەتىن تۇتاس نۇرلاندىرىپ جىبەرگەندەي ەدى. قايتا قاراعان ايشانىڭ جانارى وعان قيىلا قاراعان اياتتىڭ كوزقيىعىمەن ءتۇيىلىسىپ قالدى. ەكەۋىنىڭ دە بەتى دۋ ەتكەندەي. ايشانىڭ ءۇن -بويىن ارالاعان ىستىق اعىن جان-دۇنيەسىن تەڭسەلتىپ بارادى.

-ءاندى تاماشا ايتادى ەكەنسىز. - اۋزىنان بۇل ءسوزدىڭ قالاي شىققاندىعىن ءوزى دە اڭعارماي قالدى ايشا.

-ە، انشەيىن ايتقان عوي، -اياتتىڭ داۋىسىندا ءدىرىل پاپدا بولا باستاعان ەدى.

ايشا مەن اياتتىڭ العاشقى كەزدەسۋى وسىلاي باستالدى. ءتاتتى سىرلار تابىسىپ ، ەسىل قۇشاقتار ەمىرەنىسىپ كەتكەن تەڭدەسسىز اسەرلى مينوتتار ايشا مەن ايات سەرۋەندەيتىن اق وزەننىڭ بويىندا ولمەس ەلەس، وشپەس ءىز بولىپ قالدى.

-سەن مەنىڭ جانارىمىسىڭ ، جانارىما نۇر قۇيعان پانارىمسىڭ-دەيتىن ايشا اياتتىڭ قۇشاعىندا ەركەلەپ.

- ال سەن مەنىڭ الاۋلاعان اق گۇلىمسىڭ، ءتاڭىر تاۋىنىڭ ەتەگىنەن اۋىلىما ۇشىپ كەلگەن اققۋىمسىڭ، -دەيتىن ايات ونى قۇشاعىنا قاتتى قىسىپ.


ايشا اۋىرۋىنان ايىققان سوڭ اناسى اۋىلعا قايتۋعا اسىقتى. ارتتاعى اكەسىنە حابار بەرىپ، وزدەرىن الىپ قايتۋدى تاپسىرىپ جاتىر. لاپىلداپ جانعان العاشقى ماحابباتىنىڭ الىستا قالارىن ايشا شىنىندا ويلاپ تا كورمەپتى عوي. ءوزىنىڭ اۋىلى الىستا ، بۇل جەرگە كەلگەن مەزەتتىك قوناق ەكەندىگىن ، ايتەۋ ءبىر كۇنى بۇل ارادان اتتاناتىندىعىن اناسى كەتۋگە قامدانا باستاعاندا عانا سەزىنىپ ەسى شىعىپ وتىر.

ايشا كەشكىسىن اياتپەن كەزىگىپ ونىڭ وتتى قۇشاعىندا قىستىعىپ جىلاپ تا الدى.

- نە ىستەيمىز، جانىم، ەندى كۇندە كەزىگۋ قايدا؟ سەنى قيا الماي قينالىپ تۇرعانىم-دەدى ءدىرىل قاققان ايشا.

-مەن دە ، قايتەمىز. مۇمكىن بولسا مەن سەنى ىزدەپ بارارمىن.

ايشا اياتتىڭ ءدۇدامال جاۋابىنا بۇرتيپ قالدى.

-قويشى، ايات. ءتىپتى مۇمكىن بولساڭ نە ايتىپ تۇرعان. ءسوزسىز ىزدەپ بارام، سودان سەنى كەلىنشەك قىلىپ ۇزاتىپ الىپ كەلەم دەسەڭشى؟، -ايشا كەلىنشەك دەپ ايتقان ءوزىنىڭ توسىن ەرلىگىنە ۇيالىپ تا قالدى.

-كەلىنشەك، كەلىنشەك، مەنىڭ كەلىنشەگىم، -دەپ ايات سىقىلىقتاپ كۇلىپ ايشانى باس سالىپ قۇشاعىنا باستى دا الما جۇزىنەن وت دەمدەرىمەن ورتەي ءوپتى.

اق وزەننىڭ بويىندا وبىسكەن قوس عاشىق وسىلايشا الداعى سارپالداڭ ساعىنىشتىڭ دەرتىن سەزىنىپ، اۋىر ويمەن قيماستىق پەن قوشتاسۋدىڭ قيىن شاقتارىن وتكىزدى.

اناسىمەن بىرگە اكەسى مەن اعالارىنىڭ جانىنا قايتىپ، اتقان كۇننىڭ ارايىمەن باتقان كۇننىڭ شاپاعىمەن بىرگە اياتتى كۇنى-ءتۇنى قيالداپ، سارپالداڭ ساعىنىشقا باتقان ايشانىڭ اۋىلىنا كورشى اۋىلدان اكەسىنىڭ بەل قۇرداس دوسى سارسەن باي كەلدى. سارسەن اتى الىس-جاقىنعا جايىلعان اۋقاتتى وتباسىنىڭ يەسى ەدى. قاسىندا بىرنەشە ساپارلاستارى بار. اكەسى ولاردى اقسارباس سويىپ قارسى الدى. اۋىلداعى ءانشى-كۇيشىلەردى جيىپ ، قىزىق دۋمان قۇرىپ، ءبىر جاعىنان قىزى ايشانىڭ اۋىرۋدان ادا-كۇدە ايىققاندىعىنا ءماز بولعان اكە كوڭىلى شاتتىققا شومعان ەدى.

ءوز ويىمەن ءوزى ارپالىسىپ جۇرگەن ايشاعا بۇلار قىزىق ەمەس ەدى.

جاز شىعا اۋىلىڭا ىزدەپ كەلەم، -دەگەن اياتتىڭ سەنىمدى سەرتى ونى ساعات شىقىلىمەن الىستىراتىن. اۋىلداعى قۇربىلاس قىزدارى شاقىرسادا بارۋعا زاۋقى سوقپاي، كىشى جەڭگەسىنىڭ وتاۋىندا جالعىز ءۇزى مەلشيىپ وتىراتىندى تاپقان. قوناقتار اتتانىپ ، بىرنەشە كۇننەن كەيىن اناسى ونى اۋاشا شاقىردى، سوسىن ءبىر اڭگىمەنىڭ شەتىن شىعاردى.

-قاراعىم ، ايشا، ساعان ءبىر جايدى ايتقىم كەلىپ وتىر. جاقىندا كەلىپ كەتكەن سارسەن دەگەن كىسى اكەڭنىڭ كىشكەنتايىنان بىرگە وسكەن دوسى، ونى ءوزىڭ دە جاقسى بىلەسىڭ-عوي. ەكەۋى بال جالاسقان سىرلاستار. سەن شىر ەتىپ دۇنيەگە كەلگەندە ونىڭ دا اسقار اتتى ۇلى ومىرگە كەلدى. ول ءۇش قىزدىڭ ىشىندە ءبىر ۇل بولدى عوي. سارسەننىڭ موينىنا بۇرشاق اسىپ تىلەپ العان جالعىز مۇراگەرى. شاڭىراعىنىڭ بىردەن-ءبىر جالعاسى. ال سەنى مەن ءۇش اعاڭ تۋىلعاننان كەيىن ۇكىلەگەن سۇيكىمدى قىزىم بولسا دەپ قانشا ارماندادىم ونى وسى وتىرعان جۇرت جاقسى بىلەدى. اسقار الدىمەن تۋىلدى. سارسەننىڭ ۇلدى بولعان قۋانىشىن قۇتتىقتاپ اكەڭ ەكەۋىمىز بارعان ساپارىمىزدا مەن كەنەت تولعاتىپ، سول سارسەننىڭ وتباسىندا سەنى دۇنيەگە اكەلدىم. سول كەزدە اكەڭ مەن سارسەن كوپتەن كۇتكەن ارماندارىنىڭ ورىندالعاندىعىنا ەسى شىعا قۋانعان ەدى. سول قۋانىشتىڭ جالعاسى بەسىك قۇدا بەل قۇدا دەگەن اتا سالىتقا ويىسىپ، ەسەيگەندە ايشا مەن اسقاردى قوسىپ، ەكى شاڭىراقتىڭ دوستىق تاتۋلاستىعىن ونان ارى جالعاستىرايىق، -دەگەن الىس-جاقىن اعايىن كۋا بولعان اتالى ۋادەگە ۇلاستى. ەندى مىنە ۇل ەسەيىپ، قىز بوي تۇزەدى. ءوزىڭ دە اللانىڭ قۋاتىمەن توسىن دەرتتەن ايىعىپ امان-ەسەن ورالىپ وتىرسىڭ. سەنىڭ جانارىڭ كورمەي قالاما دەپ زار شەگىپ زاپىران قۇسقان كۇندەردە سارسەن ايەلى ەكەۋى دە بەت بۇرىپ كەتپەي ، كۇن ارالاتىپ وتباسىمىزعا باس سۇعىپ، قايتا-قايتا كەلىپ جۇباتۋ ايتىپ بىزبەن بىرگە تىلەۋلەستىگىن بىلدىردى. مىنە ەندى ۋادەلى سەرتىمىزدى ورىنداپ، جاستاردىڭ باسىنا شاڭىراق كوتەرسەك، ايشا كەلىنىمدى الىپ، وڭ جاعىمدى قىزارتسام ، -دەپ سارسەن ءسوز سالىپ كەلىپ قايتتى. اكەڭ ەكەۋىمىز اقىلداسىپ، مۇنى دا ءجۇن كوردىك. ۇلدى ۇياعا قىزدى قياعا قوندىرۋ اتا سالتى عوي. مەنىڭ ەركىمە سالسا سەنى ماڭگى قاسىمدا كوز نۇرىم بولىپ جۇرە بەرسە دەپ ويلايمىن. كىم اياۋلى قىزىن جات جۇرتتىققا قيادى دەيسىڭ. امال قانشا، قىزشاڭىراققا تۇسكەن قوناق دەگەن ماقالدىڭ ءمانىن ەندى ناعىز سەزىنىپ وتىرمىن. قارعام.

اناسى ءسوزىنىڭ ارتىن كوز جاسپەن اياقتاتتى.

ايشا دا ءۇن جوق. كيگىز ءۇيدىڭ شاڭىراعى تەڭسەلىپ بارادى.

- نە بولىپ كەتتى؟ ءبىر دەرتتەن قۇتىلىپ تاعى ءبىر ەشكىمگە ايتا الماس، ەشكىم دە تۇسىنبەس قايعىعا شالدىقتىرعانىڭبا؟ ايات ەكەۋىمىزدىڭ ءىسىمىزدى اناما نەگە ەرتەرەك ايتپادىم ەكەن. اياتتىڭ اۋىلىنا قالايشا ەم ىزدەپ بارىپ قالدىم، اراداعى سەزىمدى ۇلكەندەرگە اشىق بىلدىرمەستەن اسىعىس كەرى قايتتىم ؟ جانارىم جازىلعانمەن، جانىم جابىعىپ قايتتى ەمەسپە. ءيا، ماحاببات قىزىعى مەن شىجىعى، ازابى مەن مازاعى قاتار دۇنيە دەشى. مەنى تاعدىر بىردە ايالى جاناردان ، بىردە اياۋلى ادامنان ايىرۋدى ادەتكە اينالدىرعان سياقتى. . . . ەھ، دۇنيە. . . . .

ايشانىڭ ويى الەم-تاپىرىق. ءتاتتى ارمانىنىڭ تارامىسىنا ءىلىنىپ ، سوناۋ اسقاق شىڭنان اق بۋىرىل شاتقالعا قۇلاپ بارا جاتقانداي كۇي كەشتى. تۇنىمەن مازاسىز ودان ارىلا الماي تاڭ اتا تالىقىسپ كەتكەن ايشانىڭ تۇسىنە ايات كىردى.

ايات ەكەۋى جاسىل جايلاۋدا ارعىماقتارىن ويناتىپ، جەبەدەي زۋلاپ بارا جاتىر ەكەن. ەكەۋى جەر جاڭعىرتا شاتتانادى. ولاردىڭ كۇلكىسىنەن اناۋ كوك ورمان كۇڭگىرلەپ، اق وزەن شالقىپ ارناسىنان اسىپ جاتقانداي. كەنەت اسپاننان ءبىر الىپ قۇس قۇيعىتىپ كەلىپ ايشانى ءىلىپ الا جونەلەدى. ال ايات وعان قاراپ اڭىرىپ قالعان. ايشا كوك ءجۇزىن ءتىلىپ شالقاقتاي ۇشقان قۇستىڭ تەگەۋرىندى تۇياقتارىنا شىداماي بۇلقىنا ىشقىنىپ، -ايات، ايات، مەنى الىپ كەت ، قۇتقار، ايا-ا-ا-ات، -دەپ ايعاي سالادى. ال ايات جۇگىرگەن دە، ايعايلاعان دا، قۋعان دا جوق. ءبىر ءسات اڭىرىپ قاراپ الىپ اتىن ارتىنا بۇرىن كەتىپ بارادى. ايشا ءوز كوزىنە ءوزى سەنەر ەمەس. اياتتىڭ توسىن قىلىعى ونى ەسەڭگىرەتىپ جىبەردى.

-ايات-اۋ، ، ، ايات، قايدا كەتىپ باراسىڭ؟ مەنى قۇس اۋزىنان قۇتقارساڭشى.

ايشانىڭ ايات دەگەن اشتى داۋىسىنان اناسى ويانىپ كەتتى.

-قارعام ، نە بولدى، ءتۇس كورىپ جاتسىڭبا؟ ويانساڭشى. ايشا، وۋ، ايشا. . .

ايشا اناسىنىڭ شاقىرۋىمەن ويانىپ كەتتى. اناسى ونىڭ جۇزىنە ءبىر ءتۇرلى كۇدىكپەن قاراپ وتىر ەكەن. ايشا باسىن تومەن سالىپ، ارى قاراي اۋناپ ءتۇستى.

ايشادا تاعات جوق. نە بولسادا، اياتقا بۇل جاعدايدى جەتكىزۋىم كەرەك، -دەگەن وي ونى تىنىش تاپتىرار ەمەس. كورشى اۋىلدا اياتتىڭ جاماعايىن تۋىسى بەرىك اقساقالدىڭ اياتپەن داڭ قۇرداس ۇلى بار ەكەندىگىن بىلۋشى ەدى. ايشا ەشتەڭە قاراماستان سوعان باردى، باردى دا اياتقا جازعان حاتىن تابىستاپ ، تەزىرەك جاۋاپ الىپ كەلۋدى قيىلا ءوتىندى.

سودان بەرى ءبىر جەتى ءوتتى. ءبىر كۇنى عايىپتان كەلگەندەي ايات پايدا بولدى ايشانىڭ كوز الدىنا. ايلى كەشتە اۋىل سىرتىندا اقبوز اتىن جەتەكتەپ تۇر بويىنان نۇر توگىلىپ. ايشانىڭ قۋانىشىندا شەك جوق. جىلاپ تا جىبەردى.

-سەن سول بەتى حابارسىز كەتەمە دەپ قورىقتىم.

-قويشى ساۋلەم، قاي-قايداعىنى ويلاماي. سەنىڭ حابارىڭدى ەستىپ تىزگىن ۇشىمەن جەتكەنىم وسى.

-ەندى نە ىستەيمىز؟ جانىم، اتا-انام مەنى باسقا بىرەۋگە ۇزاتپاقشى. بەسىك قۇدا دەيدى. ال ەكەۋىمىزدىڭ كۇيىمىز نە بولادى؟

قوس عاشىق ءبىر-بىرىنە ايىرىلا المايتىندىعىن جاندارى سەزەدى. ايشانىڭ اتا-اناسى قوسىلمايتىندىعى ايدان انىق. اتا سالت، بەرىلگەن سەرت، ايتىلعان انت ەل اراسىندا بەت-بەدەلى بار، ءبىر سوزىن ەكى قايتالامايتىن قاتال اكەنى جاستاردىڭ ەركىنە جۇگىندىرۋگە ىرىق بەرمەيدى. ال اناسى دا جالعىز قىزىنىڭ كوزدەن تاسا بولىپ سوناۋ الىسقا بارۋىن قالامايتىندىعى مۇندا تۇر. ەندىگى بەكىم تەك عانا بەتتىڭ ارىن بەلبەۋگە ءتۇيىپ، قول ۇستاسىپ بىرگە كەتۋ. ەندى ەكى ايدان سوڭ جادىراعان جازدىڭ جايماشۋاق كەزەڭى باستالادى. تابيعات انا كۇللى جان بالاسىنا قوڭىراۋ كەشىن، ارايلى تاڭىن، جىلىمىق جەلىن سيلايتىن تاماشا كەزەڭنىڭ ايلى كەشىن تاڭداپ عاشىقتار زايساننان ارى سۇلتۇستىكتەگى ۇلان -بايتاق وڭىرگە بەت تۇزەمەكشى. زور ءۇمىت ، ءتاتتى سەنىم ارقالاتىپ ايات اۋىلىنا قايتتى.

ساعىنىشتى ساتتەر سانانى جەڭىپ، اقىلدى اداستىرىپ بارا جاتقان ءبىر كۇنى ۋادەلى مەرىزىم دە كەلىپ جەتتى. ايشا اتا-اناسىن ، تۋعان جەرىن قيا الماي قينالىپ بارادى. ءوزىنىڭ بۇل قىلىعى دۇرىس پا بۇرىس پا ، ونى سارالايتىن شاما دا جوق سياقتى. كەۋدەسىن تەپكىلەپ، جۇرەگىن جۇلقىلاعان سول اساۋ سەزىم اياتقا اسىقتىرا بەرەدى. ايلى كەشتە شىىرت ۇيقىدا جاتقان اناسىنىڭ كەۋدەسىنە باسىن قويىپ ، ومىراۋىنا تۇمسىعىن تىعىپ، 《كەشىرشى ، مەنى انا جان》 -دەپ ىشتەي كۇبىرلەپ از -كەم جاتتى دا شيراقى كيىنىپ، كازەكەيىن جامىلىپ اۋىلدىڭ تومەن بەتكەيىندەگى ورماندى شاتقالدىڭ قۋىسىنداعى ۋادەلى جەرگە كەلىپ جەتتى. اي تاكاپپار بەينەمەن شالقايىپ قارايدى. جۇلدىزدى اسپاننان ساعىمدانا جەتكەن اق جولاق نۇرلار ءتۇن ءىمىرتىنا ءسىڭىپ سۋالىپ بارادى. ىلبىستەي ءتونىپ كەلە جاتقان تۇننىڭ الاكەۋىم قاراڭعىلىعى ايشانىڭ جۇرەگىنە قورقىنىشتىڭ لەبىن العاش رەت سەزدىردى. ءيا، ايلى كەش بولسادا الدە ءبىر قاراڭعى كۇش ايشانىڭ تۇنشىقتىرىپ بارادى. ۇزىننان ۇزاققا سوزىلعان كۇتۋ. . . . ايشا كۇتە-كۇتە كۇدەرى ۇزىلىپ بارادى. . .

اي اسقار تاۋعا قاراي اۋناپ، تاڭ راۋانى كوتەرىلدى. ساسكە جاقىن ايشانى الاسۇرىپ ىزدەگەن اعالارى ورمان شاتقالىنىڭ ءبىر قۋىسىندا وتىرعان ورنىندا قاتقان قازىقتاي سىرەسكەن بەتى تاۋىپ الدى. ايى قۇلاعان سەنىم مەن جۇلدىزى سونگەن سەزىم اراسىندا جان دۇنيەسىنە جاسىن تۇسكەندەي ەسەڭگىرەگەن جاس قىز توسەك تارتىپ جاتىپ قالدى. سوندا دا قۇر سۇلدەرىن سۇيرەتىپ ون نەشە كۇن بويى ۋادەلەسكەن جەردە عاشىعىن كۇتۋدى ادەتىنە اينالدىرعان. اناسى ايشانىڭ حالىن مونشاقتاي توگىلگەن كوز جاسى مەن اق شۇپەرەكتەي قۋارىپ كەتكەن وڭىنەن ءبىلدى. اكەسىنەن جاسىرىپ ونىمەن بىرلىكتە باراتىن بايقۇس انا. قىزىنىڭ سەتىنەگەن سەزىمگە الدانعاندىعىن جورىعان انا ايتەۋ كەلمەيتىن جانعا كۇدەرى ءۇزىلىپ كوڭىلى ءبىر جولاتا قالسىن دەپ ايلى كەشتە بىرگە كۇتۋشى ەدى. سونىمەن كۇرسىنگەن كۇندەر ، اھلاعان تۇندەر ءوتتى. جازدىڭ شىلىڭگىر ىستىعىمەن قوسىلعان وكىنىشتىڭ ءورتى قىز جانىن قۋىرىپ بىتكەن. سۇركەي جەلى سەزىمىڭدى سۋىندىرىپ، تىنىسىڭدى بۋىندىراتىن كۇڭىرەنگەن كۇز اۋناپ، ازىناعان ايازى جانىڭدى قارىعان قاھارلى قىستا اكە شەشىمى بويىنشا ايشا اتاستىرىلعان جەرىنە ۇزاتىلدى. ەندى كىمگە جار بولۋ، كىممەن ءومىر وتكىزۋ ول ءۇشىن ءبارىبىر ەدى. ايات ونىڭ كۇللى تىرلىككە دەگەن كۇيىنىشىن كۇيرەتىپ، سۇيىسپەنشىلىگىن سۋىتىپ كەتكەن بولاتىن. اياتتىڭ بۇل توسىن قىلىعى ايشانى سان قيالعا سالاتىن. نەگە، نەلىكتەن، ۋادەلى ۋاقىتتا كەلە المادى؟ الدە ءبىر نارسەگە ۇشىرادى ما؟ الدە مەنىڭ جالىنداعان سەزىمى ءوشىپ ، باسىنا كەلەر قاتەر مەن حاۋىپتى جەڭۋگە باتىلى جەتپەدى مە؟ ايتەۋ ءبىر جۇمباق ايشانىڭ جانىن جەگىدەي جەسەدە ، بوگدە بوساعاعا ءتان نازىك تاعدىرى، اينىماس اتا سالتى، اناسىنىڭ ءوتىنىشى، اكەسىنىڭ قاتال بۇيرىعى مەن اعالارىنىڭ بەت-بەدەلىن ويلاعان ايشا ا باسىنا اق ساۋكەلەسىن امالسىز كيدى. سالتاناتتى تويدىڭ كەشىندە ، جەڭگەسىنىڭ ۇيىندە قۇربىلارىن دا قاسىنا جولاتپاي ءۇزى جالعىز وتىر. كەنەت كىشى جەڭگەسى جان-جاعىنا قاراي اقىرىن يمەنە ۇيگە كىردى دە، شۇپەرەككە تۇيىلگەن ءبىر نارسەنى ايشانىڭ قولىنا ۇستاتىپ تۇرىپ، -ەركەم مىنا حاتتى بىرنەشە كۇننىڭ الدىندا كورشى اۋىلدىڭ ءبىر جىگىتى ساعان بەر دەپ ۇستاتىپ كەتىپ ەدى، سەن ۇزاتىلاردا توسىن جاعداي تۋىلاما دەپ ساعان ۋاعىندا بەرۋدەن جۇرەكسىنگەن ەدىم، بىراق السىقا كەتىپ باراسىڭ، قالايدا اماناتىڭدى قولىڭا تاپسىرعانىم ءجۇن سياقتى، ايتەۋ نە بولسادا، ءوزىڭدى مىقتى ۇستا قالقام، ۇزاتىلار شاڭىراعىڭ جامان جەر ەمەس، تەكتى اتانىڭ اۋلەتتەرى. بولاشاق كۇيەۋىڭ اسقار دا ءبىلىمدى يناباتتى ازامات دەيدى، باقىتتى بولارسىڭ، ەركەم -دەدى دە شىعىپ كەتتى.

ايشا حاتتى اسىعا اشتى. جۇرەگىندە الدە ءبىر ءۇمىت ساۋلەسى جارىق ەتىپ جانىپ، كەۋدەسىن كۇيدىرىپ بارادى. قازىر -اق الدىندا اياۋلى جانى ايات پايدا بولاتىنداي، جۇرەك جاردى قۋانىشتان باسىنداعى ساۋكەلەسىن جۇلىپ تاستاپ، سۇيگەنىمەن قول ۇستاسىپ ، ارماننىڭ اق جولىندا سامعاپ بارادى جان الەمى.

ارمسىڭ ساۋلەم ، وتىرسام -تۇرسام ويىمنان كەتپەيتىن مەنىڭ جان شىراعىم ايشا، -حات سونشاما سالماقتى باستالعان، ايشا ەمىرەنىپ ەلجىرەگەننىڭ ورنىنا وسى ءبىر سۇلۋ سوزدە سۇمدىق جاسىرىنعانداي سەلت ەتتى، -مەنى كەشىرەرسىڭ، بالكىم تاعدىردىڭ تالكەگى بولار دەپ تە ويلايمىن. اۋىلىڭنان قايتقاننان كەيىن اكەمە ەكەۋىمىزدىڭ جاعدايىمدى، سەنى الىپ قاشۋعا بەكىگەنىمدى ايتتىم. اكەم ەستىگەن جەردەن ماعان تىلەۋلەستىك بەرمەدى. اكە-شەشەسىنىڭ بەتىن جەرگە قاراتىپ اتاستىرعان جەرى بار قىزدى قالاي الىپ كەتپەكسىڭ؟ادامگەرشىلىككە جات عوي بالام. ال سەن اۋلەتىمىزدىڭ ەمشىلىك ونەرىنە بىردەن-ءبىر مۇراگەرسىڭ. مەن دە قارتايامىن. ال اتا ونەردى جالعاستىراتىن سەنسىڭ. سەنى ورىس جەرىنە بارىپ ، جالعاستى ءبىلىم اسىرىپ، اجال اۋزىنداعى جانداردى ولىمنەن اراشالاپ، قينالعان جاندارعا مەدەت بولاتىن ۇلكەن ءبىلىم يەسى بولسىن دەپ ويلايمىن. سەنى جاقسى تاربيەلەپ، ۇلكەن دارىگەر ەتىپ شىعارۋدى اتاڭ كوز جۇماردا ماعان ەرەكشە تاپسىرعان ەدى. -دەپ اكەم كوپ ءىستى كولدەنەڭ تارتىپ، اشۋمەن باستاعان ءسوزىن اقىلمەن اياقتاتتى. سوندا دا ساعان دەگەن الىپ-ۇشقان جۇرەك مەنى العان بەتتەن قايتارمادى. ەكەۋىمىز ۋادەلەسكەن كۇنى اكەمنىڭ رۇحساتىنسىز تاس-ءتۇيىن دايىندالىپ جولعا شىقتىم. ساعان دەگەن ساعىنىش مەنى ەش بايىز تاپتىرعان جوق. شەگاراعا كەلگەنىمدە جىل بويى مالشىلاردىڭ ارى-بەرى وتۋىنە جول قويىپ اشىق تۇراتىن شەگارا قاقپاسىنا كۇزەت قويىلعاندىعىن بايقادىم. ءوتىپ كەتۋگە كۇزەتشى جول بەرمەدى. ولارعا قانشا جالىنسامدا شەگارا قاقپاسىن اشتىرا المادىم. ەندى نەدە بولسا تاۋكەلمەن شەگارا بويلاپ قورعانسىز جەردەن ءوتۋدى ويلاپ، ەرتەسى كۇن بويى جول شارلاپ، كەشكىسىن قاراڭعى ۇيىرىلە جولعا شىقتىم. امال نە، اكە باتاسىن الماعان جولدىڭ اشىق بولمايتىنى ما الدە ماڭدايعا جازباعان جازىمىشتىڭ الەگى مە شەگارا كۇزەتىنە قولدى بولىپ، تارتىپكە قايشى كەلدى دەگەن ايىپپەن تەمىر تورعا جابىلدىم. ال مەن شىققاندا جاز كەتىپ ، كۇزدە اياقتالىپ قالعان ەدى. ساعان قۇدا ءتۇسىپ، ۇكى تاعىلىپ كەتكەندىگىن ەل اۋزىنان ەستىدىم. اكەمنىڭ رەنىشى كوڭىلمە اۋىر سالماق سالدى. ال ەندى، سول اكە تىلەگىن اقتاپ، وكپەلى كوڭىلىن سەيىلتۋ ءۇشىن ، ارينە اتا كاسىپكە مۇراگەرلىك ەتىپ، اسقاق ارماندارعا قول جەتكىزۋ ءۇشىن سوناۋ الىسقا وقۋعا اتتانعالى وتىرمىن.

مەنى كەشىر ايشا، سەنى قۇرىقتان قۇتىلدىرا المادىم. ءوزىمدى دە ازاپ تۇزاعىنان جۇلىپ الارلىق ەرلىك تە جوق بولىپ شىقتى. مەنىڭ ەز دەپ بىلەرسىڭ بالكىم، پاك ماحاببات الدىنداعى الدامشى بولىپ كورىنۋىم دە مۇمكىن. ساعان نە نەدەپ تۇسىندىرەرمىن ايشا بۇل حالىمدى. بالكىم تەمىر توردا سول ەكى-ءۇش اي مەنىڭ ماحابباتقا دەگەن جىگەرىمدى مۇقالتىپ جىبەرگەن دە بولار. سەن ايتۋشى ەدىڭ، قىزداي نازىك ءبىر تۇلعاڭ بار دەپ. سوندا وزىمشە ىشتەي مويىنداماي نامىستاناشا قالۋشى ەدىم. مىنە قازىر سونى مويىندايمىن. ماگماداي اتىلعان ماحاببات وتى جانىمدى قانشا ورتەپ بارا جاتسادا، اقىل-ويىمدى اتا سالتقا دەگەن قۇرمەتكە، اكەگە دەگەن يمەنىسكە، بىلىمگە دەگەن تالپىنىسقا جەڭدىردىم دەسەم سەنەرمە ەدىڭ؟ مەنى ءالى كىنالار ما ەدىڭ؟

وسى ءبىر جازىمىشتىڭ جاراسى ءسات سايىن جانىما باتىپ اۋىرتادى. سان قىرىمەن سارپالداڭ ەتەتىن تاعدىردىڭ تار قىسپاعىنان وتە الماعان، اينىماس سەرتىنە جەتە الماعان مەن بەيباقتى كەشىرەرسىڭ. مەنىڭ مىناۋ جۇدىرىقتاي جۇرەگىمدە ماڭگىلىككە وشپەي جاسايسىڭ، قالقام. قايدا جۇرسەمدە سەنىڭ باقتىڭدى تىلەۋمەن كۇن كەشەرمىن. اسقاردى دا جاقسى ازامات دەپ ەستدىم. كوڭىلىم كەڭىپ، جۇرەگىم ازدا بولسا اداسقان ورنىنا قايتقانداي بولدى. بارعان جەردە باعىڭ جانسىن جانىم. كەشىرشى مەنى. سەنى ماڭگى ساعىنپ سۇيەتىن ايات.


******


شىر ەتكەن تەلەفون داۋىسى كوكجال تولقىنى جاعانى سوققىلاپ، كوگىلدىر مونشاقتارى كوككە شاشىراپ، اققۋى قيقۋلاپ ساعىنىش سازىن شەرتىپ، شاعالاسى شاڭقىلداپ مۇڭ شاققان قيال تەڭىزىمدى تاس لاقتىرعانداي ءبولىپ جىبەردى.

ترۋپكادا ءبىر قوڭىر داۋىس.

-سالەمەتسىز، مونشاقتى ىزدەۋشى ەدىم.

-ءيا، قاراعىم كۇتە تۇر.

-مونشاق، اۋ، مونشاق. . بارسىڭبا؟

شاماسى مەن وتكەن -كەتكەنمەن ىشتەي الىسىپ وتىرعاندا سىرتقا شىعىپ كەتكەن سياقتى. بولمەسىندە جوق بولىپ شىقتى.

- قاراعىم، مونشاق جوق ەكەن.

- بولادى، اپا، كەلگەندە سالامات ىزدەيدى دەرسىز. راحىمەت سىزگە ، ساۋ بولىڭىز!

-جارايدى. قاراعىم.

مونشاق ەسىىكتەن سامپىلداپ سويلەي كىردى.

-اپا، قولفونىمدى ابايسىزدا سۋعا ءتۇسىرىپ الىپ ەدىم. بۇزىلىپ قالعان سياقتى. يقۋاتتارى تۇگەلمەي ىستەمەي قالدى. سونى جوندەتۋگە اپارىپ كەلدىم.

-ءيا ، باسە، قايدا كەتە قالدى دەسەم. جاڭا عانا سالامات دەگەن ءبىر بالا ىزدەدى عوي سەنى تەلەفوندا.

-ە، -مونشاقتىڭ ءجۇزى انتەك قىزارىپ قالعانىن بايقاپ قالدىم.

سودان بەرى تەلەفون شىر ەتسە بولدى، مونشاق بولمەسىنەن اتىلىپ شىعىپ، ترۋپكاعا قۇستاي ۇشىپ جەتەتىن.

قاسىندا تۇرسام مونشاق الدەنەدەن قىسلاتىنداي وندايدا مەن ءوز بولمەمە كىرىپ كەتەتىنمىن.

ءبىر كۇنى مونشاق ماعان جاڭادان قۇرعان ميكرو بلوك راديو ءۇنحات تەكشەسىندە قۇندى-قىزىقتى اڭگىمەلەر وقىلىپ ، تىڭدارمانداردىڭ كۇن ساناپ ارتقاندىعىن قۋانا جەتكىزدى.

-اپا ، سەن دە تىڭداپ كورشى.

تانىس داۋىس. سالامات دەگەن بالانىڭ ادەبي شىعارمانى ارىنە جەتكىزە وقىعان سازدى داۋىسى. ال ەركەلەي ءتىل قاتىپ، ولەڭ-جىردى توگىلدىرىپ وقىعان مەنىڭ مونشاعىمنىڭ نازدى داۋىسى وعان قانداي قۇپ جاراسقان.

- كەرەمەت ەكەن بالام، جارايسىڭدار. پوۋ، مەنىڭ نەمەرەم ونەرلى-اق شىركىن. مىنا سالامات دەگەن بالادا تالانتتى ەكەن. ءار تۋىندىنى ىستىق سەزىممەن، ناعىز جۇرەكپەن بەرىلە جاقسى وقىعان. وركەندەرىڭ ءوسسىن قاراقتارىم.

-اپا، سالامات مەكتەبىمىزدىڭ ادەبيەت ءتىلى فاكلتوتىندە وقيدى. ءوزى اۋەلى اڭگىمە-ولەڭ جازادى. قازاقىستاننىڭ الماتى قالاسىنان كەلگەن شەتەلدىك وقۋشى. پويەزيانى ەرەكشە مانەرمەن جەتكىزىپ وقيدى-ءا. وعان ءبارى قۇشتار. مەنەن بىرنەشە جاس ۇلكەن. ەڭ العاش مەنى ميكروفونعا جەتەلەگەن سالامات عوي، داۋىسىڭ ادەمى. ءوزارا سايكەسىپ كەرەمەت باعدارلاما جاسايمىز دەپ.

-ە، جاقسى باستاما ەكەن. وسىلاي ەڭبەكتەرىڭ جانا بەرسىن.

ءيا ، الەم قاراما-قارسىلىققا تولى- عوي. ءبىر ورايمەن قوسا ءبىر قۋانىش قۇشاعىن جايسا، ال ەندى ءبىر ىسپەن قوسا تاعى ءبىر مۇمكىندىك اياقتالىپ جاتادى. ۆەنيۆەرسيتەتتىڭ ەكىنشى جىلى اياقتالىسمەن، مەكتەپتىڭ شەتەلگە وقۋشى ايىرباستاپ ءبىلىم تولىقتاۋ باعدارلاماسى بويىنشا مونشاقتى امەريكاعا شىعارىپ وقىتۋ ۇلىم مەن كەلىنىمنىڭ ارمانى ەدى. قولعا العان ءار ىسىنە مۇقيات مامىلەدە بولىپ، ەجەلدەن وقۋىن ۇزدىك وقيتىن مونشاق ءوز ماماندىعى اعىلشىن ءتىلىن دە مىقتاپ يگەرگەن بولاتىن. ناتيجەسى ماۋسىم سايىن كىلاس بويىنشا اعالاپ العا شىعاتىندىقتان ارينە مەكتەپ ورايدى الدىمەن مونشاققا بەردى.

مونشاقتىڭ جۇزىنەن ەندى قۋانىش پەن شاتتىقتىڭ لەبىن سەزە المايتىن بولدىم. باياعى بال-بۇل بەينەسىنىڭ ورنىن بەلگىسز ۇنسىزدىك يەلەگەن.

-قارعام، ءبىر جەرىڭ اۋىراما، جاقىننان بەرى كۇلكىڭ ازايىپ بارادى عوي، -مەن نەمەرەمنىڭ باسىن سيپاپ وتىرىپ مەيىرلەنە ءتىل قاتتىم.

-جوعا، اپا ، انشەيىن شەتەلگە شىعاتىن ەمتيحانعا دايارلانىپ شارشاپ جۇرگەن سياقتىمىن.

-ءوزىڭ كىشكەنتايىڭنان: اپا مەن ءسوزسىز شەتەلگە شىعىپ، ۇلكەن ءبىلىم ورنىندا وقيمىن، - دەۋشى ەدىڭ، بالام. قازىر ارمانىڭ ورىندالدى، قانداي جاقسى.

-ءيا، سولاي-مونشاقتىڭ داۋىسى ءالسىز سالقىن لەپپەن شىقتى. ەرنى ماقساتسىز كۇبىرلەپ، جانارى تەرەزە سىرتىنا قادالىپ، كوز شاناعىنا ىركىلگەن بەلگىسىز مۇڭنىڭ ۇشقىنى سوناۋ الىستاعى اق قايىڭدارى ارالاپ بارا جاتقانداي.

-اپا، وسى ارمان دەگەن نە؟، -ول ماعان تولعانا قارادى.

ونىڭ توسىن سۇراۋىنا مەن دە قاپەلەمدە نە دەرىمدى بىلمەي ىركىلىپ قالدىم. قاراماققا ۇنەمى ايتىلاتىن جاي سۇراق. اۋەلگىدەي جاۋاپ بەرۋگە بولادى. بىراق ونىڭ اۋەنى مەن مۇڭعا تولى جانارىنان ءبىر ءتۇرلى الاسۇرعان ىشكى ارپالىس مەنمۇندالايدى. مەنىڭ جاۋابىم ونى تىعىرىقتان قۇتقاراتىنداي ماعان اسىعا قاراپ تۇر.

مەنىڭ تۇيتكىلىكتەپ داعدارىپ قالعانىمدى بايقاعان مونشاق ءوزىنىڭ بالا كۇننەن بەرى مىنەزىنە ساي كەلمەيتىن ءبىر ءتۇرلى بايسالدىلىقپەن باسىن بۇرىپ، دالاعا تاعى دا كوز تاستاي، الدىمەن ءتىل قاتتى، داۋىسى قاتقىلدانا شىقتى:

-اپا، ءسىز بۇرىن ارمان دەگەن جۇرەك قالاۋى دەۋشى ەدىڭىز. بىراق، بىلمەيسىز-اۋ، قازىرگى كۇندە ارمان تەك جۇرەك قالاۋى ەمەس سياقتى. ونىڭ استارى قوعامداعى قوردالانىپ جاتقان قولامتالى ۇردىسپەن ، كوركەم كۇندى اڭساعان كۇيبەڭ تىرلىكپەن، نارىققا ويىسقان قۇن كوزقاراسىنان تامىر الىپ جاتقان جوق پا؟ قايسى جان تەك جۇرەگىنىڭ ءۇنىن تىڭداپ، سول ءۇشىن بارىنەن ۋاز كەشىپ سەزىم جەتەگىنە عانا ەرىپ ءجۇر دەيسىز؟ ەرىپ جۇرەر ەدى- اۋ، وعان مىناۋ زامان ۇردىسىنە بەيىمدەلگەن پەندەلىك پەيىل ، اسقاقتىققا اسىققان اڭسار تىنشتىق بەرەمە؟ بەرمەيدى. ءبارىبىر جەڭەدى.

كوز الدىمدا قارشاداي عانا كورىنەتىن نەمەرەمنىڭ وسىنشاما شەشەن تىلمەن كەڭ كوسىلگەندىگىنە تاڭ-تاماشا بولىپ تا، ءسۇيىنىپ تە تۇرىپ قالدىم. بويجەتىپ قالىپسىڭ-اۋ، قارعام، -دەپ ويلاپ تۇرىپ، مونشاقتىڭ بولمەسىنە كىرىپ كەتكەندىگىن دە بايقاماپپىن.

سودان كەيىنگى كۇندەردە مونشاق كۇنى-ءتۇنى بولمەسىنەن شىقپاي ساباق پىسىقتاۋمەن بولدى. ايتەۋ مەن تۇسىنبەيتىن تىلدە بىردە تىڭداپ، بىردە جاتتاپ دەگەندەي ابىر-سابىر كۇيدە. تەلەفوننىڭ شىرىلى دا كۇنىنە نەشە سوعىلادى.

مونشاقتىڭ تاپسىرۋىمەن تەلەفوندى كوبىندە المايتىن بولدىق. السام دا مونشاقتى سۇراعاندارعا جوق دەيمىن. بىراق ءۇن-ءتۇنسىز سوعىلاتىن تەلەفوندار دا بار ەدى.

-ۋاي، قاراعىم ، كىمدى ىزدەيسىڭ؟

ارجاقتا ءۇن جوق. سونىمەن تەلەفون جابىلادى.

قاربالاس كۇندەر اياقتالىپ، مونشاق شەتەلگە شىعۋ ەمتيحانىنان ءساتتى ءوتىپ ، وتباسىمىزدى قۋانىش پەن شاتتىققا بولەپ، كوكىرەگىمىزگە داڭق پەن ابروي سيلادى. تەك ءۇزى عانا ءۇنسىز. ەرەكشە شاتتانىپ تا كەتپەيدى. بۇرىنعىداي ەركەلەۋدەن قالعان. ەل الدىنداعى مارقايعان كوڭىلدەرىن باسا الماي تىلەك توي جاساپ مارە-سارە بولىپ جۇرگەن اتا-اناسى ونى قايدان بايقاسىن. شەتەلگە بارۋ جاقىنداعان سايىن، ءار تاڭەرتەڭ ونىڭ كوزىنىڭ دومبىعىپ ءىسىپ جۇرگەندىگىن تەك مەن عانا سەزىپ جۇردىم.

مونشاق شەتەلگە كەتەردەن ءبىر اپتا بۇرىن ءبىز تۇراتىن بينانىڭ استىنداعى سامالدىقتار اراسىنان ءبىر جىگىتتى كورىپ قالا بەرەتىن بولدىم. كەشكىسىن ، تاڭەرتەڭ مەنىڭ كورشى قۇرداس كەمپىرلەرمەن بوي جازاتىن جولدا ماقساتسىز اياڭدايدى. بىرەۋدى كۇتكەندەي اياعىن تىقىرشي باسىپ اينالسوقتايدى . قويۋ قارا شاشتارى قاپ-قارا قاستارىنا توگىلىپ، ۇياڭ جانارىمەن ءبىز تۇرعان ۇيگە قادالىپ قاراپ تۇرعان سياقتى. كەيدە قولىندا گيتتارى بار كەلەدى. كەش بولىسمەن اۋلاداعى ۇلكەندى-كىشىلى بالالاردى جيناپ ، ىڭىلداپ ءان سالادى. تاماشا اۋەنگە ەلىتىپ بەرىلە تىڭداعان بالالار جاقتارىن تايانىپ ونىڭ ماڭىنا قورالانىپ وتىرىپ قالادى. جىگىتتىڭ ءوڭى مەن جانارى، ءتۇر-تۇلعاسى ۇزاقتان كوز سالعان ماعان ءبىر ءتۇرلى تانىس سەزىلەتىن.

-ءيا، قويشى، - دەيمىن ىشتەي جەڭىل كۇرسىنىپ، - وتكەن كۇندەرگە ورالىپ جۇيكەمدى جۇقارتپايىنشى. نەمەرەم مونشاق ايتقانداي، پەندەنىڭ ءبارى جۇرەك قالاۋىنا جەتتى دەيسىڭبە؟

مونشاق شەتەلگە اتتانىپ كەتتى. نەمەرەمدى ساعىنعاندا بولمەسىنە كىرىپ توسەگىنە وتىراتىن ادەتىم بارەدى. سول ادەتىم بويىنشا توسەگىنە وتىرىپ، كەڭسىرىگىمدى اشىتقان ساعىنىش جاسىن جانارىما ىركىپ، كورپەلەرىن جيناي يىسكەپ قويامىن. نەمەرەمنىڭ قولىنىڭ ءىزى قالعان كىتاپتارىن ايالاي سيپاپ وتىرعانىمدا، كىتاپ اراسىنان كىشكەنتاي ەستەلىك داپتەر مەن اۋىزى اشىلعان كانۆرەت سۋسىپ ءتۇستى. مەن ەرىكسىز اقتارا باستادىم. سالامات اتتى جىگىتتىڭ مونشاققا جازعان ءمولدىر سەزىمگە تولى عاشىقتىق حاتتارى ەكەن. ەڭ سوڭعى حات تاپسىرىپ العان كۇنى مونشاقتىڭ ەستەلىگىنە:

كەشىرشى مەنى تۇندەرىم،

كەشىرشى مەنى كۇندەرىم،

سەزىمگە سەرىك سول جاندى،

قۇلاتىپ قۇزعا ۇرلەدىم.



سۇيمەيمىن دەدىم شىمىرىكپەي،

سەزىمدى سوردىڭ سۇلىكتەي،

ارمانىم بيىك دەسەمشى،

سەنبەيدى-اۋ جۇرەك كۇلىپ بەي.



الدىمدا جاتتى سارا جول،

بۇلدىراپ كوزگە بارادى”ول ،

شاقىرۋعا دارمەنسىز،

پەندەڭدى كەشىر قارا جول.



كەشىرىم سۇراپ تاڭداردان،

جۇرەگىم سەن دەپ جار سالعان،

كەگىڭ بوپ بالكىم قالارمىن،

جارالعان اشتى ارماننان. -دەپ جازىلىپتى. ەستەلىك اراسىنداعى ەكى پارشا راسىمدى كوزىم شالىپ، توبەمنەن بىرەۋ ۇرىپ جىبەرگەن كۇي كەشتىم. ءبىرى مەن كورىپ جۇرگەن سالامات اتتى جىگىتتىڭ جەكە سۋرەتى. ال ەندى بىرىندە ءبىر قاريامەن جانە اتا-اناسىمەن تۇسكەن راسىمى ەكەن. مونشاق سۋرەتتىڭ سىرتىنا :سالامات، اتاسى ايات اتا جانە اتا-اناسى ، -دەپ جازىپ قويىپتى. سامايىن اق قىراۋ شالىپ، ەڭگەزەردەي دەنەسى ەڭكىش تارتساسا ، وڭىنەن ءبىر ءتۇرلى بايسالدىلىق پەن سالاۋاتتىق اڭعارىلعان ايات. جانارى سول قالپى ، باياعى مەنىڭ تانىمە دە جانىما دا جارىق سيلاعان جانار. سول ەسكىرمەگەن ءوڭ. كەرەمەت كەلبەت. . . . .

ءاي ، قارىمجىىسىن ۇمىتپاعان قايتالانعان تاعدىر-اي. بىزدەر الدەقاشان حوش ايتىپ قول سەرمەگەنبىز. جۇرەكتە تەك وسى ولەڭ جولدارى قايتا- قايتا قايتالانادى.


سەن مىنا-جانارىمنىڭ ىشىندەسىڭ،

جاناردىڭ بىلەسىڭ عوي كشىرمەسىن. . . . . .

سەن مەنىڭ- ءمىنا ءتىلسىم كەۋدەمدەسىڭ،

بىلەسىڭ، كەۋدەمە ەشكىم تەڭ كەلمەسىن. . . . . . . . . .

سەن مىنا-تىلىمدەسىڭ، ۇنىمدەسىڭ،

بىلەسىڭ عوي، ءتىلىمنىڭ بۇلىنبەسىن. . . . . . .


اۆتوردىڭ قىزمەت ورنى: ورتالىق حالىق راديو-تەلەۆيزيا باس ستانسياسى



(بۇل تۋىندى شۇعىلا جۋرنالىنىڭ 2018-جىلعى 3-سانىندا جاريالانعان)


قۇرمەتتى ويلى وقىرمان بۇگىن سىزدەرگە «جاستار مەرەەكەسى» بايلانىسىمەن ستانسيامىزداعى قازاق ءتىلدى راديونىڭ جالىندى ديكتورى، جاس جازۋشى گۇلجان زارقىنبەك قىزىنىڭ «سەن مەنىڭ جانارىمسىڭ» شىعارماسىن ۇسىندىق. تۋىندى ۇناپ جاتسا كوپپەن بولسە جاتارسىزدار.