ەرتە تۇرعان جىگىتتىڭ ىرىسى ارتىق
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2019-09-05 15:13:00


    اۆتورى: لي سىيۋان


    اۋدارعان: ساعىنبەك رابات ۇلى

    كەشە تاڭەرتەڭ ۇيدە ازىراق جۇمىسىم بولىپ، كۇندەگىدەن 5 مينۋت كەشىگىپ جولعا شىقتىم. مەترو ايالداماسىنا جەتكەنىم سول ءيىن تىرەسكەن ادامعا كەز بولىپ، امالسىز كەلەسى مەترونى توستىم، سوڭىنان كەلگەن ادامدار مەنى قىسىپ مەتروعا وزدەرى-اق شىعاردى.


    مەترو ىشىندەگى جارتى ساعاتتا ورنىقتى تۇرۋدىڭ ءوزى مۇڭ بولدى، بىرەسە وڭعا، بىرەسە سولعا جىعىلىپ كەلەمىز، ونىڭ ۇستىنە ادام وتە كوپ بولعاندىقتان بىرەۋدىڭ اياعىڭدى باسىپ كەتۋى ونشا تاڭسىق ەمەس، ءتىپتى، مۇندايدا ورىنسىز قيعىلىق سالاتىندار دا كەزىگەدى.


    ايتسە دە، ادەتتە 5 مينۋت بۇرىن جولعا شىققانداعى جاعداي بۇدان مۇلدە باسقاشا. سىزىق سىرتىندا ەمىن-ەركىن كولىك توسامىن، بىرەۋلەر كەلىپ قاتارعا قىسىلمايدى، كوڭىل-كۇي جاقتان سەرگەك بولىپ، بوس ورىنعا جايعاسىپ، سومكامنان كىتابىمدى الىپ شىعىپ وقۋعا باس قويامىن. شارشاعانداي سەزىنسەم، كوزىمدى تارس جۇمىپ الىپ، تاقتايعا باسىمدى سۇيەنىپ ءبىراز مىزعاپ تا الامىن.


    مىنە بۇدان بىرنەشە مينۋت بۇرىن نەمەسە كەيىن شىعۋدىڭ پارقى راسىندا زور بولاتىنى ايتپاسام دا تۇسىنىكتى شىعار.


    «ۇزىن ارقان، كەڭ تۇساۋ» دەگەندەي تۇرمىس بارىسىندا، مەيلى قانداي ىسكە بولسىن الدىن الا ازىرلەنگەندە، كوپتەگەن مازاسىزدىق پەن اۋرەشىلىكتەن قۇتىلۋمەن بىرگە، ۋاقىتتان ۇتۋعا بولادى.


    كوپتەگەن ادام ىلعي دا جۇرتتىڭ قىزمەتكە شىعاتىن كەزىندە، ءبىر جاعىنان، قىسىلىپ-قىمتىرىلدىق دەپ كەيىسە، ەندى ءبىر جاعىنان، بىرنەشە مينۋت بۇرىن جولعا شىعۋعا قام جاسامايدى دا، ۋاقىت تاياعاندا عانا ورنىنان قوزعالادى. وسىلايشا، قاتىناس-تاسىمالدىڭ قاۋىرت اينالىسىنا كەز بولىپ، بارعان سايىن شارشايدى نەمەسە قالجىرايدى.


    ۋاقىت دەگەنىمىز ءومىر سيستەماسىنداعى قۇندى ماتەريال، ۋاقىتتى قادىرلەۋ ءومىردى قادىرلەگەندىك ەكەنى جادىڭدا بولسىن. 

    2 

    سەرىكتەستىكتىڭ كادرلار تاراۋىندا جاۋاپتى قىزمەت ىستەيتىن ءبىر دوسىم ماعان: «ادەتتە سەرىكتەستىكتە قىزمەتكە ەرتە كەلەتىن قىزمەتكەر بىرنەشە مينۋت كەشىگىپ كەلەتىن قىزمەتكەردەن الدە قايدا ۇزدىك بولادى»،-دەگەن ەدى. ءبىر ادامنىڭ قابىلەتى مەن ورەسى وسى بىرنەشە مينۋتتا ايگىلەنە قالماس دەپ، ءاۋ-باستا بۇل كوزقاراستى ونشا قۇپتاپ كەتپەن ەدىم. بۇل ءسوزدىڭ راسىندا قيسىنى بار ەكەنىن كەيىن كەلە بىرتە-بىرتە سەزىندىم.


    بىرنەشە مينۋت بۇرىن كەلگەن قىزمەتكەر، سول كۇنگى ورنالاستىرۋ مەن مىندەتتى الدىن الا سارالاپ، كوڭىلىندە بەلگىلى سان بولادى. ءبىر ستاكان شاي بىقتىرىپ، قىزمەت ۇستەلىن تازالاپ دەگەندەي قاربالاس تا ءتارتىپتى قىزمەت كۇيىنە الدىن الا كىرەدى.


    ال، بىرنەشە مينۋت كەشىگىپ كەلگەن قىزمەتكەر قالاي بولماسىن قاربالاستىققا تۇسەدى. جۇمىس ىستەگەندە ونىڭ ىرىقتىلىعى قاشان دا كەمشىل بولادى، اركەز قۋزاۋ سالعىزىپ جۇرەدى. قىزمەت ونىمدىلىگى تومەن بولىپ قانا قالماستان، ونىڭ ۇستىنە اسىعىس-ۇسىگىس قىزمەتكە كىرىسسە، قىزمەتتەن قاتەلىك جىبەرۋ مۇمكىندىگى دە زور بولادى.


    قىزمەت بارىسىندا قىزمەت پوزيتسياڭ دا قىزمەت قابىلەتىڭدى بەينەلەيدى. الدىڭعىسى قىزمەتكە بەلسەندى، ىرىقتى مامىلە جاسايدى، كەيىنگىسى ۇنەمى بويكۇيەزدىككە سالىنادى. ءبىر ادامنىڭ قابىلەتى ناشار بولسا، بەلسەندى قىزمەت پوزيتسياسى ارقىلى تولىقتاۋىنا بولادى. الايدا قارىم-قابىلەتىڭ قانشا كۇشتى بولسا دا، جالقاۋلىق پەن بويكۇيەزدىك ونى سەلگە كەتىرەدى.


    ءبىر اۋىز سوزبەن ايتقاندا، وراي قاشان دا ساقاداي ساي ادامعا بۇيىرادى. بىرەۋلەر قاراماققا وزىڭنەن ۇزدىك كورىنگەنىمەن، ول ونداي كەرەمەت ەمەس نەمەسە سەنەن اسىپ تۇرعان جەرى جوق، ءبىراق كەيبىر نازىك بۋىنداردا سەنى جەڭۋى مۇمكىن. مىسالى، ءارقانداي ىستە سەنەن ەرتە قادام تاستاسا، ۋاقىت وتە كەلە سەنى كوش قۇلاش ارتتا قالدىرادى.
مىنە بۇدان ۋاقىتتىڭ ءارى سىرلى، ءارى قۇندى ەكەنىن ۇعا الامىز.



    كەزىندە ءبىر وقىرمان ماعان مىناداي ءبىر اڭگىمەسىن ايتقان ەدى: ول ءبىر بويجەتكەنمەن ءسوز بايلاسۋعا بارعاندا بىرنەشە مينۋت كەشىگىپ قالىپتى، ناتيجەدە ءسوز بايلاسپاق بولعان بويجەتكەننىڭ جىگىت جونىندەگى اسەرى جاقسى بولماي، ەبىن تاۋىپ جىگىت جاقتىڭ تالابىن تويتارىپتى. بويجەتكەنگە كولىك كەپتەلىسىنەن كەشىگىپ قالعانىن قانشا تۇسىندىرسە دە، ونىڭ بەتىن وزىنە قاراتا الماي مىسى قۇرىپتى.


    ءاسىلى جىگىت بويجەتكەننىڭ كوڭىلىنە جاقپاعان بولۋى مۇمكىن نەمەسە كەشىككەنىن كوڭىلىنە ەرەكشە العان شىعار، قالاي دەگەنمەن جىگىتتىڭ كەشىگۋى ورىنسىز عوي، ءاسىلى ول ەرتەرەك جولعا شىقسا، كولىك كەپتەلىپ قالسا دا جەتكىلىكتى مۇمكىندىك بولار ەدى.


    سۇيىسپەنشىلىك بارىسىندا، سەنىڭ ادال نيەتىڭ تۇسىنىكتەن جوعارى تۇرادى. بىرەۋلەر: بىرنەشە مينۋت كەشىككەنىنە بولا، باسقالارعا جەڭىل-جەلپى تۇجىرىم جاساۋ سىڭار جاقتىلىق،- دەپ قارايدى. سەن ماڭىزدى ءبىر ادامدى كورمەكشى ەكەنىڭدى بىلە تۇرا، تۋىلۋ مۇمكىندىگى بار ماسەلە مەن اۋرەشىلىكتى الدىن الا مولشەرلەپ، وعان سايكەستى دايىندىق كورۋ كەرەك ەكەنىن جاقسىراق ويلانساڭ سەزە قوياسىڭ.


    كوپتەگەن جاعدايدا، قارسى جاق سەنى بىرنەشە مينۋت كۇتكەنىن قاپەرىنە المايدى، قايتا كەشىگۋ مەن بويكۇيەزدىك پوزيتسيا ماسەلەسىنە ساياتىنى ەسىڭدە بولسىن. بۇل سەنىڭ جۇمىستى جان-جاقتىلى ىستەمەگەنىڭدى، سونداي-اق ونشا ءمان بەرمەگەنىڭدى تۇسىندىرەدى. ۋاقىتقا قۇرمەت ەتپەۋ ءارقانداي قوعامدىق قارىم-قاتىناستا ادامدى كوڭىلسىزدەندىرەدى، جەڭىلىسكە جەتەلەيدى، ءتىپتى، باسقالاردىڭ سەنى قاتە تۇسىنۋىنە مۇرىندىق بولادى.



    بارلىق ىستە 5 مينۋت بۇرىن قوزعالۋ ءمانى جاعىنان العاندا، الدىن الا قامدانىپ، امانشىلىقتا جامانشىلىقتىڭ دا بولارىن ويلا دەگەن ءسوز. كولىكتە قىسىلىپ-قىمتىرىلۋدى قالاماساڭ، قىزمەتكە شىعىپ كارتۋچكا اۋدارۋدان كەشىگىپ قالامىن دەپ الاڭداساڭ، بىرنەشە مينۋت بۇرىن جولعا شىعۋدى ويلانىپ كور، ەگەر وسىلاي ىستەي الساڭ، كولىكتەگى جولاۋشىنىڭ ءيىن تىرەسكەن قاۋىرت مەزگىلىنەن اۋلاق بولاسىڭ؛ سەن بەلگىلەنگەن نەمەسە توسىن جۇكتەلگەن قىزمەت مىندەتىن ۋاعىندا ورىنداي الماۋدان الاڭداساڭ، جۇمىستى الدىن الا ىستەۋدى ويلانىپ كور، ەگەر وسىلاي ىستەي الساڭ، بۇعان بولا الاڭداۋىڭنىڭ قاجەتى جوق؛ كەزدەسپەكشى بولعان ادام مەن كەڭەسپەكشى بولعان ءىستى وتكىزىپ الۋدان قورىقساڭ، الدىن الا دايىندىق كورىپ، بۇرىنىراق قوزعالساڭ، باسى ارتىق كوپتەگەن اۋرەشىلىكتەن ساقتانۋىنا بولادى.


    بىرەۋلەر: بولماشى ۋاقىتتى سەزگىرلىكپەن پايدالانا الساڭ، ۋاقىتتان تولىق ۇتا الاسىڭ،-دەيدى. مىنە بۇل ۋاقىتتىڭ قادىرىن بىلگەن سايىن ۋاقىتتى ىسىراپ ەتۋدىڭ قاسىرەتىن سەزە بىلگەندىك دەگەن ءسوز.


    بارلىق ىستە 5 مينۋت بۇرىن قوزعالۋ ـــ ءبىر ءتۇرلى جاقسى ادەت. مۇنداي بولعاندا بارلىق ىستە الدىن الا ازىرلىك كورىپ، ەش ساسقالاقتامايسىڭ. ول ءبىر ءتۇرلى كوڭىل كۇي، بىرەر ىسكە جولىقساڭ، بايسالدى تۇردە توتەپ بەرە الاسىڭ. ول تاعى ءبىر ءتۇرلى پوزيتسيا، باسقالارعا سەنىڭ كوڭىل كۇيىڭ مەن ادالدىعىڭدى كورسەتىپ، سول ادام مەن ىسكە بولعان قۇرمەتىڭ مەن ءمان بەرۋىڭدى ايگىلەيدى.


    ەگەر تۇرمىس ءتارتىبىن جاقسارتىپ، ورايدى ءتىپتى دە جاقسى مەڭگەرمەك بولساڭ، بارلىق ىستە 5 مينۋت بۇرىن قوزعالۋدى ۇيرەن.