جاتقا سيلاعان كۇلكىڭدى جاقىنىڭا دا سيلاي ءبىل
كەلۋقاينارى: |جاۋاپتى رەداكتور: | جاڭالانعان ۋاقىت:2019-06-12 15:32:00


اۆتورى: شى-ي
اۋدارعان: ماقسات قيزات ۇلى



نەگە ءبىز وسى بار جاقسى پەيىلىمىزدى، جاقسى مىنەزىمىزدى وزگەلەرگە باعىشتاپ، بار جامان مىنەزىمىزدى وزىمىزگە، ۇيدەگىلەرىمىزگە ساقتايمىز؟ جاتقا باعىشتاعان جاز كۇلكىڭدى ەش بوياۋىن وزگەرتپەي ۇيگە دە الىپ كەلۋگە بولماس پا ەدى؟!

 

بۇل دۇنيەدە تەك ۇيدەگىلەرىڭ عانا سەنىڭ قايعىڭا ءوز قايعىسىنداي ورتاقتاسا الادى، ولار سەنىڭ قۋانىشىڭا شىن كۇلىپ، اشۋ-ىزاڭا ءبىر كىسىدەي توزە بىلەدى. سەن ولاردى توزە بەرەدى ەكەن دەپ توپەلەي بەرمە، جاتقا سيلاعان ءبىر كۇلكىڭدى جاقىنىڭا دا سيلاي ءبىل، ول دا قۋانىپ قالسىن،

 

الدىڭعى اپتا ورتا مەكتەپتى بىرگە وقىعان ساباقتاستار شۇرقىراسىپ باس قوسا قالدىق، قۇلىن-تايداي تەبىسىپ وسكەن دوستاردىڭ قالجىڭى جاراسىپ، اق داستارقاننان اق نيەتتىڭ سامالى ەستى.

 

ساباقتاستاردىڭ بىرىنەن-ءبىرى وزىپ تۇرعان ەش جەرى جوق، بارلىعى قوڭىر قالتا كۇي كەشىپ جۇرگەن قاراپايىم قىزمەتكەرلەر ەدى. ‹ارپا ىشىندە ءبىر ءبيداي› دەگەندەي ارامىزداعى ازۇيدىڭ عانا قالتاسى قالىڭ، ول ءوزى كىشكەنتاي كەزىنەن-اق جۇلىمىر بولاتىن، بارا جاتقاننىڭ بالتاسىن، كەلە جاتقاننىڭ كەتپەنىن الا كەتۋگە دايىن تۇراتىن پىسىق ەدى، سونىڭ ارقاسىندا مىنە تاسى ورگە دومالاپ قالتاسى قالىڭ، قارىنى جۋان قوجايىنعا اينالىپ ۇلگىرىپتى.

 

ورتامىزدان بەتكە باسار ءبىر بايدىڭ شىققانىنا بىزدە قۋانىپ، ونى ءاردايىم جىلى سوزبەن جارىلقاپ، ءىسىنىڭ ورگە باسا بەرۋىنە تىلەكشى بولاتىنبىز. ازۇي بۇل جولعى باس قوسۋدا بۇرىنعىسىنان دا قالجىڭباس، پەيىلدى كورىندى، بۇرىندارىن ونداي جومارت ەمەس سياقتى ەدى.

 

-‹وسى جولعى وتىرىستىڭ شىعىنى مەنەن بولسىن، ساباقتاستارىما ەكى ۇستەل تاماق بۇيىرتا الماسام، نەسىنە قوجايىن بولىپ ءجۇرمىن›،-دەپ ناق مايداندا اس-ءمازىردىڭ قاراجاتىن تولەپ جىبەرگەن كەزدە، وتىرعانداردىڭ ءبىر تالايى جىمىڭ ەتە ءتۇستى.

 

ءومىر-اي دەسەڭشى، ول راسىندا ءسوزى سىلىق، ارەكەتى يناباتتى ادامدى سۇيىندىرەتىندەي ونەگەلى جان بولىپ وزگەرىپتى، باس قوسۋدىڭ باسىندا ول بارلىق ساباقتاستارىنا بىردەن توس كوتەرتىپ، بارلىعىنىڭ شاشباۋىن كوتەرىپ، قاسيەتىن اسىرا سويلەدى. جىلى سوزگە جان سەمىرەدى، القالى ازاماتتىڭ ارقاعا قاققان ادەمى ءسوزى كوڭىلىمىزدى كوتەرىپ تاستادى.

 

‹كورە-كورە كوسەم بولار، سويلەي-سويلەي شەشەن بولار،-دەگەن، قارا قۇرساق قوجايىن دەپ جۇرسەم، ازۇيىمىز ادەپتى دە ءجون بىلەتىن جان ەكەن عوي›،-دەپ قاسىمدا وتىرعان سىرلاسىم ىشىندەگى قۋانىشىن جاسىرا الماي كۇبىر ەتتى. كوپتەن كورىسپەگەن ساباقتاستار وتكەن-كەتكەندى ايتىسىپ مارە-سارە بولىپ وتىرعان كەزدە، توردە وتىرعان ازۇيدىڭ تەلەفونىن شىرىلداي جونەلدى.

 

تەلەفونىنىڭ بەتىنە از-كەم قاراپ العاسىن ول ونى قالتاسىنا سۇڭگىتىپ جىبەردى. تەلەفون ەكىنشى رەت تاعى دا بەزەكتەي جونەلدى، بۇل جولى ول: ‹قالاي ادامسىڭ ءوزى، سونى دا بىلمەيمىسىڭ، قانشا رەت ايتامىن ساعان، كوك مي›،-دەپ تەلەفوندى شارت تا سۇرت جابا سالدى.

 

قاراسام ءوڭى اش قاسقىرداي سۇرلانىپ كەتىپتى. جاڭا عانا جازداي جادىراپ وتىرعان ادامنىڭ دەمدە ءبۇيتىپ وزگەرگەنىنە تاڭ قالدىم. ول تەلەفوندى قويعان بەتتە قايتادان جىلى ءشىرايلى تۇسكە ەنىپ، جىلپىداي باستادى. ءبىراق بۇل جولى ساباقتاستاردىڭ كوڭىلى كوتەرىلە قويمادى، الدىلارىنداعى اسقا قولدارى بارماي، سالقىن سابىرمەن، كۇبىر-سىبىرعا جاقىن ۇنمەن اڭگىمەگە ءوتتى.

 

‹ە، سەندەر بۇل جىگىتتىڭ شىن كەسپىرىن بىلمەيسىڭدەر عوي،ءبىز ساۋدا سالاسىنداعى سەرىكتەسپىز، مەن ونىڭ كورگەندە كۇلىپ، كومەسكىدە كۇڭىرەنتەتىن وسى ءبىر قىلىعىن ۇناتپايمىن، جىگىتتىكە جاراسپايدى، ادامدىققا جات، جاڭا تەلەفون ۇرعان كىسى ونىڭ ايەلى›،-دەدى ساۋدا سالاسىندا ەندى عانا كوتەرىلىپ كەلە جاتقان كوپ سويلەمەيتىن ساباقتاسىم ماعان سىر اشىپ.

 

‹ءجارايدى، ساباقتاستار، وتىرىس كوڭىلدى بولسىن، ازۇي قاربالاستاپ ساۋدا ىستەپ جۇرگەن كىسى، تاياۋدان بەرى ءبىر ىسكە باسى قاتىپ ءجۇر، ءتۇسىنىپ قويايىق›،-دەپ ازۇيدىڭ ەڭ جاقىن دەگەن دوسى ورنىنان تۇرىپ بارىمىزگە توس كوتەرتتى.

 

ءبىز جاپىرىلا ورنىمىزدان تۇردىق. ساباقتاستاردىڭ وڭىنەن ەرىكسىز كۇلگەنى بايقالادى. مەن سول كۇنگى باس قوسۋدان ۇلكەن ساباق الىپ قايتتىم. وزگەنى قويشى، ازۇيدىڭ بويىنداعى وسى ءبىر مونتانى مىنەز مەنىڭ بويىمدا دا اندا-ساندا بوركىن قىلتيتىپ قالاتىنى قينايدى.

 

وتىرىك ايتىپ ناعىلايىن، مەنىڭ اينالامدا كوپتەگەن دوستارىم جات كوزىنە جاقسى كورىنۋ ءۇشىن جالپىلداپ ءجۇر، قوجايىنىن كورسە قۇرشا جورعالاپ، ەزۋىنەن كۇلكى كەتپەيدى.

 

ال ۇيىنە بارسا قاباعىن قارىس ءتۇيىپ، بالا-شاعاسىنىڭ ەكى اياعىن ءبىر ەتىككە تىعارداي تۇسكيىپ وتىرعانىن كورەسىڭ. بىردە دوسىمنىڭ قىزى شەشەسىنە: شەشە، سەن سىرتقا شىقساڭ سونداي جاقسىسىڭ، كۇلىپ جۇرەسىڭ، ال ۇيگە كەلسەڭ، ونداي ەمەسسىڭ عوي، قىزمەتتەستەرىڭدى كورگەندە كۇلىپ، جايىراڭداپ كەتەسىڭ، ال اكەمدى كورسەڭ شارقىلداپ، ۇرساسىڭ، نەگە ويتەسىڭ-دەگەنى ويدا-جوقتا ساۋال تاستاپ. بۇل سۇراققا دوسىم جۇمعان اۋىزىن اشا العان جوق.

 

ءبىزدىڭ كوبىمىز بۇل سۇراققا جاۋاپ بەرە المايمىز. ءوزىمىز بايقاماي قالدىق، ءبىزدىڭ كوبىمىز قازىر تۇزدە جاز، ۇيدە قىسپىز، سىرتتاعى سۋىقتىڭ ىزعارىن ۇيگە اكەلىپ شاشامىز، جىلى ءۇيىمىزدى جاتتىڭ سۋىق پەيىلىمەن سۋىتامىز. ارينە، باسى اۋىرىپ، بالتىرى سىزدامايتىن پەندە بارما، ايتارعا بولماسا، بارلىعىمىز دا قينالىپ ءجۇرمىز، ءبىراق وعان بولا سۇيگەن ادامدارىڭا، سۇيىكتى جاندارىڭا الباتى اشۋ شاقىرۋعا مىندەتتى ەمەسسىڭ.

 

ءبىزدىڭ قاتەلىگىمىز سىرتتان تاپقان اشۋ-ىزامىزدى، كۇڭكىلىمىز بەن نالامىزدى سول كۇيى ۇيگە جەتەكتەپ كەلەتىنىمىز، سول ىزانى، اشۋدى وتباسىمىزداعى ادامداردان الاتىنىمىز. مىناداي ءبىر جاقسى ءسوز بار عوي، مۇڭ – جىرتىلعان كويلەك سياقتى،-دەگەن، كويلەك توزسا كۇرەسىندە قالادى، سىرتتان كەلەتىن مۇڭ نالادا سول سياقتى، ونى ۇيدە ۇستاپ وتىرۋدىڭ قاجەتى جوق، ونى دا كورمەيتىن جەرگە تاستاپ كەتكەنىمىز ءجون، ونىسىزدا ۇيدەگىلەرىڭ دە قالجىراپ ءجۇر، وتباسىڭداعى جاقىندارىڭدى قىراۋ قاباعىڭمەن توڭدىرا بەرمە.

 

مەيلى، سىرتتاعى دۇنيە سەنى قانشا قىزىقتىرىپ، ەلىتكەنىمەن ءبارىبىر ءبىر كۇنى ول دۇنيەدەن شارشايسىڭ، اينالىپ كەلە اتا-اناڭ مەن بالا-شاعاڭنىڭ قاسىنا كەلىپ جۇدەگەن جۇرەگىڭە قۋات الاسىڭ. ‹تۋعان ءۇيىڭ – قازىعىڭ، كەتە المايسىڭ الىستاپ، اتا-انا – قىمباتىڭ، مەيلى قانشا تانىس تاپ›،-دەگەن ەمەس پە، وسىدان ون جىل بۇرىن، كورشىمىزدىڭ بالاسى اتا-اناسىمەن رەنجىسىپ ۇيدەن بەزىپ كەتتى، كوپ ۋاقىت بويى حابارسىز قالدىق، جاڭا جىل تۋعاندا ول اۋىلعا ورالدى، ءبىراق ول اۋرۋ شەشەسىنىڭ الدەقاشان ومىردەن ءوتىپ كەتكەنىن مۇلدە ويلاماعان بولاتىن، سودان ول كوشەنى كۇڭىرەنتىپ جىلادى-اي كەلىپ، وتكەن ءىس ورالارما، وكىنگەنمەن پايدا جوق، وسىنداي وكىنىشتىڭ ورتىندە قالىپ جاتقان ادامدار از ەمەس.

 

ءومىر وتپەي تۇرعانىندا ۇزىن سەزىلەدى، ءبىراق جاقىندارىڭ كوزىڭنەن كەتكەندە قىپ-قىسقا ەكەنىن سەزەسىڭ، سوندىقتان دا ۇلگىرە الساڭ، قادىرلەي الساڭ ءبارى دە كەش ەمەس، ورايىڭ تۇرعاندا ۇيدەگىلەرىڭدى ايالاي ءبىل.