شەتەلدەگى مامان ـ وقىمىستىلار ا ق ش ـ تىڭ تايۋانعا قارۋ ـ جاراق ساتۋ قاتەلىگى جونىندە سىن ايتتى
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2019-07-11 10:20:00

 

    شينحۋا اگەنتتىگىنىڭ حابارى: ا ق ش مەملەكەتتىك كەڭەسىنىڭ جۋىردا تايۋانعا جالپى قۇنى 2 ميلليارد 220 ميلليون ا ق ش دوللارىندىق قارۋ- جاراق ساتۋدى بەكىتۋى، حالىقارالىق قوعامنىڭ نازارىن ايرىقشا اۋداردى . كەيبىر ەلدەردىڭ مامان-وقىمىستىلارى بىلاي دەدى: ا ق ش جۇڭگونىڭ ىشكى ىسىنە دورەكىلىكپەن كيلىگىپ، ٴبىر جۇڭگو پرينسيپىنە اۋىر قايشىلىق جاسادى . تايۋانعا قارۋ-جاراق ساتۋدان پايدالانىپ جۇڭگونى شاۋجايلاۋدىڭ سوڭى جەڭىلىسپەن تىنادى.


    رەسەي جوعارى دارەجەلى ەكونوميكا ينستيتۋتىنىڭ حالىقارالىق ساياسي، ەكونوميكا مامانى ۆاسيلي كاشين بىلاي دەدى: تاياۋ جىلداردان بەرى ا ق ش جۇڭگو ۇكىمەتىنىڭ نارازىلىعىن ەلەپ-ەسكەرمەي، تايۋانعا قارۋ-جاراق ساتۋدا ايتىلمىس «قالىپقا ٴتۇسۋ » دەگەندى جۇزەگە اسىرۋعا ۇرىندى. ا ق ش - تىڭ تايۋانعا قاراتقان اسكەري ساۋداسى وڭىرلىك ورنىقتىلىقتى اۋىر دارەجەدە بۇلدىرەدى.


    برازيليانىڭ جۇڭگو ماسەلەسىن زەرتتەۋ ورتالىعىنىڭ مەڭگەرۋشىسى روني لينس مىنانى اتاپ كورسەتتى: ا ق ش-تىڭ تايۋانعا قارۋ-جاراق ساتۋى جۇڭگونىڭ ىشكى ىسىنە دورەكىلىكپەن كيلىگۋ ارەكەتى، ا ق ش-تىڭ كوپ رەت تۇراقتاندىرعان ٴبىر جۇڭگو پرينسيپىنە، حالىقارالىق زاڭ مەن حالىقارالىق قاتىناستىڭ نەگىزگى ولشەمىنە اۋىر قايشىلىق جاساعاندىق . تايۋان جۇڭگو تەرريتورياسىنىڭ بولىنبەس ٴبىر بولەگى ەكەندىگى جۇرتقا ايان . ەگەر ا ق ش تايۋان ماسەلەسى جونىندە ٴجونسىز ارەكەتكە بارسا، ەڭ سوڭىندا تۇبەگەيلى جەڭىلىسكە ۇشىرايدى.


    جاپونيا فۋجيڭ اۋداندىق ۋنيۆەرسيتەتىنىڭ قۇرمەتتى پروفەسسورى ليڭ شيڭگۋاڭ بىلاي دەدى: ا ق ش مەملەكەتتىك كەڭەسىنىڭ تايۋانعا قارۋ – جاراق ساتۋدى بەكىتۋى ا ق ش ۇكىمەتىنىڭ جۇڭگو ۇكىمەتىنە جاساعان تاعى ٴبىر رەتكى اۋىر ارانداتۋشىلىعى. ا ق ش ۇكىمەتىنىڭ بۇل ارەكەتى جۇڭگو مەن ا ق ش قاتىناسىنا توتەنشە ٴتيىمسىز ىقپال جاسايدى، جۇڭگو دا، دۇنيە جۇزىندەگى بەيبىتشىلىكتى سۇيەتىن جۇرتشىلىق تا وسى جونىندە باتىل ٴۇن قاتىپ، نارازىلىق بىلدىرۋلەرى كەرەك.

اۋدارعان: بالاپان ٴارىپجان ۇلى