مەملەكەتتىك ەكى ماجىلىسكە قاتىناسقان از ۇلت ۋاكىلدەرى مەن مۇشەلەرىنىڭ شاي قوناعاسى بەيجيڭدە وتكىزىلدى
كەلۋقاينارى:جۇڭگو قازاق راديو تورابى |جاۋاپتى رەداكتور:داۋىلبەك | جاڭالانعان ۋاقىت:2017-03-12 09:53:00


    شينحۋا اگەنتتىگىنىڭ حابارى. جۇڭحۋا سىندى ۇلى شاڭىراقتاعى باۋىرلاس ۇلتتار ءبىر نيەت ءبىر تىلەكتە بولا وتىرىپ، جۇڭگو ارمانىن ورتاق ىسكە اسىرادى. ج ك پ ورتالىق كوميتەتىنىڭ بىرلىكساپ ءبولىمى، مەملەكەتتىك كەڭەستىڭ ۇلتتىق ىستەر كوميتەتى، مەملەكەتتىك ساياسي كەڭەستىڭ ۇلت جانە ءدىن ىستەر كوميتەتى ناۋرىزدىڭ 11-كۇنى كەشتە حالىق سارايىندا شاي قوناعاسىن وتكىزدى. پارتيا مەن مەملەكەت باسشىلارىنان شي جينپيڭ، لي كچياڭ، جاڭ دىجياڭ، يۇي جىڭشىڭ، ليۋ يۇنشان، ۋاڭ چيشان، جاڭ گاۋلي قاتارلىلار 12-كەزەكتى مەملەكەتتىك حالىق قۇرىلتايى 5-ماجىلىسى مەن مەملەكەتتىك ساياسي كەڭەس 12-كەزەكتى بەسىنشى ماجىسىلىنە قاتىناسقان از ۇلت ۋاكىل-مۇشەلەرىمەن ءبىر ارادا باس قوسىپ، ەكى ماجىلىستىڭ ءساتتى اشىلعاندىعىن قۇتتىقتاپ، ۇلى وتانىمىزدىڭ گۇلدەنىپ كوركەيۋىن تىلەپ، جۇڭحۋا ۇلتتاردىنڭ كوركەم بولاشاعىن تىلگە تيەك ەتتى.


    پارتيانىڭ 18-قۇرىلتايىنان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتى ۇلتتار قىزمەتىنە وسكەلەڭ ءمان بەرىپ، از ۇلتتار مەن ۇلتتىق رايونداردىڭ دامۋىنا باسا نازار اۋداردى. باس شۋجي شي جينپيڭ ۇلتتىق رايونداردا كوپ رەت تەكسەرۋ زەرتتەۋدە بولىپ، از ۇلت بۇقاراسىنىڭ حال جاعدايىن ۇعىسىپ، ۇلتتار قىزمەتى جايلى جالپى بەتتىك ورنالاستىرۋ جاسادى. پارتيا ورتالىق كوميتەتىنىڭ بەرىك باسشىلىعىندا، ۇلتتىق رايوندار ورايدى مىقتى ۇستاپ، رەفورمانى تەرەڭدەتىپ، جاڭالىق جاراتۋدى جەبەپ، سايىسقا توتەپ بەرىپ، رەفورما مەن دامۋدا تىڭ قادام تاستاپ، قوماقتى تابىستارعا قول جەتكىزدى.

 


    حالىق سارايىنىڭ قوناق كۇتۋ زالىندا شام شىراقتار كوزدىڭ جاۋىن الىپ، شاتتىق كۇلكىسى كەرنەپ، مەرەكە مەرەيىنە شومدى. ساعات 19 دان 45 مينۋت وتكەندە، كوڭىلدى مۋزيكا ۇنىمەن، شي جينپيڭ قاتارلى پارتيا مەن ۇكىمەت باسشىلارى مايدانعا كىردى. تۇتاس زالدى دۋ قول شاپالاق ءۇنى كەرنەدى. شي جينپيڭ قاتارلى باسشىلار ۇلتتىق كىيىم كىيگەن از ۇلت ۋاكىل-مۇشەلەرىمەن ىقلاستى قول الىسىپ، امانداستى. شي جينپيڭنىڭ جانىنان ورىن العان لاسا قالاسى چىڭ گۋان رايونى ناجين اۋىلى تاما قىستاعىنىڭ پارتيا ياچەيكا شۋجيى، حالىق قۇرىلتاي ۋاكىلى لوساڭ جوگا تەبىرەنە «باس شۋجي سالەمەتسىزبە» دەپ امان سالەم جاسادى. شي جينپيڭ ودان جەرلىك حالىقتىڭ ءوندىرىس تۇرمىس احۋالىن سۇرادى. لو ساڭ جوگا باس شۋجيعا بىلاي دەدى: تاما قىستاعى بۇرىن اتى ايگىلى كەدەي قىستاق ەدى. قازىر اقىسىز وقۋ، قىستاقتا دوحترعا كورىنۋ، قارتتارعا قارايلاسۋ جاعىندا شارت جاعدايى تولىسىپ، تۇرعىن ءۇي جاعىندا قالاداعىلارمەن پارىقتالمايتىن بولدى. قىستاقتاعىلاردىڭ قوي ۇستىنە بوز تورعاي جۇمىرتقالاعان تاماشا داۋىرگە العىسى مول.شي جينپيڭ مۇنى ەستىپ ايىرىقشا قۋاندى ءارى اۋىلداستارعا سالەم ايتىپ، جۇرتشىلىقتىڭ كۇندەرىنىڭ باياشات ءوتۋىن تىلەدى. مەملەكەتتىك حالىق قۇرىلتاي ۋاكىلى، شينجياڭ ۇيعۇر اۆتونوميالى رايونى شەريا اۋدانى شەريا اۋىلى باش ۇجىما قىستاعىنىڭ پارتيا ياشەيكا شۋجيى، قىستاق كوميتەتىنىڭ مەڭگەرۋشىسى ءمامات يبراھيم. ءماماتيمين باس شۋجيعا جەرلىكتىڭ شارۋاشىلىق دامۋى، حالىق تۇرمىسىنىڭ جاقسارۋى، ەكولوگيالىق ورتانى قورعاۋ، ۇلتتار ىنتىماعىن كۇشەيتۋ جاعىنداعى احۋالدارىن تانىستردى. شي جينپيڭ: ۇلتتار ىنتىماعى قىزمەتىن شىنايى جاقسى ىستەپ، كوپشىلىكتى ىنتىماقتاستىرىپ، دوڭگەلەك داۋلەتتى قوعامعا ءبىر نيەت ءبىر تىلەكتە ۇمتىلۋدى دارىپتەدى.


    لي كچياڭ، جاڭ دىجياڭ، يۇي جىڭشىڭ، ليۋ يۇنشان، ۋاڭ چيشان، جاڭ گاۋلي قاتارلى باسشىلار از ۇلت ۋاكىل-مۇشەلەرىمەن ىقلاستى اڭگىمەلەسىپ، كوپشىلىكتى پارتيا مەن مەملەكەتتىڭ وزەكتى قىزمەتىن توڭرەكتەي وتىرىپ، ءوز مىندەتتەرىن ادال اتقارىپ، قىمباتتى ۇسىنىس پىكىرلەردى قويىپ، رەفورماعا، دامۋعا، حالىق تۇرمىسىنا پايدالى ناقتىلى ىستەردى ىستەپ، ءار ۇلت حالقىن ىنتىماقتاستىرىپ، جۇڭحۋا ۇلتتارىنىڭ ۇلى كوركەيۋى سىندى جۇڭگو ارمانىن جۇزەگە اسىرۋ جولىندا تىنباي كۇرەس جۇرگىزۋگە شابىتتاندىردى.


    شاي قوناعاسىن مەملەكەتتىك حالىق قۇرىلتايى تۇراقتى كوميتەتى باستىعىنىڭ ورىنباسارى شياڭبا پيڭسو باسقاردى. ج ك پ ورتالىق كوميتەتى ساياسي بيۋروسىنىڭ مۇشەسى، ورتالىق بىرلىكساپ ءبولىمىنىڭ باستىعى سۇن چۇنلان سوزگە شىعىپ، بىلاي دەپ اتاپ كورسەتتى: پارتيا ورتالىق كوميتەتى ۇلتتار قىزمەتىنە وسكەلەڭ ءمان بەرىپ، ۇلتتىق رايونداردى دامىتۋ جونىندە ءبىر قىدىرۋ شەشىم ورنالاستىرۋلار جاسادى. بۇل شارالار حالىق جۇرەگىنەن ورىن الىپ، جەرلىكتە تىياناقتانىپ، تامىر تارتتى. ءبىز شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە تىعىز توپتاسىپ، ۇلتتار ماسەلەسىن شەشۋدىڭ جۇڭگوشا ەرەكشەلىككە يە تۋرا جولىندا تاباندى بولىپ، ۇلتتىق وڭىرلەردىڭ اۆتونوميا تۇزىمىندە تاباندى بولىپ جانە ونى كەمەلدەندىرىپ، ۇلتتار ىنتىماعى مەن مەملەكەتتىڭ تۇتاستىعىن قورعاۋدى ءار ۇلت حالقىنىڭ ەڭ جوعارى مۇددەسى رەتىندە قاراپ، شەكارانى گۇلدەندىرىپ حالىقتى اۋقاتتاندىرۋ، كەدەيلىكتەن قۇتىلدىرۋدا قامال الۋ ارەكەتىن بار كۇشپەن اتقارىپ، ۇلتتاردىڭ بارىس كەلىسىن، اۋىس كۇيىسىن، توعىسۋىن جەبەپ، جۇڭحۋا ۇلتتارىنىڭ تاعدىرلاس ورتاق تۇلعاسىن ورتاق جاراتۋىمىز قاجەت. ءار ۇلت حالقى انار جەمىسى سىندى تىعىز بىرلەسىپ، جۇڭحۋا ۇلتتارىنىڭ ۇلى شاڭىراعىندا ىنتىماقتاسا كۇرەس جاساپ، ورتاق گۇلدەنىپ كوركەيۋگە كۇش سالۋ ءتىيىس.


    قوناعاسىدا ونەرپازدار تاماشا كونسەرت ءنومىرلەرىن قويدى. «پارتيا ىلەسىپ، دوڭگەلەك داۋلەتتى قوعامعا ۇمتىلايىق»، «تاۋ ءانىن پارتياعا ارنايمىن»، «اتا مەكەن»، «گۇل جانە ءوسپىرىم»، «ءبىزدىڭ شينجياڭ جاقسى جەر»، «جۇڭحۋا انا» سىياقتى اسقاق اندەر اۋەلەدى. «مول ءونىم»، «ءبىر بەلدەۋ ءبىر جول حيكاياسى» سىياقتى بيلەر جۇرت كوڭىلىنەن شىقتى. ات باس قوبىزبەن ورىندالعان «تۇلپار» كۇيى سىياقتى اسەم اۋەندەر شارىقتادى. كونسەرت ۇلتتىق ونەردىڭ ەرەكشە تارتىمدىلىعىن ايگىلەپ، ءار ۇلت ۇلاندارىنىڭ جۇڭگو ارمانىنا دەگەن اسقاق سەنىمى مەن يراداسىن بەينەلەدى.


    شاي قوناعاسىنا ج ك پ ورتالىق كوميتەتى ساياسي بيۋروسىنىڭ مۇشەلەرى، ورتالىق شۋجيچۋدىڭ شۋجيلارى، مەملەكەتتىك حالىق قۇرىلتايى تۇراقتى كوميتەتىنىڭ ءبىر ءبولىم باسشىلارى، مەملەكەت ىستەر جورالارى، مەملەكەتتىك ساياسي كەڭەستىڭ ءبىر ءبولىم باسشىلارى، ورتالىق اسكەري ىستەر كوميتەتىنىڭ مۇشەلەرى، مەملەكەتتىك ەكى ماجىلىسكە قاتىناسقان 5 اۆتونوميالى رايوننىڭ وزگە دە ۋاكىل، مۇشەلەرى، ءار قايسى ولكە، رايون، قالالاردىڭ نەگىزگى جاۋاپتىلارى، شياڭگاڭ، اۋمىن ەرەكشە اكىمشىلىك رايوندارىنىڭ، تايۋان ۋاكىلدەر ۇيىرمەسىنىڭ جاۋاپتىلارى، قاتىستى جاقتاردىڭ جاۋاپتىلارىنان 1100 ادام قاتىناستى.


اۋدارعان: شالقار قازەز ۇلى